Aki toro tool a'mwo abolo tonyu kooti yogalo idopto'nodo tokwe yere maduuwiyodowo'jure toga a'mwo abolo tonyu aro to'busuko igolmwalonekono. Su tool a'mwo abolo bevrapto to'busuko wollainyo imo'nodupudo tobuurai kavo uubemwojumwalonekono. Aki a'mwo abolo pun gworeko nebuulopiyo'mo to'busuko imo'nodopure tobuurai ilaiyo to'no igolmwalonekono. Toro igolowo'ji aiyowo'mo toga gamoro kooti yogalo idopto'nodo tov yiuwi'nokai noonyumwonyu tonyu nuuwolowonokwono.
1 Tesaloonaika 5:14 - Gooti Toolluro Yogalokwono14 Nemiyobuuravoo, aro daikullano'monogano. Kevu a'mwo abolo burawo yodupudo tonyu duudapi yogalo neya duuwiyogaulo. Aki a'mwo abolo il'nyuno yodupudo tonyu jurogudo neya doduuwimwojogaulo. Aki a'mwo abolo jurogudo mimo'nodupudo kunyu kuruv duuwiyo'mwojogaulo. Toro te kevu yiuwi'nokai a'mwo abolo tonyuno biyolo nodou'mwonyopimwalpiyo. အခန်းကိုကြည့်ပါ။ |
1 Tesaloonaika 5:14
40 ပူးပေါင်းရင်းမြစ်များ
Toro kuvi kuruv guvu mino kuudo nubweyodumdo tooku nobwolorabiyokweyo'mo Gooti tool gumi gujo'mwojono'moneyokwe tovino nuvu subusu'nyogalo me'no wuudodumdonyugono. Toro te nuu aro anyunadopiyo. Guu abwolorabi tov miyomno yere neya jouragunyumo'nono. Toro souragunyumo'nubi toga gumoro jugwai'yago toorobusuko gujumo'nodupudo pworo abwolorapi kuruv miyomno aikomgu yere neya youragunyumo'nupinorogano. Toro tekwojai jurogudo nokwo duuwimwojumwalbinekugono.” Kuudokaikono.
Toro yomjomwekovlavopi moro sumdomguda'ai kumdato bwotonyo jono duudapi kuuguudo adaikullajo tonyuno kuudo nyallulo'gwonmwalpiyo. Nuu duudapi kuuguudo adaikullajo toga yiuwi'nokai iruko togake'aro surakuuto togake'aro toga yodekubwasuno yodekubwasuno sumoneyokwe kworomo pullapullu anuwolo'nokanyugono.
Moro su toro sajo tovi kevu me'no kwonyajuporekikono. Toro te kev kworekul kuruv moro sajo to'busuko kubalno womdo guureji yopi a'mwo abolo wollainyo tobuurai neya duuwiyo'mwojogaulo. Su toro tovino nuu me'no aikuduuwallajonyugono. Aki nemi Aguto Jisasolluro yogalo puruv adoka tovino kuudo nyallulo'gwonmwalpiyo. Jisasol gavnokwe tool aro adokaikono. “Guu a'mwo pwollu burowo'nyodeyo ton yasuwa'no kwibi tov gumi poowokalago tovi ilaiyo bwotonyo ibwosunbinekugono. Toro tovino tov kevu aro kuudo nyaupiyo. Oo a'mwo pworavuro yasuwa'no anekullabupi tonyu amara'ji toga ilaiyo bwotonyo ibwosunanonogano. Awiyo, su toro aikullabupi toga ilaiyo pwekwono to'no ibwosunpinogaikikono. Toro kugaikul kuruv kemoro burowo'nyodeyo ton a'mwo pworai yasuwa'no kwipi toga'no'gwowi ilaiyo bwotonyo kuunodo ibwosunpinogaikikono.” Adokaikono.” Poolol wagwolago Efesosda'ai a'mwono moduvomwallokwe toorai toro kuudokaikono.
Miyobuuravoo, Gooti tool nemino kalo mamwonyodowodo tovino tov nuu kemi aro ikujo'mo anyunadopiyo. A'mwo abolo pun sipsiporodeyo tooravuro kulako togai Gooti toollu kwiroudapiyajupo to'busuko kubalno kevnokwe togaikul kemi kulako ton Gooti toollu duuwiyogaulo. Sipsiporodeyo kwiyajupo su toorai sumdomgu me'no romiyodupu abolpi toga kemoro kulako ton Gooti toollu kwiroudapiyajupogano. Toro kuvi kuruv kevno'gwowi yere mabolopi aiyo kuuno mwalodopure toga kemoro kulako ton Gooti toollu yere neya duuwiyogaulo. Kemi poowokalago kuunodo togai Gooti toollu ilomoropiyo'moneyokwe su toro tomgu'aro kwipi tov Gooti toollu ilaiyo igolpinogaikikono.
