Toro agubwemi toga a'mwo pwol gumi kaiyako agujo'ji toollu nuu kaiyako nyugolmekono. Toro kuvi kuruv a'mwo pwol gumi ilaiyo amagujo'ji toolluno'gwowi nuu sugudo nuubwemekono. Toro te sugudo agubwemo akav yiuwi'nokai a'mwo abolo kwako akavi gomno gomno amwakopo kunyudaiyo'mo agubwemono.” Kuudokaikono.
Galesiya 3:16 - Gooti Toolluro Yogalokwono16 Su toro to'busuko kubalno Gooti toolluro subuu'yamju Eburaiyamollu aduuwiyoka kuruv yiuno aval'nodokwono. Gooti toolluro aduuwiyoka su tov yiuno Eburaiyameke'aro gami jukweyago kwolaiyo nyumo'nono pweke'aro toorallu aduuwiyokaikono. Gooti toolluro yogalo su tov gami jukweyago kwolaiyo bwotonyago tooraino madadopiyo. Toro kuvi kuruv aro adadopiyo. “Gumi jukweyago kwolaiyo pwollu,” to'no adadopiyo. Toro te Eburaiyamolluro jukweyago kwolaiyo aboka su tool Krais tool kwekono. အခန်းကိုကြည့်ပါ။ |
Galesiya 3:16
28 ပူးပေါင်းရင်းမြစ်များ
Toro wuujuno sumaiyokwe toga Gooti Yawel Eburamollu kwa'mgu tomuuno bomodomokalokwino sumaiyokwe aro kuudokaikono. “Sulugumdo tovi iloonyopiya'bi sullugabwo tonyu doonono. Guu sullugabwo su tonyu ku'nono majagilbino to'busuko kubalno gumoro jukweyago kwoloraiyo sumo'nupi kunyu kuruv ku'nono majagilbinekugono. Gumoro jukweyago kwoloraiyo ton sullugabwo bwotonyago iloonyopiyodamdo su tonbusuko imo'nupinogano.” Kuudokaikono.
Eburaiyamol ilaiyo mibwosunoduke kuvi kuruv Gooti tool aro kuudokaikono. “Gumoro ki'nato womdokwe abolo su tokwe gumoro kwolaiyo tooke tonalluno guu kuudo kwolallo miyourukwapibinono. Toro kweku kuruv gumoro abolo Saravuro burowo'nyo yogalo agudo'ji tov kuvinono duumjunono. Moro agudumo akav aro tovinokwono. Gumoro jukweyago kwolaiyo bwotonyago tooro nyawosunbinekugono. Subuu'yamju me'no adagujo su tov gumoro kwolaiyo Aisakolluda'ai imo'nupinorogano.
Toro te kevu aiyogasuro proofet amoruujajupo su tooravuro kwoloraiyo kuunodogaikikono. Aki kemi tellukweyago toorai aiyoga Gooti tool subuu'yamju adubweyajuko tooravuro kwikweyago kuunodogaikikono. Gooti tool aiyoga Eburaiyamollu subuu'yamju aro adubweyokaikono. “Gumoro jukweyago kwolaiyo pwollu moro sugudo tov uubwemovla'mwalmonyugono. Toro uubwemovla'mdo'mure toollu'aro yiuwi'nokai a'mwo abolo kwako akavi mwalodupudo kun kuruv nomapinokwono.” Adubweyokaikono.
Aiyoga Gooti tool Eburaiyameke'aro gami jukweyago kwolaiyo sumo'nopo toorogai'aro toorai subuu'yamju puruv aro aduuwiyokaikono. “Yiuwi'nokai kwako tov kemiyo'mo nekullamokwono.” Aduuwiyokaikono. Gooti toolluro subuu'yamju aduuwiyoka su tov Eburaiyamol loowo punyu uumjunoduke toollu aduuwiyokalmaiyo. Toro kuvi kuruv Eburaiyamol yiuno Gooti toolluno kuudo uubweyoduke tovino tov Gooti toolluro sumdo tovi sugudo kwimo'nokaikono. Toro toollu subuu'yamju su tov aduuwiyokaikono.
Toro tovino tov Gooti tool gamoro subuu'yamju tovi wiyo'mo tool loowo tovi uumjunodopure tomgu'aro kwiyajukolmaiyo. Toro kuvi kuruv Gooti tool gamoro subuu'yamju tov yiuno gamino kuudo uubweyodopure toorai kwiyajukekono. Gooti toolluro subuu'yamju su tov Eburaiyamolluro kwikweyago kwolaiyo sumo'nupi toorai neya mapino'moneyokwe toro wiyokwekono. Aki nevu agasuro kunollu kuruv yasuwa'no nekullabodowodekono. Toro tovino tov yiuno loowo tovi uumjunodupudo tonyuno to'no wiyodowodolmaiyo. Toro kuvi kuruv yiuwi'nokai Eburaiyamolbusuko kuudo uubweyodopure tooraino'gwowi kworaiyo'mokwono. Toro te nevu Gooti toolluno kuudo uubweyodowado tonollu nellukweyago nekullumo'nodowodo tool Eburaiyamol kwekono.
