Aki a'mwo pworo wit sulo tollovo aulewomdo tomuu abwolorapo to'busukorogano. A'mwo su tooro Gooti toolluro yogalo tovi wuu'nodupudorogano. Toro wuu'nodupudo kworo kuruv kwako akavida'ai kuto ivito tonyuno kuudo kwolallo yourukwapiyodupudo tokwe'aro kuto ivito bwotonyagokwe imo'nyo'mo kuudo tokwe'aro yiuwi'nokai kuudo su ton Gooti toolluro yogalo tovi bu'duvoloma'dupudogano. Su toro tovida'ai jurogudo imo'nyo'mo tov ku'nono mimo'nodupu aki sulo kun kuruv mai'nodupudorogano.
2 Koorin 4:4 - Gooti Toolluro Yogalokwono4 Satanyol kwako akavida'ai gooti toolbusuko imo'nodowo a'mwo abolo kuudo muubwemwakopo su tobuuravuro kuudo tonyu galobu'duvolomwora'dowodekono. Toro galobu'duvolomwora'duke tovida'ai a'mwo abolo su tobuuro sumnowojokwe tonbusuko imo'nodupudogano. Aki su toro tobuuro Krais toolluno kuuguudo sugudo tovuro bako tovi ku'nono mwonodupudogano. Aki Krais su tool Gooti toolbusuko irol'mowosunodekono. Toro toolluno kuudo miyouroma'dupudekono. အခန်းကိုကြည့်ပါ။ |
2 Koorin 4:4
42 ပူးပေါင်းရင်းမြစ်များ
Aki Yogalo su tool a'mwo kulakokwe sumo'nokaikono. Toro imo'nyuno sumaiyokwe nemi akuuto toru abwolomwalokaikono. Toro toollu Gooti toolluro yasuwa'wino sugumaluko tokwe'aro nebaikuuguudo tokwe'aro toval aiyowomno kuullo'mowopiyodowodekono. Aki toro tool Gooti Ganumiyago toolluro Kwolaiyo pwolnodo tookono. Toro toolluro jurogudo kuunodo tovi nevu me'no kwonowekono.
Toro kuudoganopo tovi Jisasol aro kuudokaikono. “Nuu bako to'busuko toonyu kevuge yiuno kula'nyo toga'gwono mwalmonyugono. Toro te nuu kevuge kuuno mwalo'mi bako pwopiyodo'mure tovi anakuuto tomuu kevu neya jomjomwekovlavogaulo. Su tov aro tovino'mokwono. Dugumdo tov kemi nobu'duvolekuma'mwalo'jokweyo'mokwono. A'mwo pwol dugumdo tovi somjomwekovlawo'ji to'gwowi gamoro novlawono tomuuno kuudo nonagutekono.
“A'mwo abolo ton sumdo noonpiyokwe Gooti tool kemoro sumdo tonyu galomjurowosodowodekono. Aki a'mwo abolo ton kemoro poowokalago togai kuudo nyouragunyumo'nupiyokwe Gooti tool kemoro poowokalago su tonyu kudo'aiko kuujugurokaikono. Su tov aro tovinokwono. A'mwo abolo su ton miyomno yadu'mwonyo'mo mwinodupudo tovino tov nuu a'mwo abolo su tonyu ku'nono mikulmonyugono. Su toro tovinokwono.”
Nuu kwako akavida'ai a'mwo su tooravuro akuuto toru womdo jurogudo ton sajonyugono. Womdo jurogudo su ton a'mwo yasuwa'nodo pwol ku'nono miyodowodogano. Nuvu womdo jurogudo su ton muuduuwallo'mujuko'mno'juki a'mwo su tooro kemi ma'no ma'nodo tovuro jul'nyo tov mamaropujukorogano. Toro kuvi kuruv aga'no'gwowi a'mwo su tooro moro duuwallo jurogudo tonyu me'no wonodupudorogano. Toro wonodupudo kworo kuruv nuuge'aro mi Nyunumiyago tooke'aro toonalluno surodo to'no wuunodupudorogano.
Toruda'ai Jisasol a'mwo abolo tonyu aiko te sodubwasoka toga aro kuudokaikono. “Nuu yiuwi'nokai a'mwo abolo kwako akavi mwalodupudo tonyu bako wimo'nodumdonyugono. A'mwo pwol numi anumjuno'ji su tool dugumdo tomuu miyomjomwekovla'mwalonekono. Toro kwol kuruv aiyo yiunokuudo mujomwekovlaiyo'moneyokwe bako to'gwowi kurukwe imo'nonekono.” Kuudokaikono.
