1 Timooti 1:9 - Gooti Toolluro Yogalokwono9 Aki aro tovino kuudo neya yau'mwalanonogano. Gooti tool a'mwo abolo sugudo mujumovla'mdupudo tonyomno gamoro loowo tov amoropiyabokalmaiyo. Toro kuvi kuruv a'mwo abolo kisuvolo wiyodupudo tonyuno'gwowi loowo su tov amoropiyabokaikono. Aki a'mwo abolo pun Gooti toollu kaduko mwiyodupudo togai'aro Gooti toolluno kuudo miyau'dupudo togai'aro a'mwo abolo ma'no ma'no yodupudo togai'aro aki a'mwo abolo Gooti toolluro kuunodo mwimo'nodupudo togai'aro aki a'mwo abolo pun Gooti toolluro kuunodo imo'nodopure tobuurai bwolomorumwogapiyodapudo togai'aro aki a'mwo abolo pun kemi kuunum kwolabolo tonyu romiyosodupudo togai'aro aki pworo a'mwo abolo pubuurai romiyosodupudo toorogai'aro အခန်းကိုကြည့်ပါ။ |
1 Timooti 1:9
45 ပူးပေါင်းရင်းမြစ်များ
Aki su toro toga a'mwo pworo kemi kuugwai'yagorodeyo kuudai'yagorodeyo toorai aromiyosupureyokweyo'mo a'mwo gabovo pworai nomorubwepinorogano. Aki a'mwo pworo kemi kwolaiyo kuunodo toorai aromiyosupureyokweyo'mo a'mwo gabovo pworai nomorubwepinorogano. Aki kwoloraiyo pun kemi kuunum kwolabolo tonyu kisuvolo wiyopi aromiyosupureyokweyo'mo a'mwo gabovo pworai nomorubwepinogano.
Aki toro ton buulo yogalo wuudodupu aki Gooti toolluno suroguudo saullajupogano. Aki a'mwo abolo punyu biyolo duu'mwojodupu aki kevnokwe ton ilomoropunyo'mo sajupogano. Aki aro kuudo saullajupogano. A'mwo pworo nemi neya ilomonekwopiyogapuro. Aki ma'no ma'no pasudo toorai kiroungovlaiyo'moneyokwe puuto muuduko ton soulosunyajupogano. Aki kemi kuunum kwolabolo tonyu kisuvolo kwiyajupogano.
Aiyoga Gooti tool Eburaiyameke'aro gami jukweyago kwolaiyo sumo'nopo toorogai'aro toorai subuu'yamju puruv aro aduuwiyokaikono. “Yiuwi'nokai kwako tov kemiyo'mo nekullamokwono.” Aduuwiyokaikono. Gooti toolluro subuu'yamju aduuwiyoka su tov Eburaiyamol loowo punyu uumjunoduke toollu aduuwiyokalmaiyo. Toro kuvi kuruv Eburaiyamol yiuno Gooti toolluno kuudo uubweyoduke tovino tov Gooti toolluro sumdo tovi sugudo kwimo'nokaikono. Toro toollu subuu'yamju su tov aduuwiyokaikono.
Toro kuvi kuruv a'mwo abolo ton kemi ma'no ma'nodo tonyuno neya yainyunpureyokwe Gooti tool gamoro loowo tov kwiyokaikono. Loowo kwiyoka su tovi me'no amaropo kuga kuruv ma'no ma'nodo tov bwotonyo mujumo'nugelabodowodokwono. Toro mujumo'nugelaboduke kuvi kuruv Gooti toolluro yasuwa'wino sugumaluko uubweyodowodo to'gwowi bwotonyo kuunodo mujumo'nugelabodowodokwono.
Toro te pugaikul aro yajunpinogaikikono. “Gooti tool gamoro loowo Moosesollu kwiyoka su tov buro'nyo kavlo tovino'mdukono?” Yajunpinogaikikono. Loowo kwiyoka su tov aro tovino'mokwono. A'mwo abolo ton kemi ma'no ma'nodo tonyuno neya yainyunpino'moneyokwe Gooti tool loowo su tov kwiyokaikono. Toro te Eburaiyamollu jukweyago kwolaiyo subuu'yamju kwiyoka su tool yere maboduke toga loowo su tov womdo kuuno sajukokwono. Loowo su tov Gooti tool ensel pworai kwiyokakwono. Toro wino sumaiyokwe ensel su tooro loowo su tov malluno sumaveyokwe Moosesollu kwiyoporogano. Moosesol Gooti tooke'aro a'mwo abolo togai'aro tonyu akuuto toru momuugurowosokwe sumo'nokaikono. Toro te a'mwo momuugurowosokwe su tool loowo tovi malluno sumaiyokwe Juu a'mwo abolo tonyu kwiyokaikono.
