Su toro imo'nono tonyuno Gooti tool aro kuudo me'no saurokaikono. Yiuwi'nokai kwako akavida'ai a'mwo abolo ton yiunokuudo nyemnopipiyo. Aki moro a'mwo abolo me'no ajesungiko ton nobolopipiyo. Toro tovino tov tabunyuwuulo su tovuro iruko tobuullu nuvu pubuul nomodovomokwolamonyugono. Kuudo saurokaikono. Su toro kuudo sauroka tovino tov tabunyuwuulo abai'mowo'ji tovuro iruko tobuullu Gooti tool pubuul nomodovomokwolabwonekono.
Efesos 1:4 - Gooti Toolluro Yogalokwono4 Aiyoga Gooti su tool kwako akavi yere miyokwollosoduke kugada'ai nemino tov Krais Jisasollu neya uuguro'mwonyano'moneyokwe me'no ajanekubweyokaikono. Toro me'no ajanekubweyoka tonol aga gavnokweyolluro a'mwo abolo kuunodo me'no wimo'nodowadonogano. Aki ma'no ma'nodo maiyokwe tonollubusuko nekwonodowodekono. Gooti su tool nemino kalo buuropino wino'no အခန်းကိုကြည့်ပါ။ |
Efesos 1:4
55 ပူးပေါင်းရင်းမြစ်များ
Su tov aro tovinokwono. A'mwo kuunano yogalo youkuu'najokwe pworo bopi ikudupinorogano. “Nuu Krais toonyugono.” Aki pworo ikudupinorogano. “Nuu proofet toonyugono.” Toro tooro kemi kaiya'nodo tomuuno mollubworomokavlaiyo'mo tooro duuwallo jurogudo pun ikuduuwallupinorogano. Aki Gooti toolluro a'mwo abolo me'no ajesungiko kunyu ki'nomallo'mo puuto puruv kurukweyo'mno'juki nokwo ki'nomapinorogano. Toro kworo kuruv ku'nono mai'nomapinorogano.
Nuu su toro wolabodo'mure toga moro yiuwi'nokai a'mwo abolo ajesungiko tonyu bomollu'bwollo'mo tov moro ensel toorai biugel tovuro deko bwotonyo tokwe morapimonyugono. Su toro amorapimi toga moro a'mwo abolo ajesungiko ton yiuwi'nokai kwako tokwe sulugumdo tokwe tovalluro aiyowo'mo do'gwapiyo tovida'ai yiuno aiyowo'mo do'gwapiyo tomuuno amjomwekwingopo su tonyu miyomno bomollu'bwo'mogano.” Jisasol toro kuudokaikono.
Su toro toga aguto kig toonyu a'mwo abolo anato tomgu amwalpi tonyu aro wuudumonyugono. “Oo moro Nyunumiyago toolluro sugudo pun ikubweyodowodogaikikono. Toro togaikul aguto kig mido mollomwalo tovida'ai sugudo ton kuvinono mapino'moneyokwe dobiloo.” Wuudumonyugono. Sugudo mapino su ton aiyoga kwako akavi muudu'no sokwollosoka togada'ai kemiyo'mo me'no sovrovaikubweyokagano.
Aki nuvu sipsip pworogai'aro kurukwenyugono. Sipsip su tooro sipsip kuurupto tovi anakuuto tomuu mamwalodupudorogano. Toro kuvi kuruv sipsip gabovo su toorogai'aro mokabo'mi sumdomguda'ai sipsip toorogai neya moguro'mwojosumonyugono. Toro amokami su tooro moro yogaimaguurai tovi kaduko nyumwalpinorogano. Aki yiuwi'nokai sipsip amoguro'mwojosumi su tooro mollu'bwoto yiuno puru'mono imo'nupinorogano. Yiuwi'nokai sipsip su toorai duuwatokwe tool yiuno pwolnodonyugono.
