2 Koorin 6:4 - Gooti Toolluro Yogalokwono4 Toro te nemoro yiuwi'nokai pasudo mujumovla'mdowado tovi'aro nevnokwe toonolluno kuu'maiyo toru'no aro wuuduuwallunodowadonogano. “Oo nevu Gooti toolluro womdokwe kuunodonogano.” Wuuduuwallunodowadonogano. Toro toonollu tabunyuwuulo go'no go'nodo togai'aro aki jul'nyo bwotonyo togai'aro aki kaiyako yanekullugolodopure tovida'ai luko bwotonyo yodowado togai'aro su ton baneki'mo'mdupudonogano. အခန်းကိုကြည့်ပါ။ |
2 Koorin 6:4
48 ပူးပေါင်းရင်းမြစ်များ
Toro te moro yogalo aikudumo su tov aro tovino'mokwono. Kevu mi nuguro'mwonyodupudo toorekul sumwoluko kavo to'no nokwo wosunmwalpinorekikono. Toro kworekul kuruv kwako akavi kuuno amwalpi toga jul'nyo tagunyo bwotonyago ton noma'mwalpinorekikono. Toro amapi kuvi kuruv nuvno'gwowi yiuwi'nokai kwako akavida'ai jurogudo tonyu me'no kuuwolovonyugono. Toro tovino tov kemi poowokalago ton jurogudo nokwo jumo'nogaulo.” Kuudokaikono.
Pital toro wuujuno sumaiyokwe aki aro kuudokaikono. “Kevu Isuraiyolda'ai toorekul moro yogalo akavi neya duu'nyulo. Kevu Nasaretda'ai Jisasolluno tov, Oo Gooti toolluro amonekwopiyabokaldeyo, kuudo youromapino'moneyokwe Gooti tool me'no aikuduuwallokaikono. Toro te Gooti tool Jisasollu'aro gamoro duuwallo jurogudo judo'no judo'nodo ton aikuduuwallajukekono. Toro ikuduuwalloduke tonyu kevnokwe toorekul amuugonallajuporekikono.
Toro te a'mwo kwako akavida'ai pworo kaiya'no kuudo aro yau'dupudorogano. Oo nevu ma'no ma'no sa'ji tov Gooti toolluro sugupasudo tovino aro bomollupto'nosonokwono. Gooti tool kwako akavi a'mwo abolo tonbusukolmaiyo. Toro kwol kuruv yiuno sugudo to'no mujumovla'mdowodekono. Nemoro ma'no ma'no sa'ji tov su toro tovino kuu'maiyo bomollupto'nosonokwono. Toro tovino tov Gooti tool nemoro ma'no ma'nodo tovino aironekumwallo'ji tov kaiya'no yonekono. A'mwo pworo kaiya'no kuudo su toro yau'dupudorogano.
Kevu kuudo neya jaullulo. Apoolosol ala'mwoldukono? Aki nuvu Poolonyu ala'mwonyudukono? Yiuwi'nokai toonal yiuno Aguto toolluro womdo tovi wiyokwe tekwojonakono. Toro tekwojonalluno kevu yogalo youllajunodupudo tov navu ilaiyo mimwakuuwolo. Yiuwi'nokai toonal Aguto toolluro womdo tovi wiyo'moneyokwe gavnokwe tool ajonakubweyokanakono. Womdo su tovi yodowole tovida'ai kevu Krais toolluno kuudo kuubweyopogaikikono.
Su toro to'busuko kubalno nevu kemi akuuto toru mwalowono Gooti toolluro yogalo tokwe kemoro poowokalago tonyu ikulsulo to'busuko avlollaikubweyajuwonogano. Toro toonol nemi womdo sajuuwo su tovida'ai kwako akavida'ai wosamujuko ton neya yomoranumwalanonogano. Su tov aro tovinokwono. A'mwo pwol gami womdo tovida'ai wosamujuko ton mulomarowo'ji yonugovla'mdowodekono. Su toro to'busuko kubalno ne kwonol kuruv kemoro kwako akavida'ai noonyumwonyu tobuurogai nekullabodopure tonyu marowa'ji nokwo yomjonomwekovla'mwalanonogano.