Toro te nuu a'mwo abolo su tonyomno amogwapimo tov aro tovinokwono. A'mwo abolo su ton dugumdo tomuu kuulomwalodupudogano. Toro tonyu gumoro kuuguudo yodubwasodo'bure tovida'ai kemoro sumdo ton delukuulludapiyo'bi bako tovi nokwo wonmwalpinogano. Toro ton Satanyolluro jurogudo tovi dolago tomuuda'ai birolo'nugolokwopi Gooti toolluro jurogudo tovi dolago tomuu nokwo kuulomwalpinogano. Aki toro ton mino kuudo anubwepi tovino tov nuu kemoro ma'no ma'nodo tovuro kirumwallo tovi modukwopiyo'mi Gooti toolluro a'mwo abolo kuunodo me'no ajesungiko nyumo'numwalpinogano.” Yogaimaguurai tov su toro anyudokakwono.” Kuudokaikono.
Gooti toolluro nekullo'mwojo'moneyokwe ajesoka Krais tool dado ton ibwosunowo'ji nobolonekono. Toro abolo'ji kwol kuruv a'mwo buuso tovida'ai aiyo aiko te dukaiyo'moneyokwe tov kwolda'ai dukawonekono. Toro dukavowo'ji toga Juu toorogai'aro a'mwo Juu tooravuro miyawosunodupudo toorogai'aro toorai wiyo'mwojo'moneyokwe kuuguudo sugudo tov moruudonekono. Wiyo'mwojo'moneyokwe kuuguudo sugudo su tov bako to'busukokwono. Aiyoga Mooseseke'aro proofet toorogai'aro tooro su toro ajakwollajuporogano.” Poolol toro kuudokaikono.
Nuvu su toro tovino maikudadokwono. Toro kuvi kuruv aro aikudumwakono. A'mwo abolo gabovo su tonyuro aromiroudapiyajupo su tov Gooti toollu kwiroudapiyajuponmaiyo. Toro te nuvu kemino tov aro anyunadopiyo. Kuullo ma'no ma'nodo tooraino sa'aiyo aromiroudapingiko tovi anpi tov kevu kuullo ma'no ma'nodo su toorai uuguro'mwonyopi kworaino nyulomoropimwolapiyo.
Moro su toro yodumdo tov aro tovinokwono. Satanyol gamoro kuudo do'mopto tokwe nemi nekuuwolowo'ji nomolloguuronekudapiyo'jokwe tovinokwono. Nevu aro tovino kuudo nyau'mwakuuwono. Oo Satanyol gamoro kuudo do'mopto tokwe nemi kaiyako yanekullugollo'moneyokwe womdo yodowodoldeyo. Nevu su toro kuudo nyau'mwakuuwono.
Kuudo neya jaullulo. Moosesolluro loowo su tov Gooti toolluro jurogudo tovida'ai bako tokwe amokabokakwono. Toro amokaboka su tov yiunokuudo wollo'mo'maiyo. Toro kuvi kuruv Gooti toolluro womdo muuduko sadopiko to'gwowi yiunokuudo mujo'movla'mwalonokwono. Yiunokuudo mujo'movla'mwalono tovino tov gamoro bako kuruv uuwolowo'ji muunyu toru'aro guureji pwopimovla'mwalonokwono.
Toro kuvi kuruv Isuraiyolda'ai a'mwo abolo tonyuro kuudo tov lumdo to'no aulopiyajupogano. Aki aga kuga kuruv subuu'yamju uumdo tovida'ai mojagilodupudo toga kemoro kuudo tovi youro to'busuko kuuno bwososodupudorogano. Youro bwososodupudo su tovi Gooti tool yiuno Krais toollu'aro modosodukwopiyodowodokwono.
Toro te Gooti tool nevu yiuwi'nokai Jisasolluro a'mwo abolo tonolluro sumdomago tovida'ai youro kudo'aiko nekulluku'dowodo su tovi me'no modosanekudukwopiyodowodonogano. Toro modosanekudukwopiyodowodo tonol Aguto toolluro bako bwotonyo tovi me'no wonodowadonogano. Toro tonol a'mwo abolo gabovo punyu bako su to'busuko pwopiyodowadonogano. Su tov nevu Jisasolbusuko imo'nano'moneyokwe Aguto toolluro Kuullo tool yiuwi'nokai toga mollumo'nanekubweyodowodonogano. Toro mollumo'nanekubweyoduke tovi'aro nevu Aguto su toolbusuko irol'mowosuno imo'nyokwenogano.