Kevu mi miyenyubworonumaroporekikono. Toro kuvi kuruv nuvno'gwowi kemi yenyubworekumarono me'no ajaikubweyorekikono. Toro ajaikubweyo su tov kevu plavopi moro womdo tovi imwalpino'moneyokweyokwono. Aki moro womdo su tovi amjumovlapi tovi'aro ikulsulo yiunokuudo mujo'movlaiyo'moneyokwe tollovo neya de'nogaulo. Su tov aro tovinokwono. Kevu moro Nyunumiyago toollu mino yovo tovida'ai buro'nyo buro'nyo tonyuno kuudoganpi tov kuvinono nomollumo'nekubweyabwonekono.
Mi Nyunumiyagoloo, guvnokwekujuro a'mwo abolo anyabodo ton moro amwalmi tomuu nuuge neya kuulomwalpino'moneyokwe nyunodowodonyugono. Moro su toro nyunodowodo tov aro tovinokwono. Guu kwako akavi yere miyokwollosodore kugada'ai mino kalo buuropino me'no agujunyajukekugono. Toro tovino tov guvnokwekujuro bako bwotonyo tov mi me'no nyabodumdekugono. Toro te gumoro a'mwo abolo anyabodo su tobuuro guvnokwekujuro bako bwotonyo nyabodumdo tovi neya wonpuro. Su toro wonpino'moneyokwe nyunodowodonyugono.
Toro kuudolo tovi a'mwo abolo Juu tooravuro miyawosunodupudo ton wuu'no'mno ilaiyo bwotonyo ino sumaveyokwe Aguto toolluro kuuguudo tovino sulomoropiyapogano. Aki yiuwi'nokai a'mwo abolo Gooti toolluro aiyo yiunokuudo mujomwekovlaiyo'moneyokwe ajesoka kubuuro kuruv gamoro kuuguudo tovi wuu'nyuno sumaveyokwe kuudo kuubweyopogano.
Aki nevu Gooti toolluro kuunodo wimo'nyo'moneyokwe me'no ajanekubweyoka tonolluno aro kuudo yau'dowodekono. Oo moro a'mwo abolo sugudogano. Gooti gavnokwe tool su toro kuudo me'no yanekuu'dowodo tovino tov gamoro sumdo tovi sugudo wimo'nodowadonogano. Toro tonolluno a'mwo abolo pun, “Ma'no ma'nodokweyogaikikonoo,” janekwonyo'moneyokwe pun nonagutomuugono.
Miyobuuravoo, neya duu'nyulo. Kevu Moosesolluro loowo tovi ki'nato womdo wiyodopure togaikullu Gooti tool nobomollurolovekumokalokwiyo'moneyokwe me'no adekumarokaikono. Kevu ki'nato womdo tovida'ai me'no birolo'nugolokwodupudo togaikulluno tov kaiya'no kuudo aro nyau'mwalpiyo. Oo nevu loowo tovi dolago tomuu mamwalodowado tonolluno tov nemi kuudo uumdo tovuro kaiya'no pasudo toorai nokwo kirounugovla'mwalanonogano. Kevu kaiya'no kuudo su toro nyau'mwalpiyo. Toro kugaikul kuruv kalo buuropino winyo'moneyokwe pasudo su to'gwowi kevu Jisasolluro a'mwo abolo togaikul imgu amgu neya duuwinogaulo.
Toro kuvi kuruv a'mwo pwol Gooti toolluro Kuullo toollu kuumjungovlawo'ji toolluro sulo ki'nono tono'gwowi arogano. A'mwo abolo tonyuno kalo buuropino winyo'mo pasudo tokwe'aro poowokalago kuunodo tovida'ai ilaiyo yo'mo pasudo tokwe'aro sumwoluko kavo wosunyo'mo pasudo tokwe'aro jul'nyo bwi'mo'mdowo'jure kuga kuruv muugollu'meyo'mo pasudo tokwe'aro a'mwo abolo tonyuno ilaiyo mollo'mo pasudo tokwe'aro yanyago wimo'nyo'mo pasudo tokwe'aro sugupasudo tovi gudupolallo'mo pasudo tokwe'aro
Kuudo neya jaullulo. A'mwo pwol Krais Jisasollu me'no uuguro'mwonyodowodo tool gami lakulkulako tov ado'no'jo'mdeyo oo mado'no'jo'mdeyo kuruv su toval aguto mimo'nodubulovakono. Toro kuvi kuruv aguto to'gwowi arokwono. A'mwo pwol Krais Jisasolluno kuudo uubweyodowodo su tovi'aro a'mwo abolo punyuno kalo buuropino winmwalono to'gwowi agutokwono.
