Toro sopo kuvi kuruv Pooleke Banabaseke tooralno'gwowi luko miyolno kuu'maiyo toru'no aro kuudolorakono. “Gooti toolluro kuuguudo tov kemi muudu'no yodekubwaso'moneyokwe nami anakuuwoso. Toro toonal a'mwo Juu toonolluro miyawosunodowado toorai yere miyodubwasodowolo kwonal kuruv kevu Juu toorekulno'gwowi muudu'no kworekulluda'ai sodekubwasumwakuuwolo. Kuuguudo toro yodekubwasodowole tovi kevu kuudo kuubweyopujuko'mno'juki aiyo yiunokuudo mujomwekovlaiyo'moneyokwe tovi nokwo amaropujukogaikikono. Toro kugaikul kuruv aiyo yiunokuudo mujomwekovlaiyo'moneyokwe su tovi mallo'mo maikullunoduke togaikul Gooti toolluro kuuguudo akavi kaduko mwimwakopogaikikono. Toro tovino tov aga'no'gwowi navu kemi ikugollu'mowosi a'mwo abolo Juu toonolluro miyawosunodowado toorai yodubwaso'moneyokwe plawosunonakono.
Efesos 6:19 - Gooti Toolluro Yogalokwono19 Aki nuu kwonyu kuruv Gooti tool anyo'mwojoneyokwe kevu aro tovino subusu'nyogalo neya duudogaulo. Moro mago tov ara'mi toga Gooti tool gavnokweyolluro yogalo tov neya anubweyono. Toro nubweyodowo'jure tokwe yiulo yogalo sumo'nyajuko kuuguudo sugudo tovino neya moruudumwalmonyugono. Toro te nuu luko nyumiyokwe tovino kevu subusu'nyogalo neya duudogaulo. အခန်းကိုကြည့်ပါ။ |
Efesos 6:19
34 ပူးပေါင်းရင်းမြစ်များ
Toro kuvi kuruv Pooleke Banabaseke tooralno'gwowi wagwolago su toru manyu toga mwalodubul Aguto Jisasolluno kuuguudo tov guureji sodubwosumovlaiyajulorakono. Kuuguudo su tov Gooti gavnokwe toolluro yasuwa'wino sugumaluko nekubweyodowodo tovinokwono. Toro tovino yodubwosumovla'mdole toga a'mwo abolo ton, Oo nebalo'mdeyo, dupino'moneyokwe Aguto tool Pooleke Banabaseke toorallu duuwallo jurogudo pun kuubweyokaikono. Toro uubweyoduke tooral a'mwo abolo tonyu duuwallo judo'no judo'nodo ton kuuduuwallajulorakono.
Toro tool Juu tooravuro i'bwo'nyago tovi kuulno sumaiyokwe kuuguudo tokwe yiuno kuu'maiyo toru'no sodubwasajukekono. Toro yodubwasoduke toga a'mwo kwolabolo Prisilakwe Akwila'weke teyaul au'nallajuleyaukono. Toro kuu'na'no sumaleyokwe Apoolosollu kemi ago tomuuno amokavlavoleyaukono. Toro mokavla'mno sumaleyokwe a'mwo su toolluro Gooti toolluno kuuguudo sodubwasajuko tonyuno po'dogalo yovo'dogallo'moneyokwe kuuguudo pugai'aro sodubwasoleyaukono.
Toruda'ai Poolol Juu tooravuro i'bwo'nyago tovi kuulodawo kuuguudo aulomoruudomollajukekono. Toro tool luko miyodowo guureji to'no amoruujajukekono. Toro tool lobako pworapwol kuuwolo'nokaikono. Poolol toro moruudomollodowodo toga a'mwo abolo ton aguto kig Gooti toolluro mido mollomwalo tovi dolago tomuu neya kuulomwalpino'moneyokwe pi'mwono sodubwasajukekono. Toro yodubwasodowo aki i'bwo'nyago tovida'ai a'mwo su toorogai kuuguudo adomwallajukekono.
Toro molloma'dowo a'mwo abolo su ton aguto kig Gooti toolluro mido mollomwalo tovino kuuguudo tov sodubwasajukekono. Aki Aguto Jisas Kraisolluno kuuguudo kurukwe'aro sodubwasajukekono. Poolol toro yodubwasodowodo toga luko miyajukekono. Toro kwol kuruv yiuno kuu'maiyo toru'no amoruujajukekono. Aki toro moruudoduke toollu a'mwo pwolnodo kwol kuruv muumjukullajukekono.
