Efesos 5:26 - Gooti Toolluro Yogalokwono

²⁶ Aki gamoro mollu'bwoto tonol gamoro sumdo tovi sugudo wimo'nyo'moneyokwe abolokaikono. Toro te Krais tool gamoro yogalo tokwe nemi wonyo to'busuko amollol'movonekumarokaikono.

Efesos 5:26 ပူးပေါင်းရင်းမြစ်များ

Joon 13:10

Toro kuudoka tovi Jisasol aro kuudokaikono. “A'mwo pwol wonyo me'no sal'mo'no'ji su tool sullukwako nonaguto to'no imo'nodowodo toolluno tov aki aiko te yal'mo'nyo'mo tovino supto miyonekono. Toro kwol kuruv yiuno gami suvlo tovalluno to'no aki aiko te wonyo tovi yal'mo'nyo'mo supto yonekono. Toro te kevu me'no sal'mo'nyungopo toorekulbusuko imo'nodupudorekikono. Kevu yiuwi'nokai toorekul toro imo'nodupudo kuvi kuruv kemida'ai pwolno'gwowi miyal'mo'nyungikekono.” Kuudokaikono.

Joon 15:3

Kevu ipilo toorekullubusuko Gooti tool me'no ku'movaikwopiyodowodekono. Aki moro yogalo togai yodekubwasodumdo tovino tov kevu wonyo me'no sal'mo'nyungopo toorekulbusuko imo'nodupudorekikono.

Joon 15:8

Kevu ikulsulo bwotonyago ai'nugovlapi tovi'aro moro Nyunumiyago tool yovo aguto maronekono. Aki ikulsulo bwotonyago ai'nugovlapi su toorekul aro tovino kuu'maiyo wuuduuwallumwalpinorekikono. Kevu moro nuumjunyokwe kuunodorekikono. Toro tovino wuuduuwallumwalpinorekikono.

Joon 17:7

Aki gumoro yiuwi'nokai noonyumwonyu nyabodumdo ton yiuno gumida'aiyogano. Su toro tovino aga toga a'mwo abolo tobuuro kuudo me'no souroma'mwakopogano.

Joon 3:5

Toro kuudoka toollu Jisasol aro kuudokaikono. “Nuvu nebal'no kuunodo agudadokwono. “A'mwo pwol wonyo tokwe'aro Gooti toolluro Kuullo tooke'aro tovalluda'ai aiyo aiko te mimo'no'ji su tool aguto kig Gooti toolluro mido mollomwalo tovi ku'nono maulomwalonekono.

Kuurotokwe 22:16

Toro te aga guu buro'nyo'mo sogwollo denadokuuno? Guu ilodavo'bi aro jono. Wonyo uuvolluno'bi Jisasolluno yovo tovida'ai subusu'nyogalo neya duudono. Toro kuudubi tookujuro ma'no ma'nodo tonyu nomollol'movagudukwopiyonekono.” Ananaiyasol toro anyudokaikono.” Poolol kwolallo tonyu toro kuudokaikono.

Kuurotokwe 26:18

Toro te nuu a'mwo abolo su tonyomno amogwapimo tov aro tovinokwono. A'mwo abolo su ton dugumdo tomuu kuulomwalodupudogano. Toro tonyu gumoro kuuguudo yodubwasodo'bure tovida'ai kemoro sumdo ton delukuulludapiyo'bi bako tovi nokwo wonmwalpinogano. Toro ton Satanyolluro jurogudo tovi dolago tomuuda'ai birolo'nugolokwopi Gooti toolluro jurogudo tovi dolago tomuu nokwo kuulomwalpinogano. Aki toro ton mino kuudo anubwepi tovino tov nuu kemoro ma'no ma'nodo tovuro kirumwallo tovi modukwopiyo'mi Gooti toolluro a'mwo abolo kuunodo me'no ajesungiko nyumo'numwalpinogano.” Yogaimaguurai tov su toro anyudokakwono.” Kuudokaikono.

Room 10:8

Toro sakwollungiko kuvi kuruv Gooti toolluro sumdo tovi sugudo wimo'nyo'moneyokwe puuto tovino kuuguudo puru'gwowi aro sakwollungikokwono. “Gooti toolluro nebaikuuguudo tov kemi wobo toru wo'dowodokwono. Toro tov kemoro poowokalago kuunodo tonyu kuuluuwo'dowo aki kevnokweyogaikulluro mago tokwe modomollodupudokwono.” Su toro sakwollungikokwono. Toro te a'mwo abolo ton kuuguudo su tovino kuudo neya uubwepino'moneyokwe nevu aval'no moruudomollodowadonogano.

