1 Timooti 3:16 - Gooti Toolluro Yogalokwono16 Toro te nevu aro tovino kuudo noullo maullo miyau'dowadonogano. Gooti toolluro yiulo yogalo kuu'maiyo toru'no me'no bomollolupto'nosodowodo su tov aguto kuunodokwono. Yogalo su tov aro dodowodokwono. “Krais tool a'mwo kulako kuunodo tokwe imo'no'no a'mwo abolo tonyu kwiyalugunyajukekono. Toro toolluno Gooti toolluro Kuullo tool kuu'maiyo aro kuuduuwallajukekono. A'mwo akal Gooti toolluro sugudo to'nodekono. Kuuduuwallajukekono. Aki ensel pworo kwollu me'no kwonomaropekono. Aki gamoro womdokwe tooro yiuwi'nokai kantri tomuu kwolluno kuuguudo amodomollajuporogano. Su toro amodomollajupo toolluno yiuwi'nokai kwako akavida'ai a'mwo abolo pun kuudo kuubweyopekono. Aki toro toollu Gooti tool muunyu kai'muuno mokailno sumaiyokwe gamoro bako jurogudo tovi anakuuto tomuu aulomorumwallokaikono.” Yogalo aguto su tov toro dodowodokwono. အခန်းကိုကြည့်ပါ။ |
1 Timooti 3:16
81 ပူးပေါင်းရင်းမြစ်များ
Neya duu'nyulo. Kwolaiyo pwol nemiyo'moneyokwe me'no sonekumarokaikono. Kwolaiyo su tool Gooti toolluro nemi anekullabokaikono. Aki toro tool a'mwo aguto kig imo'nowo'ji nemi mido mollonekumwalmwalonekono. Toro toolluno yovo go'no go'no aro ton dumwalpinekono. Yovo puruv arokwono. Sobanyo Mollodaiyo'mo Sugudo Kuunodolekono. Puruv Gooti Jurogudo Kuunodolekono. Puruv Yiuwi'nokai Toga Aiyo Yiunokuudo Mujomwekovlaiyokwe Tovi Ganumiyagolekono. Puruv Sumwoluko Kavo Wosunyo'moneyokwe Aguto Kigolekono. Yovo su toro togai wuudumwalpinekono.
Gooti Yawel aro adokaikono. “Juuda towai wagwolago bwotonyo ton wo'dupudorukono. Toro kuvi kuruv wagwolago puru'gwowi ajumiyo Efrata towai wo'dowodo tovino yovo tov Betelemovokwono. Wagwolago su tov kula'nyo kuvi kuruv yovo agutokwe imo'nonokwono. Toro tov aro tovinokwono. Isuraiyolda'ai tonyu mido mollomwallo'moneyokwe a'mwo aguto pwol wagwolago su to kuvida'ai bwonekono. A'mwo su tool toro bwono kuvi kuruv Ganumiyago toolno'gwowi wagwolago su toruda'aiyolmaiyo. Toro kwol kuruv aiyoga kuunodo togasuro amjomwekobiyajukekono. Toro te a'mwo aguto imo'nono su tool aiyogasuro amjomwekobiyajuko su to kwollurekono.”
Toro toorai Jisasol aro kuudokaikono. “Gooti tool gamoro muunyu kai'muuda'ai aguto kig mido mollomwalo tovino yiulo yogalo tov kemi me'no ikullabodowodekono. Toro ikullabodowodo tonyuno kavlo tov kevu me'no youroma'dupudorekikono. Toro kuvi kuruv Gooti tool a'mwo abolo punyuno'gwowi ku'nono mwiyodowodekono.
Jisasol toro kuudokaikono. Toro wuujuno sumaiyokwe loowo tovino pi'mwo kuudokwe toorai aro kuudokaikono. “Devitol Krais toolluno, Agutoloo, adoka tov Aguto su tool Devitolluro jukweyago kwolaiyo tekwobusuko adadomgu'aro imo'nonoldukono?” Jisasol a'mwo su toorai duullukullo'moneyokwe yogalo su tov toro kuudokaikono.
