Gooti Yawelluro Kuullo tool a'mwo su toollu bwolmwalowo'ji pi'mwo kuudo tov uubweyonekono. Toro uubweyodowo'jure tokwe jurogudo imo'nowo'ji a'mwo abolo tonyu ilaiyo to'no mido mollomwalmwalonekono. Toro tool Gooti Yawelluro ilaiyo winodowo'jure tonyuno kuudo you'movla'mwalonekono. Aki toro tool Gooti Yawellu dolago tomuu mwalowo'ji kwolluno ilomoropi imwolawonekono.
2 Timooti 1:7 - Gooti Toolluro Yogalokwono7 Kuudo neya jaurono. Gooti tool gamoro Kuullo toollu nekullabodowodo tov nevu luko imwalano'moneyokwe nekullabodowodolmaiyo. Toro kuvi kuruv nevu jurogudo imo'nyo'mo tokwe'aro kalo buuropino mollo'mo tokwe'aro nevnokwenolluro pasudo tonyu pi'mwono mollomwallunyo'mo tokwe'aro su tonyuno'gwowi neya mujumovla'mwalano'moneyokwe Gooti tool gamoro Kuullo toollu nekullabodowodekono. အခန်းကိုကြည့်ပါ။ |
2 Timooti 1:7
28 ပူးပေါင်းရင်းမြစ်များ
Toro te neya duu'nyulo. Moro jurogudo ikubweyodumdo tokwe kevu gabakuto toorogai'aro akullo toorogai'aro toorai suvlo nokwo ilomaveku'mwalpinorekikono. Aki moro jurogudo ikubweyodumdo tokwe kevu nemi ikomago Satanyolluro jurogudo tovi nokwo uuwolo'mwalpinorekikono. Toro toorekullu kaiyako yaikullugollo'mo puruv nonagutokwono.
Neya duu'nyulo. Moro Nyunumiyago tool gamoro Kuullo toollu kemi wolomekwopiyabiyo'mo tovino subuu'yamju me'no aikullajukekono. Toro te nuu gamoro Kuullo su toollu kemi noolomekwopiyamonyugono. Gooti toolluro Kuullo su tool wolabowo'ji muunyu kai'muuda'ai jurogudo aikubweyo'ji su tov kemoro poowokalago tonyu noullo'movaikwopiyonokwono. Toro kuvi kuruv Gooti toolluro Kuullo su tool yere mwolabodowo'jure akaga kevu wagwolago akavi sogwollo neya denomwalogaulo.” Kuudokaikono.
Toro kuudomollopo tovi a'mwo abolo ton wuu'nyuno sumaveyokwe buro'nyo sumo'numoka'mdukoneyokwe tovino kevnokwe ton wonyo'mo abopogano. Toro bino sumaveyokwe a'mwo kuullo ma'no ma'nodokwe me'no sukulnoka toollu kwonopo tov Jisasolluro suvlo dolago tomuu mwaloduke toollu kwonopekono. Aki toro tekwo youro togai yeso'no amomo maiyo kuunodo tool mwaloduke kwonopekono. Toro sukuloka su toollu wonyuno sumaveyokwe luko sopogano.
Oo kevu sumwoluko kavo wosunmwalpino'moneyokwe tov nuu kemi ikubweyo'mi ikugollu'mo'monyugono. Sumwoluko kavo wosunyo'moneyokwe su tov a'mwo abolo kwako akavi mwalodupudo ton ku'nono maikullabupinokwono. Toro kuvi kuruv nuvnokwe toonyuno'gwowi moro sumwoluko kavo wosunyo'moneyokwe tov kemi aikullamono. Toro te kemoro poowokalago ton jul'nyo mibwosunpinono. Aki toro toorekul luko mipinono.
Toro kugaikul kuruv kemiyo'mo tov arokwono. Gooti tool gamoro Kuullo tool nekullabwonekono. Toro aikullabwo'ji toolluro jurogudo tokwe kevu mino kuuguudo tov kuu'maiyo toru'no dodoluwosumwalpinorekikono. Toro toorekul wagwolago Jeruusalem tokwe'aro proovins Juudiya tovuro yiuwi'nokai tomge'aro proovins Samariyake'aro tomuu dodoluwosomollogaulo. Aki kwako akavuro yiuwi'nokai do'gwapiyo kumuu kuruv kuu'maiyo toru'no dodoluwosomollogaulo.” Kuudokaikono.