1 Koorin 6:11

Kevu pugaikul sumdomgu su toro sumo'nyajupogaikikono. Toro kuvi kuruv aga'no'gwowi Gooti tool kemoro ma'no ma'nodo tonyu me'no mollol'movaikudukwopiyo'no gamoro a'mwo abolo kuunodo me'no wimo'nodupudogaikikono. Toro togaikul aro tovalluda'ai gamoro sumdo tovi sugudo kwimo'nopogaikikono. Aguto Jisas Kraisolluno yovo tokwe'aro nemi Gooti toolluro Kuullo tool womdo ikulloduke tokwe'aro tovalluda'ai kevu gamoro sumdo tovi sugudo kwimo'nopogaikikono.

2 Koorin 11:2

Kuuguudo tov arokwono. Gooti tool kemino tov gami guureji neya uumjunpureyokwe tovino ilaiyo winodowodekono. Su toro to'busuko kubalno nuu kwonyu kuruv kemino tov Krais toollu neya uumjunpino'moneyokwe aval'no nyunodowodonyugono. Su tov aro to'busukokwono. Sujuraiyo kwonyalo mingiko puvi gami ganumiyago tool a'mwo pwolnodo toollu uumaso'moneyokwe me'no jesodowodekono. Su toro to'busuko kubalno kevu Krais toolluro a'mwo abolo kuunodo wimo'nyo'moneyokwe nuu kemi me'no ajaikubweyonyugono. Toro te kevu sujuraiyo kwonyalo miyodowodo to'busuko sugumaluko to'no sumo'nupi togaikullu nuu Krais toolluro ato tovi ikubweyo'mo ajudovaikubwemonyugono.

Efesos 6:17

Aki a'mwo mollurogudo tooravuro miguto jurogudo yesodupudo to'busuko kubalno kevu ma'no ma'nodo tovuro kirumwallo tovida'ai Gooti tool me'no abomollurolovekumokalokwoka tovino kuudo su tov kemoro mido tonyu neya aikworogawono. Aki molo'mo kwallu'mopto jurogudo gudupola'dupudo to'busuko kubalno kevu Gooti toolluro yogalo tokwe guureji neya dogudupolarogaulo. Kwallu'mopto su toul Gooti toolluro Kuullo tool ikullabodowodokwono.

Kooloosi 3:16

Krais toolluno kuuguudo sugumaluko tov kemoro yiuwi'nokai anakuuto tomuu neya kuullo'movaikwopimwalonokwono. Toro togaikul Jisasolluro a'mwo abolo tobuurai Gooti toolluro pi'mwo kuudo ikullabodowo'jure togai neya yodubwasopi dodumul'mwojogaulo. Kemoro poowokalago tonyu Gooti toollu, “Nenoloo,” wuujo'moneyokwe tov neya kuulaikwo'mwalonogaikikono. Toro kuulaikwo'dowo'jure toga kevu dato puruvapuruv tomgu'aro dodomwalogaulo. Dato pun Gooti toolluro yogalokwe buukiyo tovi wo'dupudogano. Aki dato pun Gooti toollu ilomoropiyo'moneyokweyogano. Aki dato pun Gooti toolluro Kuullo tool ikubweyodowodogano. Dato su toro togai kevu neya dodomwalogaulo.

Taitos 2:14

Jisas Kraisol a'mwo noromiyoso'mo tooravuro ato tovi gavnokwe tool morubwenyuno sumaiyokwe yiuno'no abolokaikono. Gamoro aboloka su tov nevu yiuwi'nokai ma'no ma'nodo tonyuro womdo tovi ki'na'dowore tonollu amollurolovonekwapiyokaikono. Aki gamoro a'mwo abolo kuunodo wimo'nowa'ji sugupasudo to'no guureji yomjomwekovla'mwalano'moneyokwe amollol'movonekumarokanogano.

Hibruu 10:10

Jisas Kraisol Gooti toolluro ilaiyo winodowodo tovi uumjunyuno sumaiyokwe gavnokwe toolluro kulako tov yiuno puru'monodo toga'no aromiroudapinokaikono. Toro aromiroudapinoka su tovi'aro nevu Gooti gavnokwe toolluro a'mwo abolo kuunodo wimo'nugovla'mdowadonogano.

Hibruu 10:14

Yiuwi'nokai a'mwo abolo Gooti toolluro kuunodo wimo'nugovla'mdopure su tonyo'mo Krais tool yiuno puru'monodo kwiroudapinoka su tovi'aro yiuno sugudo to'no wimo'nugovla'mdupudogano. Su tov yiuwi'nokai toga mujo'movlaiyo'moneyokweyokwono.

