1 Tesaloonaika 5:21 - Gooti Toolluro Yogalokwono

²¹ Toro kugaikul kuruv yiuwi'nokai yogalo tonyuno nebalo'mdukoneyokwe tovino gallenyubworomallo'mo tov kevnokwe togaikul po'dogalo neya domojagilogaulo. Toro mojagilopi, “Oo akan sugudo'mdeyo,” adupi tonyuno to'no neya dogudupolarogaulo.

1 Tesaloonaika 5:21 ပူးပေါင်းရင်းမြစ်များ

Luuk 12:57

Aki Jisasol aro kuudokaikono. “Kevnokwe toorekul pasudo pun kaiya'nodo'mdukono oo sugudo'mdukoneyokwe tovino neya jainyubworogaulo.

Joon 15:4

Nuu kemi ikuguro'mwonyumwalmonyugono. Toro toonyuge kevu kworekul kuruv neya donuguro'mwonyumwalogaulo. Kuudo neya jaullulo. Ipilo pwol ikavlo toollu muumgu'mo'no'ji tov ikulsulo ku'nono mai'nonekono. Su toro to'busuko kubalno kevu numi manumgu'mo'nupi tov ikulsulo ku'nono mai'numwalpinorekikono.

Joon 8:31

Toruda'ai Jisasol Juu a'mwo pworo gamino kuudo uubweyodopure toorai aro kuudokaikono. “Kevu moro yogalo yodekubwasodumdo tonyu avorugwo'mo'napi tov moro uumjunyokwe kuunodo imo'nupinorekikono.

Kuurotokwe 11:23

Toro amorapiyopo tool plaino sumaiyokwe wagwolago su tovi ki'movo'no Gooti tool a'mwo abolo su tonyu gamoro yasuwa'wino sugumaluko uubweyoduke tovi kwonokaikono. Toro kwonoka tovino ilaiyo bwotonyo sokaikono. Toro tool a'mwo abolo su tonyuro poowokalago tovi jurogudo duuwimwojo'moneyokwe aro kuudokaikono. “Kevu Aguto toollu kisuvolo nuuwimwalpiyo. Toro kugaikul kuruv kemi poowokalago tokwe po'dogalo neya duumjunogaulo.” Toro kuudokaikono.

Kuurotokwe 14:22

Toro tooral wagwolago go'no go'nodo su tonyu bai'mo'mdubul a'mwo abolo Jisasolluro uumjunyokwe tobuurai kemi poowokalago tonyu jurogudo duuwimwojo'moneyokwe kuuguudo aro kuujajulorakono. “Nevu aguto kig Gooti toolluro mido mollomwalo tovi dolago tomuu kuulomwallo'mo tov kavo kavo yovlavowa'ji maulomwalanonogano. Toro kunol kuruv kwako akavi mwalowa'ji toga jul'nyo go'no go'nodo ton nobaneki'mo'mwalononogano. Toro baneki'mo'mdowo'jure tonyu neya yodo'movlavowa'ji Gooti toolluro mido mollomwalo tovi dolago tomuu kuvinono kuulomwalanonogano. Toro tovino tov kevu jul'nyo ton baiki'mo'mdowo'jure toga nobwolorapiyokwe kuuguudo sugudo tovi kuudo uubweyodupudo su tovino guureji neya dogudupolarogaulo.” Aduuwimwojajulorakono.

Kuurotokwe 17:11

Wagwolago Beriyada'ai Juu mwalodupudo ton kemoro kuudo tov dogaipo'nyonmaiyo. Toro ton Poololluro kuuguudo yodubwasoduke tovi wuu'nyo'mo ilaiyo to'no kwinyajupogano. Toro kuvi kuruv imuu wagwolago Tesaloonaikada'ai toorono'gwowi yiuno pwolno pwolnodo toorono Poololluro kuuguudo tonyu wuu'nyo'mo ilaiyo kwinyajuporogano. Toro te Poolol wagwolago Beriyada'ai Juu mwalodupudo tonyu kuuguudo sugudo tokwe sodubwasajukekono. Toro yodubwasoduke ton guureji wuu'nugovlaiyo'mo kwinyajupogano. Aki kuuguudo tov nebalo'mdukono oo kuunano'mdukoneyokwe tovi yo'mgonomallo'moneyokwe kevnokwe ton yiuwi'nokai iruko toga Gooti toolluro puukwollo sakwollungiko tonyu amojagillajupogano.

