2 Pita 1:1 - Gooti Toolluro Yogalokwono1 Mino yovo tov Saimoon Pitalonyugono. Toro toonyu Jisas Kraisolluro ki'nato womdo tov yodumdonyugono. Aki gamoro kuurotokwe wimo'nodumdonyugono. Kevu nemoro kuudo uubweyodowado su tollugwoji aval'no uubweyodupudo togaikullu nuu pas akav sokwollekwopiyamono. Nemoro kuudo uubweyodowado su tov nemi Jisas Kraisolluro pasudo idopto'nodo tovi'aro ma'dowadokwono. Jisas Kraisol nemi Gootekono. Aki toro tool nemi ma'no ma'nodo tovuro kirumwallo tovida'ai bomollurolovonekumokalokwodowodo tookono. အခန်းကိုကြည့်ပါ။ |
2 Pita 1:1
40 ပူးပေါင်းရင်းမြစ်များ
Toruda'ai Jisasol wonyo buugo Galiliyovuro wolo tomuu'aro kado avlavokaikono. Toro plaino sumaiyokwe a'mwo pudorallu kwonokaikono. A'mwo su todoralluno yovo tov pwol Saimoonolekono. Su toolluno yovo puruv Pitalo dodupudekono. Aki pwolluno yovo tov Adruu'wolekono. A'mwo su todoral domwoga kuurowabwollo'mo kuto ton wonyo buugo tovi wolowopiyodole todorallu kwonokaikono. Su todoral domwoga ki'noma'dubulorakono.
Kevu toro yodupudo tovino tov Gooti tool gami pi'mwo kuudo tokwe yogalo puruv aro adokaikono. “Nuu a'mwo abolo tonyomno proofet pworogai'aro a'mwo kuurotokwe pworogai'aro toorai nomorapimonyugono. Toro amorapimi kuvi kuruv su tooravuro pwekwojai noromiyosupinorogano. Aki pwekwojai kaiyako nyugolpinorogano.” Adokaikono.
Toro wuujuno sumaiyokwe Jisasollomno amokabokaikono. Toro amokaboka toollu Jisasol wonyuno sumaiyokwe aro kuudokaikono. “Guu Joonolluro kwolaiyo Saimoonolekugono. Lukomgu gumino yovo tov Sifasolo gudumwalpinekugono.” Yovo su tovi amollovodo'mwojajungiko tov Pitaleyo'mokwono. Aki yovo Pitalo tovino kavlo tov Suloleyo'mokwono.
Toro tov Gooti tool a'mwo abolo tonol gamoro sumdo tovi sugudo wimo'nyo'moneyokwe puuto soulonekubweyoka tovino nekuduuwallodowodokwono. Toro te a'mwo abolo yiuno kuuguudo sugudo su tovino kuudo kuubwepi tono Gooti toolluro sumdo tovi sugudo nokwo wimo'nupinogano. Toro tovino Gooti toolluro yogalo sakwollungiko puruv aro dodowodokwono. “A'mwo abolo kuudo kuubwepi ton Gooti toolluro sumdo tovi sugudo wimo'nopi aiyo yiunokuudo mujomwekovla'mwalpinogano.” Gooti toolluro yogalo sakwollungiko puruv toro dodowodokwono.
Yiuno Gooti judo toolluro kemi ilaiyo yaikullugoloduke tovida'ai kevu Krais Jisaseke me'no uuguro'mwonyodupudo togaikul kweke mujomwekovla'mdupudogaikikono. Toro mujomwekovla'mdupudo su toollu'aro Gooti tool gamoro pi'mwo kuudo ton nekuduuwallodowodekono. Aki Krais Jisas su toollu'aro nevu Gooti toolluro sumdo tovi sugudo imo'nodowa gamoro a'mwo abolo kuunodo wimo'nodowadonogano. Aki toro toollu'aro Gooti tool nemi mobiyonekuma'dowodekono.
Toro te yiuwi'nokai Jisasolluro a'mwo kuurotokwe gabovo tooro mi nuwolo'mdupudorogano. Aki mino, kuurotokweyoloo, nyudodupudo kuvi kuruv nuvnokwe tekwonyuro kuudo to'gwowi yovo aguto su tovino ku'nonodo'mekwonyumaiyo. Su tov aro tovinokwono. Nuvu Gooti toolluro mollu'bwoto tonyu kaiyako sugollajo tovinokwono.
