1 Pita 4:11 - Gooti Toolluro Yogalokwono

¹¹ Toro te kemida'ai a'mwo pwol moruudomollo'moneyokwe yasuwa'wino su tovi amaro'ji tov a'mwo su tool Gooti toolluro mago tovida'ai mollodavowo'ji gamoro mago tokwe neya moruudomollumwalonekono. Aki kemida'ai a'mwo pwol a'mwo abolo pubuurai womdo wiyo'moneyokwe yasuwa'wino su tovi amaro'ji tov a'mwo su tool Gooti toolluro jurogudo uubweyodowo'jure tokwe a'mwo abolo pubuurai womdo guureji neya wimwalonekono. Su tov aro tovinokwono. Kemoro yiuwi'nokai judo'no judo'no womdo amjumovlapi su ton Jisas Kraisollu'aro Gooti toolluno yovo tovi kuvinono ilomoropiyapinogaikikono. Jisas Kraisol Gooti toolluro bako bwotonyo pwopiyodowodo tovi anakuuto tomuu mwalodowo aki yiuwi'nokai tonyu mido mollomwalodowodekono. Toro toolluno nevu yiuwi'nokai toga yiunokuudo neya ilomoropimwolowanekono. Nebalokwono.

1 Pita 4:11 ပူးပေါင်းရင်းမြစ်များ

Matyuu 6:13

Aki yamju pun nemi nonekulloganpiyokwe tomuuno guu nomollubworonekumokavla'mwalbiyo. Toro kweku kuruv nevu kirovanyuvanyu pasudo toorai nomjumovlawa'jokwe guu manyu tomuuno neya domollurolovonekumokavlavogawono.” Kevu subusu'nyogalo su toro neya dumwalpinogaikikono.

Joon 13:31

Juudasol me'no bolokwino sumaiyokwe toga Jisasol gami uumjunyokwe toorai aro kuudokaikono. “Nuu A'mwo Kwolaiyo Kuunodo toonyu yovo aguto mallo'moneyokwe tov aga toga me'no abai'mopso. Aki numi'aro Gooti kwol kuruv yovo aguto nomaronekono.

Kuurotokwe 7:38

Aki nemi nellukweyago tooro kwako a'mwomaiyo kuu'maiyo toru i'bwo'nomwalodopure toga Moosesol muumuudo Sainai toollu ilno sumaiyokwe ensel pwollu wuuru'maro'no gamoro kuuguudo tov amarokaikono. Kuuguudo su tov yiunokuudo mujo'movlaiyo'mokwono. Toro tokwe mokwolabino sumaiyokwe nemi nellukweyago toorai abwolomoruudokaikono. Aki kuuguudo su tov nemi anekullabokaikono.

Room 11:36

Kuudo neya jaullulo. Gooti su tool muudu'nodo toga yiuwi'nokai noonyumwonyu tonyu yokwolloso'no gavnokwe tool mollomwalodowodogano. Toro sokwollosoka toolluno tov yovo aguto neya ma'mwalono'moneyokwekono. Toro te ne kunol kuruv gamino yovo tov yiunokuudo neya ilomoropimwolowanekono. Nebal'nodokwono.

Room 12:3

Gooti tool gamoro yasuwa'wino sugumaluko tov me'no anubweyokanyugono. Toro tovino tov kevu yiuwi'nokai togaikullu aro ikudumo'monyugono. Kevu ilomoropunyu yapi noonyumwonyu womdo ku'nono mipino tonyuno aro kuudo nyaupiyo. Oo nevu yowa'no yanonogano. Toro kuvi kuruv pwolno puru'monodo togaikul aro kuudo neya jaurogaulo. Oo Gooti tool gamoro womdo tovi momjumovlaiyo'moneyokwe yasuwa'wino sugumaluko tollovo nubweyodowodonyugono. Toro nubweyodowodo tollovai'aro to'no uumjuno'mi gamoro womdo momjumovla'mwalmonyugono. Gooti tool gamoro womdo judo'no judo'nodo tonyu imwalano'moneyokwe tonollu aval'nodo toru'aro manekullabodowodekono.