Aki a'mwo su tooro Krais toolluro womdo tovi wiyodupudorodukono? Yowa'nogano. Nuu kwonyu kuruv Krais toolluro womdo tovi wiyodumdonyugono. Toro toonyu, Aiyoo, a'mwo amomo pwonyubusuko aro ikudumo'mokwono. Nuu a'mwo su toorai uuwolo'mdumdonyugono. Aki a'mwo su tooro womdo bwotonyo miyodupudo kuvi kuruv nuu toonyuno'gwowi womdo bwotonyo kuunodo yodumdonyugono. Aki a'mwo su toorai wuulo killo'mo ago tovi maulomerosodupudo kuvi kuruv nuu toonyuno'gwowi bwotonyago toga wuulo killo'mo ago tonyu meranubweyodupudonyugono. Aki yiuwi'nokai toga iwago nyuromiyodupudonyugono. Toro toonyu bwotonyago toga nobollo'mo wobo toru yodumdonyugono.
Aki nuu kevuge amwallajo toga noonyumwonyu punyuno supto yodum kemi aro maikudoganyajonyugono. “Oo donyo'mwojulo.” Su toro maikudoganyajonyugono. Su tov kemi jul'nyo ikubweyo'mo manyunyajukonyugono. Toro kuvi kuruv su toro toga Masedooniyada'ai Jisasolluro a'mwo pworo wagwolago Koorin'no aboporogano. Su tooro nemi nellugwai'yago toorobusuko nonekullumo'nodupudorogano. Toro tooro bino sumaveyokwe moro noonyumwonyu supto yodore tonyu abonyabiyajuporogano. Toro te nuu sumdomgu kemi jul'nyo ikubweyo'mo manyunyajuko to'busuko kubalno lukomgu kuga kuruv jul'nyo maikubwemwalmonyugono. Aki nuu noonyumwonyu punyuno supto sumi kuga kuruv anyo'mwojupureyokwe kemi maikudoganmwalmonyugono.
Toro te nuu Krais toollu womdo wiyodumdo toonyu jurogudo nonagutokwe imo'nodumdekwonyugono. Su toro tovino nuu ilaiyo yodumdonyugono. Aki a'mwo pworo mino burolyogalo bwolomonumwogapiyodapudo tovino ilaiyo yodumdonyugono. Aki a'mwo pworo numi jul'nyo nubweyodupudo tovino ilaiyo yodumdonyugono. Aki a'mwo pworo nuu Krais toollu uumjunyokwe tekwonyu kaiyako yanyugolodopure tovino ilaiyo yodumdonyugono. Aki noonyumwonyu kaiyako banyumo'nodopure tonyuno ilaiyo yodumdonyugono. Moro ilaiyo yodumdo su tovino kavlo tov arokwono. Nuu wollainyo to'no sumo'numi toga Krais toolluro nyo'mwojodowo'jure tokwe jurogudo kuvinono imo'nodumdonyugono.
Nuu kevuge amwallajo toga duuwallo jurogudo judo'no judo'nodo ton kemi kuu'maiyo toru aikuduuwallunyajonyugono. Toro ikuduuwallunodore tonyu wonodupu kuudo sanuullajupogaikikono. Oo Poolol Jisasolluro kuurotokwe kuunodoldeyo. Sanuullajupogaikikono. Aki jul'nyo pworo banyumo'nodopure toga paiko tooraibusuko kaveno to'no mokavla'mno sumoneyokwe nuu kuurotokwe womdo su tovi kuuno amjumovlaiyajonyugono.
Aki neya duu'nyulo. A'mwo ibwasokwe pworo Gooti toolluro yogalo tokwe nuugwiyo ki'noma'dupudorogano. Toro kuvi kuruv nevu ibwasokwe pwonolno'gwowi a'mwo su toorobusuko miyomjomwekovla'mdowadonogano. Gooti tool nemi amonekwopiyaboka tovino tov yiuno nebal'nodo tomgu'aro molludo'movla'mdowadonogano. Toro toonol Krais toolluro jurogudo tokwe to'no modomollodowadonogano. Toro modomollodowa'jure tovi Gooti tool nemi kuu'maiyo toru'no muugonanekwo'dowodekono.
