Jisasolluro toro kuudoka tovi Juu tooravuro a'mwo aguto su tooro aro sajunoporogano. “A'mwo su tool Grik tooravuro kantri go'no go'nodo tomuuno plavowo'ji Grikda'ai a'mwo pworai yodubwasonoldukono? Kantri go'no go'nodo su tonyu Juu pworo me'no ajo'bworapingopogano. Toro te a'mwo su tool kantri su tonyomno pla'mdowo'jure toollu nevu ku'nono mwonanoldukono?
1 Timooti 2:7 - Gooti Toolluro Yogalokwono7 Toro te nuu gamoro kuurotokwe imo'no'mi nebaikuuguudo tokwe moruudomollo'moneyokwe Krais tool mi me'no ajanubweyokaikono. Toro tovino tov nuu kuunano magudodumdo kuvi kuruv yiuno nebal'no agudumono. A'mwo abolo Juu tooravuro miyawosunodupudo tonyu yodubwaso'moneyokwe amonuwapiyokanyugono. Toro sodubwasumi tovi'aro Krais toolluno kuudo uubweyopi aki gamoro nebaikuuguudo pugai'aro tonyuno kuudo nokwo youromapinogano. Toro tovino'mo amonuwapiyokanyugono. အခန်းကိုကြည့်ပါ။ |
1 Timooti 2:7
27 ပူးပေါင်းရင်းမြစ်များ
Toro bai'mo'mno sumaleyokwe Jisasolluro a'mwo abolo tonyu amollu'bworolorakono. Toro mollu'bwo'no sumaleyokwe a'mwo abolo su tonyu Gooti toolluro jurogudo tokwe mollodubul kwimo'nyajuko tonyuno kuuguudo tov kuudolorakono. Toro wuujuno sumaleyokwe aki kuuguudo puruv aro kuudolorakono. “Nevu Juu tonol Jisasolluno kuudo uubweyodowado to'busuko kubalno Gooti tool a'mwo abolo Juu tonolluro miyawosunodowado kunyu kuruv Jisasolluno kuudo uubwepino'moneyokwe puuto me'no soulubweyokaikono.” Kuudolorakono.
Toro kwonyu kuruv kuvinono uumjunono sumdomgu wagwolago Damaskosda'ai mwalodupudo tonyu kuuguudo sugudo tokwe amoruudomollajonyugono. Toro moruudomolluno sumoneyokwe lukomgu wagwolago Jeruusalemda'ai mwalodupudo togai'aro aki yiuwi'nokai proovins Juudiya tomuuda'ai mwalodupudo togai'aro tonyu amoruudomollajonyugono. Aki a'mwo Juu tooravuro miyawosunodupudo kworai kuruv aval'no aro amoruudomollajonyugono. “Kevu Gooti toollomno kuudo neya jouragunyumo'nyulo. Toro souragunyumo'nupi togaikul Gooti toollu wobo toru nokwo bupinogaikikono. Aki kevu Gooti toollomno kuudo souragunyumo'nupi su tovino a'mwo abolo punyu wuuduuwallupino'moneyokwe pasudo muuduko ton neya domolludovogaulo.” Amoruujajonyugono.
Toro kuudoka tovi Aguto tool Ananaiyasollu kuudokaikono. “Guu luko mibinono. Soolollomno nokwo dovlavono. A'mwo su tool moro womdo tovi nyumwalono'moneyokwe me'no ajesekono. Toro ajeso su tool a'mwo abolo Juu tooravuro miyawosunodupudo togai'aro kemoro a'mwo aguto kig toorogai'aro Isuraiyolda'ai a'mwo abolo togai'aro tonyu moro kuuguudo tov yodubwasumwalonekono. Toro sodubwaso'ji tovida'ai mino yovo tovino nyouroma'mwalpinogano.
Toro tovino tov nuu Gooti toollu subusu'nyogalo wuudodum kemino kuudo miyaikullulo'gwonodumdonyugono. Moro su toro yodumdo tovino Gooti tool kuudo me'no youronuma'dowodekono. Toro me'no youronuma'dowodo toolluno tov gamoro womdo tovi yo'moneyokwe mi poowokalago kuunodo tokwe wiyodumdonyugono. Toro toonyu gamoro Kwolaiyo toolluno kuuguudo sugudo tokwe moruudomollodumdonyugono.
Gooti tool a'mwo abolo deko kuudupi su tonyu kuvinono nuuwiyo'mwojonekono. Toro kuvi kuruv a'mwo abolo ton Aguto toollu, “Donekullo'mwojonoo,” yere muudodopure toga sumdomgu gamino kuudo neya uubwepuro. Aki kuudo yere muubweyodopure toga sumdomgu Aguto toolluno kuuguudo tovi neya wuu'nupuro. Aki kuuguudo su tovi yere muu'nodopure toga sumdomgu a'mwo pwol neya amoruudono.
Gooti tool gavnokweyolluro sugudo tov mi me'no anubweyoka toonyuno tov nuu Krais Jisasolluro womdokwe wimo'nodumdonyugono. Toro toonyu Gooti toolluro kuuguudo sugudo tokwe a'mwo abolo Juu tooravuro miyawosunodupudo tonyu moruudomollodumdonyugono. Moro womdo yodumdo su tov pris tooravuro womdo sajupo to'busukokwono. Pris tooro Gooti toollu wiyo'moneyokwe sipsiporodeyo toorogai kwiroudapiyajuporogano. Toro kwiroudapiyajupo toga Gooti tool kemoro wiyodopure toorai ilaiyo amollomallajukekono. Su toro to'busuko kubalno nuu Jisasolluro kuuguudo tokwe a'mwo abolo Juu tooravuro miyawosunodupudo tobuurai moruudomollodumdonyugono. Su toro moruudomollodore tovi'aro a'mwo abolo pun kuudo uubweyodupudogano. Toro uubweyodopure tonyu Gooti tool ilaiyo molloma'dowodekono. Aki Gooti toolluro Kuullo tool a'mwo abolo su tobuurai ma'dowo Gooti toolluro kwoloraiyo kuunodo wimo'numwalpino'moneyokwe morumwallodowodogano.
