Gooti tool kevu Roomda'ai togaikulluno kalo buuropino wino'no gamoro a'mwo abolo kuunodo wimo'nyo'moneyokwe me'no adekumarokagaikikono. Toro te nuugebuuravoo, nuu kemi pas akav yakwollodum aro ikudumo'monyugono. Gooti toolluro yasuwa'wino sugumaluko ton nekubwemwalonekono. Nemi Nellunumiyago Gooti tooke'aro Aguto Jisas Kraiseke'aro tooralluda'ai yasuwa'wino sugumaluko su ton kuvinono noma'mwalpinogaikikono. Toro amapi tovida'ai kemoro sumwoluko ton kavo wosopi ilaiyo nokwo yomjomwekovla'mwalpinobuurekikono.
1 Timooti 1:2 - Gooti Toolluro Yogalokwono2 Toro ajanubweyolo toonyu pas akav guu Timootekujomno saguukwollumono. Nuu Krais Jisasolluno kuuguudo sugudo moruudomollodore tovi kuudo me'no kuubweyodekugono. Toro tookujuno tov moro kwolaiyo kuunodo toolbusuko nyumo'nodumdekugono. Toro tookujuno aro nyunodowodonyugono. Nemi Nellunumiyago Gooti tooke'aro nemi Aguto Krais Jisaseke'aro tooral aro nokwo gubwemwalbullunorakono. Kemoro yasuwa'wino sugumaluko tokwe'aro gumino kalo mamwonyodubulo tokwe'aro sumwoluko kavo wosungovlaiyo'moneyokwe tokwe'aro su ton nokwo gubwemwalbullunekugono. အခန်းကိုကြည့်ပါ။ |
1 Timooti 1:2
18 ပူးပေါင်းရင်းမြစ်များ
Toro domdukuurosuno sumawoneyokwe Sailaseke navu Timootiyollu kemiyomno yere amekwopiyabowolonakono. Timootiyol nemi nellugwai'yago toolbusuko nekullumo'nodowo Gooti toolluro womdo tovi aval'no yodowadonogano. Aki toro tool Krais toolluno kuuguudo sugudo tokwe aval'no modomollodowadekono. Toro toollu kemiyomno amekwopiyabowolekono. Su tool kemoro kuudo uubweyodupudo tovino guureji gudupola'mwalpino'moneyokwe daikullumwojonekono.
Nemi Aguto Krais Jisasol gamoro womdo akavi momjumovlaiyo'moneyokwe mino aro kuudo me'no souromarokaikono. Oo moro womdo tov nokwo uubwemwalmekono. Su toro kuudo me'no youronuma'no sumaiyokwe ajanubweyokaikono. Yo'no aki womdo su tovi momjumovlaiyo'moneyokwe jurogudo tov nubweyodowodekono. Toro tovino tov nuu, “Nenyoo,” wuudodumdonyugono.
Timootiyoloo, moro muugunyo tookubusuko nyumo'nodumdekugono. Toro tookujuno a'mwo pworo proofet yogalo tokwe aro me'no agujajupekugono. “Oo Timootiyol Gooti toolluro womdokwe wimo'nowo'ji Jisasolluno kuuguudo tokwe moruudomollonekono.” Gumino su toro me'no agujajupo tovi guu kuvinono neya uumjunmwalbino'moneyokwe nuu guureji adagubwemono. Guu su toro tomgu'aro kuumjungovla'bi tov a'mwo mollurogudo pwolbusuko ma'no ma'no pasudo toorogai molo po'dogalo mujumovla'mwalbinekugono.
Timootiyoloo, guu Gooti toolluro yogalo tokwe moruujo'moneyokwe womdo me'no ma'dumdo su tovi pi'mwono neya domollovi'mwojomwalogawono. Aki neya duu'nono. A'mwo abolo kuunano yogalo dodopure tonyu guu manyu tomuu'aro neya jurukuruwolovogawono. A'mwo abolo su ton Gooti toolluro ilaiyo mwinodowodo yogalo toorogai moruudomollodupudogano. Toro moruudomollopi kevnokwe tonyuno aro dodupudogano. “Oo nevu pi'mwo kuudokwenogano.” Toro dodupudo kun kuruv nebaikuuguudo tovino'gwowi kisuvolo wiyopi yiuno yasuwa'yogalo toorogai youllajunodupudogano. A'mwo abolo su toro yodupudo tonyu guu manyu tomuu'aro neya jurukuruwolovogawono.