Kevu kuudo neya jaullulo. Nuvu buro'nyo buro'nyo womdodeyo pun yo'mo nyunodowo'jure tovi noonyumwonyu pworo wuulo ku'nono manugullupinonyugono. Nuu nemi Aguto Jisasollu me'no kwono toonyu gamoro kuurotokwe imo'nodum gamoro womdo tovi mujumovla'mdumdonyugono. Aguto toolluro womdo mujumovla'mdore su tovida'ai kevu gamino kuudo me'no kuubweyopogaikikono.
Kuudo neya jaullulo. Krais tool ma'no ma'no puru'monodo kuruv miyajukekono. Toro kuvi kuruv Gooti tool nemi nekullo'mwojo'moneyokwe tov nemoro ma'no ma'nodo ton Krais toollu muunyu toru sulloullubweyokaikono. Toro te aga nevu Krais ma'no ma'no miyajuko su toollu me'no uuguro'mwonyodowadonogano. Toro tovino tov Gooti toolluro sumdo tovi sugudo me'no wimo'nodowadonogano.
Neya duu'nyulo. Gooti tool Pitallu jurogudo uubweyoduke tokwe Juu a'mwo abolo tonyu kuurotokwe womdo tov wiyodowodekono. Su toro to'busuko kubalno nuu kwonyu kuruv kuurotokwe womdo tov aval'no mujumovla'dumdonyugono. Toro toonyu Gooti avalo su toolluro jurogudo nubweyoduke tokwe a'mwo abolo Juu miyawosunodupudo togai to'gwowi kuurotokwe womdo mujumovla'dumdonyugono.
Krais Jisasolluno yiulo yogalo su tov aiyogasuro amwallajupo tonyu Gooti tool kuu'maiyo toru'no mabomollolupto'nubweyajukekono. Toro kuvi kuruv aga'no'gwowi Gooti toolluro Kuullo tool nevu gavnokweyolluro kuurotokwe kuunodo toonogai'aro proofet kuunodo toorogai'aro toonollu kuu'maiyo toru'no me'no bomollolupto'nanekubweyodowodekono. Toro tovino tov nevu yiulo yogalo su tovi kuu'maiyo toru'no kuudo me'no youroma'dowadonogano.
Yogalo su tovino kavlo tov arokwono. Krais tool yiuwi'nokai a'mwo abolo pwolno puru'monodo tonyu gamoro sugudo ton yasuwa'no uumwodeyodowodekono. Sugudo su tonyuda'ai pun arogano. A'mwo pworai kuurotokwe imo'nyo'mo womdo tov wiyodowodekono. Aki pworai Gooti toolluro yogalo tokwe a'mwo abolo tonyu kuurokado moruudomollo'moneyokwe womdo tov wiyodowodekono. Aki pworai gamoro kuuguudo sugudo tokwe a'mwo abolo tonyu modomollo'moneyokwe womdo tov wiyodowodekono. Aki pworai Gooti toolluro a'mwo abolo tonyu moduvomwallo'moneyokwe womdo tov wiyodowodekono. Aki pworai ibwasokwe imo'nyo'mo womdo tov wiyodowodekono.
Nuu Poolonyugono. Nuuge'aro Timootiyeke'aro toonal Krais Jisasolluro ki'nato womdokwe wimo'nodowolonakono. Toro toonal kevu wagwolago Filipaida'ai yiuwi'nokai Krais Jisasolluro a'mwo abolo togaikullomno pas akav sokwollekwopiyamawolo. Kevu Gooti gavnokwe toolluro a'mwo abolo kuunodo me'no wimo'nodupudogaikikono. Aki kevu wagwolago Filipaida'ai Jisasolluro mollu'bwoto tovi a'mwono moduvomwallokwe toorekike'aro aki a'mwo diken womdokwe kworekike'aro yiuwi'nokai su toorekullomno pas akav sokwollekwopiyamwakuuwolo.
Neya duu'nyulo. Gooti tool yasuwa'wino to'busuko aro tov ikubweyodowodekono. Kevu Krais toollu kuudo uubweyo'moneyokwe tovino to'no ajaikubweyokalmaiyo. Toro kuvi kuruv kevu gamino kuudo uubweyopi aki tagunyo ton noma'mwalpino'moneyokwe ajaikubweyokaikono. Tagunyo amo'movlapi su tovi'aro Krais tool yovo aguto noma'mwalonekono.
