2 Koorin 1:12 - Gooti Toolluro Yogalokwono12 Toruda'ai nevu aro tovino ilaiyo bwotonyo yodowadonogano. Nevu nemi poowokalago tovi me'no kuulanekwo'dupudo tonyu kuvinono uumjunyokwenogano. Aki kwako akavida'ai a'mwo abolo tonyuro sumdo tovi nemi me'no kuulanekwo'dupudo su tollovogai nevu pi'mwono molludo'movla'mdowadonogano. Aki nevu Gooti gavnokwe toolluro pasudo tonyu yiuno nebal'nodo tomgu'aro uumjunodowadonogano. Toro toonol a'mwo abolo togai'aro kev kugaikike'aro togaikullu yaikullugollo'moneyokwe tov kwako akavida'ai pi'mwo kuudo tovi muumjunodowadonogano. Toro kuvi kuruv nevu Gooti toolluro yasuwa'wino sugumaluko tovino'gwowi uumjunodowadonogano. Toro tovino tov yiuwi'nokai a'mwo abolo tonyu nevu ilaiyo to'no igolodowadonogano. Aki kemino'gwowi nemoro ilaiyo tov muunyu toru'aro guureji yaikullugolodowadonogano. အခန်းကိုကြည့်ပါ။ |
2 Koorin 1:12
40 ပူးပေါင်းရင်းမြစ်များ
Nuu Krais toolluro a'mwo pwonyugono. Toro toonyuno tov moro kuuguudo aikudumi akav kuunano'maiyo. Yiuno nebal'nodo tovi ikudumonyugono. Aki moro nebaikuuguudo ikudumo su tovino Gooti toolluro Kuullo tooke'aro moro poowokalago tokwe'aro yiuwi'nokai su toval yiuno kuu'maiyo toru'no, “kuvigono,” nyudodubulovakono. Toro tovino tov moro kuuguudo akav yiuno nebal'nodo tovi ikudumonyugono.
Toro te kevu kuudo neya jaullulo. Krais tool mi amonuwopiyaboka tov a'mwo abolo tonyu wonyo mogaluvollo'moneyokwe amonuwopiyabokalmaiyo. Toro kuvi kuruv kuuguudo sugudo tokwe moruudomollo'moneyokwe amonuwopiyabokanyugono. Krais toolluro i'noguropte tovi aboloka su tov jurogudo kuunodokwono. Toro te jurogudo su tov piyarupto imo'nowo'ji wollainyo nyumo'numwalo'jokwe nuu kuuguudo sugudo tokwe amoruudomollumi toga a'mwo pi'mwo kuudokwe pworavuro yogalo sugumaluko togai nomoruudomollumiyo.
Toro kuvi kuruv aga kuurotokwe kuvinono me'no sumo'nugelamwako su tov yiuno Gooti gavnokwe toolluro yasuwa'wino sugumaluko nubweyoduke tovida'aiyokwono. Yasuwa'wino sugumaluko nubweyoduke su tokwe womdo tovi momjumovla'mdumdonyugono. Aki Gooti toolluro yasuwa'wino sugumaluko anubweyoka su tov yasuwa'no mavlavo'no sulo ton me'no ki'nodowodokwono. Su tov aro tovinokwono. Nuu womdo kaveno miyajonyugono. Toro kwonyu kuruv yiuwi'nokai kuurotokwe gabovo tooravuro womdo yodopure tonyu uuwolo'mdum guureji kuunodo amjumovlaiyajonyugono. Su tov nuvnokwenyuro jurogudo tovida'aiyo'maiyo. Toro kuvi kuruv Gooti toolluro yasuwa'wino sugumaluko anubweyoka tovida'ai to'no amjumovlaiyajonyugono.
Toro te nevu Gooti toolluro yasuwa'no nonekullabodowodo su tonyuno kwako akavida'ai pi'mwo kuudo tokwe miyodubwasokwenogano. Toro kuvi kuruv Gooti toolluro Kuullo tool nebaikuuguudo yodonekubwasodowo'jure togai to'gwowi kevu gamoro Kuullo kurukwe togaikullu kuu'maiyo toru'no yodekubwasodowadonogano.