Kuudo neya jaullulo. Gooti tool aro me'no adokaikono. “Dugumwuulo tomuuda'ai bako tov imo'nono.” Toro adoka Gooti su tool nemoro poowokalago tonyu Jisas Kraisolluro bako tov me'no anekuuwokaikono. Gooti toolluro bako bwotonyo su tov Jisas Kraisolluro sumdomago tovi'aro nevu me'no wonoma'dowadonogano. Toro te bako su tov nemoro poowokalago tonyu anakuuto tomuu me'no pwopiyodowodokwono.
Nemi Nellunumiyago Gooti tool agasuro nevu kirovanyuvanyu kuumwiyokwe kwako mwalodowado akalluda'ai nobomollurolovonekumokalokwiyo'moneyokwe ilaiyo kwinyajukekono. Toro winodowodo tovi Jisasol kuvinono uumjunyuno sumaiyokwe nemoro ma'no ma'nodo tonyu mobiyodukwopiyo'moneyokwe tov gavnokwe tool morubweno'no abolokaikono.
Toro togaikul kwako akavida'ai a'mwo abolo punbusuko ma'no ma'no pasudo toorai amjeroungovlaiyajupogaikikono. Su toro amjeroungovlaiyajupo toga Satanyollu kuumjunyajupogaikikono. Satanyol kuullo ma'no ma'nodo pworo dolo tovi muunyu toru yomollodupudo toorai mido mollomwalodowodekono. Aki Satanyol kwol kuruv kuullo pwekono. Toro tool yiuwi'nokai a'mwo abolo Gooti toolluro yogalo tovi kisuvolo wiyodupudo su tonyuro poowokalago tonyu womdo wiyodowodekono.
Kevu kuudo neya jaullulo. Nemi ikomago toorogai molo mujumovla'mdowado su tov nebal'no kulako tokwe yodowado'maiyo. Toro kuvi kuruv kwako akavuro dugumwuulo tomuuda'ai kuullo ma'no ma'nodo toorogai ingovla'mdowadokwono. Kuullo ma'no ma'nodo su toorai nevu sumdo mwonodowado kuvi kuruv kworogai molo ingovla'mdowadonogano. Kuullo ma'no ma'nodo su tooravuro pworo kwako akavi mido mollomwalokwe imo'nodupudorogano. Aki pworo yovo agutokwe imo'nodupudorogano. Aki pworo jurogudo kuunodokwe imo'nodupudorogano. Kuullo ma'no ma'no sulugumdo tovi muunyu tomuu mwalodupudo su toorogai molo ingovla'mdowadonogano.
Nevu Gooti toollu mwonodowadekono. Toro kuvi kuruv gamoro Kwolaiyo toolno'gwowi gami Ganumiyago toolluno irol'mowosunodekono. Kwolaiyo su tool nekuduuwalloduke tovi'aro gami Ganumiyago Gooti toolluno kuu'maiyo toru'no bomollolupto'nanekubweyodowodekono. Kwolaiyo su tool yiuwi'nokai Gooti toolluro sokwollosoka tonyuro sumdomguda'aiyekono.
Gooti tool gami yiuwi'nokai a'mwo abolo su ton aro tovino kuudo youromapino'moneyokwe kwinyajukekono. Krais toolluro noonyumwonyu sugumaluko nonekullabwono tollovogai'aro aki Krais tooke ilomwallo'mo tokwe'aro su ton kevu a'mwo abolo Juu miyawosunodupudo kugaikul kuruv kuvinono nyulomapinogaikikono. Gooti tool gamoro a'mwo abolo togaikulluno su toro kwinyajukekono. Toro toolluro kuuguudo yiulo apuu'nallajuko tov arokwono. Krais tool gamoro a'mwo abolo togaikullu kuulekumwalonekono. Toro te aga kemi kuvinono kuulekumwalodowodo tovino tov lukomgu kevu Krais tooke gamoro bako bwotonyo pwopiyodowodo tovi anakuuto tomuu gavuge nyulomwalpinogaikikono. Su toro tovino sogwollo to'no kingovla'mdupudogaikikono.
Su toro yomjomwekovlavowa'ji lukomgu Jisas Kraisol gamoro bako bwotonyo tokwe nobiyalo'nonekono. Krais Jisas su tool nemi aguto Gootekono. Aki nemi ma'no ma'nodo tovuro kirumwallo tovida'ai mollurolovonekumokalokwiyo'moneyokwe tool kwekono. Toro toolluno sogwollo to'no kingovlavowa'ji lukomgu kuvinono abiyanekulo'no'ji toga nemoro poowokalago ton ilaiyo ibwosungoulapinogano.