Toro te neya duu'nyulo. Nevu yiuwi'nokai toga sugupasudo tonyu mujumovlaiyo'moneyokwe Gooti tool aiyogada'ai me'no sovrovanekubweyajukekono. Sugupasudo su tonyu kuvinono uumjungovlaiyo'moneyokwe Gooti tool nevu Krais Jisasollu uuguro'mwonyodowado tonollu aiyo aiko te me'no yokwollanekubweyodowodonogano.
Aki kevu kuudo me'no uubweyodupudo togaikullu Krais gavnokwe tool kemoro poowokalago kuudo tonyu nokwo mollekuda'mwalonekono. Toro mollekuda'mdowo'jure toga kevu Gooti toolluro kalo buuropino ikullunodowodo tovi guureji gudupola'mwalpinogaikikono. Toro togaikul ipuluko guureji gudupola'dowodo to'busuko kubalno guureji nokwo da'mwalpinogaikikono.
Kevnokwe togaikul bwolomoropinapi Jisasolluro a'mwo abolo punyu kwako tomuu'aro neya duuwiyogaulo. Aki toro tonyu kavo duubemwojogaulo. Toro togaikullu a'mwo abolo pun kaiyako saikullugolpi tov kevu sumwoluko su'mno yere nyumo'numwalpiyo. Toro kugaikul kuruv kalo buuropino ikullunodowodo tovino tov a'mwo abolo kaiyako saikullugolpi tonyu ilaiyo to'no domollomarogaulo.
Aki Krais tool nevu yiuwi'nokai tonolluno kalo buuropino winodowodekono. Toro toolluno tov nemi nonekullo'mwojo'moneyokwe Gooti toollu sipsip pwolbusuko wiroudapino'no Gooti toollu wobeya sudo kuunyokwe to'busuko kwimo'nokaikono. Krais tool nemino kalo buuropino wino'no toro sokaikono. Su toro to'busuko kubalno kev kugaikul kuruv yiuwi'nokai a'mwo abolo tonyuno kalo buuropino neya domollogaulo.
Su toro amollol'movonekumaroka tov aro tovino'mokwono. Nevu Krais toolluro mollu'bwoto tonol gavnokweyolluro sumdo tovi davowa'ji toga sugumaluko neya wimo'nyo'moneyokweyokwono. Aki gamoro sumdo tovi nevu muu'imuulokweyo'mdeyo oo iwakuumwiyokweyo'mdeyo oo kaiya'no kuumwiyokweyo'mdeyo nuuwimo'na'jokweyo'mokwono. Toro kunol kuruv gamoro sumdo tovi sugudo to'no wimo'nyo'moneyokwe amollol'movonekumarokaikono.
Su tov aro tovinokwono. Kevu Gooti toolluro kwoloraiyo togaikul pasudo pworogai kaiyako nomollugolamo'numwalpiyo. Toro kugaikul kuruv kaiya'no nonagutokwe to'no neya jumo'nogaulo. Toro togaikul kwako akavida'ai a'mwo abolo kaiya'nodokwe togai'aro kirovanyuvanyokwe togai'aro tonyu akuuto toru bako pwopiyodowodo to'busuko nokwo wimo'numwalpinogaikikono.