Aki Krais toollu yiuno'no uuguro'mwonyo'moneyokwe to'nodonyugono. Toro te nuvnokwe toonyu Moosesolluro loowo tovi'aro Gooti toolluro sumdo tovi sugudo wimo'nodumdonyumaiyo. Toro kuvi kuruv nuu Krais toollu kuudo kuubweyo tovi'aro Gooti toolluro sumdo tovi sugudo wimo'nodumdonyugono. Kuudo neya jaullulo. Yiuno Krais toolluno kuudo uubweyodowa'jure tovida'ai to'no nevu Gooti toolluro sumdo tovi sugudo wimo'nodowadonogano.
Aki nuu gumoro Krais toolluno kuudo kuunodo uubweyodumdo tovino aro kuudo you'movla'mdumdonyugono. Muudu'nodo toga gumi jukeyago Loowisokwe'aro gumi juneyago Yiunisokwe'aro tonal Krais toolluno kuudo kuunodo kuubweyolonakono. Su toro tonalbusuko aga guu kweku kuruv Krais toolluno kuudo aval'no uubweyodumdo tov gumoro poowokalago tovi me'no kuullo'mowopiyodowodokwono. Nuu su toro kuudo yaguu'dumdonyugono.
Nuu Poolonyugono. Toro toonyu Gooti toolluro ki'nato womdo tovi wiyodumdonyugono. Aki Jisas Kraisolluro kuurotokwe pwonyugono. Toro toonyu a'mwo abolo Gooti toolluro jesodowodo tonyomno amonuwopiyabokaikono. A'mwo abolo su ton yiuno Gooti toolluno to'no kuudo neya uubwepureyokwe tovino amonuwopiyabokaikono. Aki Gooti toolluro a'mwo abolo jesodowodo su ton gamoro ilaiyo winodowo'jure tovi neya uumjungovlaiyo'moneyokwe nebaikuuguudo tokwe yodubwasodumdonyugono. Toro tovino kuudo youromaropi Gooti toolluro ilaiyo winodowodo tonyu kuvinono uumjungovlapinogano.
Pas akav Taitosekujo'mo sokwollagubwemono. Guu kuuguudo sugudo modomollodumdo tovi kuudo aval'no kuubweyodekugono. Toro tookujuno tov moro kwolaiyo kuunodo toolbusuko imo'nodumdekugono. Toro tookujuno nuu aro nyunodowodonyugono. Nemi Nellunumiyago Gooti tooke'aro ma'no ma'nodo tovuro kirumwallo tovida'ai mollurolovonekumallokwe Aguto Krais Jisaseke'aro tooral aro gubwemwalbullunekugono. Yasuwa'wino sugumaluko tokwe'aro sumwoluko kavo wosunyo'mo tokwe'aro toval nokwo gubwemwalbullunekugono.
Su toro yomjomwekovlavowa'ji lukomgu Jisas Kraisol gamoro bako bwotonyo tokwe nobiyalo'nonekono. Krais Jisas su tool nemi aguto Gootekono. Aki nemi ma'no ma'nodo tovuro kirumwallo tovida'ai mollurolovonekumokalokwiyo'moneyokwe tool kwekono. Toro toolluno sogwollo to'no kingovlavowa'ji lukomgu kuvinono abiyanekulo'no'ji toga nemoro poowokalago ton ilaiyo ibwosungoulapinogano.
Mino yovo tov Jemsolenyugono. Toro toonyu Gooti tooke'aro Aguto Jisas Kraiseke'aro tooralluro ki'nato womdokwe wimo'nodumdonyugono. Nuu kevu Isuraiyolda'ai 12-pela yovodolobunyo tobuurekul kwako akavi yiuwi'nokai go'no go'nodo tomuu sounopiyopo tobuurekullu puukwollo aro sokwollaikubwemono. “Ilaiyokwono.” Aikudumono.
Nuu Pitalonyugono. Toro toonyu Jisas Kraisolluro kuurotokwe pwonyugono. Kevu Gooti gavnokwe toolluro a'mwo abolo kuunodo wimo'nyo'mo me'no jaikubweyodowodo togaikullomno nuu pas akav sokwollekwopiyamono. Kevu Jisasolluro a'mwo abolo togaikul proovins gomno gomno younopiyo'mno mwalodupudogaikikono. Proovins mwalodupudo su tomuuno yovo ton, Poontoske'aro Galesiyake'aro Kapadoosiyake'aro Esiyake'aro Bitiniyake'aro tomuu mwalodupudogaikikono.