Toro te nevu gamoro jurogudo nekubweyodowo'jure tokwe subuu'yamju muuduko tovino kuuguudo to'gwowi nokwo moruudomollanonogano. Subuu'yamju muuduko su tov loowo tovida'ai puukwollo to'busuko sokwollopiyabingiko'maiyo. Toro kuvi kuruv Gooti toolluro Kuullo toolluda'ai abingikokwono. Kuudo neya jaullulo. Loowo tov a'mwo abolo tonyu romiyosodowodo kuvi kuruv Gooti toolluro Kuullo toolno'gwowi aiyo yiunokuudo mujomwekovlaiyo'moneyokwe tov wiyodowodekono.
Nevu kwako akavi manyu toga mamwalanonogano. Aki nemoro agasuro jul'nyo baneki'mo'mdupudo su tobuuro kula'nyobuurogano. Toro kuvi kuruv jul'nyo baneki'mo'mupudo su tobuuro aro tov yovrovanekubweyodupudogano. Lukomgu nevu aiyo yiunokuudo mujomwekovlaiyo'moneyokwe tovi amara'ji toga Gooti tool noonyumwonyu sugumaluko tollovo nyoullanekubweyonekono. Aki Gooti toolluro sugumaluko youllanekubweyodowo'jure su tollovai nevu ku'nono majagilanonogano.
Toro te nevu womdo su tovi momjumovlaiyo'moneyokwe wogulpasudo toorogai'aro yiulpasudo toorogai'aro su toorai buulo uugunyumopiyodowadonogano. Aki joukuuromato'mo pasudorodeyo oo Gooti toolluro yogalo tovi kaiya'nodo tomgu'aro moruugunyumwojo'mo pasudorodeyo kworai kuruv miyodowadonogano. Toro kwonol kuruv Gooti toolluro sumdo tovino'gwowi yiuno nebal'no yogalo to'no kuu'maiyo toru moruudodowadonogano. Kuu'maiyo toru'no su toro moruudodowado toonolluno yiuwi'nokai a'mwo abolo ton aro kuudo yanekuu'dupudonogano. Oo a'mwo akaro nebal'no yogalo to'no dodupudorodeyo. Yanekuu'dupudonogano.
Neya duu'nyulo. Jul'nyo tago tooro go'no go'nodo tomgu'aro nemi kaiyako yanekullugolodupudo kuvi kuruv jurogudo kuulanekwo'dowo'jure tokwe nemi ku'nono magurojonekuda'mdupudorogano. Aki puga nemoro kuudo tov noo'nookwo yau'dowadonogano. Toro kuvi kuruv nebaikuudo kuulanekwo'dowodo su to'gwowi ku'nono manekugollu'mo'mdowodokwono.
Kevu kuudo neya jaullulo. Aga'no'gwowi Gooti toolluro womdo ikullodowo'jure tovida'ai kevu kemi kaiya'no pasudo mujumovla'mdupudo tonyuno jul'nyo ibwosunodupudogaikikono. Jul'nyo ibwosunodupudo su tov kemi ikuduka'bwo'dowo'jure tovida'ai kevu kuudo guureji aro yau'dupudogaikikono. Oo nevu ma'no ma'no pasudo toorai manyu tomuu neya amodukwopiyogawano. Su toro kuudo yauropi kevnokwe togaikul kworado jumwonyo'moneyokwe kevu guureji dodowiyoku'bworosodupudogaikikono. Aki kevu kaiya'no pasudo puvino surodo ikuunodowodogaikikono. Aki kevu Gooti toollu kwako tomuu'aro wiyodupudogaikikono. Aki nuu kemi bekuru'mallo'moneyokwe tovino guureji ikullunodowodogaikikono. Aki kevu sugupasudo molludo'movlaiyo'mo ikullunodowodo togaikulluno tov womdo guureji yodupudogaikikono. Aki kevu kaiya'no pasudo tovi kirumwallo'moneyokwe kuudo me'no saullajupogaikikono. Kemoro yiuwi'nokai su toro mujumovla'mdupudo tov kuu'maiyo toru'no aro nekuduuwallunodupudogaikikono. Nevu sugudo to'no yodowadonogano. Su toro nekuduuwallunodopure togaikullu me'no wonekuma'dowadonogano.
