Efesos 3:9 - Gooti Toolluro Yogalokwono

⁹ Aki yiuwi'nokai noonyumwonyu tonyu sokwollosoka tool yiuno Gooti toolnodokwono. Aiyoga muudu'nodo togada'ai Gooti toolluro kuudo sovo'dogallaullajuko tov yiulo apuu'nallajukokwono. Toro apuu'nallajuko su tov a'mwo abolo tonyu yiuno kuu'maiyo toru'no bomollolupto'nubweyo'moneyokwe Gooti tool mi ajanubweyokaikono.

Efesos 3:9 ပူးပေါင်းရင်းမြစ်များ

Matyuu 10:27

Kevu dugumdo tomuu mwalodopure toorekullu nuu yogalo aikudumi tokwe momworaropi kevno'gwowi bako tovi kuu'maiyo toru'no neya domoruudogaulo. Aki nuvu kemoro kaduko tovi bweyogalo aikudumi kuvi kuruv kevno'gwowi wuu'nopi kemi ago tovi muunyu toru ilodavopi kuu'maiyo toru'no neya domoruurodogaulo.

Matyuu 13:35

Su tov proofet pwolluro yogalo ajakwolloka tovi suuwiyo imwojo'moneyokweyokwono. Yogalo ajakwolloka su tov arokwono. “Nuvu yovekurajo kuuguudo tonyu'aro to'no wuudumwalmonyugono. Aki nuvu yiulo yogalo punyuro kavlo pun moruudumwalmonyugono. Yiulo yogalo su ton Gooti tool yiuwi'nokai tonyu sokwollosoka togada'ai yiulo kupuu'nugelabodupudogano. Toro tonyuno to'no moruudumwalmonyugono.”

Matyuu 25:34

Su toro toga aguto kig toonyu a'mwo abolo anato tomgu amwalpi tonyu aro wuudumonyugono. “Oo moro Nyunumiyago toolluro sugudo pun ikubweyodowodogaikikono. Toro togaikul aguto kig mido mollomwalo tovida'ai sugudo ton kuvinono mapino'moneyokwe dobiloo.” Wuudumonyugono. Sugudo mapino su ton aiyoga kwako akavi muudu'no sokwollosoka togada'ai kemiyo'mo me'no sovrovaikubweyokagano.

Matyuu 28:19

Toro te kevu plavopi yiuwi'nokai kwako akavuro go'no go'nodo tomuuda'ai a'mwo abolo tonyu moro numjunyokwe imo'numwalpino'moneyokwe jodubwosomollogaulo. Toro yodubwosomollodopure tovida'ai moro numjunyokwe sumo'nupi tonyu kevu wonyo domogaluvollogaulo. Toro toorekul Gooti Nyunumiyago toolluno yovo tokwe'aro gamoro Kwolaiyo toonyuno yovo tokwe'aro gamoro Kuullo toolluno yovo tokwe'aro tonyuda'ai wonyo domogaluvollogaulo.

Luuk 24:47

Aki yogalo puruv aro sakwollungikokwono. “Yiuwi'nokai a'mwo abolo Gooti toollomno kuudo souragunyumo'nupi su ton Gooti tool kemoro ma'no ma'nodo tovuro kirumwallo tov nomodukwopiyonekono. Yogalo su tov Krais toolluno yovo tovida'ai jurogudo tokwe nomodomollupinokwono. Muudu'no wagwolago Jeruusalemda'ai modomworaropi yiuwi'nokai kantri tonyu nomodomollupinokwono.” Su toro sakwollungikokwono.

Joon 10:30

Moro Nyunumiyago su tooke'aro nuvnokwe toonyuge'aro toonal yiuno pwolnodonakono.” Kuudokaikono.

Joon 5:17

Jul'nyo toro wiyodopure kworai kuruv Jisasol aro kuudokaikono. “Moro Nyunumiyago tool womdo mujumelabino mujumelabino yodowo iruko Sabat aka kullugwoji kuruv womdo kuuno yodowodekono. Aki nuu kwonyu kuruv iruko akallugwoji womdo yodumdonyugono.” Kuudokaikono.

Joon 5:19

Toro te Jisasol Juu su toorai aro kuudokaikono. “Nuu nebal'no kuunodo ikudumo'mokwono. Gooti toolluro Kwolaiyo toonyu nuvnokwenyuro kuudo tovida'ai womdo miyokwenyugono. Toro kwonyu kuruv yiuno mi Nyunumiyago toolluro womdo yodowo'jure tovi wonoma'dumdo tovida'ai to'no womdo aval'no yokwenyugono. Kuudo neya jaullulo. Nyunumiyago su tool burowo'nyo burowo'nyo womdo ton so'ji tov gamoro Kwolaiyo kwonyu kuruv womdo su tonyu aval'no yokwenyugono.