Kevu tagunyo baikullumo'nodopure toorai kula'nyo toga'gwo mokavla'mdopure su tovi'aro Gooti tool kemoro kuudo uubweyodupudo tovi yamju ikulloganyokwekono. Kevu gool tovino kuudo nyau'mwakovo. Gool tov kuunodo'mdukoneyokwe tovino yamju wiyoganyo'mo tooro gool tovi duko tokwe dovelogullumowopiyodupudorogano. Su toro to'busuko kubalno buro'nyo buro'nyo tagunyo kemi abaikullumo'nupi su tooro kemoro kuudo uubweyodupudo tov kuunodo'mdukoneyokwe tovino yamju ikulloganyo'morogano. Toro kuvi kuruv kemoro kuudo uubweyodupudo to'gwowi gool tovi uuwolo'mdowodokwono. Aki Jisas Kraisol kuu'maiyo toru'no abwiyalo'no'ji toga kemoro kuudo uubweyodupudo tovino ilomodomoropiyawo'ji gamoro jurogudo tov kemi nekubweyonekono. Aki yovo aguto nekullabwonekono.
Kevu su to kwolluno kuudo me'no kuubwemwakopo togaikul sulo su toolluno aro kuudo youroma'dupudogaikikono. Oo Krais tool sulo nuugwiyo bwotonyo tokwe biyoma'dupudo toolbusukoldeyo. Kevu su toro kuudo youroma'dupudo kuvi kuruv a'mwo abolo kuudo muubweyodupudo punyuno'gwowi Gooti toolluro yogalo puruv aro sakwollungikokwono. “Sulo pwollu a'mwo sulago mojokwe tooro biyolsumdo ino sumaveyokwe amodukwopiyopekono. Toro amodukwopiyopo kwollu kuruv Gooti tool sulo su toollu malluno yodowo ago tov kwollu muunyu toru amodumokaikono. Toro te aga'no'gwowi sulo su tool yiuwi'nokai ago mojo'mo punyu kuuwolo'mwallo.” Sakwollungikokwono.
Kevu Jisasolluro mollu'bwoto tovida'ai a'mwono moduvomwallokwe toorekullu kuuguudo pun ikudumo'monyugono. Nuu kwonyu kuruv kevu moduvomwallokwe toorekulbusuko Jisasolluro mollu'bwoto tovi moduvomwallokwenyugono. Toro toonyu nuvnokwe toonyuro sumdo tokwe Krais toolluro dado ma'duke tovi me'no kwononyugono. Krais su tool gamoro jurogudo tovuro bako bwotonyo tokwe kuu'maiyo toru bomollolupto'nosowo'ji gamoro sugumaluko ton wiyodowo'jure toga nuu kwonyu kuruv pun noma'monyugono. Toro te nuu kevu moduvomwallokwe toorekulbusuko imo'nodumdo toonyu kemi guureji aro ikudumo'monyugono.
Aki gamoro jurogudo bwotonyo tokwe'aro pasudo sugumaluko tokwe'aro su tovallu'aro gamoro subuu'yamju kuuguudo ton me'no anekullabokaikono. Subuu'yamju kuuguudo su ton ilaiyo noo'nyonmaiyo. Aguto kuunodogano. Kuuguudo su tonyu'aro kemoro kwako akavida'ai kulako tobuuravuro kaiyako i'nyo'moneyokwe pasudo tooraida'ai me'no abirolo'nugolokwopogaikikono. Aki gamoro kuuguudo su tovi'aro Gooti gavnokwe toolluro pasudo idopto'nodo to'busuko kubalno kev kugaikul kuruv pasudo idopto'nodo aval'nodo tovi nokwo mujumovla'mwalpinogaikikono.
Mino yovo tov Juutolenyugono. Toro toonyu Jisas Kraisolluro ki'nato womdokwe wimo'nodumdonyugono. Aki nuu Jemsolluro gagwai'yagonyugono. Toro toonyu kemiyomno pas akav sokwollekwopiyamwakono. Toro togaikullu nemi Nellunumiyago Gooti tool kalo buuropino winyokwekono. Toro tool kemi me'no adekumarokaikono. Aki kevu Jisas Kraisolluro a'mwo abolo kuuno wimo'numwalpino'moneyokwe Gooti tool yellukuromollekumwalodowodekono.
ကြော်ငြာတွေ