Room 12:2

Aki toro togaikul kwako akavida'ai a'mwo abolo punyuro mujumovla'mdopure tomgu'aro nuumjungovla'mwalpiyo. Toro kuvi kuruv Gooti tool kemoro poowokalago kuudo tonyu aiyo aiko te yokwollaikubweyodowo'jure tovi ilaiyo neya domollomarogaulo. Gooti tool kemoro poowokalago kuudo tonyu aiyo aiko te me'no sokwollaikubweyo'ji toga gamoro ilaiyo winodowodo tonyuno kuudo nokwo youroma'mwalpinogaikikono. Toro togaikul sugupasudo yo'mo togai'aro Gooti toollu ilaiyo igollo'moneyokwe togai'aro aki pasudo pun kaiya'no puru'monodo kuruv muumgu'mo'nodowodo togai'aro tonyuno nokwo youroma'mwalpinogaikikono.

Room 12:9

Toro te kevu kemoro poowokalago kuunodo togai a'mwo abolo tonyuno kalo buuropino neya aikullunogawono. Aki ma'no ma'no pasudo tooraino kwoda'molo sumdo to'no yopi sugupasudo tonyuno'gwowi po'dogalo neya dogudupolarogaulo.

1 Koorin 15:58

Toro tovino tov miyobuuravoo, Gooti toollu guureji neya dogudupolarogaulo. Aki toro togaikullu buro'nyo buro'nyorodeyo pworo nyoguluptovekwapimwalpiyo. Toro kubuurekul kuruv kevu aro kuudo nyau'mwakovo. Aguto toolluro womdo tovi wiyodupudo tov yasuwa'no mavlawonokwono. Toro tovino tov yiuwi'nokai toga kevu Aguto toolluro womdo tovi guureji neya domomjumovlavogaulo.

1 Koorin 2:11

Kuudo neya jaullulo. A'mwo pwolnodo kwol kuruv a'mwo gabovo pwolluro kuudo yau'dowo'jure tonyu ku'nono miyouroononekono. Toro kuvi kuruv yiuno gavnokwe toolluro kuullo toolno'gwowi gamoro kuudo tonyuno nokwo youroma'dowodekono. Su toro to'busuko kubalno Gooti toolluro kuudo tonyu yiuno gavnokweyolluro Kuullo toolno nokwo youroma'dowodekono.

Galesiya 6:10

Toro tovino tov nevu yiuwi'nokai toga buro'nyo buro'nyo a'mwo abolodeyo tonyu ilaiyo mollo'mo kudo'aiko ausanekubweyo'ji toga ilaiyo kuvinono neya amollogawano. Toro kuvi kuruv nevuge avalo Jisasolluno kuudo uubweyodupudo tonyuno'gwowi ilaiyo pasudo tov muunyu toru'aro guureji neya igologawano.

Efesos 5:10

Kevu su toro tomgu'aro somjomwekovlapi tov yiuwi'nokai toga Aguto toolluro ilaiyo winodowo'jure tonyuno yo'mgonomallo'moneyokwe to'no yamju neya duuwiyoganogaulo.

Filipai 1:10

Aki kevu pasudo sugudo tollovaino yenyubworomaropi pi'mwono neya domolludo'movlavogaulo. Toro togaikullu Krais tool kooti yogalo duuwiyo'moneyokwe kwolabwo'ji toga kevu kaiya'no nonagutokwe to'no imo'nupinogaikikono. Kevu su toro sumo'nupi togaikulluno a'mwo pwolnodo kwol kuruv ku'nono mabwolomekumwogapiyawonekono.