Gooti tool nuuge avalo Isuraiyolda'ai su tonyu aro wiyodowodekono. Gamoro kwoloraiyo kuunodo wimo'nyo'moneyokwe me'no jeso'no mollumwoga yodowodogano. Toro tonyu Gooti tool gamoro bako bwotonyo tov me'no kuuduuwallokagano. Aki Gooti tool Isuraiyolda'ai a'mwo abolo togai subuu'yamju pun yajuno'mno gamoro loowo ton kwiyokaikono. Toro te Isuraiyolda'ai su ton Gooti toolluno ilomoropiyodapu gamoro subuu'yamju kwiyajuko su ton me'no ma'dupudogano.
Neya duu'nyulo. A'mwo toolluro kulako tov yiuno puru'monodokwekono. Toro kuvi kuruv kulako puru'monodo tovida'ai suvlatodeyo judo'no judo'nodo bwotonyago ton kurukweyokwono. Su toro to'busuko kubalno Krais toolluro kulako tov yiuno puru'monodo kuvi kuruv gami suvlatodeyo tonbusuko judo'no judo'nodo tono'gwowi bwotonyago kurukweyokwono.
A'mwo su tooro Hibruu a'mworodukono? Yowa'nogano. Nuu kwonyu kuruv Hibruu a'mwo pwonyugono. Aki a'mwo su tooro Isuraiyolda'aiyorodukono? Yowa'nogano. Nuu kwonyu kuruv Isuraiyolda'ai a'mwo pwonyugono. Aki a'mwo su tooro Eburaiyamolluro jukweyago kwolaiyorodukono? Yowa'nogano. Nuu kwonyu kuruv Eburaiyamolluro jukweyago kwolaiyo pwonyugono.
Toro te pugaikul aro yajunpinogaikikono. “Gooti tool gamoro loowo Moosesollu kwiyoka su tov buro'nyo kavlo tovino'mdukono?” Yajunpinogaikikono. Loowo kwiyoka su tov aro tovino'mokwono. A'mwo abolo ton kemi ma'no ma'nodo tonyuno neya yainyunpino'moneyokwe Gooti tool loowo su tov kwiyokaikono. Toro te Eburaiyamollu jukweyago kwolaiyo subuu'yamju kwiyoka su tool yere maboduke toga loowo su tov womdo kuuno sajukokwono. Loowo su tov Gooti tool ensel pworai kwiyokakwono. Toro wino sumaiyokwe ensel su tooro loowo su tov malluno sumaveyokwe Moosesollu kwiyoporogano. Moosesol Gooti tooke'aro a'mwo abolo togai'aro tonyu akuuto toru momuugurowosokwe sumo'nokaikono. Toro te a'mwo momuugurowosokwe su tool loowo tovi malluno sumaiyokwe Juu a'mwo abolo tonyu kwiyokaikono.
Aki Gooti tool aiyoga aro me'no ajesokaikono. A'mwo abolo Juu tooravuro miyawosunodupudo ton kuudo kuubwepi tovi'aro to'no gamoro sumdo tovi sugudo wimo'nupinogano. Toro kuudo kuubwepi tovino kuuguudo sugudo su tov Gooti tool aiyoga Eburaiyamollu me'no amoruudokaikono. Toro amoruudoka su tov aro sakwollungikokwono. “Moro sugudo agubwemo akav yiuwi'nokai a'mwo abolo kwako akavi gomno gomno amwakopo kunyudaiyo'mo agubwemono.” Gooti toolluro yogalo tovi toro sakwollungikokwono.
Kwolabolo yoma'nyo'moneyokwe su tovino kavlo tov yiulo apuu'nallajukokwono. Toro kuvi kuruv kavlo bwotonyokweyokwono. Kwolabolo yoma'nyo'moneyokwe su tovino kavlo tov aro tovino yovekurajo'mokwono. Nevu Krais toolluro mollu'bwoto tonol kweke guro'mwonyodowa kulako yiuno puru'mono imo'nodowadonogano. Su toro tovino yovekurajo'mokwono.
Aki a'mwo su tooro nemi mido Krais toollu magudupola'dupudorogano. Krais su tool nevu gamoro kulako to'busuko imo'nodowado tonollu guureji me'no momunyutovonekubweyodowodekono. Kulako tovuro suvlo aru'wago togai'aro wilo togai'aro guureji munyuto'na'dupudo to'busuko kubalno Krais tool gamoro a'mwo abolo tonollu jurogudo danekullumwojodowodekono. Toro te gamoro kulako to'busuko me'no imo'nodowado tonol Gooti toolluro jurogudo danekullumwojodowo'jure tokwe aguto nokwo yogullumovla'mwalanonogano.
Toro tovino tov nemida'ai pwol Grikoldeyo oo Juuwoldeyo oo Juu tooravuro miyawosunodupudoldeyo oo lakulkulako do'nodowodoldeyo oo lakulkulako mado'nodowodoldeyo oo gabovo yogaljo dodowodoldeyo oo pumuuda'aiyoldeyo oo ki'nato womdo yodowodoldeyo oo ki'nato tovida'ai me'no birolo'nugolokwodowodoldeyo yiuwi'nokai go'no go'nodo su ton aguto'maiyo. Toro kuvi kuruv aguto to'gwowi yiuno Krais tookono. Krais su tool gamoro yiuwi'nokai a'mwo abolo tonollu me'no kuulonekumwalodowodekono.
ကြော်ငြာတွေ