Filipai 1:6 - Gooti Toolluro Yogalokwono6 Aki aro kuudo tovi gudupola'dumdonyugono. Gooti tool kemi poowokalago tonyu anakuuto tomuu womdo sugudo muudu'no me'no aullokaikono. Toro tool kemi poowokalago tonyu akuuto tomuu womdo kuuno mujumovla'mwalonekono. Toro mujumovlavowo'ji iruko pullugwoji Jisas Kraisol aikomgu noolabwonekono. Toro kwolabwo'ji toga'no womdo mujumelabodowodo su tovi yiuno'no nyopiyonekono. Kuudo su toro tovino kuuno gudupola'dumdonyugono. အခန်းကိုကြည့်ပါ။ |
Filipai 1:6
33 ပူးပေါင်းရင်းမြစ်များ
Toro sodubwasoka tovi wagwolago Jeruusalemda'ai Jisasolluro a'mwo abolo ton wuu'no'mno sumdomgu Pitallu yogalo amojurugollajupo kun kuruv su toro toga'no'gwowi kemoro sumwoluko tov noullo kwosunopogano. Toro wosunyuno sumaveyokwe Gooti toolluno ilomoropiyo'moneyokwe aro adopogano. “Oo a'mwo abolo Juu miyawosunodupudo kubuuro kuruv Gooti toollomno kuudo souragunyumo'nupi tonyu Gooti tool ilaiyo to'no mollomarowo'ji aiyo yiunokuudo mujomwekovlaiyo'moneyokwe tov nokwo wiyonoldeyo.” Adopogano.
Kuuguudo toro domwalodowore toga abolo puruv Gooti toolluno sulomoropiyajukokwono. Toro kuvi kuruv Jisasolluno kuuguudo tovi muu'nyajukokwono. Abolo su tov nemoro kuuguudo tovi kuu'nokakwono. Toro tovino yovo tov Lidiyavokwono. Toro tov wagwolago Taitairoda'aiyokwono. Aki abolo su tov gami mubiyago tovi youro kwallujo sugumaluko touso wosodowo'jure tovi mubiyoma'dupudokwono. Toro te abolo su tov Poololluro kuuguudo yodubwasoduke toga Aguto tool abolo su tovuro kuudo tovi ausubweyokaikono. Toro kuusubweyoduke tovida'ai kuudo saurokakwono. Oo nebalo'mdeyo.
Toro te nuvu aro kuudo saullajonyugono. Oo moro kuudo togai'aro yogalo togai'aro tonyuno kevu ilaiyo me'no youronuma'dupudogaikikono. Kuudo saullajonyugono. Toro tovino tov sumdomgu nuvu kemi iru'mato'mo anyunyajukonyugono. Su tov aro tovinokwono. Moro iru'mato aikullumi su tovi'aro Gooti tool gamoro yasuwa'wino sugumaluko tov kemi aki aiko te nokwo ikubweyonekono. Toro ikubweyodowo'jure toga kevu yasuwa'wino sugumaluko su tovi pugasal nokwo mapinogaikikono. Su toro aikullumo'noneyokwe nuu kemi iru'mato'mo anyunyajukonyugono.
Su toro tovino tov nuu pas sumdomguda'ai tov me'no sokwollekwopiyabonyugono. Pas sumdomguda'ai su tovi yakwollono aro kuudo sauronyugono. Kevu kalo subwosunopujuko'mno'juki nuu abekuru'ma'mi toga kemino ilaiyo mibwosuno'mujukonyugono. Su toro tov nyumo'no'jokwe nuu yere mabekuru'marono toga sumdomguda'ai pas tov me'no sokwollekwopiyabonyugono. Aki nuu kemino aro kuudo me'no yaikuu'dumdonyugono. Oo numoro ilaiyo yodumdo tovino a'mwo abolo su to kun kuruv avalo tovino ilaiyo nyupinodeyo. Kuudo yaikuu'dumdonyugono.