kwekuullu kuudo gabovo toorogai'aro imo'wonyo anpi tovida'ai amomo pasudo toorogai'aro lubullu doto deroungovlaiyo'mo pasudo toorogai'aro aki pasudo su toorobusuko pworogai'aro yiuwi'nokai su tooraino nevu kuudo nyau'mwakuuwono. Toro te nuu sumdomgu duudapi yogalo me'no adaikullo tovi aki aiko te aro ikudumo'monyugono. A'mwo abolo kaiya'no pasudo su toorai mujumovla'mdupudo ton aguto Kig Gooti toolluro mido mollomwalo tovi dolago tomuu ku'nono maulomwalpinogano.
kirovanyuvanyu kuumwiyo su tool yiuno kuu'maiyo toru'no nobillalo'nonekono. Su toro abillalo'no'ji toollu Aguto Jisasol gami mago tovida'ai suumjudo lokabodowodo tokwe noromiyosonekono. Aki Aguto Jisasolluro abwo'ji togasuro bako bwotonyo pwopiyono tokwe kirovanyuvanyu kuumwiyo su toollu kaiyako yiunokuudo nomollounapiyonekono.
Timootiyoloo, guu Gooti toolluro yogalo tokwe moruujo'moneyokwe womdo me'no ma'dumdo su tovi pi'mwono neya domollovi'mwojomwalogawono. Aki neya duu'nono. A'mwo abolo kuunano yogalo dodopure tonyu guu manyu tomuu'aro neya jurukuruwolovogawono. A'mwo abolo su ton Gooti toolluro ilaiyo mwinodowodo yogalo toorogai moruudomollodupudogano. Toro moruudomollopi kevnokwe tonyuno aro dodupudogano. “Oo nevu pi'mwo kuudokwenogano.” Toro dodupudo kun kuruv nebaikuuguudo tovino'gwowi kisuvolo wiyopi yiuno yasuwa'yogalo toorogai youllajunodupudogano. A'mwo abolo su toro yodupudo tonyu guu manyu tomuu'aro neya jurukuruwolovogawono.
Aki guu kwako akavida'ai yasuwa'yogalo toorai manyu tomuu'aro neya jurukuruwolovogawono. A'mwo abolo pun yasuwa'yogalo su toorai kaduko kwipi tov Gooti toolluno'gwowi kaduko mwimwalpinogano. Aki yasuwa'yogalo su tooro a'mwo abolo tonyu Gooti toollu buulo uugunyumopiyo'moneyokwe tov manyu tomuu guureji me'nomokavla'mwalpinorogano.
Aro tovinokwono. Su toro toga a'mwo abolo ton kaiya'no pasudo go'no go'nodo toorogai mujeroungovlapinogano. Toro ton yiuno kevnokwenyuno to'no kalo buuropino wingovla'mwalpinogano. Aki nuugwiyo bwotonyo ki'nomallo'moneyokwe guureji winmwalpinogano. Aki kevnokwenyuno ilomodomoropinyo'moneyokwe yogalo dumwalpinogano. Aki toro ton kevnokwenyuno aro ilomoropinapinogano. “Oo nevu tovosonol kuuwolo'mwakuuwono.” Toro dopi aki Gooti toollu bwolomorumwogapiyo'moneyokwe kaiya'no yogalo dumovla'mwalpinogano. Aki kemi kuunum kwolabolo tonyu kisuvolo wimwalpinogano. Aki noonyumwonyu pun amapi toga, “Nenyoo,” muudumwalpinogano. Aki Gooti gavnokwe toolluro pasudo idopto'nodo tonyu buulo uugunyumopimwalpinogano.
