2 Koorin 7:1 - Gooti Toolluro Yogalokwono

¹ Miyobuuravoo, Gooti toolluro subuu'yamju su ton me'no adanekubweyokaikono. Toro tovino tov nevu nemi kulako tokwe'aro kuudo tokwe'aro tovallu yiuwi'nokai kaiyako mollugolanekumo'mdupudo pasudo toorai neya amollol'movodukwopinogawano. Aki toro tonol kaiya'no nyumwala'jokwe tovino Gooti toollu kwako tomuu'aro neya amwalogawano. Toro tonollu Gooti gavnokwe toolluro sugupasudo tollovo yiunokuudo neya aullo'movanekwopiyogapuro.

2 Koorin 7:1 ပူးပေါင်းရင်းမြစ်များ

Matyuu 12:33

Guu iko pwolluno iworovomallo'moneyokwe tooku gamoro ikulsulo ki'nodowo'jure tonyu kamwoga yomuugona'binekugono. Iko pwol sugudoldeyokwe gamoro ikulsulo kun kuruv sugudo tonyu ki'nugovla'mwalonekono. Aki iko pwol kaiya'nodoldeyokwe gamoro ikulsulo kun kuruv kaiya'nodo tonyu ki'nugovla'mwalonekono.

Matyuu 5:48

Toro te kevu kemi muunyu kai'muuda'ai Tellunumiyago yiuno sugudo to'no imo'nodowodo toolbusuko kubalno kevu kugaikul kuruv yiuno sugudo to'no neya jumo'nogaulo.”

Matyuu 5:8

Aki a'mwo abolo pun kemi poowokalago me'no yal'mo'nodupudo su ton ilaiyo nokwo ipinogano. Su ton Gooti toollu yiuno'no noonpinogano.

Kuurotokwe 9:31

Toro te yiuwi'nokai kwako Juudiyake'aro Galilike'aro Samariyake'aro tomuuda'ai Jisasolluro mollu'bwoto ton sumdomgu jul'nyo tonyu amjomwekelabiyajupogano. Toro kun kuruv su toro toga'no'gwowi jul'nyo wuulo pun mamaropogano. Yiuno paiko to'no ibwosunodupu ilaiyo amwallajupogano. Toro ton Aguto toollu dolago tomuu uumjunodopure tonyu Gooti toolluro Kuullo tool wiyo'mwojoduke tovida'ai jurogudo sumo'nyajupogano. Toro imo'nodupu aki a'mwo abolo muuduko pugai'aro abuuguro'mwonyajupogano. Toro buuguro'mwonyodopure toga kwolallo bwotonyo sumo'nyajupogano.

Room 5:20

Toro kuvi kuruv a'mwo abolo ton kemi ma'no ma'nodo tonyuno neya yainyunpureyokwe Gooti tool gamoro loowo tov kwiyokaikono. Loowo kwiyoka su tovi me'no amaropo kuga kuruv ma'no ma'nodo tov bwotonyo mujumo'nugelabodowodokwono. Toro mujumo'nugelaboduke kuvi kuruv Gooti toolluro yasuwa'wino sugumaluko uubweyodowodo to'gwowi bwotonyo kuunodo mujumo'nugelabodowodokwono.

1 Koorin 6:20

Su tov aro tovinokwono. Gooti tool kemi me'no abiyekumarokaikono. Toro tovino tov kemoro kulako su ton Gooti toollurogano. Aki yiuwi'nokai toga Gooti tool kemoro kulako tovi'aro yovo aguto neya amarogawoneyokwe kevu sugudo to'no domjumovlavogaulo.

2 Koorin 1:20

Su tov aro tovida'aiyokwono. Krais Jisasol yiuwi'nokai Gooti toolluro subuu'yamju tonyuno, “Tade,” to'no jokwekono. Toro dodowo'jure tovi'aro Gooti toolluro subuu'yamju su tonyu suuwiyo imwojodowodogano. Toro te Gooti toollu subusu'nyogalo modojuguroso'mo toga, “Nebalokwonoo,” dodowadonogano. Nemoro modojugurosodowado su tov yiuno Krais Jisasollu'aro kuvinono dodowadonogano. Aki toro dodowa'jure tovida'ai Gooti tool yovo aguto ma'dowodekono.