Filipai 3:16

Neya duu'nyulo. Nevu Krais toolluro sugupasudo punyu me'no yomjomwekovla'mdowadonogano. Pasudo su tonyu guureji neya gudupola'mwalanonogano.

Filipai 4:8

Mi avalobuuravoo, nuu aiyowo'mo yogalo akav ikudumo'mokwono. Kevu noonyumwonyu nebal'no pasudo togai'aro pasudo punyuno ilaiyodeyo dodupudo togai'aro pasudo idopto'nodo togai'aro kaiya'no nonagutokwe pasudo togai'aro pasudo sugumaluko togai'aro ilaiyo jugollo'mo pasudo togai'aro yiuwi'nokai pasudo su tonyuno kuudo neya jou'movlavogaulo. Aki noonyumwonyu pasudo kuuroollumaluko togai'aro aki ilomodomoropiyo'mo pasudo togai'aro kunyuno kuruv kuudo neya jou'movlavogaulo. Yiuwi'nokai pasudo su tollovo kemoro kuudo tonyu neya aullo'movaikwopiyogapuro.

1 Tesaloonaika 5:15

Kemida'ai pugaikul Jisasolluro a'mwo abolo kaiya'no saikullugolpi tonyu kevu mido mallo'moneyokwe kaiyako nyugolpiyo. Toro kugaikul kuruv yiuwi'nokai toga kevuge avalo Jisasolluro a'mwo abolo su tobuurogai imgu amgu ilaiyo neya jungovlavogaulo. Aki yiuwi'nokai a'mwo abolo kwa'mguda'ai kunyu kuruv aval'no su toro neya jugolmovlavogaulo.

1 Tesaloonaika 5:22

Aki toro togaikul yiuwi'nokai ma'no ma'no pasudo judo'no judo'nodo tonyu manyu toru'aro neya delpolodavogaulo.

2 Tesaloonaika 2:15

Toro te nevugebuuravoo, nemoro kuuguudo me'no sodekubwasumwakuuwo togai guureji neya dodavogaulo. Aki sumdomgu kevuge amwallajuuwo togasuro nemoro mago tovida'aiyo'mdeyo oo pas tovida'aiyo'mdeyo yiuwi'nokai nebaikuuguudo sodekubwasajuuwo su tonyu guureji neya dogudupolarogaulo.

2 Timooti 1:15

Aki guu aro tovino kuudo nyau'mwakuno. Yiuwi'nokai kwako Esiyada'ai Jisasolluro a'mwo abolo ton mi buulo anuugunyumopiyopogano. Aki su toro anuugunyumopiyopo tonyuda'ai a'mwo pworalluno yovo tov Fijeloseke Hermoogeneseke toorakono. A'mwo su to kworal kuruv mi buulo anuugunyumopiyolorakono.

2 Timooti 3:6

Neya duu'nono. A'mwo su tooraida'ai pworo abolo wollainyo tobuurai galomworallo'moneyokwe kemoro ago tonyu dukuu'nugoulodapudorogano. Abolo su tobuuro kevnokwenyuro ma'no ma'no pasudo tooro jul'nyo to'busuko wiroubweyodowodogano. Aki kemi kulako tonyuda'ai kwanyu kinuwiyodupudo pasudo judo'no judo'nodo tooro abolo su tobuurai kaiya'nodo tomgu'aro mollubworomokavla'mdupudorogano.

2 Timooti 4:14

A'mwo aiyon sallukwa'jo tokwe womdo yodowodo pwolluno yovo tov Aleksaderolekono. A'mwo su tool mi kaiyako bwotonyo sanyugolokaikono. Aguto tool a'mwo su toollu gamoro pasudo tovino kirumwallo'moneyokwe mubiyo tov nuuwiyonekono.