Neya duu'nono. Guu Jisasolluro a'mwo abolo tonyuda'ai a'mwono moduvomwallokwe toorai neya molludapimwalbino tov aro tovinokwono. Aku'momdo Kritda'ai Jisasolluro a'mwo bwotonyago tooro nuumjungovlaiyo'moneyokwe kuuguudo tonyu kisuvolo to'no yokwerogano. A'mwo su tooro yogalo kavlo nonagutokwe toorogai'aro kuunano yogalo toorogai'aro su toorogai youkuu'nuujo'moneyokwe modomollodupudorogano. A'mwo su tooraida'ai bwotonyago tooro Juuworogano. Toro tooro a'mwo gabovo toorai aro wuudodupudorogano. “Kevu nevu Juu toonolbusuko kemi lakulkulako ton neya dodo'nogaulo.” Modomollodupudorogano.
A'mwo abolo su ton yiuno kemi mago tokwe to'no aro dodupudogano. “Nevu Gooti toolluno kuudo me'no youroma'dowadonogano.” Su toro dodupudo kuvi kuruv kemoro yomjomwekovla'mdupudo to'gwowi kemi yogalo su tovi muumjunodupudo tovino kuu'maiyo toru'no aro wuuduuwallunodupudogano. Gooti toollu ku'nono muumjunmwakuuwono. Kuu'maiyo toru'no su toro wuuduuwallunodupudogano. Toro te a'mwo abolo su ton kisuvolo yodupudogano. Aki toro ton sugupasudo yo'moneyokwe kuruv ku'nono mipinogano. Gooti tool a'mwo abolo su toro yodopure tonyuno kwoda'molo sumdo to'no yodowodekono.
Toro te a'mwono moduvomwallo'moneyokwe imo'nyo'mo toorai aro neya jenyubworomarogawono. Guu Jisasolluro a'mwo toorai wonomollo'bi a'mwo pwol, “Oo pasudo akanyu me'no molludo'movla'mdowodoldeyo,” adubi toollu nokwo molludapibinekugono. A'mwo nomolludapibino su tool Jisasolluro a'mwo abolo tonyuro sumdo tovi kaiya'no puru'monodo kuruv miyodowodekono. Aki toro tool abolo yiuno puru'monodokwekono. A'mwo su toolluro kwoloraiyo ton Jisasolluno kuudo neya uubweyodupudogano. Aki kwoloraiyo su tonyuno a'mwo abolo pun aro neya dodupudogano. “Oo a'mwo su toolluro kwoloraiyo ton kaiya'no mairoungovla'mdupu aki kemi kuunum kwolabolo tovallu kisuvolo mwiyodupudogano.” Su toro dodupudo tooraino to'no jenyubworomarogawono.
Kuudo neya jaullulo. Muudu'nodo toga ne kunol kuruv junorukuudo tooro yau'dowa Gooti toolluro yogalo tovi kisuvolo kwiyajuwonogano. Aki kuunano yogalo youkuu'nanekudodopure toorai kaduko wiyodowa noonyumwonyu kwanyu sumdo kinuwiyo'mo pasudo toorogai'aro nevnokwenollu ilaiyo igollunyo'mo pasudo toorogai'aro su toorai kiroungovlaiyo'moneyokwe ki'nato womdo sajuwonogano. Aki toro tonol magu'nyo kuudo toorogai'aro kwekuullu kuudo toorogai'aro you'movla'mdowa a'mwo abolo togai sumwoluko gwabo sungovlaiyajuwonogano. Muudu'nodo toga nevu kaiya'no pasudo su toro toorogai somjomwekovlaiyajuwonogano.
Aki aiyoga kwonyalabolo Rahapov Gooti toolluno kuudo kuubweyokakwono. Toro kuudo kuubweyoka su tovi'aro wagwolago Jerikoo kuurupto tovi anakuuto tomuu mwalodowodo kuvi kuruv a'mwo abolo Gooti toolluno kuudo muubweyajupo togai mabolokakwono. Su tov aro tovinokwono. Isuraiyolda'ai a'mwo domokwe pworal abuuru'marolo toorallu Rahapov ilaiyo amollomaroka tovinokwono.
Aki kemida'ai pwolnodo kwol kuruv kwonyalo pasudorodeyo oo Gooti toolluda'ai mabodupudo pasudo toorai mamolludo'movlapiyo. Pasudo su toorai amolludo'movlaiyajuko Isoo'wolbusuko nyumo'numwalpiyo. Aiyoga Isoo'wol wosamujuko yiuno puru'monodo toga nonyo'moneyokwe tekwogai gami ganumiyago toolluro kuto ivito yiuwi'nokai lukomgu nomarono ton gami gagwai'yago Jekoopollu sodolovomarokaikono.