Hibruu 10:22

Toro te Krais toolluro mujako abwoloka tov nemoro poowokalago tobuurai me'no amollol'movanekudukwopiyokakwono. Toro amollol'movanekudukwopiyoka tovida'ai nemoro poowokalago su tobuuro ma'no ma'no nonaguto imo'nodupudobuurogano. Toro tovino tov nemoro poowokalago su tobuuro nemi wogulo madonekwo'gallokweyogano. Aki aiyoga pris tooro Gooti toolluro womdo yo'moneyokwe kemi kulako ton sal'mo'nyajupo to'busuko kubalno nemoro kulako ton wonyo kuunodo tokwe me'no yal'mo'nodowadonogano. Toro tovino tov nemi poowokalago kuunodo togai Gooti toollu kuudo uubweyodowado tovi neya avorugwo'mo'narogawano. Toro porugwo'mo'narowa'ji nemi poowokalago kuunodo togai Gooti toollu wobo toru neya abuuru'marogawano.

Hibruu 10:29

Sumdomguda'ai Moosesolluro loowo tovi a'mwo pwol kisuvolo kwiyo'ji toollu kirumwallo tov su toro tomgu'aro amallajukekono. Toro kuvi kuruv a'mwo pwol Gooti toolluro Kwolaiyo toollu suvlo sulomavekuro'ji su toolno'gwowi kirumwallo kula'nyo to'no maronoldukono? Awiyo, kirumwallo bwotonyo tov nomaronekono. Aki Gooti tool gavnokweyolluro a'mwo abolo togai Krais toolluro mujako abwoloka su tokwe subuu'yamju muuduko tov me'no sajunokaikono. Aki a'mwo abolo su ton mujako su tovi'aro Gooti toolluro a'mwo abolo kuunodo wimo'nodupudogano. Toro kuvi kuruv a'mwo pwol ma'no ma'no so'ji tov Krais toolluro mujako su tovi suvlo to'busuko ilomavekuronekono. Aki a'mwo ma'no ma'no so'ji su tool yasuwa'wino sugumaluko tovuro Kuullo nekumokabodowodo toollu kisuvolo bwotonyo wimwalonekono.

Hibruu 13:12

Toro te Jisas kwol kuruv wagwolago tovi kwa'mgu tomuu danyu'nyuwuulo ibwosuno'no abolokaikono. Jisasolluro bolo'no mujako abwoloka su tov a'mwo abolo ton Gooti toolluro sumdo tovi sugudo wimo'nupino'moneyokweyokwono.

Hibruu 4:12

Neya duu'nyulo. Gooti toolluro yogalo tov aiyo kurukweyokwono. Aki yogalo su tov womdo bwotonyo yodowodokwono. Gooti toolluro yogalo su tov molo'mo kwallu'mopto puul imgu amgu do'nyo do'nyo avairo'nyungiko tousi uuwolovowo'ji a'mwo abolo tonyuro poowokalago tovi juulowosodowodokwono. Kwallu'mopto su toul a'mwo abolo tonyuro suvlo'aru'wago tokwe'aro yogudo tokwe'aro tovallu do'mdowodo to'busuko kubalno Gooti toolluro yogalo tov a'mwo abolo tonyuro kuudo tokwe'aro kuullo tokwe'aro tovallu anakuuto tomuu kuuluuwo'dowodokwono. Gooti toolluro yogalo su tov nemi me'no kuulanekwo'dowodo tovino tov nemoro poowokalago tonyuro yiulkuudo yau'dowa'jure togai'aro nemoro noonyumwonyu pasudo pun yo'mo nekullunodowo'jure togai'aro su tonyu bomollolupto'nosowo'ji janekunyubwo'dowodokwono.

Hibruu 9:14

Meme toorogai'aro buulmokau toorogai'aro tooravuro mujako tokwe su toro amollol'movodukwopinyajupo kuvi kuruv Krais toolluro mujako to'gwowi meme toorogai'aro buulmokau toorogai'aro tooravuro mujako tovi muunyu toru'aro uuwolo'mdowodokwono. Su tov aro tovinokwono. Gooti toolluro Kuullo yiunokuudo mujomwekovla'mdowodo toolluro jurogudo tokwe Krais tool sipsip meme kaiya'nodomaiyokwe pwolbusuko imo'no'no gavnokwe tool Gooti toollu kwiroudapinokaikono. Toro toolluro mujako su tov nemi mollol'movanekudukwopiyodowodokwono. Mujako su tov nemi poowokalago tovida'ai bolnodo'moneyokwe pasudo me'no kuulanekwo'dupudo toorai mollol'movanekudukwopiyodowodokwono. Nemi toro mollol'movanekudukwopiyodowodo su tov nevu Gooti aiyokwe toollu womdo wimwalano'moneyokwe tovinokwono.

