Filipai 3:18 - Gooti Toolluro Yogalokwono18 Kevu kuudo neya jaullulo. A'mwo bwotonyago tooro kevnokweravuro pasudo tovi'aro kuu'maiyo toru'no wuuduuwallunodupudorogano. A'mwo su tooro Krais toolluro i'noguropte tovi aboloka tovino kuuguudo su tovi ikomago wimo'nugovla'mdupudorogano. A'mwo su toro tooraino nuu go'no go'nodo toga me'no adekudapiyajonyugono. Toro toonyu aga kuga kuruv moro kumdaluko tov bwoloduke tokwe kemi kuuno adekudapiyadokwono. အခန်းကိုကြည့်ပါ။ |
Filipai 3:18
30 ပူးပေါင်းရင်းမြစ်များ
Nuu kevuge amwallajo toga moro poowokalago kuunodo tokwe Aguto toolluro womdo tovi kwiyajonyugono. Aki yiuwi'nokai toga nuvnokwenyu abwolomoropinyajonyugono. Aki womdo su tovida'ai jul'nyo ma'dumdo toga kumdo ajajonyugono. Toro toonyu Juu tooro kaiyako yanyugollo'mo domduukuurosodopure kuvi kuruv nuvno'gwowi womdo tovi mimwogapiyajonyugono.
A'mwo abolo pun kaiyako i'nyo'moneyokwe puuto tovi pla'mdupudogano. Toro pla'mdupudo su ton i'noguropte tovi aboloka Jisasolluno kuuguudo tovino aro dodupudogano. “Oo kuuguudo su tov junorukuudokwono.” Dodupudogano. Toro dodupudo kuvi kuruv Gooti tool nemi du'muudo tovida'ai amollurolovonekuma'mwalluko tonolno'gwowi junorukuudo manekullumo'nodowodokwono. Toro kuvi kuruv Jisasolluro i'noguropte tovi aboloka tovino kuuguudo su tov aro bomollolupto'nanekubweyodowodokwono. “Oo Gooti tool jurogudoldeyo.” Bomollolupto'nanekubweyodowodokwono.
Kevu aro kuudo me'no youroma'dupudogaikikono. A'mwo abolo ma'no ma'nodokwe ton aguto kig Gooti toolluro mido mollomwalo tovi anakuuto tomuu ku'nono maulomwalpinogano. Toro tovino tov a'mwo pworo aro nyoukuu'naikudupiyo. “Ma'no ma'no mujumovla'mdupudo ton aguto kig Gooti toolluro mido mollomwalo tovi nokwo kuulomwalpinogano.” Nyoukuu'naikudupiyo. A'mwo abolo kwonyalo yodupudodeyo oo kuunano gooti pworai ilomoropiyodapudodeyo oo abekuuko yodupudorodeyo oo a'mwo pworo a'mwo pworogai imgu amgu kwonyalo inodupudorodeyo oo
Neya duu'nyulo. A'mwo ilomodomoropunyokwe su tooro kuunano kuurotokwe imo'nodupudorogano. Su toro tooro a'mwo abolo tobuurai youkuu'nuujo'mo womdo yodupudorogano. Aki su tooro a'mwo abolo tobuuravuro sumdo tovi molloguulludapiyo'moneyokwe Krais toolluro kuurotokwe kuunodo toorobusuko wuuduuwallunodupudorogano.
Jisasolluro a'mwo pwekwojuro jurogudo tov wollainyo sumo'no'ji tov nuu a'mwo su tekwojuno kalo nyunowo'ji wiyo'mwojo'moneyokwe wollainyo pwolbusuko nuuwimo'numonyugono. Aki a'mwo pworavuro kaiya'no mollubworomokavla'mdopure tovasuda'ai Jisasolluro a'mwo pwekwo ma'no ma'no yowo'ji abwolorawo'ji tov nuu a'mwo su tooravuro pasudo tovino surodo nuunmwalmonyugono.
Neya duu'nyulo. Moro sumdomguda'ai pas sokwollekwopiyabo su tov kemi jul'nyo ikubweyo'moneyokwe sokwollekwopiyabonyumaiyo. Toro kuvi kuruv moro kemino kalo buuropino tov yiunokuudo mudo'dollanuwopiyodowodo tovino kevu kuudo neya youromapino'moneyokwe pas su tov sokwollekwopiyabonyugono. Toro toonyu pas su tovi sakwollo toga tabunyu bwotonyo tokwe'aro moro poowokalago jul'nyo tokwe'aro kumdaluko bwotonyago togai'aro ton nuwo'dopure toga pas su tov toro sokwollekwopiyabonyugono.
Toro te a'mwo abolo su tonyuro kuunano pasudo yodopure su tovi wonyuno sumoneyokwe nuu aro kuudo sauronyugono. Oo kemoro pasudo sadokwopo su tov Jisasolluno kuuguudo sugudo nebal'nodo su tovi suvlo to'busuko julomaveku'mwakovo. Su toro kuudo yau'no sumoneyokwe Jisasolluro a'mwo abolo kuunano pasudo sajupo su ton muugona'dopure toru nuu Pitallu yogalo aro amojurugolonyugono. “Guu Juu a'mwo kweku kuruv Juu miyawosunodupudo toorobusuko yomjomwekovla'mdumdekugono. Toro tovino tov a'mwo Juu miyawosunodupudo toorai Juu toorobusuko neya imo'nyo'moneyokwe guu nodumuurolo'mwalbiyo.” Toro amojurugolonyugono.
kwekuullu kuudo gabovo toorogai'aro imo'wonyo anpi tovida'ai amomo pasudo toorogai'aro lubullu doto deroungovlaiyo'mo pasudo toorogai'aro aki pasudo su toorobusuko pworogai'aro yiuwi'nokai su tooraino nevu kuudo nyau'mwakuuwono. Toro te nuu sumdomgu duudapi yogalo me'no adaikullo tovi aki aiko te aro ikudumo'monyugono. A'mwo abolo kaiya'no pasudo su toorai mujumovla'mdupudo ton aguto Kig Gooti toolluro mido mollomwalo tovi dolago tomuu ku'nono maulomwalpinogano.