Aki Yogalo su tool a'mwo kulakokwe sumo'nokaikono. Toro imo'nyuno sumaiyokwe nemi akuuto toru abwolomwalokaikono. Toro toollu Gooti toolluro yasuwa'wino sugumaluko tokwe'aro nebaikuuguudo tokwe'aro toval aiyowomno kuullo'mowopiyodowodekono. Aki toro tool Gooti Ganumiyago toolluro Kwolaiyo pwolnodo tookono. Toro toolluro jurogudo kuunodo tovi nevu me'no kwonowekono.
Toro inuguto'na'no sumaiyokwe kwonoka tov ensel pworal youro wiya'jo tokwe yesolno Jisasolluro kulako bwiyo kwollajuko toru mwalodole toorallu kwonokakwono. Ensel su tooralluro pwol Jisasolluro mido tov kwollajuko toru amwalokaikono. Aki pwol Jisasolluro suvlo toval kwollajuko toru amwalokaikono. Toro mwalodole toorallu kwonokakwono.
Aga moro yogalo su tov kemoro kuudo nubweyodupudo tovi jul'nyo aikubweyo'ji tov lukomgu jul'nyo bwotonyo tov nyubwosunpinorekikono. Su tov aro tovinokwono. Nuu A'mwo Kwolaiyo Kuunodo toonyu Gooti toolluro ago amwallajo muunyu kai'muuno aiko te nyulamonyugono. Toro ilodo'mure toonyuno tov anuwonpi toga kevu jul'nyo bwotonyo nyubwosunpinorekikono.
Juudasollu toro wimo'noduke tovino wagwolago Jeruusalemda'ai yiuwi'nokai a'mwo abolo ton kuu'nopogano. Toro wuu'nyuno sumaveyokwe kwako su tovino yovo tov Akeldemavo sowaroporukono. Yovo su tovuro kavlo tov kemoro yogalo tovida'ai tov, Muja'womdoverukoneyo'mokwono. Juudasollu toro kwimo'noka tovino kwako su toru'no yovo tov toro sowaroporukono.” Pital Juudasolluno toro kuudokaikono.
Toruda'ai Pital nyodubwaso'moneyokwe aro amoruudokaikono. “Oo nebalo'mdeyo. Aga nuu kuu'maiyo toru'no kuudo me'no souromakono. Gooti tool yiuno Juu tonolluno to'no ilaiyo mwinyokwekono. Toro kwol kuruv yiuwi'nokai a'mwo abolo Juu toonolluro miyawosunodowado kunyuno kuruv ilaiyo aval'no winyokwekono.
Toro bai'mo'mno sumaleyokwe Jisasolluro a'mwo abolo tonyu amollu'bworolorakono. Toro mollu'bwo'no sumaleyokwe a'mwo abolo su tonyu Gooti toolluro jurogudo tokwe mollodubul kwimo'nyajuko tonyuno kuuguudo tov kuudolorakono. Toro wuujuno sumaleyokwe aki kuuguudo puruv aro kuudolorakono. “Nevu Juu tonol Jisasolluno kuudo uubweyodowado to'busuko kubalno Gooti tool a'mwo abolo Juu tonolluro miyawosunodowado kunyu kuruv Jisasolluno kuudo uubwepino'moneyokwe puuto me'no soulubweyokaikono.” Kuudolorakono.
Toro te aga kevu a'mwono moduvomwallokwe toorekullu aro ikudumo'mokwono. Kevnokwe toorekul neya domoduvomwalnogaulo. Aki a'mwo abolo Gooti toolluno kuudo kuubwemwakopo kubuurai kuruv sipsip tobuuraibusuko kevu neya domoduvomwalogaulo. A'mwo abolo su tonyu Gooti tool gami kuunodo wimo'numwalpino'moneyokwe gami Kwolaiyo toolluro mujako tokwe abiyomarokagano. Toro abiyomaroka tonyu kevu mido mollomwalmwalpino'moneyokwe Gooti toolluro Kuullo tool me'no ajaikubweyokarekikono. Toro ajaikubweyoka toorekul Gooti toolluro a'mwo abolo su tobuurai sipsip duuwatokwe toorobusuko wimo'nopi neya domomjomwekovlavogaulo.