Toro kuvi kuruv kevu miyovraimwonyupi to'gwowi nuuge'aro a'mwo Masedooniyada'ai toorogai'aro toonol kemi nobekuru'maranonogano. Su toro abekuru'mara'ji toga kevu nuugwiyo i'bworoso'mo miyovraimwonyodopure togaikullu aikwona'ji tov wogulo ibwosunanonogano. Aki wogulo su tov yiuno nevnokwe toonolno mibwosunanokwono. Neya duu'nyulo. Kev kugaikul kuruv wogulo bwotonyo nyubwosunpinogaikikono.
Nuu kemino aro kuudo yaikuu'dumdonyugono. Kevu Aguto toollu me'no uuguro'mwonyodupudo togaikul kuudo judo pumgu'aro su toorai ku'nono muumjunpinodeyo. Kemino su toro kuudo yaikuu'dumdo kuvi kuruv a'mwo pwolno'gwowi kemi molloguurekudapiyo'moneyokwe kuuguudo judo pumgu'aro su toorogai me'no sodekubwasadopikekono. A'mwo sodekubwasadopiko tool ala'mwoldukoneyokwe tovino kuudo miyau'mwakono. Toro kuvi kuruv a'mwo su tool gami kirumwallo'moneyokwe tov noma'mwalonekono.
Womdo judo'no judo'no yodupudo su tonyuno kavlo tov arokwono. Yiuwi'nokai Gooti toolluro a'mwo abolo ton gamoro womdo tovi imwalpino'moneyokwe mollovrowoso'mokwono. Toro mollovrowosodowodo su ton Gooti toolluro womdo tovi supi toga Krais toolluro kulako to'busuko imo'nodowado tonol guureji yogullumwojonekwapiyodopure tovida'ai jurogudo imo'numwalanonogano. Womdo judo'no judo'no tonyuno kavlo tov torokwono.
Aki kevu pasudo sugudo tollovaino yenyubworomaropi pi'mwono neya domolludo'movlavogaulo. Toro togaikullu Krais tool kooti yogalo duuwiyo'moneyokwe kwolabwo'ji toga kevu kaiya'no nonagutokwe to'no imo'nupinogaikikono. Kevu su toro sumo'nupi togaikulluno a'mwo pwolnodo kwol kuruv ku'nono mabwolomekumwogapiyawonekono.
Neya duu'nyulo. Gooti tool yasuwa'wino to'busuko aro tov ikubweyodowodekono. Kevu Krais toollu kuudo uubweyo'moneyokwe tovino to'no ajaikubweyokalmaiyo. Toro kuvi kuruv kevu gamino kuudo uubweyopi aki tagunyo ton noma'mwalpino'moneyokwe ajaikubweyokaikono. Tagunyo amo'movlapi su tovi'aro Krais tool yovo aguto noma'mwalonekono.
Toro tovino tov miyobuuravoo, kevu Gooti toolluro yogalo tovi yiuwi'nokai toga uumjunodupudogaikikono. Nuu kevuge mwalodore toga kevu pi'mwono kuumjunyajupo to'busuko kubalno aga nuu kevuge mamwalodo'mure kuruv pi'mwono neya duumjunogaulo. Aki kevu kaveno to'no nuumjunpiyo. Toro kugaikul kuruv muunyu toru'aro guureji neya duumjunogaulo. Gooti tool kemi ma'no ma'nodo tovuro kirumwallo tovida'ai me'no abomollurolovekumokalokwokaikono. Su toro tovino kevu a'mwo abolo tonyu kuu'maiyo toru wuuduuwallo'moneyokwe womdo guureji neya jogaulo. Womdo guureji supi toga kevu Gooti toollu kwako tomuu'aro kuunodo wiyo'moneyokwe luko yo'mo togai'aro bu'buto togai'aro to'no womdo neya jogaulo.
