2 Koorin 4:6 - Gooti Toolluro Yogalokwono

⁶ Kuudo neya jaullulo. Gooti tool aro me'no adokaikono. “Dugumwuulo tomuuda'ai bako tov imo'nono.” Toro adoka Gooti su tool nemoro poowokalago tonyu Jisas Kraisolluro bako tov me'no anekuuwokaikono. Gooti toolluro bako bwotonyo su tov Jisas Kraisolluro sumdomago tovi'aro nevu me'no wonoma'dowadonogano. Toro te bako su tov nemoro poowokalago tonyu anakuuto tomuu me'no pwopiyodowodokwono.

2 Koorin 4:6 ပူးပေါင်းရင်းမြစ်များ

Muuduko 1:3

Toruda'ai Gooti tool aro adokaikono. “Bako puruv neya imo'nono.” Toro adoka toga bako tov kuvinono sumo'nokakwono.

Luuk 10:22

Toro wuujuno sumaiyokwe aki a'mwo abolo tonyu aro kuudokaikono. “Nuu yiuwi'nokai tonyu mido mollomwalmwalmo'moneyokwe tov mi Nyunumiyago tool me'no anubweyokanyugono. Yiuno mi Nyunumiyago su toolno mino kuudo kuunodo tov yanuu'dowodekono. Aki yiuno nuvnokwe toonyu mi Nyunumiyago su toolluno kuudo kuunodo tov youroma'dumdekono. Aki yiuno gamoro Kwolaiyo judo toonyu a'mwo abolo punyu moro Nyunumiyago toolluno kuu'maiyo toru nokwo wuuduuwallumonyugono. Su toro wuuduuwallodo'mure tovida'ai to'no a'mwo abolo su ton moro Nyunumiyago toolluno kuudo nokwo youromapinekono.” Kuudokaikono.

Joon 1:14

Aki Yogalo su tool a'mwo kulakokwe sumo'nokaikono. Toro imo'nyuno sumaiyokwe nemi akuuto toru abwolomwalokaikono. Toro toollu Gooti toolluro yasuwa'wino sugumaluko tokwe'aro nebaikuuguudo tokwe'aro toval aiyowomno kuullo'mowopiyodowodekono. Aki toro tool Gooti Ganumiyago toolluro Kwolaiyo pwolnodo tookono. Toro toolluro jurogudo kuunodo tovi nevu me'no kwonowekono.

Joon 11:40

Toro kuudoka tovi Jisasol aro kuudokaikono. “Nuvu aro me'no agudumo'guugono. Guvu mino kuudo anubwebi tov Gooti toolluro jurogudo kuunodo tovi noonbino'guugono. Su toro me'no agudumo'guugono.” Kuudokaikono.

Joon 12:41

Aisaiyalluro kuuguudo ajakwolloka su tov Jisasollunokwono. Jisasol yovo aguto yere mama'duke kugada'ai Aisaiyal me'no kwonomallajukekono. Su toro tovino ajakwollokaikono.

Kuurotokwe 26:18

Toro te nuu a'mwo abolo su tonyomno amogwapimo tov aro tovinokwono. A'mwo abolo su ton dugumdo tomuu kuulomwalodupudogano. Toro tonyu gumoro kuuguudo yodubwasodo'bure tovida'ai kemoro sumdo ton delukuulludapiyo'bi bako tovi nokwo wonmwalpinogano. Toro ton Satanyolluro jurogudo tovi dolago tomuuda'ai birolo'nugolokwopi Gooti toolluro jurogudo tovi dolago tomuu nokwo kuulomwalpinogano. Aki toro ton mino kuudo anubwepi tovino tov nuu kemoro ma'no ma'nodo tovuro kirumwallo tovi modukwopiyo'mi Gooti toolluro a'mwo abolo kuunodo me'no ajesungiko nyumo'numwalpinogano.” Yogaimaguurai tov su toro anyudokakwono.” Kuudokaikono.

