Filipai 4:19 - Gooti Toolluro Yogalokwono19 Aki mi Gooti su tool kemoro yiuwi'nokai supto supi ton nokwo ikullamwalonekono. Gooti su tool aguto kuunodo toolluno tov yiuwi'nokai noonyumwonyu ton bwotonyago kurukwekono. Toro tonyuda'ai pun marowo'ji Krais Jisasollu'aro kemi nokwo ikullamwalonekono. အခန်းကိုကြည့်ပါ။ |
Filipai 4:19
44 ပူးပေါင်းရင်းမြစ်များ
Toro wuujuno sumaiyokwe Jisasol kuudokaikono. “Guu gumi ato tokwe mi manubogai'nubiyo. Su tov aro tovinokwono. Nuu mi Nyunumiyago toollomno yere milmwola tovinokwono. Toro kuvi kuruv moro nyugwai'yagoruvobusuko nyumo'nodupudo tooraiyomno guvu plavo'bi mino aro duudono. “Nuu mi Nyunumiyago toollomno nyulamonyugono. Su tool kev kworekulluro Tellunumiyagekono. Aki nuu mi Gooti toollomno nyulamonyugono. Su tool kev kworekulluro Gooti tookono. Toro toollomno nyulamonyugono.” Duudono.” Kuudokaikono.
Toro wuujuno sumaiyokwe toga Toomasollu kuudokaikono. “Gumoro pollo tov akawai uubogai'no'bi aki moro ato tovida'ai imuulo kwosuko tovi doonono. Aki gumoro ato tov ruuguusapiyo'bi moro suumdo tovida'ai imuulo tovi doulopiyawono. Guu moro aduka'mo tovino kuudo noullo maullo miyau'binono. Toro kweku kuruv moro me'no aduka'mo su tovino kuudo neya duubweyono.” Kuudokaikono.
Nuu sumdomgu aro ikudumo'monyugono. Yiuwi'nokai kwako akavi kemino tov aro me'no bomje'nugoulodawodokwono. “Oo a'mwo abolo su ton Jisasolluno kuudo me'no uubweyodupudogano.” Kemino toro bomje'nugouloduke tovi a'mwo abolo bwotonyago ton me'no wuu'nopiyodupudokwono. Toro te nuu kemino su toro kuudo yaikuu'dumdo toonyu Jisas Kraisolluro yovo tovida'ai Gooti toollu, “Nenyoo,” subusu'nyogalo wuudodumdonyugono.
Aiyoo, Gooti toolluro ilaiyo igolmovla'mdowodo ton sugudo bwotonyoganoo. Gamoro pi'mwo kuudo togai'aro nevu gamino kuudo youroma'dowado togai'aro su ton bwotonyo kuunodogano. Aki toro tool buro'nyo buro'nyodeyo pun yo'mo kwino'ji tov kaveno yonekono. Toro toolluno nevu kwako akavida'ai tonol kuudo supto iwapiyanonogano. Aki gamoro yomjumovla'mdowodo tonyuno kavlo kuruv nevu ku'nono miyouromaranonogano.
Toro kuvi kuruv kevu neya duu'nyulo. Gooti sugudo ikubweyodowodo su tool yere nokwo amovaikugu'mwojowo'jujuko kwol kuruv kemi sogwollo to'no ikinodowodekono. Kevu kemi ma'no ma'nodo tonyuno buulo uugunyumopiyopi Gooti toollomno neya youragunyumo'nupureyokwe sogwollo to'no ikinodowodekono. Gooti tool kemi ilaiyo yaikullugolodowodo tovida'ai toro ikinodowodekono. Toro te kevu Gooti toolluro su toro ikullodowodo tovino kuudo yau'dupudorekuldukono?
Toro te nuu aro kuudo yau'dumdonyugono. Nemoro agasuro danyu'nyuwuulo ma'dowado su ton yiuno kula'nyekwojogano. Toro kuvi kuruv Gooti toolluro bako bwotonyo tovi kuulomwallo'moneyokwe nonekullabwono su to'gwowi aguto kuunodokwono. Su tov nemoro buro'nyo buro'nyo danyu'nyuwuulodeyo mujomo'melabodowado tonyu kuuwolo'mwallo.
Aki aro tovino manyunodowodonyugono. Nuu kemi aiko te bekuru'maro'mi kevuge amwalmi toga moro Gooti tool mi nobwolomonumwogapiyawo'jokwe tovino manyunodowodonyugono. Aki kevu bwotonyago pugaikul ma'no ma'no pasudo aro toorai kiroungovla'mdupudogaikikono. Kaiya'no mollugolamo'nyo'mo pasudo toorogai'aro kwonyalo pasudo toorogai'aro kevnokwenyuro kulako tovi ilaiyo igollunyo'mo pasudo toorogai'aro pasudo su toorai pugaikul kuuno kiroungovla'mdupudogaikikono. Kevu pasudo su tooraida'ai yere miyouragunyumo'nodopure togaikullu nobaikwonmiyo. Nuu kuvinono abaikwonmi to'gwowi kemino wogulo ibwosuno'mi kumdaillo to'no mujumovla'monyugono.