Jisasolluro a'mwo abolo pun kwolluno kuudo me'no kuubweyopogano. Toro kun kuruv kemoro kuudo uubweyodupudo su tov jurogudo mimo'nodupudogano. Su toro tonyu kevu neya wiyo'mwojopi kevuge mwallo'moneyokwe ilaiyo neya domollomarogaulo. Yopi a'mwo abolo jurogudo mimo'nodupudo su tobuuravuro kaiya'no kuudo yau'dupudo tooraino kevu yogalo miyoullajunpinono.
Kevu moro kwoloraiyo tobuurekulbusuko me'no nyumo'nodupudo togaikulluno kalo buuropino ikullunodumdonyugono. Toro togaikullu mollaikudo'meyo'moneyokwe nuvu puukwollo akav sakwollumwakono. Toro te kevu moro puukwollo akavino aro kuudo nyaupiyo. Oo nemi wogulo donekwo'gallo'moneyokweyokwono. Kuudo nyaupiyo.
Toro kuvi kuruv Jisasolluro a'mwo abolo puno'gwowi kuudo su toro tovino po'dogalo miyouroma'dupudogano. Toro ton Jisasolluno kuudo me'no kuubweyopo kun kuruv kemi sumdomguda'ai kuunano gooti tooraino kuudo pun kuuno gudupola'dupudogano. Toro tovino tov aga kuga kuruv, Kuunodorodeyo, kuuno yau'dupudogano. A'mwo abolo su ton kuunano gooti pworai ilomoropiyo'moneyokwe sa'aiyo me'no kwiroudapingiko su tonyu anpi toga aro kuudo molla'mopto yaullokweyogano. Aiyoo, nevu kuunano gooti pworai me'no kwingiko tov anmawo tovino tov Gooti tool ilaiyo mwinadopiyo. Su toro kuudo yau'dupudo ton ilaiyo mibwosunodupudogano.
Toro kuvi kuruv a'mwo pwol Gooti toolluro Kuullo toollu kuumjungovlawo'ji toolluro sulo ki'nono tono'gwowi arogano. A'mwo abolo tonyuno kalo buuropino winyo'mo pasudo tokwe'aro poowokalago kuunodo tovida'ai ilaiyo yo'mo pasudo tokwe'aro sumwoluko kavo wosunyo'mo pasudo tokwe'aro jul'nyo bwi'mo'mdowo'jure kuga kuruv muugollu'meyo'mo pasudo tokwe'aro a'mwo abolo tonyuno ilaiyo mollo'mo pasudo tokwe'aro yanyago wimo'nyo'mo pasudo tokwe'aro sugupasudo tovi gudupolallo'mo pasudo tokwe'aro
Kevnokwe togaikul bwolomoropinapi Jisasolluro a'mwo abolo punyu kwako tomuu'aro neya duuwiyogaulo. Aki toro tonyu kavo duubemwojogaulo. Toro togaikullu a'mwo abolo pun kaiyako saikullugolpi tov kevu sumwoluko su'mno yere nyumo'numwalpiyo. Toro kugaikul kuruv kalo buuropino ikullunodowodo tovino tov a'mwo abolo kaiyako saikullugolpi tonyu ilaiyo to'no domollomarogaulo.
Toro kugaikul kuruv Jisasolluro a'mwo abolo pubuurai yiuno ilaiyo to'no igolopi kemoro poowokalago ton neya duuwiyogaulo. Aki kevnokwe togaikulluda'ai pun kemi kaiyako saikullugolpi tov kemoro ma'no ma'nodo tonyuno kuudo neya jallulo'gwonogaulo. Gooti tool Krais toollu'aro kemoro ma'no ma'nodo tonyu maikudukwopiyo'no aki aiko te kuudo miyou'movla'mdowodekono. Su toro to'busuko kubalno kev kugaikul kuruv kaiyako saikullugolpi tobuuravuro ma'no ma'nodo tonyuno kuudo nyau'mwalpiyo.
Toro tovino tov nevu Krais su toolluno kuuguudo tokwe moruudomollodowadonogano. Yiuwi'nokai a'mwo abolo tonyu duudapi kuuguudo togai wuudodowa aki yiuwi'nokai pi'mwo kuudo wo'dupudo togai yodubwosomollodowadonogano. Nemoro su toro yodubwosomollodowado tov aro tovinokwono. Yiuwi'nokai a'mwo abolo ton Krais toollu neya uuguro'mwonyogapuro. Aki toro ton Gooti toolluro sumdo tovi aguto me'no agullungopo tonbusuko neya wimo'nogapureyokwe tovinokwono.