Nuu Krais toolluro a'mwo pwonyugono. Toro toonyuno tov moro kuuguudo aikudumi akav kuunano'maiyo. Yiuno nebal'nodo tovi ikudumonyugono. Aki moro nebaikuuguudo ikudumo su tovino Gooti toolluro Kuullo tooke'aro moro poowokalago tokwe'aro yiuwi'nokai su toval yiuno kuu'maiyo toru'no, “kuvigono,” nyudodubulovakono. Toro tovino tov moro kuuguudo akav yiuno nebal'nodo tovi ikudumonyugono.
Kevu kuudo neya jaullulo. Nuvu buro'nyo buro'nyo womdodeyo pun yo'mo nyunodowo'jure tovi noonyumwonyu pworo wuulo ku'nono manugullupinonyugono. Nuu nemi Aguto Jisasollu me'no kwono toonyu gamoro kuurotokwe imo'nodum gamoro womdo tovi mujumovla'mdumdonyugono. Aguto toolluro womdo mujumovla'mdore su tovida'ai kevu gamino kuudo me'no kuubweyopogaikikono.
Toro donuma'no sumaiyokwe gamoro Kwolaiyo toolluno kuu'maiyo toru'no adodolukuuranubweyokaikono. Toro adodolukuuranubweyoka su tov aro tovino'mokwono. Nuu a'mwo abolo Juu tooravuro miyawosunodupudo tonyu akuuto tomuu mwalo'mi Gooti toolluro Kwolaiyo toolluno kuuguudo sugudo tokwe moruudomollumwalmo'moneyokwe tovinokwono. Aki su toro anyuduuwalloka toga mi danumul'mwojo'moneyokwe nuu kwako akavida'ai a'mwo pwolnodo kwollu kuruv yere mavlavonyugono.
Toro kuvi kuruv nevu Jisasolluro a'mwo abolo tonolno'gwowi aro kuudo me'no youroma'dowadonogano. A'mwo pwol Moosesolluro loowo tovi kuumjuno'ji tovi'aro Gooti toolluro sumdo tovi sugudo ku'nono mwimo'nonekono. Toro kuvi kuruv yiuno Jisas Kraisolluno kuudo kuubweyo'ji su tovi'aro to'gwowi Gooti toolluro sumdo tovi sugudo kuvinono wimo'nonekono. Su toro tovino tov nevu Juu kunol kuruv Krais Jisasolluno kuudo me'no uubweyodowadonogano. Nemoro kuudo uubweyodowado su tov aro tovinokwono. A'mwo pwolnodo kwol kuruv Moosesolluro loowo kuumjuno'ji tovi'aro Gooti toolluro sumdo tovi sugudo ku'nono mwimo'nonekono. Su toro tovino tov ne kunol kuruv Moosesolluro loowo tovi kuumjuna'ji tovi'aro Gooti toolluro sumdo tovi sugudo mwimo'nanonogano. Toro kunol kuruv yiuno Krais toolluno kuudo kuubweya'ji tovi'aro to'no Gooti toolluro sumdo tovi sugudo wimo'nanonogano.
Aki Jemseke Pitaike Jooneke tooro Jisasolluro mollu'bwoto tovuro anyutuko toorobusuko imo'nodupudo su to kworo kuruv mino aro kuudo sanuuroporogano. Oo Gooti tool Poolollu yasuwa'wino sugumaluko tov uubweyoduke tovida'ai womdo yodowodoldeyo. Kuudo sanuuroporogano. Toro kuudo yanuu'no sumaveyokwe a'mwo su tooro nuuge'aro Banabaseke'aro toonallu ato amonakubwo'noporogano. Ato amonakubwo'nopo su tov aro tovino anakuduuwallopokwono. Oo nevuge'aro kev toorakike'aro yiuwi'nokai toonol avaiwomdo yodowadonogano. Toro tovino anakuduuwallopokwono. Ato me'no bwo'nyuno sumawoneyokwe aro anakudoporogano. “Ilaiyokwonoo. Kevu a'mwo abolo Juu miyawosunodupudo tonyomno plavo'bullu kuuguudo sugudo tokwe nokwo moruudomollumwalbullunorakikono. Kevu su toro moruudomollodo'bule toga nevno'gwowi Juu a'mwo abolo tonyomno plavowa'ji kuuguudo sugudo tokwe kuuno moruudomollumwalanonogano.”
Aki aiyogasuro a'mwo abolo kwako akavi amwallajupo tonyu Noowal aro amoruujajukekono. “Kevu Gooti toolluro ilaiyo winodowodo pasudo idopto'nodo tonyu neya duumjungovlavogaulo.” Toro moruudoduke kuvi kuruv a'mwo abolo kwako akavi amwallajupo su ton kisuvolo to'no kwiyajupogano. Toro te Gooti tool a'mwo abolo su tonyu wonyo allako tokwe airumwallokaikono. A'mwo abolo kwako akavi amwallajupo su ton Gooti toolluro kirumwallo su tovi mirukuruwolovopogano. Toro kuvi kuruv Noowaike'aro gami 7-pela a'mwo abolo togai'aro tonumdotono'gwowi Gooti tool amollovi'mwojomokavlavokaikono.
ကြော်ငြာတွေ