Room 11:25

Toro te miyobuuravoo, nuu yiulo yogalo puruv ikudumo'mokwono. Yiulo yogalo aikudumi su tovi kevu wuu'nopi aro nyulomodomoropinapiyo. “Oo nevu pi'mwo kuudokwe me'no imo'nodowadonogano. Aki toro tonol a'mwo abolo Juu tonyuro aiko toru ma'dowadonogano.” Su toro nyulomodomoropinapiyokwe yiulo yogalo akavi neya duu'nyulo. Aga Isuraiyolda'ai pun kemoro poowokalago kuudo tov lumdo me'no kuulopiyodupudogano. A'mwo abolo su tonyuro lumdo kuulopiyodupudo su tov yiunokuudo'maiyo. Lukomgu Juu tooravuro miyawosunodupudo pun Jisasolluro kuuguudo tovino kuudo kuubwepi ton Gooti toollomno nobumwalpinogano. Toro bodopure tonyu Gooti tool jagilno jagilno yowo'ji, Me'nodeyo, donekono. Toro ado'ji su toga'no'gwowi Isuraiyolda'ai a'mwo abolo kun kuruv Gooti toollomno kuudo youragunyumo'nupi Jisasolluno kuudo nuubwepinogano.

1 Koorin 2:7

Toro kuvi kuruv Gooti toolluro pi'mwo kuudo moruudodumdo su to'gwowi yiulo yogalo kwollajukokwono. Aiyoga kwako akav yere mimo'nyoduke togada'ai Gooti tool nemi nekullo'mwojo'moneyokwe pi'mwo kuudo su tov me'no sovrovanekubweyokaikono. Toro sovrovanekubweyoka su tov yiulo kwollajukokwono.

Efesos 1:4

Aiyoga Gooti su tool kwako akavi yere miyokwollosoduke kugada'ai nemino tov Krais Jisasollu neya uuguro'mwonyano'moneyokwe me'no ajanekubweyokaikono. Toro me'no ajanekubweyoka tonol aga gavnokweyolluro a'mwo abolo kuunodo me'no wimo'nodowadonogano. Aki ma'no ma'nodo maiyokwe tonollubusuko nekwonodowodekono. Gooti su tool nemino kalo buuropino wino'no

Efesos 3:2

Gooti tool gamoro womdo tovi momjumovlaiyo'moneyokwe mi me'no ajanubweyoka tovino kevu kuudo youronuma'dupudogaikikono. Toro toonyu Gooti toolluro yasuwa'wino sugumaluko tov kemi ikubwemo'moneyokwe anyabokaikono. Toro anyaboka tokwe yodekubwasodumdonyugono. Su toro womdo tovi momjumovlaiyo'moneyokwe tov Gooti tool mi ajanubweyokanyugono.

Efesos 6:19

Aki nuu kwonyu kuruv Gooti tool anyo'mwojoneyokwe kevu aro tovino subusu'nyogalo neya duudogaulo. Moro mago tov ara'mi toga Gooti tool gavnokweyolluro yogalo tov neya anubweyono. Toro nubweyodowo'jure tokwe yiulo yogalo sumo'nyajuko kuuguudo sugudo tovino neya moruudumwalmonyugono. Toro te nuu luko nyumiyokwe tovino kevu subusu'nyogalo neya duudogaulo.

Kooloosi 1:23

Toro te kevu kemi kuudo uubweyodupudo tovi kuuno gudupolaropi kuumjungovlapi tov guureji neya dovorugwo'mo'narogaulo. Aki kuuguudo sugudo me'no kuu'nopo su tovi muugollu'movopi aki yiuwi'nokai nomapino tonyuno yiuno sogwollo to'no kingovla'mwalpinogaikikono. Kevu su tomgu'aro somjumovlapi tov Gooti toolluro sumdo tovi kaiya'no nonagutokwe wimo'nupinogaikikono. Kuuguudo sugudo kuu'nopo su tov yiuwi'nokai kwako akavi aiyowomno bomje'nugoulodawodokwono. Nuu Poolol kwonyu kuruv kuuguudo sugudo su tokwe neya moruudomollo'moneyokwe a'mwo womdokwe me'no wimo'nodumdonyugono.

Kooloosi 1:26

Kuuguudo su tov aiyoga yiulo apuu'nallajukokwono. Toro kupuu'na'duke tov kworomo bwotonyago abuuwolo'nugwiyajukokwono. Aki aiyogasuro a'mwo abolo bwotonyago ton yowosungelabodopure kuga kuruv kuuguudo su tov yiulo to'no apuu'nallajukokwono. Toro kuvi kuruv aga'no'gwowi kuuguudo apuu'nallajuko su tov Gooti gavnokwe tool gami a'mwo abolo tonyu kuu'maiyo toru'no me'no bomollolupto'nubweyodowodokwono.