Room 16:27

Gooti pwolnodo su tool yiuwi'nokai pi'mwo kuudo ton kurukwekono. Toro tool Jisas Kraisolluro nekullo'mwojo'moneyokwe womdo sopiyoka tovi'aro yovo aguto mallokwekono. Toro toolluno nevu yiuwi'nokai tonol yiunokuudo neya ilomoropimwolowanekono. Su tov nebal'nodokwono.

Room 3:2

Tade, aro tomgu'aro nonekullo'mwojodowodokwono. Nevu Juu toonollu Gooti toolluro sugudo go'no go'nodo pun nekullabodowodonogano. Muudu'nodo tov arokwono. Gooti tool gamoro kuuguudo tovi mollomwallo'moneyokwe nevu Juu toonollu anekullabokaikono.

1 Koorin 10:31

Toro te kevu wosamujuko ton anpiyoga'deyo oo wonyo ton anpiyoga'deyo oo buro'nyo buro'nyo womdodeyo ton supiyoga'deyo yiuwi'nokai su ton Gooti tool yovo aguto mallo'moneyokwe to'no neya jogaulo.

1 Koorin 12:4

Gooti toolluro Kuullo tool Jisasolluro a'mwo abolo tonyu yasuwa'wino judo'no judo'nodo tollovo me'no wiyodowodekono. Yasuwa'wino wiyodowodo su tollovo judo'no judo'nodollovogano. Toro kuvi kuruv Kuullo avalo toolluro wiyodowodogano.

1 Koorin 3:10

Gooti tool gamoro yasuwa'wino sugumaluko anyaboka tovida'ai nuvu a'mwo sulago pi'mwono mojokwe pwolbusuko sumo'nonyugono. Toro toonyu sulo pwol kwako tomuu aluvogiloudapiyonyugono. Aki moro sulo aluvogiloudapiyo su toollu muunyu toru a'mwo pworo amodumelabadokwovo. Yiuwi'nokai a'mwo pwolno pwolno ago mojokwe su tooro moro sulo aluvogiloudapiyo su toollu muunyu toru po'dogalo modumelabiyo'moneyokwe wako neya kuu'numwalpinorogano.

1 Koorin 6:20

Su tov aro tovinokwono. Gooti tool kemi me'no abiyekumarokaikono. Toro tovino tov kemoro kulako su ton Gooti toollurogano. Aki yiuwi'nokai toga Gooti tool kemoro kulako tovi'aro yovo aguto neya amarogawoneyokwe kevu sugudo to'no domjumovlavogaulo.

2 Koorin 2:17

Aki neya duu'nyulo. A'mwo ibwasokwe pworo Gooti toolluro yogalo tokwe nuugwiyo ki'noma'dupudorogano. Toro kuvi kuruv nevu ibwasokwe pwonolno'gwowi a'mwo su toorobusuko miyomjomwekovla'mdowadonogano. Gooti tool nemi amonekwopiyaboka tovino tov yiuno nebal'nodo tomgu'aro molludo'movla'mdowadonogano. Toro toonol Krais toolluro jurogudo tokwe to'no modomollodowadonogano. Toro modomollodowa'jure tovi Gooti tool nemi kuu'maiyo toru'no muugonanekwo'dowodekono.

2 Koorin 9:13

Kevu womdo su tovi toro sopipi tov kwako Juudiyada'ai a'mwo abolo ton kemi kamwoga yaikworopi aro kuudo yaupinogano. Oo Koorinda'ai a'mwo abolo su ton Krais toolluno kuuguudo sugudo tovi duumjunmwakovo. Toro ton nuugwiyo bwotonyo i'bworosodupu nevuge'aro yiuwi'nokai Jisasolluro a'mwo abolo pugai'aro tonollu donekullo'mwojumwakovoo. Su toro kuudo yaikuuropi Gooti toolluno yovo tov nyulomoropiyapinogano.