Kevu su toro sumo'nyajupo kugaikullu kuruv Gooti toolno'gwowi Krais toolluro kulako aboloka tovi'aro gamiyomno wobo toru ikumokabo'no ibwoto'nyo'moneyokwe me'no amollumo'naikubweyokaikono. Su toro amollumo'naikubweyoka tov aro tovinokwono. Kevu Krais toolluro a'mwo abolo togaikul gavnokweyolluro sumdo tovi adapi toga yiuno sugumaluko neya wimo'nupino'moneyokwe tovinokwono. Aki gamoro sumdo tovi kevu kaiya'no kuumwiyo nonagutokwe neya wimo'nupino'moneyokweyokwono. Kevu su toro kwimo'nupi togaikulluno a'mwo pwolnodo kwol kuruv aro nekudumwalpiyo. “Kaiya'no yodupudogaikikono.” Toro nekudumwalpiyokwe tovino'mo Gooti tool kemi gamoro ibwoto'nyo'moneyokwe amollumo'naikubweyokaikono.
Toro toonyu aro tovino nyunodowodonyugono. Kevu yiuwi'nokai togaikul Jisasolluro a'mwo abolo pubuurai kalo buuropino neya domollogaulo. Kalo buuropino amollupi su tov wuulo to'busuko kevu imgu amgu togaikullu jurogudo nokwo galogudupolaikwo'mwalonokwono. Toro gudupolaikwo'dowo'jure tovi'aro kemoro poowokalago tonyu jurogudo nokwo daikullumwojumwalonokwono. Aki kevu Gooti toolluro yiulo yogalo apuu'nallajuko su tov aga kuu'maiyo toru'no bomollolupto'naikubweyodowodokwono. Toro tovino kavlo tov me'no youroma'dupudogaikikono. Kavlo su tov Krais tool kwekono. Kevu Krais su toolluno kuudo me'no youromoropiyodupudo tov kuvi kuunogano. Kuudo su tovi youroma'dupudo togaikul Gooti toolluro sumdo tovi kevu gamoro yiuwi'nokai sugumaluko tollovo me'no ma'dupudo tonbusuko wimo'nodupudogaikikono.
Gooti tool gamoro a'mwo abolo kuunodo wimo'nyo'moneyokwe kemi me'no ajaikubweyokaikono. Toro togaikulluno kalo buuropino winyokwekono. Toro tovino tov kevu youro mollosodupudo to'busuko kubalno pasudo akanyu neya domollosogaulo. Kemi poowokalago tokwe a'mwo abolo tonyuno kalo mamwonyo'mo pasudo togai'aro a'mwo abolo tonyu ilaiyo to'no igollo'mo pasudo togai'aro bwolomoropinyo'mo pasudo togai'aro kavo molludo'movlaiyo'mo pasudo togai'aro jul'nyo baiki'mo'mdowo'jure kuga kuruv womdo mimwogapiyo'moneyokwe pasudo togai'aro pasudo su toro tonyu kevu neya domollosogaulo.
Aki kevu a'mwo abolo punyuno kalo buuropino guurejuno ikullungovla'mwalono'moneyokwe tov nemi Aguto toolno aikullo'mwojono. Toro ikullo'mwojodowo'jure tokwe kevu Gooti toolluro a'mwo abolo togai'aro yiuwi'nokai a'mwo abolo kugai'aro tonyuno kalo buuropino nokwo wingovla'mwalpinogaikikono. Kalo buuropinodo su tov guureji yogullumovla'mno yogullumovla'mno yowo'ji kemi akuuto toru bwotonyo nokwo ikullumo'numwalonokwono. Su toro aikullumo'no'ji tov nevu kemino kalo buuropino nekullunodowodo to'busuko kubalno kev kugaikul kuruv aval'no nokwo mujumovla'mwalpinogaikikono.
Kuudo neya jaurono. Gooti tool nemi ma'no ma'nodo tovuro kirumwallo tovida'ai me'no abomollurolovonekumokalokwokanogano. Aki nevu gamoro pasudo idopto'nodo tonyu uumjungovla'mwalano'moneyokwe adonekumarokanogano. Gooti toolluro su toro adonekumaroka tov nevnokwenolluro womdo yodowore tovida'aiyo'maiyo. Toro kuvi kuruv Gooti gavnokwe toolluro ilaiyo winodowodo tokwe'aro gamoro yasuwa'wino sugumaluko tokwe'aro toval nekullabodowodo tovida'aiyokwono. Gooti toolluro yasuwa'wino sugumaluko su tov aiyoga yiuwi'nokai ton yere mimo'nyodopure togada'ai Krais Jisasollu'aro nonekullabiyo'moneyokwe me'no sovrovanekubweyajukokwono.
Su toro tovino a'mwo pworavuro yiuwi'nokai buro'nyo buro'nyo kaiyako yanyugolodopure kuruv nuvu kavo to'no mwalodum mido mamallokwenyugono. Moro su toro yodumdo tov a'mwo abolo Gooti toolluro me'no ajesungiko tobuuraiyo'mokwono. A'mwo abolo su ton Krais Jisasollu kuuguro'mwonyupi tovi'aro kemi ma'no ma'nodo tovuro kirumwallo tovida'ai nokwo abirolo'nugolokuupuro. Aki a'mwo abolo su ton Gooti tooke gamoro bako bwotonyo anakuuto tomuu aiyo yiunokuudo mujomwekovlaiyo'moneyokwe kuruv nokwo amapuro.
Toro kuvi kuruv Gooti tool gamoro mollu'bwoto tovi mojudapiyo'moneyokwe nebaikuuguudo to'gwowi sulo bwotonyo toolbusuko jurogudo me'no kuudapingikokwono. Toro kuudapingiko su tovi aro sakwollungikokwono. “Aguto tool gamoro a'mwo abolo tonyuno kuudo me'no youroma'dowodekono.” Aki puukwollo sakwollungiko puruv arokwono. “Yiuwi'nokai a'mwo abolo ton, Oo nevu Aguto toolluronogano, dodupudo su tobuuro kaiya'no pasudo toorai buulo neya uugunyumopiyogapuro.” Sakwollungikokwono.
Mi avalobuuravoo, neya duu'nyulo. Kwako akavida'ai a'mwo abolo apoo'nyaiyo mwalodupudo tobuuro kuudo uubweyodopure tovida'ai muunyu kai'muuda'ai noonyumwonyu bwotonyagokwe tonbusuko imo'nyo'moneyokwe Gooti tool me'no ajesokagano. Aki a'mwo abolo apoo'nyaiyo su tobuuraino Gooti toolluro subuu'yamju me'no aduuwiyoka puruv arokwono. “Yiuwi'nokai pwolno puru'monodo mino kalo buuropino winyokwe ton nuu aguto kig toonyuro mido mollomwalo toru nuuge noulomwalmwalpinogano.” Adokaikono.
Jisas Kraisolluro Ganumiyago Gooti tool aiyogada'ai kemi me'no ikwono'no ajaikubweyokaikono. Aki gamoro Kuullo kuulekumwalodowodo toollu'aro kevu gamoro a'mwo abolo kuunodo wimo'nodupudogaikikono. Gooti toolluro kemi su toro saikullugoloka tov aro tovino'mokwono. Kevu Jisas Kraisolluro yogalo tovi uumjungovla'mwalpino'moneyokwe tovinokwono. Aki gamoro mujako tokwe kemi mollol'movaikudukwopiyono'moneyokwe tovinokwono. Oo Gooti tool gamoro yasuwa'wino sugumaluko ton kemi guureji nokwo ikubwemovla'mwalonekono. Aki kevu sumwoluko kavo wosungovlaiyo'moneyokwe kuruv Gooti tool nokwo ikullo'mwojumwalonekono.
Toro kuvi kuruv kemino'gwowi Gooti tool me'no ajaikubweyokaikono. Toro togaikul kemi aguto kig Gooti toolluro pris womdokwe wimo'numwalpino'moneyokwe me'no imo'nodupudogaikikono. Aki a'mwo abolo pun kemi aguto kig toolluro kantri toru mwalodupudo tonbusuko kubalno kevu Gooti gavnokwe tooke mujomwekovla'mwalpino'moneyokwe gamoro a'mwo abolo wimo'nodupudogaikikono. Aki kevu Gooti toolluro me'no ajaikubweyoka togaikul yiuno gavnokweyolluro a'mwo abolo wimo'nugovla'mdupudogaikikono. Toro tovino tov kevu Gooti toolluro pasudo sugumaluko yaikullugolodowodo tonyuno a'mwo abolo punyu nokwo moruudumwalpinogaikikono. Gooti su tool kevu dugumwuulo tomuu amwallajupo togaikullu bomollurolovekumokalokwiyo'moneyokwe dekuma'no sumaiyokwe gamoro bako sugumaluko tomuuno amogaibworekumokaulokaikono.
Mi ibwoto'nyobuuravoo, kevu su toro ikullumo'nono tovino sogwollo to'no kinomwalodupudogaikikono. Toro tovino tov kevu Gooti toolluro sumdo tovi dosudosumaiyokweyo'mdeyo oo kaiya'nodomaiyokweyo'mdeyo wimo'nupino'mo womdo bwotonyo neya domjumovlavogaulo. Aki kevu yiuwi'nokai a'mwo abolo tobuurogai sumwoluko noullo wosungovlaiyo'moneyokwe kuruv womdo bwotonyo neya domjumovlavogaulo.
Toro te Gooti toolluro nemino kalo buuropino winodowodo su tovino nevu kuudo me'no youroma'dowadonogano. Aki su to kuvino kuudo uubweyodowadonogano. Kalo buuropino pasudo su tov Gooti toollu uuwo'dowodokwono. Toro te a'mwo pwol kalo buuropino winyo'moneyokwe pasudo su tovi amjumovlawo'ji tool Gooti toollu me'no uuguro'mwonyodowodekono. Aki Gooti tool a'mwo su to kwollu kuruv me'no uuguro'mwonyodowodekono.
Toro te yiuwi'nokai a'mwo abolo kwako akavi mwalodupudo ton ibesa'aiyo kaiya'no kuumwiyo su toollu sulomoropiyajupogano. Toro sulomoropiyajupo su ton aiyoga kwako akav yere mimo'nyoduke togada'ai kemino yovo ton Buukiyo Aiyo Yiunokuudo Mujomwekovlaiyo'moneyokwe tovi miyakwollungikogano. Buukiyo su tov Sipsip Muugunyo me'no aromiyosopo toollurokwono.
Ibesa'aiyo kaiya'no kuumwiyo kwonmodo su tool aiyoga amwallajuko kwol kuruv aga'no'gwowi mamwallo. Toro kwol kuruv wobo toga kuuraibuuso puruv daneyajokwe tovida'ai nyulabiyo'mo sadopiyo. Toro sulabwo'ji su toollu Gooti tool kaiyako yiunokuudo mollounapiyo'moneyokwe du'muudo tovi noolomovodukwopiyawonekono. Toro te ibesa'aiyo kaiya'no kuumwiyo tool sulabwo'ji toga a'mwo abolo ton luko morumoukuropipinogano. A'mwo abolo su ton aiyoga kwako akav yere mimo'nyoduke togada'ai kemi yovo ton Buukiyo Aiyo Yiunokuudo Mujomwekovlaiyo'moneyokwe tovi miyokwollosungikogano. Toro tonyuro luko morumoukuropipino tov aro tovinokwono. Sumdomgu ibesa'aiyo kaiya'no kuumwiyo amwallajuko su tool aga mamwallo. Toro kwol kuruv lukomgu kuuraibuuso daneyajokwe tovida'ai aki aiko te nobillalo'nonekono. Su toro tovino luko morumoukuropipinogano.
ကြော်ငြာတွေ