Toro kuvi kuruv a'mwo su tekwojuno aro kuudo nyaupiyo. Oo nemi ikomago anekullumo'nadopiyo. Kuudo nyaupiyo. A'mwo su tool Jisasolluro a'mwo abolo pubuurobusuko kemi avalo me'no ikullumo'nodowodekono. Toro tekwoji kevu duudapi yogalo aro neya duuwiyogaulo. “Oo guu wako neya dou'nogawono.” Duudogaulo.
Toro kuvi kuruv Timootiyoloo guvno'gwowi Gooti toolluro a'mwo pwekugono. Toro tookujuno tov yiuwi'nokai ma'no ma'no pasudo su tooraida'ai manyu tomuuno lukado neya dovlavogawono. Aki sugupasudo togai'aro Gooti toolluro ilaiyo winodowodo togai'aro tonyu neya duumjunogawono. Aki Gooti toolluno kuudo uubwemovlavo'bi a'mwo abolo punyuno kalo buuropino neya domollogawono. Aki jul'nyo bagi'mo'mdopure kuga kuruv womdo tovi mimwogapiyo'bi guureji neya domomjumovlavogawono. Aki yiuwi'nokai a'mwo abolo tonyu kavo neya duubemwojogawono.
Guu Gooti toolluro yogalo tokwe modomollo'moneyokwe neya jovraimonyogawono. A'mwo abolo ton Gooti toolluro yogalo su tovi kaduko wiyo'mo kwinpiyoga'deyo oo kaduko wiyo'mo mwinpiyoga'deyo kuga kuruv yiuwi'nokai toga guu Gooti toolluro yogalo tokwe modomollo'moneyokwe neya jovraimonyogawono. Aki toro tooku kavo to'no mwalo'bi Gooti toolluro yogalo su tokwe neya jodubwasogawono. Toro yodubwasodo'bure tovi'aro a'mwo abolo tobuurai mollado'movo'bi aki yogalo mojurugolo'bi aki jurogudo duuwimwojo'bi tono tono imwalbinekugono. Aki toro tobuurai Krais toolluro yogalo tokwe yodubwasodumdo tovi miyuu'dapimwalbinekugono. Toro kweku kuruv yiuwi'nokai toga neya jodubwosumovlavogawono.
Neya duu'nono. Guu Jisasolluro a'mwo abolo tonyuda'ai a'mwono moduvomwallokwe toorai neya molludapimwalbino tov aro tovinokwono. Aku'momdo Kritda'ai Jisasolluro a'mwo bwotonyago tooro nuumjungovlaiyo'moneyokwe kuuguudo tonyu kisuvolo to'no yokwerogano. A'mwo su tooro yogalo kavlo nonagutokwe toorogai'aro kuunano yogalo toorogai'aro su toorogai youkuu'nuujo'moneyokwe modomollodupudorogano. A'mwo su tooraida'ai bwotonyago tooro Juuworogano. Toro tooro a'mwo gabovo toorai aro wuudodupudorogano. “Kevu nevu Juu toonolbusuko kemi lakulkulako ton neya dodo'nogaulo.” Modomollodupudorogano.
Toro te a'mwono moduvomwallo'moneyokwe imo'nyo'mo toorai aro neya jenyubworomarogawono. Guu Jisasolluro a'mwo toorai wonomollo'bi a'mwo pwol, “Oo pasudo akanyu me'no molludo'movla'mdowodoldeyo,” adubi toollu nokwo molludapibinekugono. A'mwo nomolludapibino su tool Jisasolluro a'mwo abolo tonyuro sumdo tovi kaiya'no puru'monodo kuruv miyodowodekono. Aki toro tool abolo yiuno puru'monodokwekono. A'mwo su toolluro kwoloraiyo ton Jisasolluno kuudo neya uubweyodupudogano. Aki kwoloraiyo su tonyuno a'mwo abolo pun aro neya dodupudogano. “Oo a'mwo su toolluro kwoloraiyo ton kaiya'no mairoungovla'mdupu aki kemi kuunum kwolabolo tovallu kisuvolo mwiyodupudogano.” Su toro dodupudo tooraino to'no jenyubworomarogawono.
Aki kevu Jisasolluro a'mwo abolo wuulo killo'mo ago tovi kuule'na'dupudo tobuuraino kuudo nyallulo'gwonmwalpiyo. Kevnokwe togaikul wuulo killo'mo ago tovi aule'naropujuko togaikulbusuko a'mwo abolo kuule'na'dupudo su tobuuraino kuudo nyallulo'gwonmwalpiyo. Aki kevnokweyogaikulluro kulako tonyu danyu'nyuwuulo subwosunopujuko to'busuko a'mwo abolo danyu'nyuwuulo ibwosunodupudo su tobuuraino kuudo nyallulo'gwonmwalpiyo.
ကြော်ငြာတွေ