Efesos 1:19

Aki kevu Gooti toolluro jurogudo tovino kuudo you'movla'mwalpino'moneyokwe subusu'nyogalo wuudodumdonyugono. Gamoro jurogudo su tov maluko'maiyo. Bwotonyo kuunodokwono. Aki toro tov nevu yiuwi'nokai Krais toolluno kuudo uubweyodowado tonolluro poowokalago tovi womdo kuulanekullodowodokwono. Jurogudo bwotonyo su tokwe

Efesos 4:29

Aki kemoro mago tonyuda'ai kaiya'no yogalo jugollo'moneyokwe tooro nobolokuumwalpiyo. Toro kugaikul kuruv a'mwo abolo pubuurai jurogudo duuwimwojo'moneyokwe yogalo sugudo to'no neya dodogaulo. Toro dodopure tovi a'mwo abolo kadu'molo supi tobuuravuro sumdo tovi Gooti toolluro yasuwa'wino sugumaluko nekubweyodowodo tovino kuu'maiyo toru'no bomollolupto'nubweyonokwono.

Efesos 5:20

Aki yiuwi'nokai toga buro'nyo buro'nyodeyo kemi aikullumo'no'ji tonyuno nemi Aguto Jisas Kraisolluno yovo tovida'ai nemi Nellunumiyago Gooti toollu, “Nenoloo,” neya duudogaulo.

Efesos 6:10

Aga nuu moro kuuguudo akavuro aiyowo'mo toru bai'mo'mdum kemi aro ikudumo'monyugono. Kevu Aguto tooke me'no guro'mwonyodupudogaikikono. Toro togaikul gavnokweyolluro jurogudo daikullumwojodowo'jure tokwe kevu jurogudo imo'nopi guureji nokwo mujodo'movla'mwalpinogaikikono.

Filipai 1:11

Aki ikulsulo ki'nodupudo to'busuko kubalno pasudo idopto'nodo pun yiuno Jisas Kraisollu'aro bodupudogano. Pasudo idopto'nodo su togai yomjomwekovlaiyo'moneyokwe kuudo tov kemoro poowokalago tovi neya aullo'movaikwopiyono. Kevu su toro tomgu'aro yomjomwekovla'mdopure togaikullu a'mwo abolo ton aikwonpi tov Gooti toollu yovo aguto wiyopi aki nyulomodomoropimwolapinogano.

Filipai 2:11

Aki yiuwi'nokai su ton kuu'maiyo toru'no aro neya dodowiyoku'bworosunpinogano. “Oo Jisas Kraisol Agutekono.” Toro dodowiyoku'bworosunodopure tovida'ai gami Ganumiyago Gooti tool yovo aguto ma'mwalonekono.

Kooloosi 4:6

Yovekurajo akavi duu'nyulo. Soore tov wosamujuko tonyu wuullo molludo'mdowodokwono. Su toro to'busuko kubalno yiuwi'nokai toga kemoro yogalo wuudodopure tovi'aro Gooti toolluro yasuwa'wino sugumaluko tonyuno kuu'maiyo toru'no neya bomollolupto'nubweyogaulo. Aki kemoro yogalo wuudodopure su tovino a'mwo abolo pun yamuugojo nekudoganpinogano. Toro aikudoganpi tovino'mo kevu sumdomgu neya jovrowosunogaulo. Toro togaikul yiuwi'nokai a'mwo abolo pwolno puru'monodo tonyu kemoro yamuugojo tonyuno pi'mwono nokwo wuudumwalpinogaikikono.

1 Tesaloonaika 2:4

Toro kuvi kuruv Gooti tool gamoro kuuguudo sugudo su tokwe moruudomollo'moneyokwe nemi me'no senyubworonekumarokanogano. Toro yenyubworonekuma'no sumaiyokwe gamoro kuuguudo sugudo su tov anekubweyokanogano. Toro te nevu kuuguudo sugudo su tokwe a'mwo abolo punyu ilaiyo igollo'moneyokwe to'no moruudomollodowadonolmaiyo. Toro kwonol kuruv nemi poowokalago tonyu kamwoga yanekwo'dowodo Gooti su toolluno'gwowi ilaiyo igollo'moneyokwe moruudomollodowadonogano.