Efesos 2:3

Su toro to'busuko kubalno ne kunol kuruv sumdomgu nevnokwenolluro kulako tovuro winoduke tomgu'aro kuumjungovlaiyajuwonogano. Su toro kuumjungovlaiyajuuwo toga nevnokwenolluro kulako tonyu ilaiyo igollunyo'mo pasudo togai'aro kaiya'no kuudo toorogai'aro toorai kuumjungovlaiyajuwonogano. Su toro toga Gooti toolluro surodo wuunodowodo tov nemi wobo toru kwollajukokwono. Gooti tool yiuwi'nokai kwako akavida'ai a'mwo abolo ma'no ma'nodokwe tonyuno surodo wuunodowodekono. Su toro to'busuko kubalno sumdomgu ne kunolluno kuruv Gooti tool surodo aval'no kuunyajukekono.

1 Tesaloonaika 3:13

Aki Aguto tool kemoro poowokalago tonyu jurogudo adaikullumwojogawono. Toro daikullumwojodowo'jure tovida'ai kevu nemi Nellunumiyago Gooti toolluro sumdo tovi gavnokweyolluro kuunodo wimo'nopi aki a'mwo abolo kaiya'nodomaiyokwe nokwo wimo'numwalpinogaikikono. Su toro kwimo'nupi togaikul lukomgu nemi Aguto Jisasol gami a'mwo abolo kuunodo togai kwolabwo'ji toga ilaiyo nokwo wuuru'mapinogaikikono. Gooti tool su toro daikullumwojumwalono tovino nevu subusu'nyogalo wuudoganodowadonogano. Nebal'nodokwono.

1 Tesaloonaika 4:7

Kevu neya duu'nyulo. Gooti tool nemi adonekumaroka su tov nevu kaiya'no pasudo toorai kiroungovlaiyo'moneyokwe adonekumarokalmaiyo. Toro kuvi kuruv gamoro ilaiyo winodowodo pasudo tollovogai neya yomjomwekovla'mwalano'moneyokwe adonekumarokanogano.

1 Tesaloonaika 5:23

Oo kemino tov aro anekullunadopiyo. Gooti sumwoluko kavo wosunyo'moneyokwe tool kemi womdo nekullumwalonekono. Toro ikullodowo'jure tovida'ai kemoro yiuwi'nokai somjomwekovlapi tomgu'aro Gooti gavnokwe toolluro kuunodo nokwo wimo'numwalpinogaikikono. Toro wimo'nugovlavopi nemi Aguto Jisas Kraisol abwo'ji toga kevu a'mwo abolo kaiya'nodomaiyokwe to'no neya imo'nupinogaikikono. Su toro kuvinono ikullumo'nyo'moneyokwe Gooti tool pi'mwono nomollekumwalonekono. Kemoro poowokalago togai'aro kuudo togai'aro kulako togai'aro tonyu nokwo mollekumwalmwalonekono. Su toro tovino anekullunadopiyo.

Hibruu 12:23

Aki kevu Jisasolluro a'mwo abolo togaikul Gooti toolluro kwoloraiyo sujuraiyo tonbusuko wimo'nodupudogaikikono. Toro togaikul Gooti toolluro ago muunyu kai'muu gamoro kwoloraiyo sujuraiyo tobuuro i'bwo'nomwalodupudo toru me'no bai'mo'mdupudogaikikono. Aki Gooti tool gamoro ago muunyu kai'muu tovi anakuuto tomuu kwoloraiyo sujuraiyo su tonyuno yovo tov me'no sokwollosokaikono. Aki toro togaikul Gooti gavnokwe toollu wobo toru me'no bai'mo'mdupudogaikikono. Gooti su tool yiuwi'nokai a'mwo abolo tonyu kooti yogalo jainyubwo'dowodo tookono. Aki kevu a'mwo abolo Gooti toolluro sumdo tovi sugudo me'no wimo'nodupudo tobuuravuro kuullo tonyu wobo toru me'no bai'mo'mdupudogaikikono.

