Aki a'mwo pwol yiuwi'nokai kwako akavida'ai ton marowo'ji abolo'ji toga yiuwi'nokai me'no amaro'ji su ton a'mwo su tekwoji aiyo yiunokuudo mujomwekovlaiyo'moneyokwe tov nokwo wiyo'mwojupinoldukono? Awiyo. Yiuwi'nokai amaro'ji su ton ku'nono mwiyo'mwojupinogano. Aki a'mwo pwol yiunokuudo nobolmiyo kuudo yaurowo'ji aiyo yiunokuudo mujomwekovlaiyo'moneyokwe tovi mallo'mo kwino'ji tool Gooti toollu noonyumwonyu pugai nokwo biyomaronoldukono? Awiyo. A'mwo aiyo yiunokuudo mujomwekovlaiyo'moneyokwe tovi mallo'mo kwino'ji su tool Gooti toollu noonyumwonyu pugai ku'nono mabiyomaronekono.
2 Timooti 2:14 - Gooti Toolluro Yogalokwono14 Guu Jisasolluro a'mwo abolo tobuuro kuuguudo akavino kuudo po'dogalo yau'mwalpino'moneyokwe duudapi yogalo neya duuwiyogawono. Aki guu Gooti toolluro sumdo tovi aro tovino kuu'maiyo toru'no neya dodumul'mwojogawono. A'mwo abolo su tobuuro yogalo judo'no judo'no pwekwojo ku'nono mwiyo'mwojokwe su tekwojaino nyoullajunmwalpiyo. Yogalo su tekwojaino soullajunpi to'gwowi a'mwo abolo kuu'nupi tonyu jurogudo ku'nono maduuwimwojonokwono. Toro kuvi kuruv a'mwo abolo kuu'nupi su tonyu yiuno kaiyako to'no jugolonokwono. အခန်းကိုကြည့်ပါ။ |
2 Timooti 2:14
30 ပူးပေါင်းရင်းမြစ်များ
aro kuudokaikono. “Guu Satanyolluro kwolaiyo toolbusuko wimo'nodumdekugono. Toro tooku yiuwi'nokai sugudo imo'nodopure tonyu ikomago wimo'nodum a'mwo abolo tonyu yiuwi'nokai toga judo'no judo'no tomgu'aro youkuu'nuudodumdekugono. Aki toro tooku Aguto toolluro yogalo idopto'nodo tovino kuunano pumgu'aro mollovodo'mwojadodumdekugono. Gumoro su toro yodumdo tov guvnokwe tooku ku'nono mimwogapibinekugono.
Nevu aro tovino me'no kuu'numawonogano. Nemoro a'mwo pworo kemi kaiyako daikullugollo'moneyokwe kuuguudo pun amodekumolloporogano. Toro amodekumollopo tovida'ai kevu ilaiyo mibwosunodupu jul'nyo ma'dopure tovino me'no kuu'numawonogano. A'mwo su toorai nevu su toro kuuguudo tokwe mamodapiyowonogano. Toro kuvi kuruv kevnokwe tooravuro kuudo tovida'ai kaiyako daikullugollo'moneyokwe kuuguudo su ton toro amodekumolloporogano.
Jisasolluro a'mwo abolo pun kwolluno kuudo me'no kuubweyopogano. Toro kun kuruv kemoro kuudo uubweyodupudo su tov jurogudo mimo'nodupudogano. Su toro tonyu kevu neya wiyo'mwojopi kevuge mwallo'moneyokwe ilaiyo neya domollomarogaulo. Yopi a'mwo abolo jurogudo mimo'nodupudo su tobuuravuro kaiya'no kuudo yau'dupudo tooraino kevu yogalo miyoullajunpinono.
Nuu nemi Aguto toolluro yovo tovida'ai kemi guureji aro dodoluvaikubwemo'monyugono. Kevu a'mwo abolo kwa'mguda'ai tonbusuko nomjumovla'mwalpiyo. A'mwo abolo su ton Aguto toolluno kuudo maiyokwe imo'nugelabodupudogano. Toro tonyuro kuudo kworo kuruv yiuno noo'nookwo to'no yopiyodupudorogano. Su toro yopiyodupudo tovida'ai kevnokwe ton ku'nono mwiyo'mwoju'nupinogano.
Nemi avalobuuravoo, aga kuuguudo purukwe'aro ikullabwanonogano. Kevu Aguto Krais Jisasolluro a'mwo abolo me'no wimo'nodupudogaikikono. Toro togaikulluno tov Gooti toollu ilaiyo igollo'moneyokwe to'no neya domjumovlavogaulo. Su toro tovino nevu sumdomgu me'no sodekubwasowonogano. Toro sodekubwasowo su to kuvi, “Oo me'no uumjunodupudodeyo,” kemino su toro kuudo me'no yaikuu'dowadonogano. Kevu ilaiyo uumjunodupudo su tovi muunyu toru'aro guureji mujumovla'mwalpino tovino'mo aga jurogudo adaikullumwojumwakuuwono.
Nemi avalobuuravoo, nemi Aguto Jisas Kraisolluno yovo tovida'ai guureji aro adaikullumawono. Kevu Jisasolluro a'mwo abolo togaikulluda'ai a'mwo pworo kevnokwero yomjomwekovlaiyo'mo burawo yopi yasuwa'no kirounomollodupudorogano. Aki a'mwo burawo su tooro nemoro yogalo me'no sodekubwasajuuwo tonyu kisuvolo wiyodupudorogano. Yiuwi'nokai su toro yodupudo toorai kevu manyu tomuu'aro neya duuwiyogaulo.
