Toro moruudomollodopure tovi a'mwo pwol mino kuudo nubweyowo'ji wonyo uuvollunonekono. Su toro so'ji toollu Gooti tool aiyo yiunokuudo mujomwekovlaiyo'moneyokwe tov nuuwiyo'mwojonekono. Toro kuvi kuruv a'mwo pwol mino kuuguudo sugudo tovi kuudo muubweyo'ji toolno'gwowi Gooti toolluro kirumwallo tov nomaronekono.
Hibruu 10:39 - Gooti Toolluro Yogalokwono39 A'mwo buulo uugunyumopiyopudo su tooro kaiyako i'nopiyodupudorogano. Nevu a'mwo su toorobusuko nyomjumovla'mwala'jo. Toro kunol kuruv nevu Gooti toolluno to'no kuudo uubweyokwenogano. Aki kuudo uubweyodowado su tovi'aro nevu ma'no ma'nodo tovuro kirumwallo tovida'ai birolo'nugolokwodowadonogano. အခန်းကိုကြည့်ပါ။ |
Hibruu 10:39
28 ပူးပေါင်းရင်းမြစ်များ
Toro wonomarowo'ji kuullo ma'no ma'nodo su tool kuullo ma'no ma'nodo 7-pela pworogai'aro toorai mokaulawonekono. 7-pela kuullo su tooravuro kirovanyuvanyu pasudo tov sumdomguda'ai kuullo ma'no ma'nodo toolluro tovi uuwolo'mdupudorogano. Toro toorai me'no mokaulawo'ji yiuwi'nokai kuullo ma'no ma'nodo su tooro a'mwo su toollu kuulomwalmwalpinorogano. Toro te sumdomgu a'mwo su tekwo kuullo ma'no ma'no pwolnodo toolluro mollugolamo'mduke tovida'ai kaiya'no amwallajukekono. Toro kuvi kuruv lukomgu yiuwi'nokai kuullo ma'no ma'nodo su tooro me'no aulomwalpi toga'no'gwowi kaiya'nodo sumdomguda'ai tovi nuuwolowonokwono. Yowo'ji kaiya'no bwotonyo wimo'nugovla'mwalonekono.” Jisasol toro kuudokaikono.
Nuu a'mwo abolo su tobuurogai mwalodumdo toga gumoro yovo anyabodo tovuro jurogudo tokwe po'dogalo mollovi'mwojomwalodumdogano. Toro mollovi'mwojomwalodore toga a'mwo abolo su tobuuravuro puru'monodo kuruv moro ato tovida'ai mimagwo'nodupudogano. Toro kuvi kuruv Gooti tookujuro yogalo tovi suuwiyo kuvinono imwojo'moneyokwe a'mwo yiuno pwolnodo toolno sumagwo'nokaikono. A'mwo su toollu kaiyako mollounapiyo'moneyokwekono.
Toro kuvi kuruv kuuguudo me'no sokwollosumo su ton kevu aro tonyuno kuudo uubwepureyokweyo'mokwono. Oo nebalo'mdeyo. Jisasol Gooti toolluro amonekwopiyaboka Krais tool kwoldeyo. Aki toro tool Gooti toolluro Kwolaiyoldeyo. Su toro toolluno kevu kuudo kuubwepi tov gamoro yovo tovi'aro aiyo yiunokuudo mujomwekovlaiyo'moneyokwe tov nomapinogaikikono.
Nuvu nebal'no kuunodo aro ikudumo'mokwono. A'mwo pwol moro yogalo tovi wuu'nowo'ji mi amonuwopiyaboka toolluno kuudo kuubweyo'ji su tool aiyo yiunokuudo mujomwekovla'mwalonekono. A'mwo kuudo me'no kuubwengiko su tool kooti yogalo tovida'ai jul'nyogalo tov mamaronekono. Toro kwol kuruv bolnodo tovi me'no wuugollu'mo'mdowo aiyo yiunokuudo mujomwekovlaiyo'moneyokwe tovi anakuuto tomuuno'gwowi me'no kuulai'mo'mdowodekono.
Aki Nyunumiyago toolluro ilaiyo winodowodo tov aro tovinokwono. Yiuwi'nokai a'mwo abolo pwolno puru'monodo ton gamoro Kwolaiyo toonyu nuwonopi kuudo anubwepi tov aiyo yiunokuudo mujomwekovlaiyo'moneyokwe tov nomapinogano. Aki toro tonyu aiyowo'mo toga nuvu aiyo aiko te nomoduka'monyugono.” Kuudokaikono.
A'mwo pworo kuunano yogalo su toro tokwe nyoukuu'naikudupiyokwe tovino kevu wako neya dou'nogaulo. Neya duu'nyulo. Aguto toolluro aikomgu bwono iruko su tollugwo yasuwa'no mabai'mowonokwono. Toro kuvi kuruv sumdomgu a'mwo abolo bwotonyago ton Gooti toollu kisuvolo bwotonyo wipinorogano. Toro wiyodopure toga kirovanyuvanyu kuumwiyo pwol kuu'maiyo toru'no nobiyalo'nonekono. Puga Gooti tool kirovanyuvanyu kuumwiyo su toollu kaiyako yiunokuudo mollounapiyonekono.
Toro kuvi kuruv a'mwo abolo pun nuugwiyo bwotonyago ki'nomallo'moneyokwe winodupudo su tono'gwowi ma'no ma'nodo tovi bi'nodupudogano. Bwotonyago tonyuno ki'nomallo'mo winodupudo su ton kuudo maiyogano. Aki toro winodupudo tovino tov wuulo tovibusuko pwaropi kuulojuulo'na'dupudogano. Su toro tomgu'aro a'mwo abolo kaiyako i'nodupudo su tonyu Gooti tool lukomgu yiunokuudo nomollounapiyonogano.