Moro womdo yodumdo tonyu gallainyubwollo'moneyokwe danyono to'gwowi Aguto toollu kuuwoso. Toro te nuvnokwenyuno, Oo nuvu moduvomwallokwe toonyu kaiya'no puru'monodo kuruv miyodumdonyudeyo, kuudo yau'dumdonyugono. Toro kuvi kuruv nuvnokwenyu gallainyubwollo'moneyokwe tov mi manuwoso. Yiuno Aguto toolno mi gallainyubworowo'ji domdukuuranubweyonekono.
Toro tovino tov a'mwo abolo ton Gooti tool Muunyu Toru'aro Surukuruwolovoka tovino kuudo yaullo'moneyokwe lubullu doto su tovi yanyo'mo toga yis tovi modukwopiyodupudo to'busuko kubalno nemoro ma'no ma'no pasudo sajuuwo toorai aval'no neyo amodukwopiyogawano. Yiuwi'nokai ma'no ma'no pasudo toorogai'aro kirovanyuvanyu pasudo toorogai'aro su tooro bret munyo'moneyokwe yis uumdo tooraibusuko yiunokuudo neya amodukwopiyogawano. Yowa'ji yiuno nebal'no pasudo togai'aro nebal'no yogalo jo'mo togai'aro su tono neya amomjumovlavogawano. Nevu su toro sa'ji tov bret aiyo yis maiyokwe to'busuko imo'numwalanonogano.
Toro te nuu kemi iru'mato ikullo'moneyokwe me'no adomdukuurosonyugono. Moro sumdomguda'ai yogalo adomdukuuroso su tovi nuu kuvinono muumjunodore tovino aro kuudo nyanuupiyo. Oo kuudo noullo maullo sau'mwallo. Toro tool kwako akavida'ai a'mwo abolo tonbusuko youkuu'nanekudodowodoldeyo. Mino su toro kuudo nyanuupiyo. Kuudo neya jaullulo. Kwako akavida'ai a'mwo abolo ton kemoro mido togai, Awiyo, kuudo yauropi kun kuruv kemoro mago tokwe, “Tade,” jokweyogano.
Toro kuvi kuruv nuu aro tovino luko yodumdonyugono. Aiyoga gabakuto tool gami pi'mwo kuudo tokwe Iviyovi soukuu'nuudoka to'busuko kubalno a'mwo pwol kemi nyoukuu'naikudo'jo. Aki kemoro kuudo jurogudo tovida'ai yiuno Krais toolluno to'no guureji uumjunodupudogaikikono. Toro togaikulluro kuudo jurogudo tovi a'mwo pwol Krais toolluda'ai manyu tomuu'aro nome'nekumovlawo'jokwe tovino nuu luko yodumdonyugono.
Aki neya duu'nyulo. A'mwo ibwasokwe pworo Gooti toolluro yogalo tokwe nuugwiyo ki'noma'dupudorogano. Toro kuvi kuruv nevu ibwasokwe pwonolno'gwowi a'mwo su toorobusuko miyomjomwekovla'mdowadonogano. Gooti tool nemi amonekwopiyaboka tovino tov yiuno nebal'nodo tomgu'aro molludo'movla'mdowadonogano. Toro toonol Krais toolluro jurogudo tokwe to'no modomollodowadonogano. Toro modomollodowa'jure tovi Gooti tool nemi kuu'maiyo toru'no muugonanekwo'dowodekono.
