To'no'gwowi su toro toga Gooti Yawelluro yiuwi'nokai ibesa'aiyo sokwollosoka tooravuro pwol youkuu'najo'mo kuudo tov yiuwi'nokai pworai kuuwoleyajukekono. Toro kuuwoleyajuko tool gabakuto tookono. Toro te gabakuto su tool abolo tovi kuudoganokaikono. “Gooti tool nebal'no aro aikudokaldukono. Kevu yiuwi'nokai iko womdo akavida'ai adakwopo tooravuro ikulsulo ton mamuudanbullunono. Aikudokaldukono?”
2 Koorin 11:3 - Gooti Toolluro Yogalokwono3 Toro kuvi kuruv nuu aro tovino luko yodumdonyugono. Aiyoga gabakuto tool gami pi'mwo kuudo tokwe Iviyovi soukuu'nuudoka to'busuko kubalno a'mwo pwol kemi nyoukuu'naikudo'jo. Aki kemoro kuudo jurogudo tovida'ai yiuno Krais toolluno to'no guureji uumjunodupudogaikikono. Toro togaikulluro kuudo jurogudo tovi a'mwo pwol Krais toolluda'ai manyu tomuu'aro nome'nekumovlawo'jokwe tovino nuu luko yodumdonyugono. အခန်းကိုကြည့်ပါ။ |
2 Koorin 11:3
47 ပူးပေါင်းရင်းမြစ်များ
Su tov aro tovinokwono. A'mwo kuunano yogalo youkuu'najokwe pworo bopi ikudupinorogano. “Nuu Krais toonyugono.” Aki pworo ikudupinorogano. “Nuu proofet toonyugono.” Toro tooro kemi kaiya'nodo tomuuno mollubworomokavlaiyo'mo tooro duuwallo jurogudo pun ikuduuwallupinorogano. Aki Gooti toolluro a'mwo abolo me'no ajesungiko kunyu ki'nomallo'mo puuto puruv kurukweyo'mno'juki nokwo ki'nomapinorogano. Toro kworo kuruv ku'nono mai'nomapinorogano.
Toro te kevu kemi tellunumiyago Satanyolluro kwoloraiyo kuunodo imo'nodupudorekikono. Aki gamoro kirovanyuvanyu pasudo molludo'mdowo'jure toorai kevu aval'no kiroungovlaiyo'moneyokwe tovino guurejuno ikullunodowodorekikono. Kemi tellunumiyago su tool muudu'nodo togada'ai a'mwo abolo tonyu romiyosokwe me'no sumo'nokaikono. Toro tool nebal'no yogalo tov nonagutekono. Toro toolluno tov nebal'no yogalo tovi anakuuto tomuu mauloda'mdowodekono. Aki toro tool kuunano soukuu'nado'ji toga gamoro pasudo su tovino yiuno kuu'maiyo toru'no wuuduuwallunodowodekono. Neya duu'nyulo. Satanyol kuunano youkuu'najokwe tookono. Aki kuunano youkuu'najo'moneyokwe pasudo tovi ganumiyago kuunodekono.
Aki punol a'mwo abolo tonyu jurogudo duuwimwojo'moneyokwe nekullabodowodo tonol kuvinono neya duuwimwojumwalanonogano. Aki punol nemi poowokalago tokwe yanyago wimo'nyo'mo nekullabodowodo su tonol kuvinono yanyago neya wimo'numwalanonogano. Aki punol mido mollomwallo'moneyokwe nekullabodowodo tonol womdo su tovi guureji neya mujumovla'mwalanonogano. Aki punol a'mwo abolo pubuuraino kalo mamwonyo'moneyokwe tov nekullabodowodonogano. Toro nekullabodowodo su tokwe a'mwo abolo tobuurai kwiyo'mwoja'ji toga ilaiyo neya ibwosunmwalanonogano.