Toruda'ai a'mwo Pitaike Jooneke tooralluro kuuguudo wuudodole tovi au'nallajupo su tooro wuu'nyuno sumaveyokwe morumoukuropi soporogano. Toro tooro aro adoporogano. “A'mwo su tooral a'mwo yasuwa'nodo pworakono. Aki toro tooral skuul miyajulo kworal kuruv jurogudo da'mdubul pi'mwono sodonekubwasadokuulo.” Adoporogano. Toro juno sumaveyokwe aro ainodokwopiyomaroporogano. “Oo a'mwo su tooral Jisaseke subwoto'nomollajupo pworakono.” Ainodokwopiyomaroporogano.
Subusu'nyogalo toro me'no dopino sumaveyokwe toga wunyu wunyu to'busuko puruv yo'no ago aulomwallajupo tov yaudo yaudo bwotonyo sokakwono. Toro yoduke toga Gooti toolluro Kuullo toollu uumjunyo'moneyokwe kuudo ton kemoro poowokalago tovi aullo'mowopiyokakwono. Toro kuullo'mowopiyoduke toga a'mwo abolo su ton Gooti toolluro yogalo tokwe moruudomollo'mo tovino luko miyajupogano. Toro kun kuruv yiuno kuu'maiyo toru'no guureji amoruujajupogano.
Toro kuudo yau'dopure kuvi kuruv Banabasolno'gwowi Soolollu wiyo'mwojo'moneyokwe momwora'no sumaiyokwe a'mwo kuurotokwe tooraiyomno amollubworomokavlavokaikono. Toro mollubworomokavla'mno sumaiyokwe Banabasol a'mwo kuurotokwe toorai aro kuudokaikono. “Soolol puuto tomuu pla'mduke toga Aguto tool abwiyalo'noka toollu kwonokaikono. Toro wonyuno sumaiyokwe Aguto tooke kuuguudo adolorakono. Aki Soolol luko miyo'no wagwolago Damaskosda'ai mwalodupudo tonyu Jisasolluno kuuguudo tov guureji sodubwasokaikono.” Banabasol a'mwo kuurotokwe toorai Soololluno toro kuudokaikono.
Oo miyobuuravoo, nemi Aguto Jisas Kraisolluno aval'no kuudo uubweyodowa aki Gooti toolluro Kuullo tool kalo buuropino winyo'moneyokwe pasudo tov ikullabodowodekono. Toro tovino tov kemi guureji aro ikudoganmo'mokwono. Kevu mi sobanyo mollonyudavopi Gooti tool mi nyo'mwojo'moneyokwe subusu'nyogalo neya duudogaulo.
Aga nevu yiuno Gooti toolluno to'no neya ilomoropimwolowanonogano. Gooti su tool kuuguudo sugudo nuu modomollodumdo tovi'aro kemi jurogudo nokwo daikullumwojumwalonekono. Kuuguudo sugudo su tov aiyoga manyu kuunodo togada'ai yiulo yogalo mujumo'nugelabino mujumo'nugelabino sumaiyokwe kworomo bwotonyago kuuwolo'nyajukokwono. Toro kuvi kuruv aga'no'gwowi yiuno kuu'maiyo toru'no me'no abiyanekulo'nadopikokwono. Kuuguudo sugudo su tov yiuno Jisas Kraisollunokwono. Toro te kevu kuuguudo sugudo su tovino kuudo neya uubwemovlavopi jurogudo nokwo yogullumovla'mwalpinogaikikono.
Toro te kevu Krais Jisaseke me'no uuguro'mwonyodupudo togaikul yiuwi'nokai sugudo go'no go'nodo tollovo me'no ma'dupudogaikikono. Toro togaikul bwotonyagokwe imo'nodupudogaikikono. Kevu Jisasolluro mollu'bwoto togaikul su toro me'no ma'dupudo tovino tov kevu kuuguudo ilaiyo to'no modomollodupudogaikikono. Aki Gooti toolluro yiuwi'nokai pi'mwo kuudo judo'no judo'no ikullabodowodo kugai'aro tonyuno you'movla'mdupudogaikikono.
