Toro tekwo a'mwo abolo bwotonyago ton sugudo imo'nupino'moneyokwe kemoro ma'no ma'nodo tonyuro jul'nyo tov maro'no danyu'nyuwuulo tov subwosunokaikono. Toro ibwosunoduke toollu Gooti Yawel wono'no adokaikono. “Moro a'mwo womdokwe su tekwojuno ilaiyo yodum a'mwo abolo ma'no ma'nodokwe tonyuno surodo nuunodowodo tov dugoga anyulmaiyo.” Adokaikono. Toro te a'mwo womdokwe yiuno sugudo to'nodo su tekwo a'mwo abolo tonyu sugudo wimo'nodowo'jure tovi wonowo'ji kuudo youromaronekono. Oo moro danyu'nyuwuulo amaro tov yasuwa'nodo'maiyo. Kuudo youromarowo'ji ilaiyo nokwo yomjomwekovla'mwalonekono.
1 Timooti 2:4 - Gooti Toolluro Yogalokwono4 Gooti su tool aro tovino ilaiyo winyokwekono. Yiuwi'nokai a'mwo abolo ton kemi ma'no ma'nodo tovuro kirumwallo tovida'ai neya abirolo'nugolokuupureyokwe tovino winyokwekono. Aki toro tool nebaikuuguudo tovino kavlo ton a'mwo abolo kuudo neya youromapureyokwe tovino ilaiyo winyokwekono. အခန်းကိုကြည့်ပါ။ |
1 Timooti 2:4
32 ပူးပေါင်းရင်းမြစ်များ
Toro te kevu plavopi yiuwi'nokai kwako akavuro go'no go'nodo tomuuda'ai a'mwo abolo tonyu moro numjunyokwe imo'numwalpino'moneyokwe jodubwosomollogaulo. Toro yodubwosomollodopure tovida'ai moro numjunyokwe sumo'nupi tonyu kevu wonyo domogaluvollogaulo. Toro toorekul Gooti Nyunumiyago toolluno yovo tokwe'aro gamoro Kwolaiyo toonyuno yovo tokwe'aro gamoro Kuullo toolluno yovo tokwe'aro tonyuda'ai wonyo domogaluvollogaulo.
Aki guvu Gooti toolluro a'mwo abolo tonyu kuu'maiyo toru'no yodubwasubinekugono. Su toro yodubwasodo'bure tovida'ai a'mwo abolo ton aro tovi nyainyunpinogano. Oo Gooti tool nemoro ma'no ma'nodo tonyu modukwopiyowo'ji kirumwallo tovida'ai nomollurolovonekumaronoldeyo. Su toro tovino nyainyunpinogano.
Toro kuudoka tovi a'mwo aguto tool gami ki'nato womdokwe toollu amodapiyokaikono. “Guu lokabo'bi ajumiyo kwa'mgu tomuuda'ai puuto bwotonyo togai'aro aki puuto kula'nyo togai'aro tomuu yomollo'bi a'mwo abolo ton moro ago tovi kuulomwollutowopipino'moneyokwe guu guureji neya dodomarono.” Amodapiyokaikono.
Aki yogalo puruv aro sakwollungikokwono. “Yiuwi'nokai a'mwo abolo Gooti toollomno kuudo souragunyumo'nupi su ton Gooti tool kemoro ma'no ma'nodo tovuro kirumwallo tov nomodukwopiyonekono. Yogalo su tov Krais toolluno yovo tovida'ai jurogudo tokwe nomodomollupinokwono. Muudu'no wagwolago Jeruusalemda'ai modomworaropi yiuwi'nokai kantri tonyu nomodomollupinokwono.” Su toro sakwollungikokwono.
Toro kuudoka tovi Jisasol aro kuudokaikono. “Nuvnokwe toonyu puutonyugono. Aki nuu yogalo nebal'nodonyugono. Aki nuu aiyo yiunokuudo mujomwekovlaiyo'moneyokwenyugono. Toro te a'mwo pwolnodo kwol kuruv moro Nyunumiyago toollomno biyo'mo kwino'ji tool puuto pumgu'aro abwo'ji tov ku'nono mabai'mowonekono. Toro kwol kuruv yiuno numi'aro abwo'ji toolno'gwowi nokwo bai'mowonekono.
Su tov aro tovinokwono. Moro avalo Juu ton kemi ikwonopi kwekuullu kuudo aro neya yaupinogano. Oo a'mwo abolo Juu tonolluro miyawosunodowado su tonyu Gooti tool kwiyo'mwojadopiko to'busuko kubalno ne kunollu kuruv neya anekullo'mwojono. Su toro kuudo yauropi ma'no ma'nodo tovuro kirumwallo tovida'ai abirolo'nugolokuupi tov ilaiyo kuunodokwono.
Toro te nevu womdo bwotonyo imo'na'dowa guurejuno mujumovla'mdowadonogano. Su tov aro tovinokwono. Nevu Gooti aiyo mujomwekovla'mdowodo toolluno sogwollo kinodowadonogano. Gooti su tool yiuwi'nokai a'mwo abolo tonyu ma'no ma'nodo tovuro kirumwallo tovida'ai bomollurolovomokalokwiyo'moneyokwe tookono. Toro toolluno kuudo me'no uubweyodowado tonollu kuvinono bomollurolovonekumokalokwodowodekono.