Toro te nevu Juu tonogai'aro Juu tonolluro miyawosunodowado togai'aro tonol go'no go'nodonolmaiyo. Yiuwi'nokai tonol Gooti toollu aval'no wimo'nodowadonogano. Gooti tool yiuno pwolnodekono. Su tool nemi aguto nekullumo'nodowo yanyagekono. Toro toollu nevu, “Donekullo'mwojonoo,” kuuda'ji tov yiuwi'nokai tonollu gamoro sugumaluko bwotonyago tollovo nonekubwemovla'mwalonekono.
Toro kuvi kuruv yamuugojo puruv arokwono. Isuraiyolda'ai ton kuuguudo sugudo su tovi me'no kuu'nopodukono? Tade, yiuno kaduko tokwe to'no me'no kuu'nopogano. Gooti toolluro yogalo puruv aro sakwollungikokwono. “Kemoro kuuguudo amoruudomollopo tov kwako akavuro yiuwi'nokai do'gwapiyo kumuu kuruv me'no abomje'nugoulokakwono.” Sakwollungikokwono.
Aga nevu yiuno Gooti toolluno to'no neya ilomoropimwolowanonogano. Gooti su tool kuuguudo sugudo nuu modomollodumdo tovi'aro kemi jurogudo nokwo daikullumwojumwalonekono. Kuuguudo sugudo su tov aiyoga manyu kuunodo togada'ai yiulo yogalo mujumo'nugelabino mujumo'nugelabino sumaiyokwe kworomo bwotonyago kuuwolo'nyajukokwono. Toro kuvi kuruv aga'no'gwowi yiuno kuu'maiyo toru'no me'no abiyanekulo'nadopikokwono. Kuuguudo sugudo su tov yiuno Jisas Kraisollunokwono. Toro te kevu kuuguudo sugudo su tovino kuudo neya uubwemovlavopi jurogudo nokwo yogullumovla'mwalpinogaikikono.
Nevu yiulo yogalo sumo'nyajuko su tovi yiuwi'nokai a'mwo abolo tonyu kuu'maiyo toru'no moruudomollodowadonogano. Yiuwi'nokai a'mwo abolo Juu tooravuro miyawosunodupudo kunyu kuruv Jisasolluno kuudo neya uubwepino'moneyokwe nevu proofet tooravuro puukwollo sakwollajupo togai yodubwasodowadonogano. Su toro yodubwasodowore tovi'aro yiulo yogalo sumo'nyajuko su tov yiuno kuu'maiyo toru'no bomollupto'nubweyodowadonogano. Aki Gooti aiyo yiunokuudo mujomwekovla'mdowodo toolluro yogalo nekudodowo'jure tomgu'aro kuvinono moruudomollodowadonogano.
Nebal'no ikudumo'mokwono. Yiuwi'nokai a'mwo abolo tonol kuunano yogalo jokwenogano. Toro kuvi kuruv yiuno Gooti judo toolno'gwowi kuunano yogalo majokwekono. Toro tool gamoro yogalo me'no ado'ji tovi kuvinono uumjunowo'ji yiuno nebal'nodo to'no jokwekono. Gooti toolluno kuuguudo sakwollungiko puruv arokwono. “Oo Gootoloo, guu kooti yogalo nekullodumdo tooku nebal'no kuunodekugono. Toro tookuji a'mwo pworo kooti yogalo adagujupi tov ku'nono maguuwolopinorogano.” Gooti toolluno yogalo sakwollungiko puruv torokwono. Gooti tool yiuwi'nokai toga gamoro yogalo tovi kuvinono uumjunodowodekono. Toro uumjunodowo'jure toollu a'mwo pworo wonopi aro dupinorogano. “Oo Gooti tool yiuno nebal'nodoldeyo.” Dupinorogano.
Kevu kuudo neya jaullulo. Gooti toolluro loowo tov nemi ma'no ma'nodo tonyu ku'nono mamonekudukwopiyonokwono. Su tov aro tovinokwono. Nevu loowo tovi uumjunyo'mo nekullunodowodo kuvi kuruv kwako akavida'ai kuudo tooro kuuno kuulanekwo'dowodo tovino tov jurogudo nonaguto imo'nodowadonogano. Toro kuvi kuruv Gooti toolno'gwowi nonekullo'mwojo'moneyokwe gavnokweyolluro Kwolaiyo toollu kwolomonekwopiyabokaikono. Toro kwolomonekwopiyaboka su tool a'mwo pwolbusuko sumo'nyajukekono. Nevu ma'no ma'nodokwe imo'nodowado kuvi kuruv su toolno'gwowi ma'no ma'no puru'monodo kuruv miyajukekono. Toro tool nemoro ma'no ma'nodo tovuro mubiyo tov amobiyanekudukwopiyokaikono. Toro mobiyanekudukwopino sumaiyokwe aki ma'no ma'nodo tovuro jurogudo tovi yiunokuudo amodukwopiyokaikono.