Aki kevu nemi nekullo'mwojo'moneyokwe Gooti toollu subusu'nyogalo neya duudogaulo. Kevu bwotonyago togaikul kuudoganpi tov Gooti tool kuvinono ikuu'nonekono. Toro ikuu'nowo'ji nemi nonekullo'mwojonekono. Toro nekullo'mwojodowo'jure tovi a'mwo abolo bwotonyago ton muugonaropi Gooti toollu, Nenoloo, nokwo wuudumwalpinogano. Toro tovino tov kevu nemiyo'mo subusu'nyogalo neya duudogaulo.
Nuu kemino aro kuudo yaikuu'dumdonyugono. Kevu moro yogalo tovi kuvinono uumjunodupudodeyo. Yaikuu'dumdonyugono. Toro togaikulluno tov kemi kuuguudo ikujo'moneyokwe luko miyodumdonyugono. Toro kwonyu kuruv kemi kuu'maiyo toru'no mollovo'dogalaikudodumdonyugono. Aki toro toonyu kemino ilaiyo bwotonyo yokwenyugono. Aki kemoro jurogudo danyumwojodopudo tov mi aiyowomno yo'movanuwopiyodowodokwono. Toro toonyu yiuwi'nokai jul'nyo go'no go'no banyu'mo'mdopure kuga kuruv nuu ilaiyo bwotonyo to'no yodumdonyugono. Aki moro ilaiyo yodumdo su tov bwotonyo bilowakuu'nowo'ji bwolouro'bwo'nodawodokwono.
Toro te kevu yiuwi'nokai pasudo akanyu pi'mwono molludo'movla'mdupudogaikikono. Gooti toolluno kuudo uubweyo'mo tokwe'aro Gooti toolluro yogalo tovino moruujo'mo tokwe'aro Kuullo toolluro yogalo ikudodowo'jure tovi kuudo youromallo'mo tokwe'aro aki yiuwi'nokai womdo sugudo tonyu guureji momjumovlaiyo'mo tokwe'aro nemino kalo buuropino ikullunodowodo tokwe'aro yiuwi'nokai pasudo su tonyu kevu pi'mwono molludo'movla'mdupudogaikikono. Toro tovino tov nuugwiyo tokwe yasuwa'wino mollu'bworoso'mo womdo aka kuruv kevu nuugollu'mopiyokwe tovino wako neya dou'nogaulo.
Toro te Gooti tool gamoro womdo puruv Krais toollu'aro yo'moneyokwe tov nemi nekuduuwallo'mo kwinyajukekono. Gooti toolluro womdo sugudo yo'mo winodowodo su tov aiyoga yiulo kwollajukokwono. Toro kuvi kuruv aga'no'gwowi nemi me'no nekuduuwallodowodo tovino tov nevu kuu'maiyo toru'no kuudo youroma'dowadonogano.
Aki yiuwi'nokai noonyumwonyu tonyu sokwollosoka tool yiuno Gooti toolnodokwono. Aiyoga muudu'nodo togada'ai Gooti toolluro kuudo sovo'dogallaullajuko tov yiulo apuu'nallajukokwono. Toro apuu'nallajuko su tov a'mwo abolo tonyu yiuno kuu'maiyo toru'no bomollolupto'nubweyo'moneyokwe Gooti tool mi ajanubweyokaikono.
Toro toonyu aro tovino nyunodowodonyugono. Kevu yiuwi'nokai togaikul Jisasolluro a'mwo abolo pubuurai kalo buuropino neya domollogaulo. Kalo buuropino amollupi su tov wuulo to'busuko kevu imgu amgu togaikullu jurogudo nokwo galogudupolaikwo'mwalonokwono. Toro gudupolaikwo'dowo'jure tovi'aro kemoro poowokalago tonyu jurogudo nokwo daikullumwojumwalonokwono. Aki kevu Gooti toolluro yiulo yogalo apuu'nallajuko su tov aga kuu'maiyo toru'no bomollolupto'naikubweyodowodokwono. Toro tovino kavlo tov me'no youroma'dupudogaikikono. Kavlo su tov Krais tool kwekono. Kevu Krais su toolluno kuudo me'no youromoropiyodupudo tov kuvi kuunogano. Kuudo su tovi youroma'dupudo togaikul Gooti toolluro sumdo tovi kevu gamoro yiuwi'nokai sugumaluko tollovo me'no ma'dupudo tonbusuko wimo'nodupudogaikikono.