1 Timooti 1:17

Toro tool Aguto Kig yiunokuudo imo'nyo'moneyokwekono. Aki mabollo'moneyokwekono. Aki Gooti mwonodowado su tool yiuno pwolnodekono. Toro toolluno yiuwi'nokai toga yovo aguto wiyowa'ji yiunokuudo ilomoropimwolowanekono. Nebal'nodokwono.

1 Timooti 6:16

Aki Gooti yiuno pwolnodo su tool mabolonekono. Aki gamoro bako mwalodowodo tovi wobo toru kwako akavida'ai a'mwo pwolnodo kwol kuruv ku'nono maulai'mowonekono. Aki kwako akavida'ai a'mwo pwolnodo kwol kuruv Gooti su toollu mwonyajukekono. Aki lukomgu kuga kuruv kwako akavida'ai a'mwo pwol ku'nono mwonekono. Gooti su toolluno aro dodowadekono. “Oo yiuno Gooti pwolnodo su tool yovo aguto neya ma'mwalonekono. Aki toro toolluro mido mollomwallo tov yiunokuudo mujo'movla'mwalonokwono. Kuuguudo su tov nebal'nodokwono.” Dodowadekono.

Taitos 2:1

Toro yodupudo kuvi kuruv guu tookuno'gwowi yiuno kuuguudo idopto'nodo tovi kinamjo'bi a'mwo abolo tonyu neya jodubwasogawono.

Taitos 2:15

Toro te guu yiuwi'nokai kuuguudo me'no aikudumo akan a'mwo abolo tonyu neya jodubwasogawono. Aki kuuguudo akanyu a'mwo abolo ton po'dogalo uumjunmwalpino'moneyokwe jurogudo doduuwimwojumovlavogawono. Aki a'mwo abolo pun kuuguudo akanyu kisuvolo yodopure tonyu guu yogalo neya domojurugologawono. Guu womdo su toro tovi yo'moneyokwe Gooti tool me'no ajagubweyokaikugono. Toro tovino tov a'mwo abolo pun gumi maguu'nyubusuko yopi kaduko magujupi tov guu su toro tonyu wonyapino nyumwalbiyo.

Hibruu 13:7

Aki kevu Jisasolluro mollu'bwoto tovida'ai a'mwo mido amollekumwallajupo tooraino kuudo nyallulo'gwonmwalpiyo. A'mwo su tooro Gooti toolluro yogalo tovino sodekubwosumelabiyajuporogano. Aki toro tooro yere mabolodopure toga Gooti toollu kuudo uubweyodupudo tovi gudupola'no gudupola'no yodupu somjomwekelabiyajuporogano. Toro tooro kemi kuudo uubweyodupudo su tovi guureji agudupolallajupo tovino kevu kuudo neya you'movlavopi aval'no neya duumjunogaulo.

Hibruu 5:12

Su tov aro tovinokwono. Aga kevu a'mwo abolo punyu Gooti toolluro yogalo tokwe ibwasokwe me'no sumo'nopujukogaikikono. Toro kuvi kuruv kevnokwe togaikul Gooti toolluro kuuguudo tovida'ai kavlo muudu'nodo tobuuraino to'no aki aiko te wuu'nyo'mo tovino supto kuuno sumwakopogaikikono. Kevu aguto agullopujuko'mno'juki wosamujuko jurogudo tonyu nokwo anopujukogaikikono. Toro kuvi kuruv kevu kwolaiyo muudoga tobuurekulbusuko amuunallo tovino supto kuuno yodupudogaikikono.

Jems 1:19

Kevu moro kalo buuropino nyunodowodo tobuurekul kuudo neya jaurogaulo. Kevu yiuwi'nokai pwolno puru'monodo togaikul yogalo tovi wuu'nyo'moneyokwe kemoro kaduko ton yere neya duuwiyogaulo. Toro kuvi kuruv kemoro mago tovida'ai yogalo to'gwowi yere nodumwalpiyo. Aki kevu surodo'mo yere nyumo'numwalpiyo.