Kooloosi 3:3

Kuudo neya jaullulo. Kemoro kwako akavida'ai amwallajupo tov me'no abollungopogaikikono. Toro kuvi kuruv kemoro aiyo nyomjomwekovla'mwalpino kuunodo to'gwowi Krais tooke yiulo kupuu'na'dowodokwono. Aki Gooti toollu me'no uuguro'mwonyodowodokwono.

Kooloosi 4:3

Aki kevu subusu'nyogalo kuudupi su toga Gooti tool nemiyo'mo kudo'aiko kuusanekubweyono'moneyokwe neya duudoganogaulo. Gooti tool kudo'aiko ausanekubweyo'ji su tovi'aro nevu Krais toolluno yiulo yogalo apuu'nallajuko su tokwe a'mwo abolo punyu kuu'maiyo toru'no nomoruudanonogano. Nuvu kuuguudo su tovi moruudomollodore tovino tov mi wuulo ameranubweyoponyugono. Toro toonyu wuulo killo'mo ago tovi kuule'na'dumdonyugono.

2 Tesaloonaika 2:13

Nemi avalobuuravoo, Aguto tool kemino kalo buuropino winodowodekono. Toro togaikullu kemi ma'no ma'nodo tovuro kirumwallo tovida'ai bomollurolovekumokalokwiyo'moneyokwe muudu'nodo togada'ai me'no ajaikubweyokaikono. Toro te kevu Gooti toolluro ilaiyo winodowo'jure tonyu neya uumjunpino'moneyokwe tovino'mo gamoro Kuullo tool kemi me'no aikubweyokaikono. Aki kevu nebaikuuguudo tovino kuudo me'no kuubweyopogaikikono. Toro togaikullu Gooti tool kemi ma'no ma'nodo tovuro kirumwallo tovida'ai me'no abomollurolovekumokalokwokaikono. Gooti su tool nemoro nebaikuuguudo amodekumollajuuwo su tovi'aro kemi aikullo'mwojokaikono. Toro togaikulluno Gooti toollu, “Nenoloo,” subusu'nyogalo neya wuudumwalano'monogano.

1 Timooti 3:16

Toro te nevu aro tovino kuudo noullo maullo miyau'dowadonogano. Gooti toolluro yiulo yogalo kuu'maiyo toru'no me'no bomollolupto'nosodowodo su tov aguto kuunodokwono. Yogalo su tov aro dodowodokwono. “Krais tool a'mwo kulako kuunodo tokwe imo'no'no a'mwo abolo tonyu kwiyalugunyajukekono. Toro toolluno Gooti toolluro Kuullo tool kuu'maiyo aro kuuduuwallajukekono. A'mwo akal Gooti toolluro sugudo to'nodekono. Kuuduuwallajukekono. Aki ensel pworo kwollu me'no kwonomaropekono. Aki gamoro womdokwe tooro yiuwi'nokai kantri tomuu kwolluno kuuguudo amodomollajuporogano. Su toro amodomollajupo toolluno yiuwi'nokai kwako akavida'ai a'mwo abolo pun kuudo kuubweyopekono. Aki toro toollu Gooti tool muunyu kai'muuno mokailno sumaiyokwe gamoro bako jurogudo tovi anakuuto tomuu aulomorumwallokaikono.” Yogalo aguto su tov toro dodowodokwono.

2 Timooti 1:9

Kuudo neya jaurono. Gooti tool nemi ma'no ma'nodo tovuro kirumwallo tovida'ai me'no abomollurolovonekumokalokwokanogano. Aki nevu gamoro pasudo idopto'nodo tonyu uumjungovla'mwalano'moneyokwe adonekumarokanogano. Gooti toolluro su toro adonekumaroka tov nevnokwenolluro womdo yodowore tovida'aiyo'maiyo. Toro kuvi kuruv Gooti gavnokwe toolluro ilaiyo winodowodo tokwe'aro gamoro yasuwa'wino sugumaluko tokwe'aro toval nekullabodowodo tovida'aiyokwono. Gooti toolluro yasuwa'wino sugumaluko su tov aiyoga yiuwi'nokai ton yere mimo'nyodopure togada'ai Krais Jisasollu'aro nonekullabiyo'moneyokwe me'no sovrovanekubweyajukokwono.