Aki a'mwo kanoga kuuguudo jokwe toorogai'aro aki kemi kwikweyago tooraino yovokwe kuuguuwipuuto toorogai'aro toorai nodumwalpiyokwe tovino neya doduumjukurogawono.” Agudekugono. Kuuguudo su to kworaino a'mwo abolo ton yogalo youllajunodupudogano. Aki kuuguudo su tooro Gooti toolluro womdo tovi wimovlaiyo'moneyokwe ku'nono maikullo'mwojupinorogano. Toro kuvi kuruv yiuno Gooti toolluno kuudo kuubwemovlapi su to'gwowi gamoro womdo tovi wimovlaiyo'moneyokwe nokwo ikullo'mwojonokwono.
Kuudo neya jaurono. Nemoro kulako tovi jurogudo imo'nyo'moneyokwe sumwonyo pun guureji ino ino sa'ji tov yiuno pwekwonodo to'no nonekullo'mwojodowodokwono. Toro kuvi kuruv Gooti toolluro ilaiyo winodowo'jure tovi uumjunyo'mo yogudo amjumovlawa'ji su to'gwowi yiuwi'nokai tonyuno nonekullo'mwojonokwono. Su tov nemoro aiyo amwakuuwo akagake'aro lukomgu aiyo yiunokuudo mujomwekovla'mwalano kugake'aro yiuwi'nokai su toga yiuno ilaiyo to'no nekullo'mwojumwalonokwono.
Nuu Gooti tooke'aro Krais Jisaseke'aro gamoro ensel toorogai'aro tooravuro muugonanuwo'dopure toru gumi guureji aro adagujumono. Moro yogalo me'no adagubwemwako akanyu guu neya duumjunogawono. Toro tooku a'mwo abolo pun gomno gomno somuudeyapinpi tov guu a'mwo abolo yiuno avalo punyuno kuu'dello nuubwemwalbiyo. Toro kweku kuruv yiuwi'nokai tonyu yiuno aval'no neya jugologawono.
Toro te yiuwi'nokai tonyu aiyo yokwollosodowodo Gooti tooke'aro Krais Jisaseke'aro tooralluro sumdo tovi aro dagubwemo'mokwono. Krais Jisas su tool Poontiyos Pailatolluro sumdollu toru ilaiyo to'no adodowiyoku'bworosunokaikono. Jisasol ilaiyo to'no adodowiyoku'bworosunoka toolbusuko kubalno guu kweku kuruv aval'no neya jogawono.
Toro tovino tov guu aro tovino aki aiko te kuudo neya jou'movlavogawono. Sumdomgu guu Gooti toolluro womdo tovi imwalbino'moneyokwe nuu ato tokwe agubogai'nekugono. Toro agubogai'no toga Gooti tool gamoro womdo tovi imwalbino'moneyokwe yasuwa'wino me'no agujabokaikugono. Toro te guu Gooti toolluro yasuwa'wino agujaboka su tovi pwo'miyo yamjuro'mdo'bure toga yasuwa'wino su tov widuko to'busuko guureji neya abomjengelogawono.
Aki guu kwako akavida'ai yasuwa'yogalo toorai manyu tomuu'aro neya jurukuruwolovogawono. A'mwo abolo pun yasuwa'yogalo su toorai kaduko kwipi tov Gooti toolluno'gwowi kaduko mwimwalpinogano. Aki yasuwa'yogalo su tooro a'mwo abolo tonyu Gooti toollu buulo uugunyumopiyo'moneyokwe tov manyu tomuu guureji me'nomokavla'mwalpinorogano.
Toro te nuu aki aiko te aro gudumo'mokwono. Guu a'mwo junorukuudokwe pworavuro yogalo go'no go'nodo tooraino yogalo noullajunmwalpiyo. A'mwo su tooro kemi yogalo su tooraino kavlo ton kuudomaiyorogano. Guu aro tovino kuudo me'no youroma'dumdekugono. Guu a'mwo su toorogai yogalo soullajunpi tov a'mwo su tooro yiuno molo'mo to'no kuudo yaupinorogano.
Krais Jisasol kwako akavi aikomgu nobiyalo'nonekono. Toro abiyalo'no'ji toga aguto kig su toolluro mido mollomwalo tov nobwolomolludapiyonekono. Su toro toga a'mwo abolo aiyo amwalpi togai'aro me'no abolpi togai'aro yiuwi'nokai su tonyuro pasudo toorai nojainyubworonekono. Toro tovino tov nuu Gooti tooke'aro Krais Jisaseke'aro tooralluro sumdo tovi gumi kuu'maiyo toru'no duudapi yogalo aro gudumo'mokwono.
Jisasolluro a'mwo abolo ton aro tonyuno kuudo nyallulo'gwonmwalpiyokwe guu neya duudogawono. “Kevu gavman a'mwo aguto toorogai'aro gavman womdokwe gabovo toorogai'aro su toorai kwako tomuu'aro neya duuwiyogaulo. A'mwo su tooravuro yogalo dodopure tonyu po'dogalo uumjunopi buro'nyo buro'nyo sugupasudo tonyu yo'moneyokwe tov yiuwi'nokai toga neya jovrowosunogaulo.
Toro te a'mwo pworavuro ibwasodupudo kavlo go'no go'no muuduko pun kemi nomollubworekumokavla'mwalpiyo. Wosamujuko punyuno kumako mwallo'mo loowo tooro kemi jurogudo ku'nono madaikullumwojodupudorogano. Toro kuvi kuruv Gooti toolluro yasuwa'wino sugumaluko to'gwowi kemi poowokalago tonyu jurogudo daikullumwojodowodokwono. Wosamujuko kumako mwallo'mo loowo su tooro a'mwo abolo uumjunodupudo tonyu ku'nono mwiyo'mwojodupudorogano.
ကြော်ငြာတွေ