Kevu su to kwolluno kuudo me'no kuubwemwakopo togaikul sulo su toolluno aro kuudo youroma'dupudogaikikono. Oo Krais tool sulo nuugwiyo bwotonyo tokwe biyoma'dupudo toolbusukoldeyo. Kevu su toro kuudo youroma'dupudo kuvi kuruv a'mwo abolo kuudo muubweyodupudo punyuno'gwowi Gooti toolluro yogalo puruv aro sakwollungikokwono. “Sulo pwollu a'mwo sulago mojokwe tooro biyolsumdo ino sumaveyokwe amodukwopiyopekono. Toro amodukwopiyopo kwollu kuruv Gooti tool sulo su toollu malluno yodowo ago tov kwollu muunyu toru amodumokaikono. Toro te aga'no'gwowi sulo su tool yiuwi'nokai ago mojo'mo punyu kuuwolo'mwallo.” Sakwollungikokwono.
Wuulo aule'nallajupo kuullo su tooro aiyoga Noowalluro togasuro a'mwo abolo amwallajupo tonyurogano. Aiyoga Noowal sip toollu mododuke toga Gooti tool a'mwo abolo su tonyu kemi ma'no ma'no pasudo tonyuno yere mairumwallajukekono. Toro te a'mwo abolo su ton Gooti toollu kisuvolo to'no kwiyajupogano. Toro kuvi kuruv yiuno 8-pela a'mwo abolo tobuurono'gwowi sip toollu aulomwalopogano. A'mwo abolo pwolno puru'monodo aulomwalopo su tobuurai wonyo tov nome'nyudapiyo'jokweyo'mo Gooti tool wonyo tovida'ai luvomato to'busuko amollurolowapiyokaikono.
Su toro tovino Gooti toolluro yogalo sakwollungiko puruv aro dodowodokwono. “A'mwo abolo Gooti toolluro sumdo tovi sugudo wimo'nodupudo tobuurai ma'no ma'nodo tovuro kirumwallo tovida'ai bomollurolovomokalokwiyo'moneyokwe womdo tov kavenodo'maiyo. Toro tovino tov a'mwo abolo Gooti toollu muumjunodupu ma'no ma'no mujumovlaiyokwe su tonyuno'gwowi Gooti tool mabomollurolovomokalokwonogano.” Dodowodokwono.
Aguto toolluro nobwono su tov aro yo'mo tovino bwonekono. Yiuwi'nokai a'mwo abolo tonyu kooti yogalo jainyubworowo'ji ma'no ma'no pasudo tooraino nerumwallonekono. Aki yiuwi'nokai a'mwo abolo Gooti toollu muumjunodupudo su tonyuro yiuwi'nokai pasudo mujeroungovla'mdupudo tovino Aguto tool nomovagu'mwojonekono. Aki Aguto tool a'mwo abolo tonyuro yiuwi'nokai kaiya'no yogalo gamino bwolomorumwogapiyodapudo su tonyu nomovagu'mwojonekono.” Ajakwollokaikono.
Toro kuvi kuruv a'mwo abolo puno'gwowi luko yodupudo su togai'aro kuudo muubweyodupudo togai'aro kaiyako igolamo'nodupudo togai'aro romiyosodupudo togai'aro kwonyalo yodupudo togai'aro bulapto yodupudo togai'aro kuunano gooti toorai ilomoropiyodapudo togai'aro kuunano yogalo youkuu'nuudodupudo togai'aro yiuwi'nokai su tonyuno'gwowi dukworokakwe salfa sulo tokwe du'muudo nugovla'mdowo'jure tovi noulapinogano. Du'muudo su tovino, naba 2 bolnodovo, dodupudokwono.”
Toro kuvi kuruv a'mwo abolo puno'gwowi wagwolago su tovi kwa'mgu tomuu mwalpinogano. A'mwo abolo jul pasudo yodupudo togai'aro bulapto yodupudo togai'aro kwonyalo yodupudo togai'aro a'mwo pworai romiyosodupudo togai'aro kuunano gooti toorai ilomoropiyodapudo togai'aro aki yiuwi'nokai a'mwo abolo kevnokwenyuro kuunano pasudo tovino ilaiyo winopi youkuu'nuudodupudo togai'aro yiuwi'nokai su ton wagwolago tovi kwa'mgu tomuu mujomwekovla'mwalpinogano.
ကြော်ငြာတွေ