Jems 1:26

A'mwo pwol gavnokweyolluno, Oo nuu lootuu pi'mwono yodumdonyugono, kuudo yauronekono. Su toro kuudo yaurowo'ji kwol kuruv gavnokweyolluro mago tovi po'dogalo tomgu'aro mamolludo'movlawo'ji to'gwowi gami poowokalago tovi kuunano youkuu'najunonekono. A'mwo su toolluro lootuu pasudo tov yiuno yasuwa'no to'no yonekono.

1 Pita 2:12

Kevu a'mwo abolo Jisasolluno kuudo muubweyodopure tonyuro akuuto tomuu amwalpi toga yiuno sugupasudo tollovogai to'no jogaulo. Su tov aro tovinokwono. A'mwo abolo Jisasolluno kuudo muubweyodupudo ton kemi bwolomekumwogapiyo'mo winodopure toga kemoro sugupasudo su tollovai wonopi lukomgu Gooti tool kuu'maiyo abiyalo'no'ji toga gamino yovo tov nyulomoropiyapinogano.

1 Pita 2:5

Aki kevu Jisasolluro a'mwo abolo kugaikul kuruv sulo aiyokwe togaikulbusuko wimo'nodupudogaikikono. Kevu sulo togaikulbusuko wimo'nodupudo togaikike Gooti tool gamoro Kuullo tool kuulekumwallo'moneyokwe ago to'busuko modumelabodowodekono. Toro modumelabodowo'jure tovi'aro kevu Gooti gavnokwe toolluro ago to'busuko mujumo'nugelabodupudogaikikono. Aki kevu Gooti toolluro pris womdokwe togaikulbusuko wimo'nodupudogaikikono. Aki pris kwiroudapiyajupo to'busuko kubalno kevu Gooti toolluro Kuullo tool jurogudo ikubweyodowo'jure tokwe kemoro sugupasudo ton aval'no wiyodupudogaikikono. Kemoro pasudo wiyodupudo su tonyu Gooti tool Jisas Kraisolluro amomuugurovonekubweyoka tovi'aro ilaiyo mollomallokwekono.

1 Pita 4:10

Gooti tool kevu Jisasolluro a'mwo abolo pwolno puru'monodo togaikullu gamoro yasuwa'wino sugumaluko tov me'no aikullabokaikono. Toro ikullabino sumaiyokwe kevu Gooti toolluro womdo imwalpino'moneyokwe yasuwa'wino judo'no judo'nodo tonyuda'ai pun aikullabokaikono. Yasuwa'wino aikullaboka su ton Jisasolluro a'mwo abolo pubuurai womdo wimwalpino'moneyokweyogano. Toro te kevu yiuwi'nokai Jisasolluro a'mwo abolo togaikul imgu amgu womdo pi'mwono neya jungovlavogaulo.

1 Pita 4:16

Toro kuvi kuruv kevu Kristenovo dodupudo togaikulluda'ai a'mwo pwol Krais toolluno yovo tovida'ai tabunyuwuulo amaro'ji su toolno'gwowi wogulo nyubwosunmwalo'jo. Toro kwol kuruv Krais toolluno yovo tovida'ai tabunyuwuulo amaro'ji su tovino Gooti toolluno yovo tovi neya ilomoropimwolawonekono.

1 Pita 5:11

Gooti su tool yiuwi'nokai tonyu mido momjomwekovla'mdowodekono. Toro toolluno nevu yiuwi'nokai toga yiunokuudo neya ilomoropimwolowanekono. Nebalokwono.

Juut 1:25

Gooti pwolnodo su tool nemi Aguto Jisas Kraisolluro womdo sopiyoka tovi'aro ma'no ma'nodo tovuro kirumwallo tovida'ai me'no abomollurolovonekumokalokwokaikono. Toro toolluno yovo tovi neya ilomoropimwolowanekono. Gooti su tool Aguto kig kuunodo imo'nodowodekono. Toro tool jurogudo bwotonyokwekono. Aki toro tool yiuwi'nokai tonyu mido momjomwekovlaiyokwekono. Gooti su tool aiyoga sumdomgu me'no amwallajukekono. Aki aga kuga kuruv kuuno mujomwekovla'mdowodekono. Aki lukomgu kuga kuruv yiunokuudo tono mujomwekovla'mwalonekono. Nebal'nodokwono.