Aki a'mwo ki'nato womdokwe nuugwiyo 2,000 kuubwemovlavoka su tool gami nuugwiyo 2,000 pugai'aro muunyu toru amollu'bworosajuko togai amokabokaikono. Toro mokabino sumaiyokwe aro kuudokaikono. “Agutoloo, gumoro nuugwiyo anubwemovlavodo tokwe nuvu mollodolovoma'dum 2,000 pugai'aro muunyu toru me'no mollu'bworosodumdonyugono.” Kuudokaikono.
2 Koorin 8:7 - Gooti Toolluro Yogalokwono7 Toro te kevu yiuwi'nokai pasudo akanyu pi'mwono molludo'movla'mdupudogaikikono. Gooti toolluno kuudo uubweyo'mo tokwe'aro Gooti toolluro yogalo tovino moruujo'mo tokwe'aro Kuullo toolluro yogalo ikudodowo'jure tovi kuudo youromallo'mo tokwe'aro aki yiuwi'nokai womdo sugudo tonyu guureji momjumovlaiyo'mo tokwe'aro nemino kalo buuropino ikullunodowodo tokwe'aro yiuwi'nokai pasudo su tonyu kevu pi'mwono molludo'movla'mdupudogaikikono. Toro tovino tov nuugwiyo tokwe yasuwa'wino mollu'bworoso'mo womdo aka kuruv kevu nuugollu'mopiyokwe tovino wako neya dou'nogaulo. အခန်းကိုကြည့်ပါ။ |
2 Koorin 8:7
25 ပူးပေါင်းရင်းမြစ်များ
Miyobuuravoo, nuu kemino aro kuudo guureji yaikuu'dumdonyugono. “Oo a'mwo abolo su tobuuro sugudo mujumovlaiyo'moneyokwe kuudo ton me'no kuuluuwo'dowodogano. Aki Gooti toolluro yogalo tovida'ai yiuwi'nokai kuudo ton me'no youroma'dupudogano. Toro tonyuno tov kevuge avalo pubuurai nokwo yodubwasumwalpinogano.” Kemino su toro kuudo me'no yaikuu'dumdonyugono.
Toro te kevu Krais Jisaseke me'no uuguro'mwonyodupudo togaikul yiuwi'nokai sugudo go'no go'nodo tollovo me'no ma'dupudogaikikono. Toro togaikul bwotonyagokwe imo'nodupudogaikikono. Kevu Jisasolluro mollu'bwoto togaikul su toro me'no ma'dupudo tovino tov kevu kuuguudo ilaiyo to'no modomollodupudogaikikono. Aki Gooti toolluro yiuwi'nokai pi'mwo kuudo judo'no judo'no ikullabodowodo kugai'aro tonyuno you'movla'mdupudogaikikono.
Toro te Gooti toolluro Kuullo tool kulako puru'monodo su tovi moguro'mwojanekubweyo'moneyokwe nemi wonyo to'busuko mogalanekuvollodowodekono. Su toro me'no moguro'mwojanekubweyodowodo tonol nevu kulako su tovuro suvlatodeyo judo'no judo'nodo tonbusuko imo'nodowadonogano. Nevu Juuwonoldeyo oo Juu tooravuro miyanekuuwosunodupudonoldeyo tonogai'aro aki ki'nato womdo yodowadonoldeyo oo ki'nato womdo tovida'ai me'no birolo'nugolokwodowadonoldeyo nevu yiuwi'nokai tonollu Gooti toolluro Kuullo avalo pwolnodo su tool me'no kuulonekumwalodowodonogano.
Aki nuvu Gooti toolluro proofet yogalo tokwe kuurokado amoruudumiyo'mdeyo oo yiuwi'nokai yiulo yogalo tonyu kuu'maiyo toru'no adodowiyoku'bworosumiyo'mdeyo oo yiuwi'nokai noonyumwonyu kuudo aguto togai amoruudumi kwonyu kuruv a'mwo abolo pubuuraino kalo buuropino manyuno'ji to'gwowi a'mwo yasuwa'nodo pwolbusuko imo'numonyugono. Aki nuvu Gooti toolluno kuudo guureji kuubwemi tovida'ai muumuudo pworai pumgu amodogulptowapimi kwonyu kuruv nuvu a'mwo abolo pubuuraino kalo buuropino manyuno'ji to'gwowi moro womdo su tov yasuwa'no plawonokwono.