Gooti tool Nasaretda'ai Jisasollu jeso'moneyokwe gamoro Kuullo tool uubweyo'no gamoro jurogudo tokwe'aro kuubweyokaikono. Toro kuubweyoka tokwe Jisasol a'mwo abolo tonyu ilaiyo to'no sugollajukekono. Aki Gooti tool kweke yomollodowo a'mwo abolo Satanyolluro kaiyako igolodowodo tobuurai sukullajukekono.
Toro dodoluvanubweyodowodo tovino tov nuu aro kuudo yaullokwenyugono. Oo nuvnokwe toonyuno kuudo bwotonyo nyau'mwalmiyo. Aki mi aromiyanubwepi kuruv nokwo'mokwono. Nuu su toro tonyuno jul'nyo mibwosunodumdo kwonyu kuruv aro tovino kuudo kwolallo yourukwapiyokwenyugono. Oo mi Aguto Jisasolluro womdo anubweyoka tovi yiuno'no sopimi tov ilaiyo imonyugono. Mi Aguto toolluro womdo anubweyoka su tov arokwono. Gooti toolluro yasuwa'wino sugumaluko nekullabodowodo tovino kuuguudo sugudo tokwe moruudomollumwalmo'moneyokwenyugono. Mi Aguto toolluro womdo anubweyoka su tov torokwono.
Toro kuudowo kuvi kuruv Poolol aro anekudokaikono. “Kevu mino buro'nyo'mo kumdo dodadokwovo? Kemoro kumdo adadokwopo tovi nuu ikuu'nodum kalo nonyunoduke kwonyu kuruv kevu manumjukupinogaikikono. Nuu wagwolago Jeruusalem'no plavo'mi ki'mo'mdo'mure toonyu wuulo tokwe agaleranbwepi tov nokwo'mokwono. Aki mi Aguto Jisasolluro yovo tovida'ai aromiyanubwepi kuruv nokwo'mokwono. Nuu su toro nonyumo'nono tonyuno luko miyodum kuudo me'no sovrowosunmwakonyugono.” Anekudokaikono.
Aki toro toonyu aro kuudo saullajonyugono. Jisasolluro a'mwo abolo kevnokwe ton Jisasolluno bwolomorumwogapiyo'moneyokwe yogalo tov neya adogapuro. Toro kuudo yau'dum yiuwi'nokai toga nevu Juu toonolluro i'bwo'nyago tonyu kuulodam Jisasolluro a'mwo abolo tonyu aulogalomworallajonyugono. Toro kuulogalomwora'dum a'mwo abolo su ton Jisasolluno buulo neya uugunyumopipuro, kuudo saullajonyugono. Toro toonyu a'mwo abolo su tonyu kaiyako bwotonyo sugollajonyugono. Aki surodo bwotonyo nuunodowo a'mwo Juu tooravuro miyawosunodupudo tooravuro wagwolago go'no go'nodo kumuu kuruv pla'mdum Jisasolluro a'mwo abolo tonyu kaiyako igollo'moneyokwe amovomjai'nyajonyugono.” Kuudokaikono.
Toruda'ai a'mwo 7-pela ajesopo su tooraida'ai pwolluno yovo tov Stivenolekono. A'mwo su toollu Gooti tool gamoro jurogudo tokwe sugudo tokwe toval uubweyoduke tovida'ai Stivenol a'mwo jurogudokwe sumo'nyajukekono. Toro tool a'mwo abolo ton muugona'dopure toru duuwallo jurogudo kuunodo pun kuuduuwallajukekono.
Toro yajunodopure kuvi kuruv Soololno'gwowi kuuguudo sugudo tokwe yodubwasuno yodubwasuno yodowo jurogudo sumo'nyajukekono. Toro tool wagwolago Damaskosda'ai a'mwo abolo Juu tonyu aro sodubwasajukekono. “Oo Gooti toolluro nekullo'mwojo'moneyokwe amonekwopiyaboka Krais tool Jisasol kwekono.” Toro tovino kuuguudo ton yiuno pi'mwono yodubwasoduke toga kavlo tov kuu'maiyo toru'no sumo'nyajukokwono. Toro tovino tov Juu tooro Soololluro kuuguudo yodubwasoduke su tovi ku'nono mabwolomorumwogapiyajuporogano.