Aki Isuraiyolda'ai su ton kemi kwikweyago kuunodo Eburaiyameke Aisakeke Jekoopeke tooraida'ai imo'nugelabodupudogano. Aki Krais gavnokwe kwol kuruv kwako akavida'ai a'mwo pwolbusuko imo'nyo'moneyokwe tov Isuraiyolda'ai su tonyuro iko tovasuda'ai abwollumo'nokaikono. Krais su tool Gooti kuunodekono. Aki toro tool yiuwi'nokai tonyu mido aguto mollomwalodowodekono. Toro toolluno yovo tov yiuwi'nokai toga neya ilomoropimwolowanekono. Kuuguudo akav yiuno nebal'nodokwono.
Kuudo neya jaullulo. Sumdomgu nuuge'aro Sailaseke'aro Timootiyeke'aro toonol Gooti toolluro Kwolaiyo Jisas Kraisolluno kemi me'no amodekumollowonogano. Jisas Krais su tool gamoro mido tokwe, Awiyo, kuudo yaurowo'ji gamoro mago tokwe, “Tade,” miyoukuu'najokwekono. Toro kwol kuruv yiuwi'nokai toga, “Tade,” to'no dowo'ji kuvinono uumjunyokwekono.
Neya duu'nyulo. Gooti tool Pitallu jurogudo uubweyoduke tokwe Juu a'mwo abolo tonyu kuurotokwe womdo tov wiyodowodekono. Su toro to'busuko kubalno nuu kwonyu kuruv kuurotokwe womdo tov aval'no mujumovla'dumdonyugono. Toro toonyu Gooti avalo su toolluro jurogudo nubweyoduke tokwe a'mwo abolo Juu miyawosunodupudo togai to'gwowi kuurotokwe womdo mujumovla'dumdonyugono.
Toro te Gooti tool gamoro womdo puruv Krais toollu'aro yo'moneyokwe tov nemi nekuduuwallo'mo kwinyajukekono. Gooti toolluro womdo sugudo yo'mo winodowodo su tov aiyoga yiulo kwollajukokwono. Toro kuvi kuruv aga'no'gwowi nemi me'no nekuduuwallodowodo tovino tov nevu kuu'maiyo toru'no kuudo youroma'dowadonogano.
Aki nuu kwonyu kuruv Gooti tool anyo'mwojoneyokwe kevu aro tovino subusu'nyogalo neya duudogaulo. Moro mago tov ara'mi toga Gooti tool gavnokweyolluro yogalo tov neya anubweyono. Toro nubweyodowo'jure tokwe yiulo yogalo sumo'nyajuko kuuguudo sugudo tovino neya moruudumwalmonyugono. Toro te nuu luko nyumiyokwe tovino kevu subusu'nyogalo neya duudogaulo.
Toro te kevu kemi kuudo uubweyodupudo tovi kuuno gudupolaropi kuumjungovlapi tov guureji neya dovorugwo'mo'narogaulo. Aki kuuguudo sugudo me'no kuu'nopo su tovi muugollu'movopi aki yiuwi'nokai nomapino tonyuno yiuno sogwollo to'no kingovla'mwalpinogaikikono. Kevu su tomgu'aro somjumovlapi tov Gooti toolluro sumdo tovi kaiya'no nonagutokwe wimo'nupinogaikikono. Kuuguudo sugudo kuu'nopo su tov yiuwi'nokai kwako akavi aiyowomno bomje'nugoulodawodokwono. Nuu Poolol kwonyu kuruv kuuguudo sugudo su tokwe neya moruudomollo'moneyokwe a'mwo womdokwe me'no wimo'nodumdonyugono.