Nevu kwako akavi manyu toga mamwalanonogano. Aki nemoro agasuro jul'nyo baneki'mo'mdupudo su tobuuro kula'nyobuurogano. Toro kuvi kuruv jul'nyo baneki'mo'mupudo su tobuuro aro tov yovrovanekubweyodupudogano. Lukomgu nevu aiyo yiunokuudo mujomwekovlaiyo'moneyokwe tovi amara'ji toga Gooti tool noonyumwonyu sugumaluko tollovo nyoullanekubweyonekono. Aki Gooti toolluro sugumaluko youllanekubweyodowo'jure su tollovai nevu ku'nono majagilanonogano.
Aki kemino subusu'nyogalo aro tovino dodumdonyugono. Gooti tool kemoro poowokalago kuudo tonyu kudo'aiko neya ausaikubweyono. Toro kuusaikubweyodowo'jure toga kevu gamoro bako bwotonyo pwopiyodowodo tovino kuu'maiyo toru nokwo wonmwalpinogaikikono. Toro kwonpi toga kevu aro kuudo yau'mwalpinogaikikono. Oo Gooti tool su toro kavlo tovino nemi adonekumarokaldeyo. Kuudo yau'mwalpinogaikikono. Aki lukomgu kemi ilaiyo ikullumo'nono tovino sogwollo kinodupudo kuvino kuruv kuudo nyouromapinogaikikono. Aki gamoro a'mwo abolo kuunodo tonollu gavnokweyolluro bako bwotonyo tomuuda'ai yiuwi'nokai sugumaluko bwotonyago tollovo nonekullabiyo'moneyokwe dodowodo tonyuno nyouromapinogaikikono.
Gooti toolluro nemi su toro amonekumwalloka tov aro tovino wuuduuwallo'mokwono. Krais Jisasolluro nemi ilaiyo yanekullugollo'moneyokwe womdo sopiyoka su tovi'aro Gooti tool gamoro yasuwa'wino sugumaluko tollovo nonekubweyodowodekono. Su toro tollovo maluko'nyonmaiyo. Bwotonyo kuunodollovogano. Aki toro tollovo nemi yiuno ilaiyo to'no yanekullugolodupudogano. Su toro tollovaino yiuwi'nokai lukomgu kuga kuruv kuuno wuuduuwollumovlaiyo'moneyokweyogano.
Toro toollu nuu subusu'nyogalo aro tovino wuudodumdonyugono. Nellunumiyago jurogudo kuunodo su tool noonyumwonyu punyuno supto miyodowodekono. Toro kwol kuruv bwotonyago ton kurukwekono. Toro tonyuda'ai pun kemi nokwo ikubwemwalonekono. Toro aikubweyo'ji su ton gamoro Kuullo kuulekumwalodowodo toollu'aro kemoro poowokalago tonyu jurogudo nokwo daikullumwojumwalpinogano.
Nuu yiuwi'nokai Gooti toolluro a'mwo abolo tonyu kwako tomuu'aro iwapiyodumdekwonyugono. Toro kwekwonyu kuruv Gooti tool mi ilaiyo yanyugollo'moneyokwe gamoro kuuguudo sugudo tokwe a'mwo abolo Juu tooravuro miyawosunodupudo tonyu moruudomollo'moneyokwe womdo tov anyabokaikono. Toro te kevu Juu toonolluro miyaikuuwosunodowado togaikul yasuwa'wino sugumaluko su tollovo neya mapino'moneyokwe aro modekumollodumdonyugono. Kevu Krais toollu kuuguro'mwonyupi tovi'aro gamoro yasuwa'wino sugumaluko tollovo nekubweyonekono. Sugumaluko su tollovo maiyo'nopiyodupudogano.
Aki kemoro subusu'nyogalo su tovi'aro Gooti toolluro kavo wosunyo'moneyokwe tov nekullamwalonekono. Gooti toolluro kavo wosunyo'moneyokwe su tov yiuwi'nokai kwako akavida'ai kuudo youroma'dupudo tonyu uuwolo'mdowodokwono. Aki kevu Krais Jisasollu uuguro'mwonyodopure tovi'aro Gooti toolluro kavo wosunyo'moneyokwe su tov kemoro poowokalago togai'aro kuudo togai'aro tonyu pi'mwono yellukuromollekumwalmwalonokwono.
Gooti tool gami yiuwi'nokai a'mwo abolo su ton aro tovino kuudo youromapino'moneyokwe kwinyajukekono. Krais toolluro noonyumwonyu sugumaluko nonekullabwono tollovogai'aro aki Krais tooke ilomwallo'mo tokwe'aro su ton kevu a'mwo abolo Juu miyawosunodupudo kugaikul kuruv kuvinono nyulomapinogaikikono. Gooti tool gamoro a'mwo abolo togaikulluno su toro kwinyajukekono. Toro toolluro kuuguudo yiulo apuu'nallajuko tov arokwono. Krais tool gamoro a'mwo abolo togaikullu kuulekumwalonekono. Toro te aga kemi kuvinono kuulekumwalodowodo tovino tov lukomgu kevu Krais tooke gamoro bako bwotonyo pwopiyodowodo tovi anakuuto tomuu gavuge nyulomwalpinogaikikono. Su toro tovino sogwollo to'no kingovla'mdupudogaikikono.