Kuudo neya jaullulo. Gooti tool kemi poowokalago tonyu womdo kuulaikullodowodekono. Womdo kuulaikullodowodo su tovi'aro gamoro ilaiyo winodowo'jure tovi kevu nokwo uumjunmwalpinogaikikono. Aki kevu kuvinono uumjunpino'moneyokwe kuudo tokwe'aro jurogudo tokwe'aro yiuwi'nokai su toval ikubwemwalonekono.
Gooti toolluro yogalo tov aiyo yiunokuudo mujomwekovlaiyo'moneyokwe tov wiyodowodokwono. Yogalo su tovi kevu guureji neya dogudupolarogaulo. Kevu kuvinono agudopolapi tov Krais tool aikomgu kwolabwo'ji toga nuu kemino aro kuudo yau'monyugono. Oo moro dukwogulo sumo'nallajo tokwe'aro womdo bwotonyo sajo tokwe'aro su toval yasuwa'no mavlaiyajulovaldeyo. Kuudo yau'monyugono. Toro kuudo yauro'mi kemino ilaiyo nokwo imwalmonyugono.
Aki kevu wonyo kuuvollunopo toga aro tovino me'no kuuduuwallunopogaikikono. Kevu Krais toollu uuguro'mwonyodupudo togaikulluno tov Krais toollu buuso tovi amollusosopo toga Gooti tool kev kugaikullu kuruv aval'no amollusaikubweyokaikono. Toro kuvi kuruv Krais toollu aiyo aiko te amodukavoka Gooti su toolluro jurogudo su tovino kevu kuudo me'no kuubweyopogaikikono. Toro togaikulluno tov Krais tool aiyo aiko te adukavoka toga Gooti tool kev kugaikullu kuruv gavnokweyolluro jurogudo su tokwe aiyo aiko te aval'no amekudukavokaikono.
Nemi Nellunumiyago Gooti toollu aro tonyuno wuudodowadonogano. Kevu kuudo me'no kuubweyopo togaikulluro womdo mujumovla'mdopure tovino wuudodowadonogano. Aki kemoro kalo buuropino ikullunoduke tovida'ai womdo mollodupudo tovino wuudodowadonogano. Aki nemi Aguto Jisas Kraisolluro aikomgu wolabwono tovino sogwollo kinomwallo'moneyokwe tov muugollu'mo'mdupudogaikikono. Su toro tonyuno Gooti toollu, “Nenoloo,” wuudodowadonogano.
Toro te Gooti tool kemi aikullo'mwojoneyokwe nevu subusu'nyogalo aro wuudoganodowadonogano. “Oo nemi Gootoloo, guu a'mwo abolo Tesaloonaikada'ai ton guvnokwekujuro tomgu'aro neya yomjomwekovlapino'moneyokwe me'no adomarodogano. Toro ton kuvinono bilodukovimo'nyo'moneyokwe guu jurogudo neya doduuwimwojogawono. Aki a'mwo abolo su ton sugupasudo yo'mo winodopure tonyu kuvinono uumjunpino'moneyokwe neya duuwiyo'mwojogawono. Aki a'mwo abolo su tobuuravuro kuudo gubweyodupudo tovida'ai yiuwi'nokai womdo tonyu kuvinono yo'moneyokwe guu jurogudo duubweyogawono.” Nevu Gooti toollu kemino subusu'nyogalo su toro wuudoganodowadonogano.
Aki Aguto tool kemino me'no nekuduuwallodowodo tovino tov nevu ilaiyo kuudo aro me'no saikuu'mwakuuwonogano. Oo nemoro yogalo me'no adaikullajuuwo tonyu aga kuvinono uumjunodupudodeyo. Aki lukomgu kuga kuruv yiuno'no uumjungovla'mwalpinodeyo. Kuudo saikuu'mwakuuwono. Toro tovino tov kemino kuudo noullo maullo miyau'dowadonogano.