2 Timooti 4:17

Toro kuvi kuruv Aguto toolno'gwowi numi sobanyo mollonyudavo'no jurogudo adanyumwojokaikono. Toro tovino tov nuu Gooti toolluro kuuguudo sugudo tokwe moruujuno sumoneyokwe yiuwi'nokai Juu tooravuro miyawosunodupudo ton me'no kuu'nopiyopokwono. Aki su toro toga a'mwo pworo me'no aromiyanubweyopujuko kuvi kuruv Aguto tool mi abomollurolovonumokalokwokaikono. Su tov aro to'busukokwono. Nuu laiyon pwolluro mago tovi me'no mwalodore toonyu Aguto tool agalouro'mwojonumarokanyugono.

Taitos 1:2

Su toro uumjungovlavopi aiyo yiunokuudo mujomwekovlaiyo'moneyokwe tov kuvinono mallo'mo sogwollo to'no kingovla'mwalpinogano. Aiyo mujomwekovlaiyo'moneyokwe su tovino aiyoga yiuwi'nokai ton yere mimo'nyodopure toga Gooti tool subuu'yamju me'no kwiyajukekono. Aki subuu'yamju kwiyajuko Gooti su tool kuunano yogalo puru'monodo kuruv miyoukuu'najokwekono.

1 Pita 1:20

Aiyoga kwako akav yere mimo'nyoduke togada'ai Gooti tool Krais su toolluro mujako abwolawo'ji tokwe kemi mobiyekumallo'moneyokwe Krais toollu me'no ajesokaikono. Toro te aiyowo'mo akaga Gooti tool Krais su toollu kemi kuu'maiyo toru'no me'no abomollolupto'naikubweyokaikono.

Adodolukuu'nosungiko 13:8

Toro te yiuwi'nokai a'mwo abolo kwako akavi mwalodupudo ton ibesa'aiyo kaiya'no kuumwiyo su toollu sulomoropiyajupogano. Toro sulomoropiyajupo su ton aiyoga kwako akav yere mimo'nyoduke togada'ai kemino yovo ton Buukiyo Aiyo Yiunokuudo Mujomwekovlaiyo'moneyokwe tovi miyakwollungikogano. Buukiyo su tov Sipsip Muugunyo me'no aromiyosopo toollurokwono.

Adodolukuu'nosungiko 14:6

Aki toruda'ai nuu ensel pwol muunyu kai'muu sulugumdo tovi akuuto toru'aro pla'mduke toollu kwononyugono. Ensel su tool a'mwo abolo kwako akavi mwalodupudo tonyu moruujo'moneyokwe kuuguudo sugudo tokwe amokavlavokaikono. Kuuguudo sugudo su tov yiunokuudo mujo'movla'mdowodokwono. Toro tokwe momwora'no sumaiyokwe yiuwi'nokai kantri togai'aro yovodolobunyo togai'aro yogaljo go'no go'no dodupudo togai'aro judo'no judo'no kula'nokakwe togai'aro tonyu moruujo'moneyokwe amokavlavokaikono.

Adodolukuu'nosungiko 17:8

Ibesa'aiyo kaiya'no kuumwiyo kwonmodo su tool aiyoga amwallajuko kwol kuruv aga'no'gwowi mamwallo. Toro kwol kuruv wobo toga kuuraibuuso puruv daneyajokwe tovida'ai nyulabiyo'mo sadopiyo. Toro sulabwo'ji su toollu Gooti tool kaiyako yiunokuudo mollounapiyo'moneyokwe du'muudo tovi noolomovodukwopiyawonekono. Toro te ibesa'aiyo kaiya'no kuumwiyo tool sulabwo'ji toga a'mwo abolo ton luko morumoukuropipinogano. A'mwo abolo su ton aiyoga kwako akav yere mimo'nyoduke togada'ai kemi yovo ton Buukiyo Aiyo Yiunokuudo Mujomwekovlaiyo'moneyokwe tovi miyokwollosungikogano. Toro tonyuro luko morumoukuropipino tov aro tovinokwono. Sumdomgu ibesa'aiyo kaiya'no kuumwiyo amwallajuko su tool aga mamwallo. Toro kwol kuruv lukomgu kuuraibuuso daneyajokwe tovida'ai aki aiko te nobillalo'nonekono. Su toro tovino luko morumoukuropipinogano.

Adodolukuu'nosungiko 4:11

“Oo yiuno nemi Gooti tookuno nokwo'mekugono. Yiuno guvu judo tookuno yovo aguto maro'bi aki judo tookuji kwako tomuu'aro mwalmwalanonogano. Aki toro tookujuno, Jurogudoloo, ilomodomorogwopiyodowadekugono. Su tov aro tovinokwono. Guu yiuwi'nokai noonyumwonyu tonyu sokwollosodekugono. Aki toro tooku yiuwi'nokai tonyu yiuno guvnokwekujuro ilaiyo gujunodowodo tovi'aro sokwollosodogano. Aki yiuwi'nokai sokwollosodo su ton gumi ilaiyo gujunodowodo su tovi'aro kuuno wo'dupudogano.”