Hibruu 12:28

Aguto kig Gooti toolluro mido mollomwalo tovi nomarano su tov yaudo yaudo minonokwono. Yiuno jurogudo to'no adapsuko tovino tov Gooti toollu, “Nenoloo,” neya wuudumwalanonogano. Toro tonol Gooti toollu kwako tomuu'aro wiyowa'ji aki gamino luko wiyowa'ji neya ilomoropimwolowanonogano. Nevu su toro tomgu'aro sulomoropiyowa'ji tovino Gooti tool ilaiyo winyokwekono.

Hibruu 4:1

Aiyoga a'mwo abolo Moosesol kwako Ijupda'ai abomokalokwoka tonyu kwimo'noka tovino kuuguudo tov nevu me'no souroma'mwakuuwonogano. Aki Gooti toolluro iruko mujomwekovlaiyo'moneyokwe ago towai kuulai'meyo'mo subuu'yamju kwiyajuko tov kuuno kwoso. Toro tovino tov kevu pwolno puru'monodo togaikul Gooti toolluro iruko mujomwekovlaiyo'moneyokwe ago su towai neya kuulai'mopinogaikikono. Toro kuvi kuruv pugaikul ku'nono maulai'mopinogaikuldeyokwe to'gwowi nemi aval'no nonekullumo'no'jo. Toro tovino nevu luko neya yogawano.

Hibruu 6:9

Toro kuvi kuruv kevu nemoro kalo buuropino nekullunodowodo togaikulluno'gwowi yogalo jurogudo akav kemino maikudumwakuuwono. Nevu kemino aro kuudo yaikuu'dowadonogano. Oo a'mwo abolo su ton sugupasudo yodupudodeyo. Yaikuu'dowadonogano. Kemoro sugupasudo yodupudo su ton nemi aro tovino nekuduuwallunodupudogaikikono. Oo Gooti toolluro a'mwo abolo tonyu ma'no ma'nodo tovuro kirumwallo tovida'ai me'no bomollurolovomokalokwodowodo ton kevu kugaikuldeyo. Su toro tovino me'no nekuduuwallunodupudogaikikono.

Jems 4:8

Kevu Gooti toollu wobo toru kuuru'mapi tov Gooti kwol kuruv kemi wobo toru nobekuru'ma'mwalonekono. Kevu ma'no ma'no amjumovlapi to'gwowi kemi ma'no ma'no pasudo su toorai kevnokwe togaikul neya domollol'movodukwopinogaulo. Aki kevu pugaikul Gooti toollu uumjunyo'mo tovino kuudo noullo maullo saupi kugaikul kuruv kemi poowokalago tovida'ai ma'no ma'no kuudo kuulaikwo'dupudo su tooro neya domodukwopiyogaulo.

1 Pita 1:15

Gooti tool kemi me'no adekumarokaikono. Gooti adekumaroka su tool yiuno sugudo to'nodekono. Toro te kevu kemi me'no adekumaroka su toolbusuko neya imo'nopi gamoro sugupasudo tollovogai yiuwi'nokai toga neya jomjomwekovlavogaulo.

1 Pita 1:17

Kevu Gooti toollu, Oo mi Nyunumiyagoloo, subusu'nyogalo wuudodupudekono. Gooti su tool a'mwo abolo tonyu jainyubwollo'mo tool yiuno avalo punyuno to'no kuu'dello muubweyokwekono. Toro kwol kuruv kevu yiuwi'nokai pwolno puru'monodo tobuurekulluro pasudo tonyu ikwonowo'ji yiuno pi'mwono to'no jainyubwollokwekono. Toro te kevu kwako akavi bomwallo togaikulbusuko mwalopi toga Gooti su toollu kwako tomuu'aro neya wiyopi jomjomwekovlavogaulo.