Aki Gooti tool gamoro yiuwi'nokai jurogudo tokwe kemi adaikullumwojoneyokwe subusu'nyogalo wuudodowolonakono. Jurogudo su tov gamoro bako bwotonyo tovida'ai daikullumwojomwalonekono. Toro te kevu gamoro jurogudo su tovi neya gudupola'mwalpinogaikikono. Toro gudupola'dopure togaikullu tagunyo pun abaiki'mopi toga kevu kavo to'no mollukwovopi kemi poowokalago togai ilaiyo nokwo ibwosunmwalpinogaikikono.
Aga nuu kemi ikullo'mwojo'moneyokwe tagunyo banyumo'nodopure tovida'ai danyu'nyuwuulo subwosunmwakonyugono. Danyu'nyuwuulo ibwosunodumdo su tonyuno moro poowokalago tokwe ilaiyo sadokwono. Moro ilaiyo yodumdo su tov aro tovinokwono. Krais tool gamoro a'mwo abolo tonyu wiyo'mwojo'moneyokwe danyu'nyuwuulo subwosunokaikono. Su toro subwosunoka toolbusuko kubalno aga nuu kwonyu kuruv gamoro aiko toru ma'dum kevu gamoro kulako to'busuko mollu'bwoto togaikullu ikullo'mwojo'moneyokwe danyu'nyuwuulo subwosunmwakono.
Nemiyobuuravoo, aro daikullano'monogano. Kevu a'mwo abolo burawo yodupudo tonyu duudapi yogalo neya duuwiyogaulo. Aki a'mwo abolo il'nyuno yodupudo tonyu jurogudo neya doduuwimwojogaulo. Aki a'mwo abolo jurogudo mimo'nodupudo kunyu kuruv duuwiyo'mwojogaulo. Toro te kevu yiuwi'nokai a'mwo abolo tonyuno biyolo nodou'mwonyopimwalpiyo.
Toro kuvi kuruv abolo su tobuuro kwoloraiyo tonyu yoma'mwalpino tobuuraino tov Gooti tool nuuwiyo'mwojumwalonogano. Toro ton Jisasolluno kuudo uubwemovlavopi kalo buuropino kwingovlapi tov Gooti tool nuuwiyo'mwojumwalonogano. Aki Gooti toolluro kuunodo wimo'nugovlavopi kevnokwe tobuuro po'dogalo amollomwalnupi kuruv Gooti tool nuuwiyo'mwojumwalonogano.
Oo Timootiyoloo, guu Jisasolluro a'mwo abolo avalo tobuurai moro kuuguudo agudumo su tonyuno sodubwasubi tov Krais Jisasolluro a'mwo womdokwe sugudo imo'nubinekugono. Toro tookuji Gooti toolluro yogalo tovi kuudo uubweyowado su ton gumi aguto nokwo yogullumwojogwapimwalpinogono. Aki kuuguudo idopto'nodo ilaiyo tokwe yodubwasodowado tovi guu me'no uumjungelabodumdo su to kuruv gumi aguto nokwo yogullumwojogwapimwalonokwono.
Toro kuvi kuruv Timootiyoloo guvno'gwowi Gooti toolluro a'mwo pwekugono. Toro tookujuno tov yiuwi'nokai ma'no ma'no pasudo su tooraida'ai manyu tomuuno lukado neya dovlavogawono. Aki sugupasudo togai'aro Gooti toolluro ilaiyo winodowodo togai'aro tonyu neya duumjunogawono. Aki Gooti toolluno kuudo uubwemovlavo'bi a'mwo abolo punyuno kalo buuropino neya domollogawono. Aki jul'nyo bagi'mo'mdopure kuga kuruv womdo tovi mimwogapiyo'bi guureji neya domomjumovlavogawono. Aki yiuwi'nokai a'mwo abolo tonyu kavo neya duubemwojogawono.