Kevu sumdomgu togada'ai Aguto toolluno kuudo guureji uubwemovla'mdupudogaikikono. Toro togaikul aga kuga kuruv kemi Aguto toolluno kuudo guureji uubwemovla'mdupudo su tovi nuugollu'mo'mwalpiyo. Kuudo neya jaullulo. Kemoro kuudo uubwemovla'mdupudo su tovuro mubiyo ikubiyo'moneyokwe tov kevu Gooti toolluro ago muunyu kai'muuda'ai sugumaluko tollovai kuvinono nomapinogaikikono.
Aki toro tonol a'mwo pwol resis tovuro aiyo'wo tomgu kinamjodowodo to'busuko kubalno nevu yiuno Jisasolluno bekonarowa'ji neya ainomjumovlavogawano. Nemoro kuudo uubweyodowado tov yiuno Jisasolluno to'no porugwo'mo'na'dowodokwono. Aki lukomgu yiuno Jisasolno Gooti toolluro ago muunyu kai'muuno nekumokailawonekono. Jisasol aro kuudo me'no souromarokaikono. Oo nuu aiyowo'mo toru ai'mo'mi toga ilaiyo bwotonyo tov noma'monyudeyo. Toro tovino tov mi sumdollu toruda'ai puuto wo'dowodo tovi guureji neya ainamjumo. Kuudo me'no souromarokaikono. Toro souromaroka tool nokwo wonyapino to'no yoduke toga a'mwo kaiya'nodo tooro galomworaro'mno i'noguropte tovi amovoromiyoguroptowosopekono. Aki toro tool aro kuudo miyaullajukekono. Nuu i'noguropte tovi abolmi toonyuno yovo tov nobwolomonumwogapiyapinonyudeyo. Su toro tovino kuudo miyaullajukekono. Toro te Jisasol resis tovi me'no uuwolo'mno sumaiyokwe Gooti toolluro sia kig tovi anato toru sulomwalokaikono. Toro ilomwalno sumaiyokwe aga kuga kuruv kuuno mujomwekovla'mdowodekono.
Gooti tool yiuwi'nokai toga gamoro yasuwa'wino sugumaluko tov nekullabiyokwekono. Aki Gooti tool kevu Krais Jisasollu uuguro'mwonyodupudo su toollu'aro gamoro bako su tovi anakuuto tomuu yiunokuudo mujomwekovlaiyo'moneyokwe kemi me'no adekumarokaikono. Toro tovino tov kemoro tabunyuwuulo amo'movla'mwakopo su ton manyu toga guureji mamjo'movla'mwalpinogano. Yiuno kula'nyo toga'gwono mokavlavopi kevu sugudo imo'nupino'moneyokwe Gooti tool aki aiko te yere yekuvo'dogalmwalonekono. Toro yekuvo'dogalowo'ji kemi sobanyo mollekuda'mwalonekono. Toro mollekudavowo'ji aki jurogudo yogullumwojekwapimwalonekono. Aki kemi jurogudo nomekudapimwalonekono. Gooti tool kemi tono tono yaikullugolmwalonekono.
Aguto toolluro wolabwono iruko tollugwo aro to'busuko imo'nonokwono. A'mwo abolo pun, “Oo kuuko tool nobwonoldeyo” kuudo miyau'dopure toga a'mwo kuuko tool bai'mo'mdowodekono. Su toro to'busuko kubalno a'mwo abolo ton kuudo miyau'dopure su toga Aguto tool nobai'mowonekono. Toro abai'mowo'ji toga sulugumdo tov uuwiyago bwotonyo ki'nowo'ji nyounopiyonokwono. Aki duko tov kuujo tooke'aro lobako tooke'aro sullugabwo togai'aro tonyu amonoso'ji toga noduuwiyopipinogano. Aki su toro toga kwako tokwe'aro kwako akavida'ai pasudo kworogai'aro kworo kuruv nyounopipinorogano.
ကြော်ငြာတွေ