Neya duu'nyulo. Nevu nebaikuuguudo tovino kuudo me'no youroma'dowado punol muu'nyubusuko yowa'ji ma'no ma'no kuuno amjeroungovlawa'ji tov nemoro ma'no ma'nodo su tovi modukwopiyo'moneyokwe Jisasolluro yiuno puga'nodo togasuro me'no kwiroudapinoka su tovi buulo uugunyumopiyanonogano. Toro kuuguunyumopiya'ji tov nevu ma'no ma'nodo tovi modukwopiyo'moneyokwe Gooti toollu aki aiko te wiroudapiyo'mo puruv nonagutonogano.
Gooti toollu kuudo uubweyo'moneyokwe pasudo tovino neya duu'nyulo. Gooti toollu kuudo uubweyodowado tov kavlo aro tovallunokwono. Gooti toolluro subuu'yamju sogwollo kinodowado tonyuno kuudo yau'dowadonogano. Oo kuvinono nyumo'nupinodeyo. Aki kavlo puruv Gooti toolluro noonyumwonyu nonekullabwono tonyu mwonodowado kuvi kuruv aro kuudo yau'dowadonogano. Oo kuvinono, nomaranonoldeyo. Su toro kuudo yau'dowado tovi guureji to'no gudupola'dowadonogano.
Toro to'busuko kubalno kevu Krais toollu kuudo uubweyodupudo tovino tov Gooti tool gamoro jurogudo tokwe kemi pi'mwono yellukuromollekumwalodowodekono. Toro yellukuromollekumwalowo'ji lukomgu kevu gavuge ilaiyo mujomwekovla'mwalpino'moneyokwe ma'no ma'nodo tovuro jurogudo tovida'ai yiunokuudo nobomollurolovekumokalokwonekono. Gooti tool kemi yiuno'no bomollurolovekumokalokwono su tov aiyowo'mo toga yiuwi'nokai a'mwo abolo tonyuro sumdo tovi kuu'maiyo toru'no nobomollolupto'nosonokwono.
Aki lukomgu Gooti toolluro yogalo avalo su tovi'aro sulugumdo tokwe kwako tokwe toval duko tovi noso'moneyokwe sogwollo to'no kinodubulovakono. Gooti tool gami kisuvolo wiyodupudo tonyu mollounapiyo'moneyokwe aiyowo'mo toga kooti yogalo duuwiyonekono. Iruko su tollugwo yere mabai'mo'mdowo'jure toga Gooti tool sulugumdo tokwe kwako tokwe tovallu kuuno mollomwalmwalonekono.
Jisasolluro a'mwo pwekwo ma'no ma'no pasudo puruv yodowo'jure toollu gami avalo Jisasolluro a'mwo gabovo pwol kwono'ji tov subusu'nyogalo neya wuudoganonekono. Su toro kuudogano'ji tovi'aro a'mwo su tekwo aiyo mujomwekovlaiyo'moneyokwe tov Gooti tool nokwo wiyonekono. Aki a'mwo su toolluro ma'no ma'no pasudo tov yiunokuudo mabollo'mo'mno'juki Gooti tool aiyo mujomwekovlaiyo'moneyokwe tov kuvinono nuubweyonekono. Toro kuvi kuruv ma'no ma'no pasudo pworono'gwowi yiunokuudo nobollo'moneyokweyorogano. Toro te kevu a'mwo yiunokuudo bollo'moneyokwe ma'no ma'no pasudo yodowo'jure su toollu wiyo'mwojo'mo Gooti toollu subusu'nyogalo nuudumwalpiyo.
Aki Ibesa'aiyo kaiya'no kuumwiyo toolluno kuudo neya jaullulo. Su tool aiyoga amwallajuko kwol kuruv aga'no'gwowi mamwallo. Ibesa'aiyo kaiya'no kuumwiyo su tool 7-pela a'mwo aguto kig sumdomguda'ai tooraida'ai bwonekono. Toro abwo'ji su tool naba 8 toolbusuko imo'nonekono. Toro tool lukomgu kaiyako i'nallo'moneyokwe tomuuno plawonekono.
Ibesa'aiyo kaiya'no kuumwiyo kwonmodo su tool aiyoga amwallajuko kwol kuruv aga'no'gwowi mamwallo. Toro kwol kuruv wobo toga kuuraibuuso puruv daneyajokwe tovida'ai nyulabiyo'mo sadopiyo. Toro sulabwo'ji su toollu Gooti tool kaiyako yiunokuudo mollounapiyo'moneyokwe du'muudo tovi noolomovodukwopiyawonekono. Toro te ibesa'aiyo kaiya'no kuumwiyo tool sulabwo'ji toga a'mwo abolo ton luko morumoukuropipinogano. A'mwo abolo su ton aiyoga kwako akav yere mimo'nyoduke togada'ai kemi yovo ton Buukiyo Aiyo Yiunokuudo Mujomwekovlaiyo'moneyokwe tovi miyokwollosungikogano. Toro tonyuro luko morumoukuropipino tov aro tovinokwono. Sumdomgu ibesa'aiyo kaiya'no kuumwiyo amwallajuko su tool aga mamwallo. Toro kwol kuruv lukomgu kuuraibuuso daneyajokwe tovida'ai aki aiko te nobillalo'nonekono. Su toro tovino luko morumoukuropipinogano.
ကြော်ငြာတွေ