Gooti toolluro Kwolaiyo su tool Gooti jurogudo kuunodo toolluro bako pwopiyodowodo tov nekuduuwallodowodekono. Aki toro tool gami Ganumiyago Gooti toolbusuko irol'mowosunodekono. Toro tool kwako tokwe'aro sulugumdo tokwe'aro tovalluda'ai yiuwi'nokai wo'dupudo tonyu gamoro yogalo jurogudo tokwe kuuno mollomwalodowodekono. Kwolaiyo su tool nemoro ma'no ma'nodo tovuro kirumwallo tovi me'no amollol'movonekudukwopiyokaikono. Toro mollol'movonekudukwopino sumaiyokwe toga muunyu kai'muu mwalodowodo Aguto Kuunodo toolluro anato toru sulomwalokaikono.
A'mwo pworo sumdomgu Krais toolluro bako tovi bodupu Gooti toolluro ago muunyu kai'muuda'ai yasuwa'wino tollovai me'no wonoma'dupudorogano. Aki toro tooro Gooti toolluro Kuullo toollu aval'no ma'dupudorogano. Aki toro tooro Gooti toolluro yogalo tovino yamju gallainyubwo'dupudo tovida'ai, “Oo ilaiyo'mdeyo,” me'no dodupudorogano. Aki toro tooro Gooti toolluro jurogudo ton lukomgu aiyowo'mo toga kuu'maiyo bomollolupto'nosono su tonyuda'ai pun me'no ma'dupudorogano. A'mwo su tooro yiuwi'nokai toro tonyu me'no wonoma'dupudo kworo kuruv su tooraida'ai pworono'gwowi lukomgu Gooti toollu buulo uugunyumopipinorogano. Toro te a'mwo su tooro Gooti toollu buulo toro kuuguunyumopipi tov Gooti toollomno aki aiko te kuudo ku'nono miyouragunyumo'nupinorogano. Su tov aro tovinokwono. A'mwo Gooti toollu buulo kuuguunyumopipi su tooro Gooti toolluro Kwolaiyo kwollu kuruv buulo aval'no uugunyumopipinorogano. Toro tooro aiyoga Juu tooro Krais toollu buulo uugunyumopiyo'mno i'noguropte tovi amovoromiyoguroptowosopo to'busuko kubalno a'mwo su tooro Krais toollu aki aiko te kaiyako aval'no igolpinorogano. Su toro sugolpi tov Krais toolluno kuu'maiyo toru'no bwolomorumwogapiyapi aki kevnokwe kworo kuruv kaiyako i'nopipinorogano.
Toro te proofet tooravuro yogalo ajakwollajupo tovino nevu kuudo noullo maullo miyaullokwenogano. Toro kuvi kuruv nevu, Oo nebalo'mdeyo, guureji to'no yau'dowadonogano. Proofet tooravuro yogalo amoruujajupo su tov dugumdo tomuuda'ai lamwo tovuro bako pwopiyowodo to'busukokwono. Bako su tov lomwo iru'mago tov yere millourosodowo'jure toga kuuno pwopimwalonokwono. Su toro to'busuko kubalno Krais tool lomwo iru'mago togasuro sulludo kabwo tollugwobusuko imo'nodowodekono. Toro tool iruko tollugwoji kuu'maiyo toru bowo'ji pwopiyodowo'jure toga kemoro poowokalago kuunodo togai noonpinekono. Toro tovino tov kevu proofet su tooravuro yogalo tovi pi'mwono neya duumjunogaulo.
Toro kuvi kuruv a'mwo pwol Jisasolluro a'mwo abolo gami gadai'yagorovobusuko jo'mwovobusuko wimo'nodupudo pubuuraino surodo kuuno'ji tov a'mwo su tool dugumwuulo toollu anakuuto tomuu mwallokwekono. Aki toro tool dugumwuulo toollu anakuuto tomuu kuullomollodowodekono. Dugumwuulo juna'dowo'jure tovida'ai a'mwo su tekwo sumnowojokwe toolbusuko imo'nodowodekono. Toro tovino tov a'mwo su tool buko buko to'no yowo'ji puuto nuumjunyo'moneyokwe tovi ku'nono miyo'mgonomallokwekono.
Loowo su tov uumdo kuvi kuruv aiyo kuuno imo'nodowodokwono. Loowo su tovi Krais tool kuvinono kuumjunyajukekono. Toro toolbusuko kubalno kev kugaikul kuruv kuvinono uumjunodupudogaikikono. Kevuge'aro Krais tooke'aro togaikul loowo aiyo su tovino kuu'maiyo wuuduuwallunodupudo tov aro tovinokwono. Dugumwuulo tov nyovlaiyo'mo sadopiyo. Aki bako kuunodo pwopiyodowodo tov me'no abai'mo'mwallukokwono.
ကြော်ငြာတွေ