Jems 1:18

Toro te Gooti tool gavnokweyolluro ilaiyo winoduke tovi uumjunyuno sumaiyokwe gamoro nebal'no yogalo tokwe nemi a'mwo abolo aiyokwe sumo'nonekudapiyokaikono. Su tov aro tovino'mokwono. Nevu Gooti toolluro yiuwi'nokai sokwollosoka tonyuda'ai ikulsulo muudu'no ki'nodupudo tonbusuko gamoro yiuwi'nokai gabovo sokwollosoka tonyu neya uuwolo'mwalano'moneyokwe tovinokwono.

1 Pita 1:2

Jisas Kraisolluro Ganumiyago Gooti tool aiyogada'ai kemi me'no ikwono'no ajaikubweyokaikono. Aki gamoro Kuullo kuulekumwalodowodo toollu'aro kevu gamoro a'mwo abolo kuunodo wimo'nodupudogaikikono. Gooti toolluro kemi su toro saikullugoloka tov aro tovino'mokwono. Kevu Jisas Kraisolluro yogalo tovi uumjungovla'mwalpino'moneyokwe tovinokwono. Aki gamoro mujako tokwe kemi mollol'movaikudukwopiyono'moneyokwe tovinokwono. Oo Gooti tool gamoro yasuwa'wino sugumaluko ton kemi guureji nokwo ikubwemovla'mwalonekono. Aki kevu sumwoluko kavo wosungovlaiyo'moneyokwe kuruv Gooti tool nokwo ikullo'mwojumwalonekono.

1 Pita 3:21

Gooti tool wonyo tovida'ai luvomato to'busuko amollurolowapiyoka su tov a'mwo abolo wonyo uuvollunodupudo tovino yovekurajo'mokwono. Wonyo mogaluvollo'moneyokwe pasudo su tov kulako tovida'ai guru'mopiko tonyu mollol'movodukwopiyo'mo'maiyo. Toro kuvi kuruv wonyo galuvollodupudo pasudo su to'gwowi Gooti tool nemi ma'no ma'nodo tovuro kirumwallo tovida'ai bomollurolovonekumokalokwodowodo tovino wuuduuwallo'mokwono. Aki Jisas Kraisolluro aiyo aiko te adukavoka tovi'aro kemoro poowokalago ton Gooti toolluro sumdo tovi sugudo me'no wimo'nodupudogaikikono. Toro te kevu wonyo kuuvollunpi toga Gooti toollomno me'no souragunyumo'nopo tovino kuu'maiyo toru'no wuuduuwallunodupudogaikikono.

2 Pita 1:9

Kuudo neya jaullulo. Kevu pugaikulno'gwowi pasudo su tonyuno nonagutokweyogaikuldeyokwe a'mwo sumnowojokwe togaikulbusuko me'no imo'nodupudogaikikono. Toro imo'nodupudo togaikul aro tovino kuudo yallulo'gwonodupudogaikikono. Gooti tool kemoro ma'no ma'no pasudo tonyu me'no amollol'movaikudukwopiyoka tovino kuudo yallulo'gwonodupudogaikikono.

1 Joon 5:6

Jisas Kraisol kwako akavi me'no abiyalo'nokaikono. Toro abiyalo'noka su tov yiuno gamoro wonyo kuuvollunoka to'no anekuduuwallokalmaiyo. Toro kwol kuruv pasudo puruval tovake anekuduuwallokaikono. Pasudo puruv Jisas Kraisolluro wonyo kuuvollunoka tokwono. Aki puruv gamoro mujako abwoloka tokwono. Pasudo su tovalluno Gooti toolluro Kuullo tool kuu'maiyo toru'no adodoluwosokaikono. Gooti toolluro Kuullo su tool yiuno nebal'no yogalo to'no jokwekono. Toro toolluro yogalo adodoluwosoka tov Jisasolluro pasudo su tovalluno kuu'maiyo toru'no nekuduuwallodowodokwono.

Juut 1:1

Mino yovo tov Juutolenyugono. Toro toonyu Jisas Kraisolluro ki'nato womdokwe wimo'nodumdonyugono. Aki nuu Jemsolluro gagwai'yagonyugono. Toro toonyu kemiyomno pas akav sokwollekwopiyamwakono. Toro togaikullu nemi Nellunumiyago Gooti tool kalo buuropino winyokwekono. Toro tool kemi me'no adekumarokaikono. Aki kevu Jisas Kraisolluro a'mwo abolo kuuno wimo'numwalpino'moneyokwe Gooti tool yellukuromollekumwalodowodekono.