1 Koorin 12:8

Toro te kevu neya duu'nyulo. Gooti toolluro Kuullo tool a'mwo pwollu pi'mwo kuudo tokwe dumul'mwojo'moneyokwe womdo tov wiyodowodekono. Aki puruv, kuudo aguto tokwe moruujo'moneyokwe womdo tov Gooti toolluro Kuullo tool a'mwo pwollu wiyodowodekono.

2 Koorin 2:10

Toro te kevu a'mwo su toolluro ma'no ma'nodo tonyuro kirumwallo tovi yiunokuudo amodukwopipi toga nuu kwonyu kuruv a'mwo su toolluro ma'no ma'nodo tonyuro kirumwallo tovi yiunokuudo nomodukwopimonyugono. Moro su toro amodukwopimi su tov kev kugaikulluda'ai ikullo'mwojo'moneyokweyokwono. Nuu su tov Krais toolluro sumdo tovi kuvinono yodumdonyugono.

2 Koorin 3:18

Toro te Gooti tool nevu yiuwi'nokai Jisasolluro a'mwo abolo tonolluro sumdomago tovida'ai youro kudo'aiko nekulluku'dowodo su tovi me'no modosanekudukwopiyodowodonogano. Toro modosanekudukwopiyodowodo tonol Aguto toolluro bako bwotonyo tovi me'no wonodowadonogano. Toro tonol a'mwo abolo gabovo punyu bako su to'busuko pwopiyodowadonogano. Su tov nevu Jisasolbusuko imo'nano'moneyokwe Aguto toolluro Kuullo tool yiuwi'nokai toga mollumo'nanekubweyodowodonogano. Toro mollumo'nanekubweyoduke tovi'aro nevu Aguto su toolbusuko irol'mowosuno imo'nyokwenogano.

2 Koorin 4:4

Satanyol kwako akavida'ai gooti toolbusuko imo'nodowo a'mwo abolo kuudo muubwemwakopo su tobuuravuro kuudo tonyu galobu'duvolomwora'dowodekono. Toro galobu'duvolomwora'duke tovida'ai a'mwo abolo su tobuuro sumnowojokwe tonbusuko imo'nodupudogano. Aki su toro tobuuro Krais toolluno kuuguudo sugudo tovuro bako tovi ku'nono mwonodupudogano. Aki Krais su tool Gooti toolbusuko irol'mowosunodekono. Toro toolluno kuudo miyouroma'dupudekono.

Efesos 1:17

Toro kwonyu kuruv nemi Aguto Jisas Kraisolluro Gooti toollu kuuno wuudumovla'mwalmonyugono. Gooti su tool bako bwotonyo pwopiyodowodo tomuuda'ai Nellunumiyago kuunodekono. Toro toollu nuu aro tonyuno subusu'nyogalo wuudodumdonyugono. Gooti toolluro Kuullo tool pi'mwo kuudo tov kemi nokwo ikubwemwalonekono. Gamoro pi'mwo kuudo ikubweyodowo'jure tokwe kevu Gooti toolluno kuudo bwotonyago nyouroma'mwalpinogaikikono.

Efesos 1:18

Aki kemino subusu'nyogalo aro tovino dodumdonyugono. Gooti tool kemoro poowokalago kuudo tonyu kudo'aiko neya ausaikubweyono. Toro kuusaikubweyodowo'jure toga kevu gamoro bako bwotonyo pwopiyodowodo tovino kuu'maiyo toru nokwo wonmwalpinogaikikono. Toro kwonpi toga kevu aro kuudo yau'mwalpinogaikikono. Oo Gooti tool su toro kavlo tovino nemi adonekumarokaldeyo. Kuudo yau'mwalpinogaikikono. Aki lukomgu kemi ilaiyo ikullumo'nono tovino sogwollo kinodupudo kuvino kuruv kuudo nyouromapinogaikikono. Aki gamoro a'mwo abolo kuunodo tonollu gavnokweyolluro bako bwotonyo tomuuda'ai yiuwi'nokai sugumaluko bwotonyago tollovo nonekullabiyo'moneyokwe dodowodo tonyuno nyouromapinogaikikono.