Toruda'ai nevu aro tovino ilaiyo bwotonyo yodowadonogano. Nevu nemi poowokalago tovi me'no kuulanekwo'dupudo tonyu kuvinono uumjunyokwenogano. Aki kwako akavida'ai a'mwo abolo tonyuro sumdo tovi nemi me'no kuulanekwo'dupudo su tollovogai nevu pi'mwono molludo'movla'mdowadonogano. Aki nevu Gooti gavnokwe toolluro pasudo tonyu yiuno nebal'nodo tomgu'aro uumjunodowadonogano. Toro toonol a'mwo abolo togai'aro kev kugaikike'aro togaikullu yaikullugollo'moneyokwe tov kwako akavida'ai pi'mwo kuudo tovi muumjunodowadonogano. Toro kuvi kuruv nevu Gooti toolluro yasuwa'wino sugumaluko tovino'gwowi uumjunodowadonogano. Toro tovino tov yiuwi'nokai a'mwo abolo tonyu nevu ilaiyo to'no igolodowadonogano. Aki kemino'gwowi nemoro ilaiyo tov muunyu toru'aro guureji yaikullugolodowadonogano.
A'mwo su tooro kemi aro tomgu'aro kaiyako yaikullugolodupudorogano. Pugaikullu ki'nato womdo'mo amerekumokovlapiyo'mdeyo oo kemoro nuugwiyo tonyu avipolekumapiyo'mdeyo oo a'mwo su tooro kevnokwero ilomoropunyu yodopureyo'mdeyo oo kemoro suuwado tonyu allukurekumollupiyo'mdeyo kemi kaiyako su toro yaikullugolodopure kuvi kuruv kevno'gwowi a'mwo su toorai nokwo wonyapino to'no yodupudogaikikono.
Jisasolluro a'mwo pwekwojuro jurogudo tov wollainyo sumo'no'ji tov nuu a'mwo su tekwojuno kalo nyunowo'ji wiyo'mwojo'moneyokwe wollainyo pwolbusuko nuuwimo'numonyugono. Aki a'mwo pworavuro kaiya'no mollubworomokavla'mdopure tovasuda'ai Jisasolluro a'mwo pwekwo ma'no ma'no yowo'ji abwolorawo'ji tov nuu a'mwo su tooravuro pasudo tovino surodo nuunmwalmonyugono.
Aki neya duu'nyulo. A'mwo ibwasokwe pworo Gooti toolluro yogalo tokwe nuugwiyo ki'noma'dupudorogano. Toro kuvi kuruv nevu ibwasokwe pwonolno'gwowi a'mwo su toorobusuko miyomjomwekovla'mdowadonogano. Gooti tool nemi amonekwopiyaboka tovino tov yiuno nebal'nodo tomgu'aro molludo'movla'mdowadonogano. Toro toonol Krais toolluro jurogudo tokwe to'no modomollodowadonogano. Toro modomollodowa'jure tovi Gooti tool nemi kuu'maiyo toru'no muugonanekwo'dowodekono.
Toro te nevu womdo su tovi momjumovlaiyo'moneyokwe wogulpasudo toorogai'aro yiulpasudo toorogai'aro su toorai buulo uugunyumopiyodowadonogano. Aki joukuuromato'mo pasudorodeyo oo Gooti toolluro yogalo tovi kaiya'nodo tomgu'aro moruugunyumwojo'mo pasudorodeyo kworai kuruv miyodowadonogano. Toro kwonol kuruv Gooti toolluro sumdo tovino'gwowi yiuno nebal'no yogalo to'no kuu'maiyo toru moruudodowadonogano. Kuu'maiyo toru'no su toro moruudodowado toonolluno yiuwi'nokai a'mwo abolo ton aro kuudo yanekuu'dupudonogano. Oo a'mwo akaro nebal'no yogalo to'no dodupudorodeyo. Yanekuu'dupudonogano.
Nuu kemino morumoukuropi sumwakonyugono. Moro su toro amorumoukuropiyadokwo tov aro tovinokwono. Gooti tool Krais toolluro yasuwa'wino sugumaluko tovi'aro kemi me'no adekumarokaikono. Toro kuvi kuruv kevu Gooti su toollu yere molluduvolno yodupu puuto gabovo puvino, Oo kuuguudo sugudo'mdeyo, dodupu kuvi kuumjunmwakopogaikikono.