Gooti tool gami yiuwi'nokai a'mwo abolo su ton aro tovino kuudo youromapino'moneyokwe kwinyajukekono. Krais toolluro noonyumwonyu sugumaluko nonekullabwono tollovogai'aro aki Krais tooke ilomwallo'mo tokwe'aro su ton kevu a'mwo abolo Juu miyawosunodupudo kugaikul kuruv kuvinono nyulomapinogaikikono. Gooti tool gamoro a'mwo abolo togaikulluno su toro kwinyajukekono. Toro toolluro kuuguudo yiulo apuu'nallajuko tov arokwono. Krais tool gamoro a'mwo abolo togaikullu kuulekumwalonekono. Toro te aga kemi kuvinono kuulekumwalodowodo tovino tov lukomgu kevu Krais tooke gamoro bako bwotonyo pwopiyodowodo tovi anakuuto tomuu gavuge nyulomwalpinogaikikono. Su toro tovino sogwollo to'no kingovla'mdupudogaikikono.
Kuudo neya jaullulo. Kuuguudo sugudo tov kemi baiki'mo'mduke tovi kevu me'no kuu'nopogaikikono. Toro wuu'nyuno sumaveyokwe kevu Gooti toolluro yasuwa'wino sugumaluko tovino kavlo tov kuudo pi'mwono souromaropogaikikono. Su toro souromaropo toga sulo tov kemi akuuto toru ai'nokakwono. Aki su toro togada'ai sulo tov kuuno ki'nugelabodowodokwono. Kevu Jisasolluro a'mwo abolo togaikullu akuuto toru sulo ki'nugelabodowodo to'busuko kubalno kuuguudo sugudo avalo su tov yiuwi'nokai kwako akavi aiyowomno bomje'nugoulodawodokwono. Toro bomje'nugouloduke su tovi a'mwo abolo kuudo uubweyodupudo tonyuro akuuto toru sulo aval'no ki'nugelabodowodokwono. Aki su toro tovida'ai a'mwo abolo su tonyuro sugupasudo ton bwotonyo kuuno imo'nugelabodupudogano.
Toro toonyu aro tovino nyunodowodonyugono. Kevu yiuwi'nokai togaikul Jisasolluro a'mwo abolo pubuurai kalo buuropino neya domollogaulo. Kalo buuropino amollupi su tov wuulo to'busuko kevu imgu amgu togaikullu jurogudo nokwo galogudupolaikwo'mwalonokwono. Toro gudupolaikwo'dowo'jure tovi'aro kemoro poowokalago tonyu jurogudo nokwo daikullumwojumwalonokwono. Aki kevu Gooti toolluro yiulo yogalo apuu'nallajuko su tov aga kuu'maiyo toru'no bomollolupto'naikubweyodowodokwono. Toro tovino kavlo tov me'no youroma'dupudogaikikono. Kavlo su tov Krais tool kwekono. Kevu Krais su toolluno kuudo me'no youromoropiyodupudo tov kuvi kuunogano. Kuudo su tovi youroma'dupudo togaikul Gooti toolluro sumdo tovi kevu gamoro yiuwi'nokai sugumaluko tollovo me'no ma'dupudo tonbusuko wimo'nodupudogaikikono.
Aguto tool iruko su tollugwoji kwolabwo'ji toga gamoro kuunodo wimo'nyo'moneyokwe kuudo uubweyodupudo tono'gwowi yovo aguto wipinekono. Aki toro toolluno ilaiyo bwotonyo mollomapinekono. Kev kugaikul kuruv nemoro kuuguudo kuu'maiyo toru adodoluvaikubweyowo tovi kuudo me'no kuubweyopogaikikono. Toro togaikulluno tov ilaiyo aval'no mollomapinekono.
Aga kirovanyuvanyu kuumwiyo su tool yere mabiyalo'noduke kuvi kuruv gamoro jurogudo to'gwowi yiulo tomuu womdo me'no bomjumoulodawodokwono. Su toro bomjumouloduke tovi a'mwo abolo pun uumjunodupu Gooti toollu kisuvolo wiyodupudogano. Kirovanyuvanyu kuumwiyo toolluro jurogudo tov womdo me'no bomjumoulodawodo kuvi kuruv kirovanyuvanyu kuumwiyo su toolluno'gwowi pwol kuuno uumjuku'dowodekono. Toro uumjuku'dowodo su tool me'no sovo'bworodawo'ji toga'no'gwowi
Toro kworo kuruv Krais toolluno kuuguudo tovino to'no neya gudupola'mwalpinorogano. Kuuguudo su tov aiyoga yiulo apuu'nallajuko kuvi kuruv aga'no'gwowi kuu'maiyo toru'no me'no bomollolupto'nosodowodokwono. Aki toro tooro kemi poowokalago tovida'ai kuudo kuuluuwo'dupudo kunyu kuruv neya uumjunmwalpinorogano.