Toro te nevu womdo su tovi momjumovlaiyo'moneyokwe wogulpasudo toorogai'aro yiulpasudo toorogai'aro su toorai buulo uugunyumopiyodowadonogano. Aki joukuuromato'mo pasudorodeyo oo Gooti toolluro yogalo tovi kaiya'nodo tomgu'aro moruugunyumwojo'mo pasudorodeyo kworai kuruv miyodowadonogano. Toro kwonol kuruv Gooti toolluro sumdo tovino'gwowi yiuno nebal'no yogalo to'no kuu'maiyo toru moruudodowadonogano. Kuu'maiyo toru'no su toro moruudodowado toonolluno yiuwi'nokai a'mwo abolo ton aro kuudo yanekuu'dupudonogano. Oo a'mwo akaro nebal'no yogalo to'no dodupudorodeyo. Yanekuu'dupudonogano.
Moro yogalo aikudumo su tov kevu guureji uumjunpino'moneyokwe jurogudo madaikullumwakono. Toro kuvi kuruv aro tovinokwono. Masedooniyada'ai ton nuugwiyo mollu'bworosodupudo tonbusuko kubalno kev Koorinda'ai kugaikul kuruv wiyo'mwojo'mo nuugwiyo amollu'bworosupi tov kevnokwe togaikulluno aro wuuduuwallunupinogaikikono. Oo nevu Jisasolluro a'mwo abolo pubuuraino kalo buuropino kuunodo nekullunodowodonogano. Kevnokwe togaikulluno su toro wuuduuwallunupinogaikikono.
Kevu yiuwi'nokai pwolno puru'monodo togaikul kemi womdo go'no go'no yodupudo tonyuno ilaiyo'mdukono oo kaiya'nodo'mdukoneyokwe tovino neya jainyubwo'nogaulo. Aki aro kuudo nyau'mwalpiyo. Oo moro womdo tov a'mwo abolo punyuro womdo yodupudo tovi neya uuwolowono. Kuudo nyau'mwalpiyo. Toro kuvi kuruv kevnokweyogaikulluro womdo go'no go'no yodupudo tonyu neya yainyunopi kemi womdo sugudo tonyuno'gwowi ilaiyo nokwo ibwosunmwalpinogaikikono.
Toro te kevu guureji daiyo'moneyokwe tov a'mwo mollurogudo tooravuro muulo jurogudo mollosodupudo to'busuko kubalno kevu nebaikuuguudo tokwe guureji neya domollosogaulo. Aki a'mwo mollurogudo tooravuro kupolmdo toruda'ai youro jurogudo mollosodupudo to'busuko kubalno kevu Gooti toolluro sumdo tovi sugudo me'no wimo'nodupudo tovino to'no kuudo jou'movlavogaulo.
Aki kevu pasudo sugudo tollovaino yenyubworomaropi pi'mwono neya domolludo'movlavogaulo. Toro togaikullu Krais tool kooti yogalo duuwiyo'moneyokwe kwolabwo'ji toga kevu kaiya'no nonagutokwe to'no imo'nupinogaikikono. Kevu su toro sumo'nupi togaikulluno a'mwo pwolnodo kwol kuruv ku'nono mabwolomekumwogapiyawonekono.
Su toro tovino kevu Jisasolluno kuudo uubweyodupudo togaikul nemino kuudo me'no yanekuu'dupudogaikikono. Su toro toga nevu yiuno Gooti toolluno to'no kuumjunyajuwonogano. Aki toro toonol sugupasudo to'no amjumovlaiyajuwonogano. Su toro mujumovla'mdowore toonolluno kevu aro kuudo sanekuullajupogaikikono. Oo kaiya'no miyanekullugollokwerogano. Su toro tovino kevu kuudo me'no yanekuu'dupudogaikikono. Aki su toro tovino Gooti kwol kuruv nemino kuudo me'no youronekuma'dowodekono.
Guu a'mwo kuunano ibwasodopure toorai duumjukullo'moneyokwe aro neya jodubwasogawono. Yiuwi'nokai Jisasolluro a'mwo abolo ton a'mwo abolo pubuuraino kalo buuropino neya winogapuro. Kalo buuropino winyo'moneyokwe pasudo su tov puruvapuruv tonyuda'ai lokabodowodokwono. Muudu'nodo tov kemoro poowokalago me'no sal'mo'nyungiko tovida'ai lokabodowodokwono. Aki puruv kemi poowokalago tovida'ai kuudo sugudo me'no kuuluuwo'dowodo tovi kuvinono uumjunodowo'jure tovida'ai lokabodowodokwono. Aki puruv Gooti toolluno kuudo kuvinono uubweyodopure tovida'ai lokabodowodokwono.