A'mwo kuunano youkuu'nanekujo'mo pworo Jisasolluro a'mwo kuunodo toorobusuko soukuu'nugoulaporogano. Toro youkuu'nugoulno sumaveyokwe nevu i'bwo'nomwalodowore akuuto tomuu aulomwaloporogano. A'mwo soukuu'nugoulapo su tooro domokwe toorobusuko aulomuugonanekworoporogano. Aki toro tooro, nevu Krais Jisasollu uuguro'mwonyodowado tonol Moosesolluro loowo tovi dolago tomuuda'ai me'no birolo'nugolokwodowado tonolluno kamwoga aullanekuuworoporogano. A'mwo su tooro, nevu Jisasolluro a'mwo abolo tonollu Moosesolluro loowo tovi dolago tomuu aki aiko te kuulomonekumwallo'mo winodupudorogano.
Oo Galesiyada'ai Jisasolluro a'mwo abolo togaikul junorukuudo yau'dupudogaikikonoo! Numoro me'no sodekubwasajo tovida'ai Jisas Kraisol i'noguropte tovi amovoguroptowosopo tovino kuu'maiyo toru'no me'no abomollulupto'naikubweyowokwono. Toro tovi kevnokwe togaikulluro sumdo tokwe me'no kwonomaropogaikikono. Toro kuvi kuruv a'mwo pworavuro kuunano youkuu'naikudodopure tovi kevu kaduko me'no kwimwakopogaikikono.
Nevu su toro tomgu'aro sogullumovlawa'ji tov kwoloraiyo tobuurobusuko mimo'nanonogano. Aki toro tonol kwoloraiyo tobuuravuro yodupudo to'busuko kubalno aro nyumwala'jo. Ibwasokwe pworo bopi nemi yojelukuulovonekumallo'mo tooro kuuguudo judo pumgu'aro'mdeyo oo kuunano yogalo'mdeyo youkuu'nanekudodopure tonyu kaduko nuuwimwala'jo. Punol kaduko kwiya'ji tov dolo tokwe'aro wonyo tokwe'aro toval boot tovi manyu tomuuno molobemokwodubulo to'busuko kubalno nonekullumo'no'jo.
Sumdomgu kevu kuudo uumdo su toorai kuumjungovlaiyajupo toga kemi kaiyako bwotonyo sugolaikumeyajuporogano. Aki kemi kaiyako igolaikumeyo'moneyokwe youkuu'naikudodopure toorai uumjungovlaiyo'mo tov ilaiyo aikullunyajukogaikikono. Toro kuvi kuruv aga'no'gwowi kevu kuudo uumdo su toorai yiunokuudo neya duugollu'movogaulo.
A'mwo pwol kemi aro ikudonekono. “Oo nuu wojo suwo'numwa'jo tovida'ai pasudo muuduko uumjunyo'mo puvino me'no kwonoma'mwa'jonyugono. Su tov arokwono. Kevnokwe togaikul neya bwolomorumwogapinapi ensel toorai julomoropiyogaulo. Moro wojo kwonmwa'jo su tov agutokwono. Toro tovi kevu neya duumjunyulo.” Ikudonekono. A'mwo pwol su toro aikudo'ji kuvi kuruv kevu muumjunpinono. A'mwo su toolluro yogalo aikudo'ji tovi kevu kaduko kwipi tov a'mwo su tool kemoro muunyu kai'muuda'ai mubiyo sugudo tonyu nyupolekumaro'jo. Toro te kevu a'mwo su toollu kaduko nuuwimwalpiyo. Kuudo neya jaullulo. A'mwo su tooro kemi kuudo uumdo toorai uumjunodupudo tovino tov ilomoropunyu bwotonyo yodapudorogano.
