1 Pita 3:8 - Gooti Toolluro Yogalokwono

⁸ Aiyowo'mo yogalo pun ikudumo'mokwono. Kevu yiuwi'nokai tobuurekul avaikuudo to'no neya jou'movlavogaulo. Kemida'ai go'no go'nodo pubuuraino kalo neya ikullunowo'ji aki Jisasolluro a'mwo abolo kemi avalo ikullumo'nodupudo su tobuuraino kalo buuropino neya domollogaulo. Aki kemoro poowokalago ton iroto neya duubweyogaulo. Aki kevnokweyogaikulluro kuudo ton neya bwolomoropinogaulo.

1 Pita 3:8 ပူးပေါင်းရင်းမြစ်များ

Matyuu 18:33

Nuvu gumino kalo amagumwonyumwa'jonyugono. Toro amagumwonyumwa'jo toonyubusuko kubalno guu kweku kuruv guvuge avalo ki'nato womdokwe tekwoji aval'no kalo nokwo amamwonyo'bujukekugono. Kuudokaikono.

Luuk 10:33

Toro kuvi kuruv Samariyada'ai a'mwo pwolno'gwowi puuto su tovi'aro kwokado abokaikono. Toro tool bino sumaiyokwe a'mwo tekwo wo'duke toru abai'movokaikono. Toro bai'mo'mno sumaiyokwe a'mwo su tekwoji kwonoka toga kalo bwotonyo kwinokaikono.

Kuurotokwe 2:1

Toruda'ai iruko pullugwoji yiuwi'nokai Jisasolluro a'mwo abolo ton lubullu doto puruv yanyo'moneyokwe ago avalo puusi aullu'bwo'nopogano. Lubullu doto su tovino yovo tov Pentikoosovokwono.

Kuurotokwe 27:3

Toro toonol plaino sumawoneyokwe iruko aikomguda'ai tollugwoji wagwolago Saidoon toru ai'movowonogano. Toro ki'mo'mno sumawoneyokwe Poolol wagwolago su tovida'ai gavuge ibwoto'nyo toorai wuuru'mallo'mo kwinokaikono. Toro winoduke toollu mollurogudo Juuliyosol ilaiyo mollo'no muumjukurokaikono. Toro te Poolol wagwolago su tovida'ai gavuge ibwoto'nyo tooraiyomno uuwo'no kuuru'marokaikono. Toro wuuru'ma'duke toollu gami ibwoto'nyo tooro wosamujuko pugai'aro noonyumwonyu supto yoduke pugai'aro ton kwiyoporogano.

Kuurotokwe 28:7

To'no'gwowi soolwaravuro wolo ai'movowo woboruda'ai kwako wo'dowodo tov a'mwo pwollurokwono. A'mwo su toolluno yovo tov Puubliyasolekono. Toro tool aku'momdo su toruda'ai a'mwo abolo mwalodupudo tonyuro a'mwo aguto kuunodekono. Toro tool gamoro ago tomuuno anekumokwokanogano. Toro nekumokwino sumaiyokwe nemi yanekullubwotovo'no gamoro ago toru iruko pullapullu tobuullu ilaiyo to'no amollonekumwallajukekono.

Kuurotokwe 4:32

Yiuwi'nokai Jisasolluno kuudo uubweyodupudo ton kemoro poowokalago togai'aro kuudo togai'aro ton yiuno avalou'no kwosunyajupokwono. Toro ton aro ajajupogano. “Oo nemi buro'nyo buro'nyo kuto ivitodeyo ton yiuno nevnokwenollo'mo'maiyo.” Toro dodupu kevuge avalo pubuurai abuuwingoullajupogano.

Room 12:10

Aki kevu Krais toolluro a'mwo abolo avalo pubuuraino kemi poowokalago togai kalo buuropino neya duuwingovlavogaulo. Aki kevuge avalo tobuurai kwako tomuu'aro wiyopi ilaiyo to'no guureji neya domollomarogaulo.

Room 15:5

Aki kevu jurogudo da'mwalpino'moneyokwe Gooti tool kemoro poowokalago tonyu me'no daikumul'mwojodowodekono. Toro tool Krais Jisasolluro kuudo yau'dowodo to'busuko kuudo ton kemoro poowokalago tonyu nokwo ikubweyonekono. Su toro aikubweyo'ji tokwe kevu Jisasolluro tomgu'aro uumjunopi kemoro kuudo ton aval'no nokwo wosunmwalpinogaikikono.

1 Koorin 1:10

Miyobuuravoo, nemi Aguto Jisas Kraisolluro yovo tovida'ai kemi guureji aro aikudumono. Kevu gomno gomno nyeru'mdeyapinpiyokwe tovino yogalo miyoullajunpinono. Toro kuvi kuruv kevu yiuwi'nokai togaikul guureji neya guro'mwonyopi avaikuudo to'no neya jou'movlavogaulo. