2 Timooti 4:1 - Gooti Toolluro Yogalokwono1 Krais Jisasol kwako akavi aikomgu nobiyalo'nonekono. Toro abiyalo'no'ji toga aguto kig su toolluro mido mollomwalo tov nobwolomolludapiyonekono. Su toro toga a'mwo abolo aiyo amwalpi togai'aro me'no abolpi togai'aro yiuwi'nokai su tonyuro pasudo toorai nojainyubworonekono. Toro tovino tov nuu Gooti tooke'aro Krais Jisaseke'aro tooralluro sumdo tovi gumi kuu'maiyo toru'no duudapi yogalo aro gudumo'mokwono. အခန်းကိုကြည့်ပါ။ |
2 Timooti 4:1
35 ပူးပေါင်းရင်းမြစ်များ
A'mwo su tool gamoro aguto kig mido mollomwalo tovi me'no malluno sumaiyokwe aikomgu abokaikono. Me'no bai'mo'mno sumaiyokwe toga a'mwo pworai aro amodapiyokaikono. “A'mwo womdokwe nuugwiyo kwiyo su tooro miyomno abupureyokwe kevu neya dodomallulo. Su tov nuvu aro tovino kuudo youroma'mo'monyugono. Moro nuugwiyo kwiyo su tovi muunyu toru nuugwiyo pugai'aro mollu'bworosodupudorodukoneyokwe tovino kuudo youroma'mo'monyugono.”
Toro nomwalno sumawoneyokwe a'mwo abolo tonyu kuuguudo sugudo moruudomollo'moneyokwe Jisasol aro tovino adanekullokaikono. Kevu a'mwo abolo tonyu aro domoruudomollogaulo. “Gooti tool Jisasollu me'no ajesokaikono. Toro ajesoka tool a'mwo abolo aiyo mwalodupudo togai'aro me'no bolodupudo togai'aro tonyu kooti yogalo duuwiyo'moneyokwe Gooti tool ajesokaikono.” A'mwo abolo tonyu toro domoruudomollogaulo. Adanekullokaikono.”
Su toro danekullodowodo tov aro tovinokwono. Gooti tool yiuwi'nokai kwako akavida'ai tonollu nebal'no kooti yogalo danekullo'moneyokwe iruko pullugwo me'no ajesokaikono. Aki kooti yogalo tovi mollomwallo'moneyokwe a'mwo pwollu me'no ajesokaikono. A'mwo ajesoka su toolluno Gooti tool yiuwi'nokai a'mwo abolo tonollu kuu'maiyo toru'no me'no anekuduuwallokaikono. A'mwo ajesoka su tool me'no bino sumaiyokwe aboloka toollu Gooti tool aiyo aiko te amodukavokaikono. Su toro tomgu'aro me'no anekuduuwallokaikono.” Poolol toro kuudokaikono.
Toro te lukomgu Gooti toolluro iruko me'no ajesungiko toga abai'mowo'ji moro yiuwi'nokai kuuguudo sugudo moruudomollodumdo akav kuvinono nyumo'nonokwono. Su toro toga yiuwi'nokai a'mwo abolo tonyuro jupweyo kuudo yau'dupudo toorai yiuno kuu'maiyo toru'no bomollolupto'nubweyowo'ji kooti yogalo duuwiyonekono. Gooti tool Krais Jisasollu'aro toro yonekono. Moro kuuguudo moruudomollodumdo tov torokwono.
kirovanyuvanyu kuumwiyo su tool yiuno kuu'maiyo toru'no nobillalo'nonekono. Su toro abillalo'no'ji toollu Aguto Jisasol gami mago tovida'ai suumjudo lokabodowodo tokwe noromiyosonekono. Aki Aguto Jisasolluro abwo'ji togasuro bako bwotonyo pwopiyono tokwe kirovanyuvanyu kuumwiyo su toollu kaiyako yiunokuudo nomollounapiyonekono.
Nuu Gooti tooke'aro Krais Jisaseke'aro gamoro ensel toorogai'aro tooravuro muugonanuwo'dopure toru gumi guureji aro adagujumono. Moro yogalo me'no adagubwemwako akanyu guu neya duumjunogawono. Toro tooku a'mwo abolo pun gomno gomno somuudeyapinpi tov guu a'mwo abolo yiuno avalo punyuno kuu'dello nuubwemwalbiyo. Toro kweku kuruv yiuwi'nokai tonyu yiuno aval'no neya jugologawono.
Toro te aga nemi bomollurolovonekumokalokwiyo'moneyokwe Krais Jisasol biyanekulo'nodowo gamoro yasuwa'wino sugumaluko su tovino kuu'maiyo toru bomollolupto'nanekubweyodowodekono. Toro tool bolnodo tovuro jurogudo tovi kaiyako me'no amollounapiyokaikono. Toro mollounapino sumaiyokwe aga'no'gwowi gamoro kuuguudo sugudo tov bako to'busuko imo'nodowodokwono. Toro tovi'aro aiyo yiunokuudo mujomwekovlaiyo'moneyokwe tovi kuu'maiyo toru me'no bomollolupto'nosodowodekono.
Guu Jisasolluro a'mwo abolo tobuuro kuuguudo akavino kuudo po'dogalo yau'mwalpino'moneyokwe duudapi yogalo neya duuwiyogawono. Aki guu Gooti toolluro sumdo tovi aro tovino kuu'maiyo toru'no neya dodumul'mwojogawono. A'mwo abolo su tobuuro yogalo judo'no judo'no pwekwojo ku'nono mwiyo'mwojokwe su tekwojaino nyoullajunmwalpiyo. Yogalo su tekwojaino soullajunpi to'gwowi a'mwo abolo kuu'nupi tonyu jurogudo ku'nono maduuwimwojonokwono. Toro kuvi kuruv a'mwo abolo kuu'nupi su tonyu yiuno kaiyako to'no jugolonokwono.
Toro te yiuwi'nokai judo'no judo'nodo tomgu'aro kaiyako yanyugolodupudo kuvi kuruv Aguto toolno'gwowi bomollurolovonumokalokwowo'ji gamoro ago muunyu kai'muuno nonumokailawonekono. Toro anumokailawo'ji toga aguto kig su tool gamoro mido mollomwalodowodo toru ilaiyo to'no nomonumwallonekono. Nevu Aguto su toolluno yiuwi'nokai toga yovo aguto to'no wiyowa'ji yiunokuudo ilomoropimwolowanekono. Nebal'nodokwono.
Toro te aga resis su tovi me'no uuwolo'mdupudo toorai mubiyo tov Aguto tool me'no mollovrowosodowodekono. Toro mollovrowosodowodo tovida'ai numiyo'moneyokwe tov mino sogwollo ainyunadopiyo. Numiyo'moneyokwe mubiyo su tov arokwono. A'mwo aguto kig tooravuro miguto yesodupudo tokwono. Miguto su tov yiuwi'nokai a'mwo abolo Gooti toolluro sumdo tovi sugudo wimo'nodupudo tonyuno to'no mapinokwono. Aguto tool a'mwo abolo tonyu pi'mwono jainyubwo'dowodo su toolluro iruko kwolabwo'ji toga miguto su tov kuvinono nonyabwonekono. Aki yiuno nuu judo toonyuno to'no nyabwonolmaiyo. Toro kwol kuruv yiuwi'nokai a'mwo abolo Aguto Jisasolluro aikomgu wolabwono tovino sogwollo kinodupudo kubuurai kuruv miguto su tov nuuwiyonekono.
Su toro yomjomwekovlavowa'ji lukomgu Jisas Kraisol gamoro bako bwotonyo tokwe nobiyalo'nonekono. Krais Jisas su tool nemi aguto Gootekono. Aki nemi ma'no ma'nodo tovuro kirumwallo tovida'ai mollurolovonekumokalokwiyo'moneyokwe tool kwekono. Toro toolluno sogwollo to'no kingovlavowa'ji lukomgu kuvinono abiyanekulo'no'ji toga nemoro poowokalago ton ilaiyo ibwosungoulapinogano.
Kevu tagunyo baikullumo'nodopure toorai kula'nyo toga'gwo mokavla'mdopure su tovi'aro Gooti tool kemoro kuudo uubweyodupudo tovi yamju ikulloganyokwekono. Kevu gool tovino kuudo nyau'mwakovo. Gool tov kuunodo'mdukoneyokwe tovino yamju wiyoganyo'mo tooro gool tovi duko tokwe dovelogullumowopiyodupudorogano. Su toro to'busuko kubalno buro'nyo buro'nyo tagunyo kemi abaikullumo'nupi su tooro kemoro kuudo uubweyodupudo tov kuunodo'mdukoneyokwe tovino yamju ikulloganyo'morogano. Toro kuvi kuruv kemoro kuudo uubweyodupudo to'gwowi gool tovi uuwolo'mdowodokwono. Aki Jisas Kraisol kuu'maiyo toru'no abwiyalo'no'ji toga kemoro kuudo uubweyodupudo tovino ilomodomoropiyawo'ji gamoro jurogudo tov kemi nekubweyonekono. Aki yovo aguto nekullabwonekono.