Efesos 5:8

Su tov aro tovinokwono. Sumdomgu kemoro poowokalago ton dugumwuulo toollu anakuuto tomuu kwollajupogano. Toro kuvi kuruv aga'no'gwowi Aguto toolluro a'mwo abolo me'no wimo'nodupudo togaikulluno tov gamoro gworeko to'busuko me'no wimo'nodupudogaikikono. Toro togaikul kemi Aguto su toolluro bako tov kuu'maiyo toru'no pwopiyo'moneyokwe pasudo tollovo neya domjumovlavogaulo.

Filipai 2:6

Krais Jisasol Gooti kuunodo imo'nodowodo kwol kuruv kuudo aro tovi guureji magudupolallajukekono. Oo nuu Gooti kuunodo imo'nodumdo toonyuno tov aval'no neya amwalmo. Toro kuudo tovi guureji magudupolallajukekono.

Kooloosi 1:15

Nevu Gooti toollu mwonodowadekono. Toro kuvi kuruv gamoro Kwolaiyo toolno'gwowi gami Ganumiyago toolluno irol'mowosunodekono. Kwolaiyo su tool nekuduuwalloduke tovi'aro gami Ganumiyago Gooti toolluno kuu'maiyo toru'no bomollolupto'nanekubweyodowodekono. Kwolaiyo su tool yiuwi'nokai Gooti toolluro sokwollosoka tonyuro sumdomguda'aiyekono.

1 Tesaloonaika 2:12

Kemi jurogudo dekumworaso'moneyokwe kuuguudo togai'aro nodaikumul'mwojo'moneyokwe kuuguudo togai'aro kemoro poowokalago tonyu jurogudo daikullumwojo'moneyokwe kuuguudo togai'aro su togai kemi yodekubwasodowa sodogullumwojekwapiyajuwonogano. Su tov kevu Gooti toolluro ilaiyo winodowo'jure tomgu'aro neya yomjomwekovla'mwalpino'moneyokwe tovinokwono. Kuudo neya jaullulo. Aguto kig Gooti tool gamoro mido mollomwalodowodo tovi kuulomwallo'moneyokwe kemi me'no dekuma'dowodekono. Aki gamoro bako bwotonyo tovi anakuuto tomuu kuulomwallo'moneyokwe kuruv me'no dekuma'dowodekono.

Hibruu 1:3

Gooti toolluro Kwolaiyo su tool Gooti jurogudo kuunodo toolluro bako pwopiyodowodo tov nekuduuwallodowodekono. Aki toro tool gami Ganumiyago Gooti toolbusuko irol'mowosunodekono. Toro tool kwako tokwe'aro sulugumdo tokwe'aro tovalluda'ai yiuwi'nokai wo'dupudo tonyu gamoro yogalo jurogudo tokwe kuuno mollomwalodowodekono. Kwolaiyo su tool nemoro ma'no ma'nodo tovuro kirumwallo tovi me'no amollol'movonekudukwopiyokaikono. Toro mollol'movonekudukwopino sumaiyokwe toga muunyu kai'muu mwalodowodo Aguto Kuunodo toolluro anato toru sulomwalokaikono.

Hibruu 6:4

A'mwo pworo sumdomgu Krais toolluro bako tovi bodupu Gooti toolluro ago muunyu kai'muuda'ai yasuwa'wino tollovai me'no wonoma'dupudorogano. Aki toro tooro Gooti toolluro Kuullo toollu aval'no ma'dupudorogano. Aki toro tooro Gooti toolluro yogalo tovino yamju gallainyubwo'dupudo tovida'ai, “Oo ilaiyo'mdeyo,” me'no dodupudorogano. Aki toro tooro Gooti toolluro jurogudo ton lukomgu aiyowo'mo toga kuu'maiyo bomollolupto'nosono su tonyuda'ai pun me'no ma'dupudorogano. A'mwo su tooro yiuwi'nokai toro tonyu me'no wonoma'dupudo kworo kuruv su tooraida'ai pworono'gwowi lukomgu Gooti toollu buulo uugunyumopipinorogano. Toro te a'mwo su tooro Gooti toollu buulo toro kuuguunyumopipi tov Gooti toollomno aki aiko te kuudo ku'nono miyouragunyumo'nupinorogano. Su tov aro tovinokwono. A'mwo Gooti toollu buulo kuuguunyumopipi su tooro Gooti toolluro Kwolaiyo kwollu kuruv buulo aval'no uugunyumopipinorogano. Toro tooro aiyoga Juu tooro Krais toollu buulo uugunyumopiyo'mno i'noguropte tovi amovoromiyoguroptowosopo to'busuko kubalno a'mwo su tooro Krais toollu aki aiko te kaiyako aval'no igolpinorogano. Su toro sugolpi tov Krais toolluno kuu'maiyo toru'no bwolomorumwogapiyapi aki kevnokwe kworo kuruv kaiyako i'nopipinorogano.