Toro te kalo buuropino winyo'moneyokwe pasudo su tov yiunokuudo mimwogapiyonokwono. Proofet yogalo moruujo'moneyokwe womdo tov puga yiunokuudo nyumwogapiyonokwono. Aki a'mwo abolo punyuro yogaljo togai moruujo'moneyokwe womdo kuruv nyumwogapiyonokwono. Aki yiuwi'nokai noonyumwonyu kuudo aguto togai moruujo'moneyokwe womdo su to kuruv puga yiunokuudo nyumwogapiyonokwono. Toro kuvi kuruv kalo buuropino winyo'moneyokwe su to'gwowi yiunokuudo mimwogapiyonokwono.
Toro te kevu Gooti toolluro Kuullo tool yasuwa'wino judo'no judo'no wiyodowodo tollovai mallo'mo guureji ikullunodowodogaikikono. Toro tovino tov kevu aro kuudo neya jaurogaulo. Oo nevu Jisasolluro mollu'bwoto tonyu jurogudo duuwimwojo'moneyokwe womdo tollovaino to'no neya amarogawano. Su toro kuudo yauropi Jisasolluro mollu'bwoto tonyu jurogudo neya doduuwimwojogaulo.
Neya duu'nyulo. Gooti tool kemi muunyu toru'aro mollekudapiyodowodo tov kevu a'mwo abolo punyu uuwoleyo'mo'maiyo. Aki kemoro yiuwi'nokai mwora'dupudo su ton Gooti toolluro ato tovida'ai to'no ma'dupudogano. Toro kuvi kuruv yiuwi'nokai su tonyu kevnokwe togaikulluro yokwollosodupudo to'busuko ilomoropunyu yodapudogaikikono. Kemoro su toro yodupudo tov ilaiyo'maiyo.
Nevu paiko subwosunowo su tov yiuno Taitosolluro abai'movoka tovida'ai to'no subwosunowonolmaiyo. Toro kuvi kuruv aro kunyuda'ai kuruv paiko subwosunowonogano. Sumdomgu kevu Taitosolluro jul'nyo amaroka toga kevu dugoga kwirovopogaikikono. Kevu su toro kwirovopo tovi Taitosol uumjunyuno sumaiyokwe lukomgu nemoro jul'nyo tonyu dugoga anekirovokaikono. Aki puruv Taitosol nemi aro anekudokaikono. “Oo Koorinda'ai Jisasolluro a'mwo abolo ton Poolollu wuuru'mallo'mo guureji winodupudogano. Toro ton Poolollu kaiyako me'no sugologopo tovino kalo winodupu Pooleke aki aiko te uuguro'mwonyo'moneyokwe kuudo guureji sau'mwakopogano.” Taitosolluro kemino su toro anekudoka tovi wuu'nyuno sumawoneyokwe nuvu ilaiyo sonyugono. Moro ilaiyo bwotonyo su tov kuuno ibwosungelabodumdonyugono.
Kevu Koorinda'ai togaikullu muudu'nodo toga nuugwiyo ton mollu'bworoso'moneyokwe Taitosol me'no adaikumul'mwojajukekono. Toro te nevu Taitosollu aro aduuwimwojumwakuuwonogano. “Guu a'mwo abolo su tonyu aiko te wuuru'maro'bi dodumul'mwojono. Toro adumul'mwojubi tovi uumjunopi yasuwa'wino nuugwiyo tov nokwo mollu'bworosopipinogano.” Su toro aduuwimwojumwakuuwonogano.
Aki kemino aro kuudo yaikuupinogano. Oo Gooti toolluro yasuwa'wino sugumaluko kuunodo tov wagwolago Koorinda'ai Jisasolluro a'mwo abolo su tonyu wo'dowodo'mdeyo. Kuudo yaikuupinogano. Toro tovino tov kemi ikuru'mallo'mo winpinogano. Aki toro ton Gooti tool kemi aikullo'mwojoneyokwe subusu'nyogalo wuudumwalpinogano.
Aki Gooti tool noonyumwonyu sugudo togai kemi nokwo ikullamwalonekono. Gooti toolluro su toro ikullamwalono tov aro tovino'mokwono. Buro'nyo buro'nyodeyo pun kemi abaiki'mowo'ji toga kevu noonyumwonyu punyuno supto mipinogaikikono. Aki yiuwi'nokai sugupasudo go'no go'nodo kun kuruv nokwo molludo'movla'mwalpinogaikikono.
Aki kemoro mago tonyuda'ai kaiya'no yogalo jugollo'moneyokwe tooro nobolokuumwalpiyo. Toro kugaikul kuruv a'mwo abolo pubuurai jurogudo duuwimwojo'moneyokwe yogalo sugudo to'no neya dodogaulo. Toro dodopure tovi a'mwo abolo kadu'molo supi tobuuravuro sumdo tovi Gooti toolluro yasuwa'wino sugumaluko nekubweyodowodo tovino kuu'maiyo toru'no bomollolupto'nubweyonokwono.