Krais toolluno kuuguudo sugumaluko tov kemoro yiuwi'nokai anakuuto tomuu neya kuullo'movaikwopimwalonokwono. Toro togaikul Jisasolluro a'mwo abolo tobuurai Gooti toolluro pi'mwo kuudo ikullabodowo'jure togai neya yodubwasopi dodumul'mwojogaulo. Kemoro poowokalago tonyu Gooti toollu, “Nenoloo,” wuujo'moneyokwe tov neya kuulaikwo'mwalonogaikikono. Toro kuulaikwo'dowo'jure toga kevu dato puruvapuruv tomgu'aro dodomwalogaulo. Dato pun Gooti toolluro yogalokwe buukiyo tovi wo'dupudogano. Aki dato pun Gooti toollu ilomoropiyo'moneyokweyogano. Aki dato pun Gooti toolluro Kuullo tool ikubweyodowodogano. Dato su toro togai kevu neya dodomwalogaulo.
Kemi jurogudo dekumworaso'moneyokwe kuuguudo togai'aro nodaikumul'mwojo'moneyokwe kuuguudo togai'aro kemoro poowokalago tonyu jurogudo daikullumwojo'moneyokwe kuuguudo togai'aro su togai kemi yodekubwasodowa sodogullumwojekwapiyajuwonogano. Su tov kevu Gooti toolluro ilaiyo winodowo'jure tomgu'aro neya yomjomwekovla'mwalpino'moneyokwe tovinokwono. Kuudo neya jaullulo. Aguto kig Gooti tool gamoro mido mollomwalodowodo tovi kuulomwallo'moneyokwe kemi me'no dekuma'dowodekono. Aki gamoro bako bwotonyo tovi anakuuto tomuu kuulomwallo'moneyokwe kuruv me'no dekuma'dowodekono.
Yogalo akav agasuro Jisasolluro a'mwo abolo pun nuugwiyo bwotonyagokwe tonyu dumul'mwojo'mokwono. Toro te guu a'mwo abolo su tonyu guureji aro neya duudogawono. “Kevu ilomoropunyu kuudo nyau'mwalpiyo. Aki kemoro nuugwiyo su ton yere imagwo'nodupudo tonyuno tov kemi nuugwiyo su tonyuno kuudo bwotonyo nuubwemwalpiyo. Toro kuvi kuruv Gooti toolluno'gwowi kuudo neya duubweyogaulo.” Duudogawono. Gooti su tool nemi ilaiyo yanekullugollo'moneyokwe yiuwi'nokai noonyumwonyu supto yodowado ton bwotonyago youllanekubweyodowodekono.
Kevu Jisasolluro mollu'bwoto tovida'ai a'mwono moduvomwallokwe toorekullu kuuguudo pun ikudumo'monyugono. Nuu kwonyu kuruv kevu moduvomwallokwe toorekulbusuko Jisasolluro mollu'bwoto tovi moduvomwallokwenyugono. Toro toonyu nuvnokwe toonyuro sumdo tokwe Krais toolluro dado ma'duke tovi me'no kwononyugono. Krais su tool gamoro jurogudo tovuro bako bwotonyo tokwe kuu'maiyo toru bomollolupto'nosowo'ji gamoro sugumaluko ton wiyodowo'jure toga nuu kwonyu kuruv pun noma'monyugono. Toro te nuu kevu moduvomwallokwe toorekulbusuko imo'nodumdo toonyu kemi guureji aro ikudumo'monyugono.
Gooti tool yiuwi'nokai toga gamoro yasuwa'wino sugumaluko tov nekullabiyokwekono. Aki Gooti tool kevu Krais Jisasollu uuguro'mwonyodupudo su toollu'aro gamoro bako su tovi anakuuto tomuu yiunokuudo mujomwekovlaiyo'moneyokwe kemi me'no adekumarokaikono. Toro tovino tov kemoro tabunyuwuulo amo'movla'mwakopo su ton manyu toga guureji mamjo'movla'mwalpinogano. Yiuno kula'nyo toga'gwono mokavlavopi kevu sugudo imo'nupino'moneyokwe Gooti tool aki aiko te yere yekuvo'dogalmwalonekono. Toro yekuvo'dogalowo'ji kemi sobanyo mollekuda'mwalonekono. Toro mollekudavowo'ji aki jurogudo yogullumwojekwapimwalonekono. Aki kemi jurogudo nomekudapimwalonekono. Gooti tool kemi tono tono yaikullugolmwalonekono.
ကြော်ငြာတွေ