Kevu aro tovino wako neya kuu'numwalpinogaikikono. A'mwo pworo kwako akavida'ai pi'mwo kuudorodeyo oo sulo mai'nyo'moneyokwe kuunano yogalorodeyo toorogai youkuu'naikudodopure tovi kevu nuumjunmwalpiyo. A'mwo su tooravuro kuuguudo su ton kemi kuunumiyago tooraida'ai ma'dupudorogano. Aki kuuguudo su ton kwako akavida'ai kuullo tooraida'ai ma'dupudorogano. Toro kuvi kuruv kwako akavida'ai pi'mwo kuudo su toorogai'aro kuunano yogalo su toorogai'aro tooro Krais toolluda'ai mabodupudorogano.
Toro kuvi kuruv nuu kemino tov aro tovino luko sonyugono. “Oo a'mwo abolo su ton Satanyolluro yamju wiyoganoduke tovi nobwolorapiyo. Kuvinono abwolorapi tov kemi akuuto toru mwalowono nemoro womdo sajuuwo su tov yiuno yasuwa'no to'no plawonokwono.” Su toro tovino luko sonyugono. Toro tovino tov nuu kemino kuudo yourekumallo'moneyokwe sogwollo kuuno mainomwalodumdonyugono. Toro te tabunyuwuulo ton baiki'mo'mdopure toga kemoro kuudo uubweyodupudo tovi kevu buulo me'no uugunyumopiyodupudogaikuldukono oo muugunyumopiyodupudogaikuldukono? Su toro tovino nuu kuudo yourekumallo'mo tov Timootiyollu kemiyomno me'no amekwopiyabonyugono.
Toro kuvi kuruv a'mwo kirovanyuvanyu kiroungovla'mdupudo toorogai'aro kuunano yogalo youkuu'nuudodupudo toorogai'aro tooravuro ma'no ma'no pasudo tooro kuuno mujumo'nugelabino mujumo'nugelabino yopi yiuno ma'no ma'no kuumwiyo to'no imo'nugelamwalpinorogano. Aki kevnokwe su tooro imgu amgu kuunano yogalo to'no youkuu'najunmwalpinorogano.
Neya duu'nono. Guu Jisasolluro a'mwo abolo tonyuda'ai a'mwono moduvomwallokwe toorai neya molludapimwalbino tov aro tovinokwono. Aku'momdo Kritda'ai Jisasolluro a'mwo bwotonyago tooro nuumjungovlaiyo'moneyokwe kuuguudo tonyu kisuvolo to'no yokwerogano. A'mwo su tooro yogalo kavlo nonagutokwe toorogai'aro kuunano yogalo toorogai'aro su toorogai youkuu'nuujo'moneyokwe modomollodupudorogano. A'mwo su tooraida'ai bwotonyago tooro Juuworogano. Toro tooro a'mwo gabovo toorai aro wuudodupudorogano. “Kevu nevu Juu toonolbusuko kemi lakulkulako ton neya dodo'nogaulo.” Modomollodupudorogano.
Toro te a'mwo pworavuro ibwasodupudo kavlo go'no go'no muuduko pun kemi nomollubworekumokavla'mwalpiyo. Wosamujuko punyuno kumako mwallo'mo loowo tooro kemi jurogudo ku'nono madaikullumwojodupudorogano. Toro kuvi kuruv Gooti toolluro yasuwa'wino sugumaluko to'gwowi kemi poowokalago tonyu jurogudo daikullumwojodowodokwono. Wosamujuko kumako mwallo'mo loowo su tooro a'mwo abolo uumjunodupudo tonyu ku'nono mwiyo'mwojodupudorogano.
Mi ibwoto'nyobuuravoo, a'mwo kuunano ibwasokwe tooro kemi akuuto toru yere maullumo'nodopure kuga kuruv kevu su toro tooraino kuudo me'no souroma'mwakopogaikikono. Toro tovino tov a'mwo pworo kuunano puuto tovi nome'nekumokavlapiyokwe kevu wako neya dou'nomwalogaulo. Kemi kuvinono ame'nekumokavlapi tov kevnokwe togaikul kuudo noo'nookwo yopiyopi nebal'no yogalo gudupola'dupudo tovi nobwolodukwopiyapiyo.