Gooti toolluro Kwolaiyo su tool Gooti jurogudo kuunodo toolluro bako pwopiyodowodo tov nekuduuwallodowodekono. Aki toro tool gami Ganumiyago Gooti toolbusuko irol'mowosunodekono. Toro tool kwako tokwe'aro sulugumdo tokwe'aro tovalluda'ai yiuwi'nokai wo'dupudo tonyu gamoro yogalo jurogudo tokwe kuuno mollomwalodowodekono. Kwolaiyo su tool nemoro ma'no ma'nodo tovuro kirumwallo tovi me'no amollol'movonekudukwopiyokaikono. Toro mollol'movonekudukwopino sumaiyokwe toga muunyu kai'muu mwalodowodo Aguto Kuunodo toolluro anato toru sulomwalokaikono.
Aki toro tonol a'mwo pwol resis tovuro aiyo'wo tomgu kinamjodowodo to'busuko kubalno nevu yiuno Jisasolluno bekonarowa'ji neya ainomjumovlavogawano. Nemoro kuudo uubweyodowado tov yiuno Jisasolluno to'no porugwo'mo'na'dowodokwono. Aki lukomgu yiuno Jisasolno Gooti toolluro ago muunyu kai'muuno nekumokailawonekono. Jisasol aro kuudo me'no souromarokaikono. Oo nuu aiyowo'mo toru ai'mo'mi toga ilaiyo bwotonyo tov noma'monyudeyo. Toro tovino tov mi sumdollu toruda'ai puuto wo'dowodo tovi guureji neya ainamjumo. Kuudo me'no souromarokaikono. Toro souromaroka tool nokwo wonyapino to'no yoduke toga a'mwo kaiya'nodo tooro galomworaro'mno i'noguropte tovi amovoromiyoguroptowosopekono. Aki toro tool aro kuudo miyaullajukekono. Nuu i'noguropte tovi abolmi toonyuno yovo tov nobwolomonumwogapiyapinonyudeyo. Su toro tovino kuudo miyaullajukekono. Toro te Jisasol resis tovi me'no uuwolo'mno sumaiyokwe Gooti toolluro sia kig tovi anato toru sulomwalokaikono. Toro ilomwalno sumaiyokwe aga kuga kuruv kuuno mujomwekovla'mdowodekono.
Gooti tool aiyoga proofet su toorai aro tovino me'no kuuduuwallokaikono. “Kemoro proofet yogalo moruudodupudo womdo su tov kevnokweraiyo'mo'maiyo. Toro kuvi kuruv yogalo amoruujajupo su tov a'mwo abolo lukomguda'ai billumo'nupino tonyo'mokwono.” Gooti tool proofet su toorai kuu'maiyo me'no kuuduuwallajukekono. Toro te proofet yogalo su tokwe a'mwo kuurotokwe tooro modomollodupudorogano. Toro modomollodupudo su tov kev togaikullo'mokwono. Aki Gooti tool aiyogasuro su toorai gamoro Kuullo tool muunyu kai'muuda'ai kwolomoropiyabokaikono. Toro toolluro jurogudo tokwe Krais toolluno kuuguudo sugudo tov amodekumollajuporogano. Aki ensel kworo kuruv proofet tooravuro yogalo su tovino kavlo tov kuudo youromallo'mo winodupudorogano.
Toro te kevu Krais su toollu'aro Gooti toollu kuudo me'no kuubwemwakopogaikikono. Aki Gooti su tool Krais toollu aiyo aiko te moduka'mno sumaiyokwe gamoro bako bwotonyo toru me'no amorumwallokaikono. Toro tovino tov kevu Gooti su toolluno kuudo uubweyodupudogaikikono. Aki Gooti su toolluno sogwollo to'no kinodupudogaikikono.