Nevu su toro tomgu'aro sogwollo aina'ji tov wogulo'mo miyanonogano. Su tov aro tovinokwono. Gooti tool nemino kalo buuropino winodowodo tovi nekuduuwallo'moneyokwe gamoro Kuullo tool anekubweyokaikono. Toro te Kuullo su toollu'aro Gooti tool gamoro kalo buuropino winodowodo tov nemoro poowokalago tonyu kuulemovanekubweyodowodekono.
Gooti tool kemino tov ki'nato womdokwe tonbusuko luko neya imwalpino'moneyokwe gamoro Kuullo su tool aikullabokalmaiyo. Toro kuvi kuruv Gooti toolluro Kuullo tool kemi mollumwoga ikullo'moneyokwe aikullabokaikono. Toro togaikul Gooti toolluro kwoloraiyo kuunodo me'no wimo'nodupudogaikikono. Toro te nevu Gooti toollu aro wuudodowadonogano. “Nemi Nellunumiyago Doweyoloo,” wuudodowadonogano.
Toro kuvi kuruv a'mwo pwol Gooti toolluro Kuullo toollu kuumjungovlawo'ji toolluro sulo ki'nono tono'gwowi arogano. A'mwo abolo tonyuno kalo buuropino winyo'mo pasudo tokwe'aro poowokalago kuunodo tovida'ai ilaiyo yo'mo pasudo tokwe'aro sumwoluko kavo wosunyo'mo pasudo tokwe'aro jul'nyo bwi'mo'mdowo'jure kuga kuruv muugollu'meyo'mo pasudo tokwe'aro a'mwo abolo tonyuno ilaiyo mollo'mo pasudo tokwe'aro yanyago wimo'nyo'mo pasudo tokwe'aro sugupasudo tovi gudupolallo'mo pasudo tokwe'aro
Toro te a'mwo su tool nami nakudoduke tovi wuu'nodowol kemino aro kuudo yaikuu'dowolonakono. Oo Gooti toolluro Kuullo tool a'mwo abolo su tonyu kalo buuropino pasudo tov me'no uubweyodowodoldeyo. Toro uubweyodowodo tokwe a'mwo abolo su ton a'mwo abolo punyuno kalo buuropino kuvinono mollodupudodeyo. Kemino su toro kuudo me'no yaikuu'dowolonakono.
Kevu Gooti toolluro nebal'no yogalo tovi kuumjunopo tovino tov kemi ma'no ma'no pasudo tooraida'ai me'no yal'mo'no'mno sugudo kwimo'nopogaikikono. Toro te kevu Jisasolluro a'mwo abolo tobuurekul kevuge avalo tellugwai'yago tello'mwo kuunodo tonbusuko ikullumo'nodupudo pubuuraino kalo buuropino mollodupudogaikikono. Toro te kemida'ai avalo su tobuuraino kemi poowokalago kuunodo tokwe kalo buuropino pasudo su tokwe imgu amgu guureji muunyu toru'aro neya domollogaulo.
A'mwo pwol kalo buuropino winodowodoldeyokwe luko yo'moneyokwe pasudo tov nonagutekono. Aki kalo buuropino winyo'moneyokwe pasudo su tov a'mwo toolluro poowokalago tovi neya kuullo'mowopiyonokwono. Kalo buuropino pasudo su tokwe aullo'mowopiyo'ji tov luko yo'moneyokwe pasudo tovino'gwowi bilomelpolodukwopiyonokwono. Luko yo'moneyokwe pasudo su tov arokwono. A'mwo pwol ma'no ma'no so'ji tool kirumwallo tovino luko imwalonekono. Toro tovino tov nevu a'mwo luko yodowo'jure su toollu kwona'ji toga aro kuudo youroonanekono. Oo a'mwo su tekwo Gooti toolluro kalo buuropino winyo'moneyokwe pasudo tov gamoro poowokalago tovi po'dogalo maullo'mowopiyodowodo'mdeyo. Su toro kuudo nokwo youroonanekono.
ကြော်ငြာတွေ