A'mwo abolo kuudo muubwemwakopo su ton lukomgu Gooti toolluro sumdollu toru nodapinogano. Gooti su tool yiuwi'nokai tonyu kooti yogalo duuwiyowo'ji nojainyubwollo'moneyokwe tov me'no sovraimwonyomwallajukekono. Toro tool a'mwo abolo aiyo kuuno mwalodupudo togai'aro aki a'mwo abolo me'no bolodupudo togai'aro yiuwi'nokai tonyu jainyubwollo'moneyokwe kooti yogalo noduuwiyonekono. Toro aduuwiyo'ji toga yiuwi'nokai su ton kemoro pasudo mujumovla'mdupudo tooraino kavlo tov yiuno kuu'maiyo toru'no dodowiyoku'bworosunpinogano.
Aki a'mwo abolo sipsip tobuurobusuko su tobuuravuro moduvomwallo'moneyokwe Aguto kuunodo Jisasol kuu'maiyo toru nobiyalo'nonekono. Su toro abiyalo'no'ji toga a'mwo resis tovi kuuwolopi tooravuro mubiyo sugudo ma'dupudo to'busuko kubalno kevu aval'no nomapinogaikikono. Mubiyo su tov Gooti tool gamoro bako bwotonyo tovi anakuuto tomuu yiunokuudo mujomwekovla'mwalpino tov ikullabwonekono. Aki toro aikullabwo'ji su tov kaiyako ku'nono migolamo'nonokwono.
Aki aguto kig Jisas Kraisolluro mido mollomwalo tovi anakuuto tomuu kuulomwallo'moneyokwe kudo'aiko me'no kuusaikubweyodowodekono. Gamoro mido mollomwalo su tov yiunokuudo mujo'movla'mwalonokwono. Toro tovi kuulomwalodopure toga Gooti tool kemino ilaiyo bwotonyo nomollekumaronekono. Krais Jisas su tool nemi Agutekono. Aki toro tool nemi ma'no ma'nodo tovuro kirumwallo tovida'ai bomollurolovonekumokalokwodowodo tookono.
Aki gami Ganumiyago Gooti tool gami Kwolaiyo su toolluno yovo aguto wiyo'no sulomoropiyokaikono. Aki Aguto Kig Kuunodo toolluro jurogudo tovida'ai bako bwotonyo tovi anakuuto tomuuda'ai gamoro yogaimaguurai tov aro alokabokakwono. “Akal moro Kwolaiyo kalo buuropino nyunodowodo tookono. Toro toolluno ilaiyo kuunodo anyunumaiyoo.” Alokabokakwono.
Moro kwoloraiyobusukobuuravoo, aga kevu Krais toollu guureji neya duuguro'mwonyogaulo. Su tov aro tovinokwono. Lukomgu Krais tool kuu'maiyo abiyalo'no'ji toga nevu yiuwi'nokai tonol luko nya'jo. Aki wogulo nyubwosuna'jo. Kevu su toro nyubwosunpiyokweyo'mo Krais toollu guureji neya duuguro'mwonyogaulo.
Neya duu'nyulo. Jisas Kraisol sulu'wo tovi anakuuto tomuu yanekulo'nowo'ji noolabwonekono. Toro wolabodowo'jure toollu yiuwi'nokai a'mwo abolo ton sumdo noonpinekono. Aiyoga a'mwo mollurogudo pwol takubwopto tokwe Jisasolluro suumdo tovi juulowosoduke toga a'mwo abolo pun nokwo wonyapino to'no sopo su to kun kuruv noonpinekono. Toro kwonpi toga kwako akavida'ai yiuwi'nokai a'mwo abolo yovodolobunyo go'no go'nodo tonyuda'ai ton aro dupinogano. “Oo neronekumwallonoldeyo.” Su toro dopi kumdato dupinogano. Su tov kuvinono nyumo'nonokwono. Nebalokwono.
ကြော်ငြာတွေ