Kuudo neya jaullulo. Krais kwol kuruv a'mwo abolo tonyuro ma'no ma'nodo tovi modukwopiyo'moneyokwe danyu'nyuwuulo ton yiuno puru'monodo toga'no amarokaikono. Krais su tool yiuno sugudo to'no imo'nodowodo kwol kuruv nevu sugudo mimo'nodowado tonolluro aiko toru maro'no abolokaikono. Aki nemi Gooti toollu wobo toru nekumokabiyo'moneyokwe abolokaikono. Krais toolluro kulako tov me'no aboloka kuvi kuruv aiyo aiko te adukavoka toga'no'gwowi Kuullo sumo'nokaikono.
Aki Jisas Kraisol Gooti toolluro ago muunyu kai'muuno me'no ilomwalno sumaiyokwe Gooti toolluro anato toru mwalo'no mido mollomwalokwe imo'nodowodekono. Toro toolluro mido mollomwalo tovi dolago tomuu yiuwi'nokai ensel toorogai'aro kuullo mido mollomwalokwe toorogai'aro kuullo jurogudokwe toorogai'aro tooro kuulomwalodupudorogano.
A'mwo abolo tonyuro poowokalago tonyu aiyo mujomwekovlaiyo'moneyokwe wiyodowodo su tool kuu'maiyo toru'no me'no abiyalo'nokaikono. Toro biyalo'noduke toga nevnokwe toonol me'no kwonowekono. Aki toro kwonowo tovino kuu'maiyo toru'no dodoluwosodowadonogano. Aki aga nevu aiyo yiunokuudo mujomwekovlaiyo'moneyokwe tov nekullabodowodo su toolluno kemi modekumollodowadonogano. Su tool gami Ganumiyago tooke amwallajuko kwol kuruv nemi kuu'maiyo toru'no abiyanekulo'nokaikono.
Toro kuvi kuruv a'mwo abolo puno'gwowi ma'no ma'no pasudo mujumovla'mdupudogano. Ma'no ma'no pasudo su tovi wonopi kuudo youromapinogaikikono. Oo a'mwo abolo su ton Satanyollurodeyo. Kuudo youromapinogaikikono. Su tov aro tovinokwono. Satanyol muudu'nodo togada'ai ma'no ma'no pasudo mujumelabino mujumelabino yodowo aga kuga kuruv kuuno mujumovla'mdowodekono. Aki Satanyolluro womdo mujumelabodowodo su tovi Gooti toolluro Kwolaiyo tool kaiyako mollounapiyo'moneyokwe kuu'maiyo toru me'no abiyalo'nokaikono.
Aki abolo su tovuro yomo tovi yovo puruv sokwollosungikokwono. Yovo su tovino kavlo tov yiulo apuu'nallajukokwono. Yovo su tov arokwono. “Mino yovo tov wagwolago aguto Bebeloonoveyo'migono. Toro to'mi kwako akavida'ai kwonyalo abolo tonyu kuuneyago'migono. Aki yiuwi'nokai kwako akavida'ai kwoda'mollunyo pasudo toorai kuuneyago'migono.” Sakwollungikokwono.
Toro yodore toonyu ensel tool anyudokaikono. “Guu mollolokurosi mibinono. Abolo su tokwe'aro ibesa'aiyo kaiya'no kuumwiyo sulomwalluko su tooke'aro tovalluno kavlo tov yiulo sumo'nyajukokwono. Ibesa'aiyo kaiya'no kuumwiyo su tool 7-pela mido togai'aro atousal koomwo togai'aro kurukwekono. Toro tovalluno kavlo tov yiulo sumo'nyajuko tovino gudumo'mokwono.
Toruda'ai nuu a'mwo abolo kwolallo bwotonyago i'bwo'nodopure tonyu kwononyugono. Kwolallo su tonyu a'mwo pwolnodo kwol kuruv ku'nono majagilonekono. Toro ton yiuwi'nokai kantri togai'aro yovodolobunyo togai'aro judo'no judo'no kula'nokakwe togai'aro go'no go'no yogaljo tonyuda'ai togai'aro su ton sia kig tovi dolago toruke Sipsip Muugunyo toolluro sumdollu toruke towai abodavopogano. Toro ton youro kumi'yago wiya'jo tousogai yeso'mno kemoro ato tonyu wonoweyo kuuwopto to'busuko togai amworaropogano.
ကြော်ငြာတွေ