Toro toonyu pas akav Timootiyekujomno saguukwollumono. Guu moro kwolaiyo kuunodo tookubusuko nyumo'nodumdo tookujuno kalo buuropino nyunodowodekugono. Toro tookuji nemi Nellunumiyago Gooti tooke'aro nemi Aguto Krais Jisaseke'aro tonumdalluro yasuwa'wino sugumaluko tokwe'aro gumino kalo mamwonyodubulo tokwe'aro sumwoluko kavo wosunyo'mo tokwe'aro su ton nokwo gubwemwalbullunekugono.
Pas akav Taitosekujo'mo sokwollagubwemono. Guu kuuguudo sugudo modomollodumdo tovi kuudo aval'no kuubweyodekugono. Toro tookujuno tov moro kwolaiyo kuunodo toolbusuko imo'nodumdekugono. Toro tookujuno nuu aro nyunodowodonyugono. Nemi Nellunumiyago Gooti tooke'aro ma'no ma'nodo tovuro kirumwallo tovida'ai mollurolovonekumallokwe Aguto Krais Jisaseke'aro tooral aro gubwemwalbullunekugono. Yasuwa'wino sugumaluko tokwe'aro sumwoluko kavo wosunyo'mo tokwe'aro toval nokwo gubwemwalbullunekugono.
Toro te a'mwono toorai yodubwaso'mo tov arokwono. A'mwono su tooro kevnokweravuro pasudo tonyu po'dogalo neya mollomwalnupinorogano. Aki toro tooro a'mwo abolo tonyuro sumdo tovi yovo sugudokwe neya wimo'numwalpinorogano. Toro tooro pi'mwo kuudo tokwe neya yomjomwekovlavopi aki Krais toollu kuudo guureji neya uubwemovla'mwalpinorogano. Aki a'mwo abolo punyu kalo buuropino neya winmwalpinorogano. Aki buro'nyo buro'nyo jul'nyo abwi'mowo'ji kuga kuruv womdo tovi nyumwogapipiyo. Toro kworo kuruv yiuwi'nokai toga womdo tovi guureji neya mujumovla'mwalpinorogano.
Jisas Kraisolluro Ganumiyago Gooti tool aiyogada'ai kemi me'no ikwono'no ajaikubweyokaikono. Aki gamoro Kuullo kuulekumwalodowodo toollu'aro kevu gamoro a'mwo abolo kuunodo wimo'nodupudogaikikono. Gooti toolluro kemi su toro saikullugoloka tov aro tovino'mokwono. Kevu Jisas Kraisolluro yogalo tovi uumjungovla'mwalpino'moneyokwe tovinokwono. Aki gamoro mujako tokwe kemi mollol'movaikudukwopiyono'moneyokwe tovinokwono. Oo Gooti tool gamoro yasuwa'wino sugumaluko ton kemi guureji nokwo ikubwemovla'mwalonekono. Aki kevu sumwoluko kavo wosungovlaiyo'moneyokwe kuruv Gooti tool nokwo ikullo'mwojumwalonekono.
Oo nami Nallunumiyago Gooti tooke'aro gamoro Kwolaiyo Jisas Kraiseke'aro tooralluro nebal'no yogalo tokwe'aro kalo buuropino pasudo tokwe'aro toval nami me'no kuulonakwo'dubulovakono. Toro tovalluda'ai yasuwa'wino sugumaluko tokwe'aro kalo mamwonyo'mo tokwe'aro sumwoluko kavo wosunyo'mo tokwe'aro yiuwi'nokai su ton nami nokwo nakwo'mwalpinogano.
Toro te nuvu kuuguudo aro tonyu wuu'nyo'mo nyunodowodonyugono. “Oo a'mwo abolo gumoro kwoloraiyo tobuurobusuko gujumo'nodupudo ton Gooti toolluro nebal'no yogalo tovi kuvinono uumjunodupudogano.” Kuuguudo su toro tovi kuu'numi toga nuu ilaiyo bwotonyo yodumdonyugono. Aki moro ilaiyo bwotonyo yodumdo su tov moro yiuwi'nokai ilaiyo punyu muunyu toru'aro uuwolo'mdowodokwono.
ကြော်ငြာတွေ