Hibruu 10:23

Nevu Gooti toolluro nonekullabwono tonyuno sogwollo kinodowado su tovino kuu'maiyo dodowiyoku'bworosodowadonogano. Toro dodowiyoku'bworosodowado su tovi guureji neya agudupolarogawano. Yiunokuudo su toro gudupolarowa'ji aki buulo nuugunyumopimwala'jo. Nevu su toro mujumovla'mwalano tovino kavlo tov arokwono. Subuu'yamju danekullodowodo Gooti tool buro'nyo buro'nyodeyo pun imokwe ado'ji tov yiuwi'nokai toga kuvinono yodowodekono. Toro te nevu noonyumwonyu sogwollo kinodowado su ton kuvinono nonekullumo'nupinogano.

1 Joon 4:1

Mi ibwoto'nyobuuravoo, a'mwo bwotonyago tooro kuunano proofet imo'nodupudorogano. Toro tooro yiuwi'nokai kwako akavuro go'no go'nodo tomuu aro modomollodupudorogano. “Oo Gooti toolluro Kuullo toolluro yogalo anekullaboka tokwe amokamwakuuwono.” Modomollodupudorogano. Toro modomollodupudo tovino tov yiuwi'nokai su tooraino kevu kuudo nuubwemwalpiyo. Toro kuvi kuruv proofet modomollokwe su tooravuro kuullo kuuluumwalodupudo tooro kuunano'mdukono oo Gooti toolluda'aiyo'mdukoneyokwe tovino gallainyubwollo'mo tov kevu yamju neya duuwiyoganogaulo.

Adodolukuu'nosungiko 2:2

Gumoro yiuwi'nokai pasudo yodumdo tonyuno kuudo me'no youroguma'dumdonyugono. Guu gumoro womdo guureji yodumdo tovi yere miyuu'dapiyodumdekono. Aki Gooti toolluno guureji to'no gudupola'dumdo su tovi nuu me'no gwonodumdonyugono. Aki guu a'mwo kirovanyuvanyokwe toorai wonyapino to'no miyodumdekugono. Toro tooku a'mwo kuunanokwe pworo, Oo nevu Krais toolluro kuurotokweyonogano, youkuu'naikudodopure su toorai guu pi'mwono kinodokwopiyoma'dumdekugono. Su toro kinodokwopiyoma'dumdo tovida'ai kuu'maiyo toru'no aro dodowiyoku'bworosodumdekugono. “Oo a'mwo akaro kuunanorodeyo,” dodowiyoku'bworosodumdekugono.

Adodolukuu'nosungiko 2:25

Toro kuvi kuruv kemi yiuno aro to'no daikullumo'monyugono. Nuu yere mabai'mo'mdo'mure toga kevu mino kuudo nubweyodupudo su tovi guureji to'no neya dogudupolarogaulo.

Adodolukuu'nosungiko 3:11

Nuu wobo toga noolamonyugono. Toro te kevu kuuguudo sugudo me'no kuu'nopo tovi guureji neya dogudupolarogaulo. Toro kuvi kuruv kevu guureji magudupolapi to'gwowi kemoro mubiyo sugudo tov a'mwo abolo pun nyupolekumapinogano. Toro te kemi nyupolekumapiyokwe tov kevu kuuguudo sugudo tovi guureji neya dogudupolarogaulo.

Adodolukuu'nosungiko 3:3

Kevu muudu'nodo toga kuuguudo sugudo tovi wuu'no'mno kuudo me'no kuubweyopogaikikono. Kuuguudo sugudo me'no kuubweyajupo su tovino aga aki aiko te kuudo neya jaurogaulo. Aki toro tovi guureji neya gudupolaropi miyomno aki aiko te neya jodu'mwonyugobilo. Kevu su toro tomgu'aro madukapi to'gwowi nuu kemi kirekumwallo'moneyokwe yere nobwolekuru'ma'monyugono. Su tov a'mwo kuuko pwol kevu kuudo miyau'dopure toga bowo'ji galekumwora'dowodo to'busuko kubalno nuu kemi nobwolekuru'ma'monyugono.