Toro tovino tov guu a'mwo abolo punyu nemi Aguto toolluno kuu'maiyo toru moruujo'moneyokwe tovino wogulo mibinono. Aki nuu Aguto toollu uumjunodumdo tovida'ai wuulo killo'mo ago tovi kuule'na'dumdo kwonyuno kuruv kuu'maiyo toru moruujo'mo tovino wogulo mibinono. Nuu Krais toolluno kuuguudo sugudo tokwe moruudodore tovida'ai tagunyo ama'mwakonyugono. Toro ama'mwako toonyuge guu kweku kuruv Gooti toolluro jurogudo gubweyodowo'jure tokwe Krais toolluno kuuguudo sugudo tov amoruudubi tovida'ai jul'nyo pun nokwo ma'binekugono. Su toro ama'bi tovino'mo guu neya jovrowosunogawono.
Toro te kuudo neya jaurono. Aguto toolluro a'mwo womdokwe pwol molo nyumwalo'jo. Toro kwol kuruv yiuwi'nokai a'mwo abolo tonyu ilaiyo to'no neya igolmovla'mwalonekono. Aki toro tool nebal'no yogalo tokwe nokwo yodubwasonekono. Aki toro tool a'mwo pworavuro amolloluwosupi kuga kuruv sumwoluko su'mno yere mimo'nonekono.
Toro kuvi kuruv guvno'gwowi yiuwi'nokai toga guvnokwe tooku neya domollomwalnogawono. Aki gumi kaiyako yagujugolodopure kuga kuruv guu womdo tovi nyuu'dapimwalbiyo. Toro kweku kuruv Gooti toolluro kuuguudo sugudo tokwe modomollo'moneyokwe womdo su tovi yiuwi'nokai toga neya domomjumovlavogawono. Aki toro tooku yiuwi'nokai Gooti toolluro womdo me'no agubweyungiko su tonyu neya yopibinekugono.
A'mwo abolo bwotonyago Gooti toollu kuudo kuubweyajupo su ton sulu'wo to'busuko nemi aiyowomno mwodovonekuma'dupudogano. Kemoro kuudo kuubweyajupo su tov nemi kuu'maiyo toru'no me'no nekuduuwallodupudo tovino tov nevu resis tovibusuko guureji neya yogawano. Nevu resis tovi yo'mo tonol noonyumwonyu pworo nemi nekumjukuto yodupudo toorogai'aro aki ma'no ma'no pasudo nemi nekumgu'mo'nodupudo toorogai'aro su toorai neya arobwotovodukwopiyogawano. Me'no robwotovodukwopiyowa'ji nevu resis tovi kano kano plaiyo'moneyokwe puuto tov nemi sumdollu toru wo'dowodo su tovi neya ainomjumovlavogawano. Puuto su tov Gooti toolluro anekuduuwalloka su tovi'aro guureji neya uumjungovlavogawano.
Nuvu Joononyu kemi telludai'yago toonyubusuko ikullumo'nodumdonyugono. Toro te nuu toonyuge'aro kevuge'aro nevu yiuwi'nokai tonol Jisasollu aval'no me'no kuuguro'mwonyowonogano. Aki aguto kig Gooti toolluro mido mollomwalo tovi dolago tomuu nevu yiuwi'nokai tonol aval'no me'no kuulomwalodowadonogano. Aki a'mwo abolo pun kaiyako yanekullugolodopure tovida'ai nevu yiuwi'nokai tonol danyu'nyuwuulo aval'no ibwosunodowadonogano. Toro ibwosunodowado kuvi kuruv nemi Gooti toollu muugollu'mo'mdowadonogano. Aki toro toollu guureji to'no gudupola'dowadonogano. Nuu Gooti toolluro yogalo tokwe'aro Jisasolluno nebal'no kuuguudo tokwe'aro tovake moruudomollodore tovino tov aku'momdo akawai ameranubweyoponyugono. Aku'momdo akavino yovo tov Patimoosovokwono.
Kevu moro yogalo adaikullo tovi me'no uumjunodupudogaikikono. Toro togaikul kaiya'no yaikullugolodopure kuga kuruv kevu moro yogalo tovi guureji neya dogudupolarogaulo. Lukomgu yamju wiyoganyo'moneyokwe puruv yiuwi'nokai a'mwo abolo kwako akavi mwalodupudo tonyu nobwi'mowonokwono. Su toro abwi'mowo'ji toga kevu moro yogalo tovi gudupola'dupudo togaikulluno tov kaiyako nomapiyokwe tov nuu po'dogalo nomollekumwalmonyugono.
ကြော်ငြာတွေ