Aki kevu subusu'nyogalo kuudupi su toga Gooti tool nemiyo'mo kudo'aiko kuusanekubweyono'moneyokwe neya duudoganogaulo. Gooti tool kudo'aiko ausanekubweyo'ji su tovi'aro nevu Krais toolluno yiulo yogalo apuu'nallajuko su tokwe a'mwo abolo punyu kuu'maiyo toru'no nomoruudanonogano. Nuvu kuuguudo su tovi moruudomollodore tovino tov mi wuulo ameranubweyoponyugono. Toro toonyu wuulo killo'mo ago tovi kuule'na'dumdonyugono.
Nevu kemi yere mabekuru'ma'dowore toga sumdomgu wagwolago Filipai toru abomwalowonogano. Su toro bomwalodowore toonollu a'mwo Filipaida'ai pworo danyu'nyuwuulo pun nekubweno sumaveyokwe kaiyako sanekullugoloponogano. Su toro sanekullugolopo tovino kevu me'no wuu'nodupudogaikikono. Ikomago tooro kaiyako toro sanekullugolopo kuvi kuruv Gooti toolluro kuuguudo sugudo tokwe kemi ikujo'moneyokwe tovino luko miyowonogano. Toro kwonol kuruv Gooti toolluro jurogudo nekubweyoduke tokwe kemi akuuto toru bomwalno sumawoneyokwe kuuguudo sugudo su tokwe guureji aikujajuwonogano.
Nemi avalobuuravoo, aiyowo'mo yogalo tov arokwono. Kevu nemino subusu'nyogalo aro duudoganogaulo. Nevu Aguto toolluro yogalo modomollodowado tov yere neya abomje'nugoulawono. Aki kevu kuuguudo sugudo tovi ilaiyo amollomaropo to'busuko kubalno a'mwo abolo pun kuuguudo sugudo bomje'nugoulodowo'jure su tovi ilaiyo aval'no neya amollomapuro.
Toro te nevu aro tovino kuudo noullo maullo miyau'dowadonogano. Gooti toolluro yiulo yogalo kuu'maiyo toru'no me'no bomollolupto'nosodowodo su tov aguto kuunodokwono. Yogalo su tov aro dodowodokwono. “Krais tool a'mwo kulako kuunodo tokwe imo'no'no a'mwo abolo tonyu kwiyalugunyajukekono. Toro toolluno Gooti toolluro Kuullo tool kuu'maiyo aro kuuduuwallajukekono. A'mwo akal Gooti toolluro sugudo to'nodekono. Kuuduuwallajukekono. Aki ensel pworo kwollu me'no kwonomaropekono. Aki gamoro womdokwe tooro yiuwi'nokai kantri tomuu kwolluno kuuguudo amodomollajuporogano. Su toro amodomollajupo toolluno yiuwi'nokai kwako akavida'ai a'mwo abolo pun kuudo kuubweyopekono. Aki toro toollu Gooti tool muunyu kai'muuno mokailno sumaiyokwe gamoro bako jurogudo tovi anakuuto tomuu aulomorumwallokaikono.” Yogalo aguto su tov toro dodowodokwono.
Aki nuu aro kuudo sau'mwakonyugono. Nuu gumi iru'mato gujo'mo nyunodowodonyugono. Aki Gooti tool puuto tovi ausosoneyokwe tovino guvu Gooti toollu subusu'nyogalo wuudoganodumdekugono. Toro wuudoganodumdo su tovi Gooti tool kaduko kuvinono nogujonekono. Nuu su toro tovino sogwollo kinodumdonyugono. Toro te nuu guuge iru'mato'moneyokwe ago adovarojungiko puruv neya jovrowosogawono.
Gooti tool nemi anekullo'mwojoneyokwe tovino kevu subusu'nyogalo neya duudogaulo. Aki Gooti toolluro sumdo tovi nevu aro me'no yainyunodowadonogano. Oo nemi poowokalago tovi kuulanekwo'dupudo tonyu kuvinono uumjunodowadonoldeyo. Yainyunodowadonogano. Aki nevu yiuwi'nokai toga pasudo idopto'nodo tonyu mujumovlaiyo'mo nekullunodowodonogano.