Toro te guu nebal'no yogalo yodubwasodo'bure tovi a'mwo pworo kisuvolo agujupi tov guu a'mwo su toorai yovo'dogallo'moneyokwe yogalo kavo togai duubemwojo'bi domojurugologawono. Su tov aro tovino'mokwono. A'mwo su tooro Gooti toollomno kuudo youragunyumo'nupureyokwe tovino Gooti tool nokwo wiyo'mwojonorodukono. Kuvinono kwiyo'mwojo'ji to'gwowi nebal'no yogalo tovuro kavlo tovino kuudo nokwo youromapinorogano.
Nuu Poolonyugono. Toro toonyu Gooti toolluro ki'nato womdo tovi wiyodumdonyugono. Aki Jisas Kraisolluro kuurotokwe pwonyugono. Toro toonyu a'mwo abolo Gooti toolluro jesodowodo tonyomno amonuwopiyabokaikono. A'mwo abolo su ton yiuno Gooti toolluno to'no kuudo neya uubwepureyokwe tovino amonuwopiyabokaikono. Aki Gooti toolluro a'mwo abolo jesodowodo su ton gamoro ilaiyo winodowo'jure tovi neya uumjungovlaiyo'moneyokwe nebaikuuguudo tokwe yodubwasodumdonyugono. Toro tovino kuudo youromaropi Gooti toolluro ilaiyo winodowodo tonyu kuvinono uumjungovlapinogano.
Neya duu'nyulo. Nevu nebaikuuguudo tovino kuudo me'no youroma'dowado punol muu'nyubusuko yowa'ji ma'no ma'no kuuno amjeroungovlawa'ji tov nemoro ma'no ma'nodo su tovi modukwopiyo'moneyokwe Jisasolluro yiuno puga'nodo togasuro me'no kwiroudapinoka su tovi buulo uugunyumopiyanonogano. Toro kuuguunyumopiya'ji tov nevu ma'no ma'nodo tovi modukwopiyo'moneyokwe Gooti toollu aki aiko te wiroudapiyo'mo puruv nonagutonogano.
Toro kuvi kuruv kevu kwekuullu kuudo bwotonyo tokwe'aro aki kevnokwe togaikul yovo aguto mallo'mo kuudo tokwe'aro su toval kemoro poowokalago tonyu aulaikworo'ji to'gwowi kevnokwe togaikulluno aro nodumwalpiyo. “Oo nevu kuudo pi'mwono me'no youroma'dowadonogano.” Nodumwalpiyo. Kevnokweyogaikulluro pi'mwo kuudo tovino su toro sulomoropinapi tov kuunano yogalo dupinogaikikono. Aki nebal'no yogalo tovi kisuvolo wipinogaikikono.
Toro te a'mwo pworo aro dodupudorogano. “Aguto tool gamoro subuu'yamju tonyu yere muumjunyokwekono.” Su toro dodupudo tov kuvimaiyo. Aguto tool gamoro subuu'yamju tovi kuvinono uumjunodowodekono. Toro kuvi kuruv agasuro a'mwo abolo tobuurekullu yere kirekumwallo'mo mwinodowodekono. Su tov Gooti tool a'mwo pwolnodo kwol kuruv yiunokuudo nyounapiyo'jokwe tovino kuudo yaullokwekono. Toro tovino tov Gooti tool a'mwo abolo gamiyomno kuudo youragunyumo'nupino'moneyokwe sogwollo to'no kinodowodekono. Su toro kinodowo'jure toga a'mwo abolo tonyu yere mairumwallodowodekono.
Nuu Jisasolluro mollu'bwoto tovida'ai a'mwono moduvomwallokwe pwonyugono. Toro toonyu guu abolo Gooti toolluro me'no ajesungiko to'guuji pas akav sokwollogwopiyamono. Guuge'aro aki gumi kwoloraiyo tobuurobusuko gujumo'nodupudo kubuurogai'aro togaikullomno pas akav sokwollekwopiyamono. Nuu gumino kalo buuropino kuunodo nyunodowodonyugono. Aki yiuno nuu judo toonyuno to'no gumino kalo buuropino nyunodowodo'maiyo. Toro kuvi kuruv yiuwi'nokai a'mwo abolo Gooti toolluro nebal'no yogalo tovino kuudo me'no youroma'dupudo kun kuruv gumino kalo buuropino winodupudogano.
Aki toruda'ai nuu ensel pwol muunyu kai'muu sulugumdo tovi akuuto toru'aro pla'mduke toollu kwononyugono. Ensel su tool a'mwo abolo kwako akavi mwalodupudo tonyu moruujo'moneyokwe kuuguudo sugudo tokwe amokavlavokaikono. Kuuguudo sugudo su tov yiunokuudo mujo'movla'mdowodokwono. Toro tokwe momwora'no sumaiyokwe yiuwi'nokai kantri togai'aro yovodolobunyo togai'aro yogaljo go'no go'no dodupudo togai'aro judo'no judo'no kula'nokakwe togai'aro tonyu moruujo'moneyokwe amokavlavokaikono.
ကြော်ငြာတွေ