Guvnokwe tooku a'mwononyunodo su toorai ilaiyo wuuduuwallunyo'moneyokwe neya jumo'nogawono. Toro tooku yiuwi'nokai sugupasudo go'no go'nodo tonyu pi'mwono molludo'movla'mdo'bure tookuji gwonopi a'mwononyunodo kworo kuruv aval'no nokwo molludo'movlapinorogano. Aki guu pi'mwono jodubwasogawono. Toro yodubwasodo'bure tovino a'mwo abolo ton kuudo yaguupinogano. Oo akal gamoro poowokalago kuunodo tokwe kuvinono kinamjodowo pi'mwono jodonekubwasadopiyo. Kuudo yaguupinogano.
Gooti tool nemi anekullo'mwojoneyokwe tovino kevu subusu'nyogalo neya duudogaulo. Aki Gooti toolluro sumdo tovi nevu aro me'no yainyunodowadonogano. Oo nemi poowokalago tovi kuulanekwo'dupudo tonyu kuvinono uumjunodowadonoldeyo. Yainyunodowadonogano. Aki nevu yiuwi'nokai toga pasudo idopto'nodo tonyu mujumovlaiyo'mo nekullunodowodonogano.
Aki Gooti tool gamoro yasuwa'wino sugumaluko tov nemi guureji muunyu toru'aro nekullabiyokwekono. Toro tovino tov Gooti toolluro yogalo sakwollungiko puruv aro dodowodokwono. “Gooti tool a'mwo ilomoropunyokwe toorai nobwolomorumwogapiyokwekono. Toro kuvi kuruv a'mwo pworo a'mwo abolo punyu kwako tomuu'aro abwolomoropinapi su tooraino'gwowi gamoro yasuwa'wino sugumaluko tov nuuwiyokwekwono.” Dodowodokwono.
Sugupasudo su tov kemoro poowokalago tovi me'no kuulaikwo'dowodokwono. Toro tovi kuvinono neya duumjunogaulo. Toro togaikul kavo bemwojopiyopi kevnokwe togaikul kwako tomuu'aro bwolomorumwogapinogaulo. Su toro tomgu'aro kemoro sogwollo kinodupudo tovino kavlo tov kuu'maiyo toru neya dodelukuulludapiyogaulo. Toro te kevu Krais toollu me'no uuguro'mwonyodupudo togaikulluro sugupasudo yomjomwekovla'mdopure su tovino a'mwo abolo pun nobwolomekumwogapiyapinogano. Toro abwolomekumwogapiyapi kuvi kuruv kevnokwe ton wogulo to'no yowo'gallunmwalpinogano.
Gooti tool wonyo tovida'ai luvomato to'busuko amollurolowapiyoka su tov a'mwo abolo wonyo uuvollunodupudo tovino yovekurajo'mokwono. Wonyo mogaluvollo'moneyokwe pasudo su tov kulako tovida'ai guru'mopiko tonyu mollol'movodukwopiyo'mo'maiyo. Toro kuvi kuruv wonyo galuvollodupudo pasudo su to'gwowi Gooti tool nemi ma'no ma'nodo tovuro kirumwallo tovida'ai bomollurolovonekumokalokwodowodo tovino wuuduuwallo'mokwono. Aki Jisas Kraisolluro aiyo aiko te adukavoka tovi'aro kemoro poowokalago ton Gooti toolluro sumdo tovi sugudo me'no wimo'nodupudogaikikono. Toro te kevu wonyo kuuvollunpi toga Gooti toollomno me'no souragunyumo'nopo tovino kuu'maiyo toru'no wuuduuwallunodupudogaikikono.
ကြော်ငြာတွေ