1 Pita 1:22

Kevu Gooti toolluro nebal'no yogalo tovi kuumjunopo tovino tov kemi ma'no ma'no pasudo tooraida'ai me'no yal'mo'no'mno sugudo kwimo'nopogaikikono. Toro te kevu Jisasolluro a'mwo abolo tobuurekul kevuge avalo tellugwai'yago tello'mwo kuunodo tonbusuko ikullumo'nodupudo pubuuraino kalo buuropino mollodupudogaikikono. Toro te kemida'ai avalo su tobuuraino kemi poowokalago kuunodo tokwe kalo buuropino pasudo su tokwe imgu amgu guureji muunyu toru'aro neya domollogaulo.

1 Pita 2:11

Mi ibwoto'nyobuuravoo, kevu kwako akavida'aiyogaikulmaiyo. Toro te kevu kwako akavi mwalopi toga yiuno kwako pumuuda'ai a'mwo bomwallo togaikulbusuko to'no imo'nugovla'mdupudogaikikono. Toro tovino tov nuu duudapi yogalo guureji aro ikudumo'mokwono. Kevu kemi kwako akavida'ai kulako tonyuro buro'nyo buro'nyo ilaiyo igollunyo'mo ikullunodowodo su toorai nuumjunmwalpiyo. Pasudo su tooro kemoro poowokalago tobuurai molo bwotonyo wiyodupudorogano.

1 Pita 5:10

Gooti tool yiuwi'nokai toga gamoro yasuwa'wino sugumaluko tov nekullabiyokwekono. Aki Gooti tool kevu Krais Jisasollu uuguro'mwonyodupudo su toollu'aro gamoro bako su tovi anakuuto tomuu yiunokuudo mujomwekovlaiyo'moneyokwe kemi me'no adekumarokaikono. Toro tovino tov kemoro tabunyuwuulo amo'movla'mwakopo su ton manyu toga guureji mamjo'movla'mwalpinogano. Yiuno kula'nyo toga'gwono mokavlavopi kevu sugudo imo'nupino'moneyokwe Gooti tool aki aiko te yere yekuvo'dogalmwalonekono. Toro yekuvo'dogalowo'ji kemi sobanyo mollekuda'mwalonekono. Toro mollekudavowo'ji aki jurogudo yogullumwojekwapimwalonekono. Aki kemi jurogudo nomekudapimwalonekono. Gooti tool kemi tono tono yaikullugolmwalonekono.

1 Joon 1:7

Toro kuvi kuruv Gooti bako tomuu mwalodowodo toolbusuko kubalno ne kunol kuruv bako tovi anakuuto tomuu'aro neya yomjomwekovla'mwalanonogano. Nevu su toro amjomwekovlawa'ji tov Gooti toolluro a'mwo abolo togai nokwo ibwoto'nomwalmwalanonogano. Aki Gooti toolluro Kwolaiyo Jisasolluro mujako tov nemoro yiuwi'nokai ma'no ma'nodo tonyu mollol'movanekudukwopiyokweyokwono.

1 Joon 1:9

Toro kuvi kuruv nevu Gooti toollu nemoro ma'no ma'no pasudo tonyuno kuu'maiyo adodowiyoku'bworosuna'ji to'gwowi Gooti tool nemoro yiuwi'nokai ma'no ma'no pasudo tonyuro kirumwallo tovi nomodukwopiyonekono. Aki yiuwi'nokai kaiya'no pasudo mollugolanekumo'mdupudo kworai kuruv nomollol'movanekudukwopiyonekono. Gooti tool pasudo idopto'nodo tovi uumjunowo'ji su toro kuvinono yonekono.

1 Joon 3:3

Aki yiuwi'nokai a'mwo abolo Krais su toolluno sogwollo winodupudo ton aro kuudo yaullokweyogano. Krais kaiya'no pasudo puru'monodo kuruv migolamo'nodowodo su toolbusuko kubalno nevu kaiya'no pasudo puru'monodo kuruv nyugolamo'numwala'jo. A'mwo abolo Krais toolluno sogwollo winodupudo ton su toro kuudo yaullokweyogano.