1 Pita 1:12

Gooti tool aiyoga proofet su toorai aro tovino me'no kuuduuwallokaikono. “Kemoro proofet yogalo moruudodupudo womdo su tov kevnokweraiyo'mo'maiyo. Toro kuvi kuruv yogalo amoruujajupo su tov a'mwo abolo lukomguda'ai billumo'nupino tonyo'mokwono.” Gooti tool proofet su toorai kuu'maiyo me'no kuuduuwallajukekono. Toro te proofet yogalo su tokwe a'mwo kuurotokwe tooro modomollodupudorogano. Toro modomollodupudo su tov kev togaikullo'mokwono. Aki Gooti tool aiyogasuro su toorai gamoro Kuullo tool muunyu kai'muuda'ai kwolomoropiyabokaikono. Toro toolluro jurogudo tokwe Krais toolluno kuuguudo sugudo tov amodekumollajuporogano. Aki ensel kworo kuruv proofet tooravuro yogalo su tovino kavlo tov kuudo youromallo'mo winodupudorogano.

1 Pita 2:9

Toro kuvi kuruv kemino'gwowi Gooti tool me'no ajaikubweyokaikono. Toro togaikul kemi aguto kig Gooti toolluro pris womdokwe wimo'numwalpino'moneyokwe me'no imo'nodupudogaikikono. Aki a'mwo abolo pun kemi aguto kig toolluro kantri toru mwalodupudo tonbusuko kubalno kevu Gooti gavnokwe tooke mujomwekovla'mwalpino'moneyokwe gamoro a'mwo abolo wimo'nodupudogaikikono. Aki kevu Gooti toolluro me'no ajaikubweyoka togaikul yiuno gavnokweyolluro a'mwo abolo wimo'nugovla'mdupudogaikikono. Toro tovino tov kevu Gooti toolluro pasudo sugumaluko yaikullugolodowodo tonyuno a'mwo abolo punyu nokwo moruudumwalpinogaikikono. Gooti su tool kevu dugumwuulo tomuu amwallajupo togaikullu bomollurolovekumokalokwiyo'moneyokwe dekuma'no sumaiyokwe gamoro bako sugumaluko tomuuno amogaibworekumokaulokaikono.

2 Pita 1:19

Toro te proofet tooravuro yogalo ajakwollajupo tovino nevu kuudo noullo maullo miyaullokwenogano. Toro kuvi kuruv nevu, Oo nebalo'mdeyo, guureji to'no yau'dowadonogano. Proofet tooravuro yogalo amoruujajupo su tov dugumdo tomuuda'ai lamwo tovuro bako pwopiyowodo to'busukokwono. Bako su tov lomwo iru'mago tov yere millourosodowo'jure toga kuuno pwopimwalonokwono. Su toro to'busuko kubalno Krais tool lomwo iru'mago togasuro sulludo kabwo tollugwobusuko imo'nodowodekono. Toro tool iruko tollugwoji kuu'maiyo toru bowo'ji pwopiyodowo'jure toga kemoro poowokalago kuunodo togai noonpinekono. Toro tovino tov kevu proofet su tooravuro yogalo tovi pi'mwono neya duumjunogaulo.