Moro kwoloraiyobusukobuuravoo, sumdomgu kevu kuuguudo aro tovino me'no kuu'nyajupogaikikono. “Lukomgu a'mwo Krais toollu ikomago wimo'nono pwol nobiyalo'nonekono.” Kuu'nyajupogaikikono. Toro kuu'nyajupo su tov aga kuvinono abai'mo'mwallo. Toro te a'mwo Krais toollu ikomago wimo'nodupudo bwotonyago tooro me'no abiyalo'nadokwoporogano. Toro tovino tov nevu aro kuudo souroma'mwakuuwono. Oo aga aiyowo'mo tov me'no dobai'mo'mwallo. Kuudo souroma'mwakuuwono.
Mi ibwoto'nyobuuravoo, a'mwo bwotonyago tooro kuunano proofet imo'nodupudorogano. Toro tooro yiuwi'nokai kwako akavuro go'no go'nodo tomuu aro modomollodupudorogano. “Oo Gooti toolluro Kuullo toolluro yogalo anekullaboka tokwe amokamwakuuwono.” Modomollodupudorogano. Toro modomollodupudo tovino tov yiuwi'nokai su tooraino kevu kuudo nuubwemwalpiyo. Toro kuvi kuruv proofet modomollokwe su tooravuro kuullo kuuluumwalodupudo tooro kuunano'mdukono oo Gooti toolluda'aiyo'mdukoneyokwe tovino gallainyubwollo'mo tov kevu yamju neya duuwiyoganogaulo.
Toro te moro yogalo adaikumul'mwojumwako akav aro tovinokwono. Kevu sumdo mwonoma'dopure toga a'mwo Gooti toollu muumjunodupudo pworo yiulo tomuu'aro aulodukwopiyabiyajuporogano. Toro kuulodukwopiyabodupu kevu Jisasolluro a'mwo abolo togaikulluro mollu'bwoto tovi akuuto tomuu me'no aboullo'mo'nomwaloporogano. A'mwo su toro tooraino aiyoga yogalo puruv aro me'no ajakwollopokwono. “Gooti tool a'mwo su toorai kooti yogalo wiyowo'ji nerumwallonorogano.” Ajakwollopokwono. Toro kuvi kuruv a'mwo su tooravuro kaiya'no yogalo to'gwowi aro dodupudorogano. “Oo Gooti tool gamoro yasuwa'wino sugumaluko tov yiuwi'nokai toga nekullabodowodekono. Toro tovino tov nemoro kulako tovuro noonyumwonyu ilaiyo igollunyo'moneyokwe pasudo toorai neya amjumovlavogawanoo.” Su toro dodupudo tov kuvimaiyo. Neya duu'nyulo. A'mwo su toro dodupudo tooro nemi Mido Mollonekumwalokwe Aguto pwolnodo Jisas Kraisollu buulo me'no uugunyumopiyodupudorogano.
Toro movomjapino sumaveyokwe Maikoleke'aro gami ensel avalo toorogai'aro tooro ilviyo bwotonyo su toollu kwako akavino kwolomowopiyabopekono. Aiyogasuro gabakuto sumo'nyajuko su tool ilviyo bwotonyo toolbusuko tool kwekono. Toro toolluno yovo aro sowallajupekono. “Kooti Yogalo Mojokuu'nosokweyolekono.” Aki toro toolluno yovo puruv “Satanyolo” dodupudekono. Toro toollu kwako akavino kwolomowopiyabopo toga yiuwi'nokai Satanyolluro ensel kworogai'aro toorai kwolomowopiyaboporogano. Toro te Satanyol yiuwi'nokai a'mwo abolo kwako akavi mwalodupudo tonyu kuunano youkuu'nuujokwekono.
Toro tool aiyogasuro ilviyo bwotonyo toolbusuko gabakuto toollu senyo wuulo tokwe agalogullosokaikono. Gabakuto su toolluno yovo puruv “Kooti Yogalo Mojokuu'nosokweyolekono.” Aki yovo puruv “Satanyolo” dodupudekono. Toro toollu wan tausen kworomo tobuullu wuulo ki'narono'moneyokwe ensel tool senyo wuulo tokwe agalogullosokaikono.
ကြော်ငြာတွေ