Aki ikulsulo ki'nodupudo to'busuko kubalno pasudo idopto'nodo pun yiuno Jisas Kraisollu'aro bodupudogano. Pasudo idopto'nodo su togai yomjomwekovlaiyo'moneyokwe kuudo tov kemoro poowokalago tovi neya aullo'movaikwopiyono. Kevu su toro tomgu'aro yomjomwekovla'mdopure togaikullu a'mwo abolo ton aikwonpi tov Gooti toollu yovo aguto wiyopi aki nyulomodomoropimwolapinogano.
Aki Gooti tool kemi aro ikullo'mwojono'moneyokwe nuu subusu'nyogalo wuudodumdonyugono. Nebal'no kuudo tokwe'aro yiuwi'nokai pi'mwo kuudo togai'aro ton kemi neya aullo'movaikwopiyogawono. Toro kuullo'movaikwopiyodowo'jure tokwe kevu a'mwo abolo tonyuno kalo buuropino mollopi aki muunyu toru'aro guureji nokwo ikullunumwalonogaikikono.
Nemi avalobuuravoo, kemoro Gooti toolluno kuudo uubweyodupudo tokwe'aro imgu amgu kalo buuropino ingovla'mdupudo tokwe'aro tovalluno kuudo yaikuu'dowadonogano. Kemoro pasudo su toval gullumovla'mno gullumovla'mno yodubul bwotonyo imo'nodubulovakono. Kevu su toro yomjomwekovla'mdupudo togaikulluno yiuwi'nokai toga Gooti toollu, “Nenoloo,” to'no wuudumwalano'monogano.
Aguto kig Gooti toolluro mido mollomwalo tovi nomarano su tov yaudo yaudo minonokwono. Yiuno jurogudo to'no adapsuko tovino tov Gooti toollu, “Nenoloo,” neya wuudumwalanonogano. Toro tonol Gooti toollu kwako tomuu'aro wiyowa'ji aki gamino luko wiyowa'ji neya ilomoropimwolowanonogano. Nevu su toro tomgu'aro sulomoropiyowa'ji tovino Gooti tool ilaiyo winyokwekono.
Kevu Gooti toolluro nebal'no yogalo tovi kuumjunopo tovino tov kemi ma'no ma'no pasudo tooraida'ai me'no yal'mo'no'mno sugudo kwimo'nopogaikikono. Toro te kevu Jisasolluro a'mwo abolo tobuurekul kevuge avalo tellugwai'yago tello'mwo kuunodo tonbusuko ikullumo'nodupudo pubuuraino kalo buuropino mollodupudogaikikono. Toro te kemida'ai avalo su tobuuraino kemi poowokalago kuunodo tokwe kalo buuropino pasudo su tokwe imgu amgu guureji muunyu toru'aro neya domollogaulo.
Toro kuvi kuruv kevu nemi Aguto Jisas Kraisollu'aro jurogudo neya jogullumwoju'nugovlavogaulo. Su tool nemi ma'no ma'nodo tovuro kirumwallo tovida'ai bomollurolovonekumokalokwodowodekono. Kevu gamoro yasuwa'wino sugumaluko togai'aro Krais toolluno kuudo togai'aro tonyuno kuudo souromapi tovida'ai aguto yogullumwoju'nugovlavopi kwolluno nokwo ilomoropimwolapinekono. Agake'aro aki lukomgu aiyo yiunokuudo mujomwekovla'mwalano kugake'aro yiuwi'nokai iruko tollugwojai gamino yovo tov neya ilomoropiyo'moneyokwekono. Nebal'nodokwono.
Kevu aro dodupudogaikikono. “Oo nevu kuto ivito nuugwiyo bwotonyagokwe tonolluno tov noonyumwonyu punyuno supto mimwakuuwono.” Su toro dodupudo tov kuvimaiyo. Kevnokwe togaikul po'dogalo miyainyunodupu aro tovino kuudo miyouroma'dupudogaikikono. Kevu kaiya'no yomjomwekovla'mdupudobuurekikono. Toro tobuurekulluno a'mwo abolo ton kalo neya aikullunogapuro. Kevu apoo'nyaiyo toorobusuko me'no imo'nodupudobuurekikono. Aki a'mwo sumnowojokwe toorobusuko imo'nodupudobuurekikono. Aki toro tobuurekul a'mwo muukanyulmaiyo toorobusuko kevu wogulo yowo'gallunodupudobuurekikono.
ကြော်ငြာတွေ