Neya duu'nyulo. A'mwo pworo lakulkulako do'nyo'mo tovino guureji dumuurolo'mdupudo su tooraino nuu me'no aikudumonyugono. A'mwo su tooro Juu a'mwo abolo punyu ilaiyo igollo'moneyokwe aro dumuurolo'mdupudorogano. “Kevu a'mwo toorekul lakulkulako neya dodo'nogaulo.” Dumuurolo'mdupudorogano. A'mwo su toro dumuurolo'mdupudo tooro aro tovino luko yodupudorogano. “Oo nevu i'noguropte tovi aboloka Krais toolluno kuuguudo tokwe amoruudomolla'ji tov nemi kaiyako nyanekullugolpiyo.” Luko yodupudorogano. Toro tovino tov a'mwo su tooro kev tekwojekullu lakulkulako neya do'numwalpino'moneyokwe daikumuurolo'mdupudorogano.
Nuvnokwe toonyuno'gwowi ilomodomoropunyu miyamonyugono. Toro kwonyu kuruv yiuno nemi Aguto Jisas Kraisol i'noguropte tovi aboloka su toolluno to'no ilomodomoropiyamonyugono. Krais su toolluro i'noguropte tovi aboloka tov noonyumwonyu kwako akavida'ai pasudo tooro me'no amovoromiyoguroptowosungopo toorobusuko nonyumo'nodupudorogano. Aki nuu kwonyu kuruv i'noguropte tovi me'no amovoromiyoguroptovanubwengiko toonyubusuko kwako akavida'ai pasudo su toorai aval'no wimo'nodumdonyugono.
Nuu nemi Aguto toolluro yovo tovida'ai kemi guureji aro dodoluvaikubwemo'monyugono. Kevu a'mwo abolo kwa'mguda'ai tonbusuko nomjumovla'mwalpiyo. A'mwo abolo su ton Aguto toolluno kuudo maiyokwe imo'nugelabodupudogano. Toro tonyuro kuudo kworo kuruv yiuno noo'nookwo to'no yopiyodupudorogano. Su toro yopiyodupudo tovida'ai kevnokwe ton ku'nono mwiyo'mwoju'nupinogano.
Toro te pweku Jisasolluro a'mwo gumi jugwai'yago toolbusuko gujumo'nodowodo tekwoji kaiyako nyugolbiyokwe gamoro abolo tokwe kwonyalo mibinono. Su tov aro tovinokwono. Ma'no ma'no pasudo su tonyu Aguto tool kirumwallodowodekono. Su toro tovino kevu wako neya kuu'numwalpino'moneyokwe nevu sumdomgu duudapi yogalo me'no adaikullowonogano. Su toro adaikullowo tovi kevu kaduko neya duuwiyogaulo.
Su toro adaikullajuuwo kuvi kuruv kemida'ai a'mwo abolo pugaikulluno aro kuu'numwakuuwonogano. “Oo a'mwo abolo su tonyuro pun womdo yo'mo mwinodupu yiuno yasuwa'no worubovenodupudogano. Toro worubovenodupudo su ton a'mwo abolo punyuro yonomwalodopure tovino yiuno kuuguudo toorono luvomollodupudogano.” Kemida'ai pugaikulluno su toro me'no kuu'numwakuuwonogano.
Aki a'mwo kuunano ibwasokwe tooro kemi kulako tokwe kwonyalo yo'moneyokwe pasudo tooraino kwanyu sumdo to'no kinuwiyodupudorogano. Toro kinuwiyodupudo su tov Gooti toolluro sumdo tovi kaiyako igolamo'nodupudorogano. Aki toro tooro kemi mido mollomwalokwe toolluro yogalo tovi dolago tomuu mwallo'mo kwoda'molo to'no yodupudorogano. A'mwo su tooro kemi kirumwallo tov yere mama'dopure kuvi kuruv lukomgu Gooti tool guureji nerumwallonekono. Aki kemoro kirovanyuvanyu pasudo kiroungovla'mdupudo tovino luko miyodupudorogano. Aki kevnokwe tooravuro kuudo tovino to'no uumjunodupudorogano. Toro tooro Gooti toolluro bako bwotonyo pwopiyodowodo tomuuda'ai ensel tooraino burolyogalo bwolomorumwogapiyodapudorogano. Toro abwolomorumwogapiyapi kuga kuruv luko bu'buto miyodupudorogano.
Aki soolwara tov luwagu luwaguto guureji yodowodo to'busuko imo'nodupudorogano. Kemoro wogulo'mo pasudo tov soolwara luwagu luwaguto su tovuro ibu'muudo to'busuko imo'nodowodorogano. Aki a'mwo su tooro sullugabwo pworobusukorogano. Sullugabwo su tooro sulugumdo tovida'ai kemi puuto tovi mainamjodupu gomuuno gomuuno yasuwa'no yomollodupudorogano. Su toro to'busuko kubalno a'mwo Gooti toolluno kuudo maiyokwe su tooro dugumwuulo kuunodo tomuuno yiunokuudo plapino'moneyokwe Gooti tool me'no sokwollovi'mwojubweyokaikono.
ကြော်ငြာတွေ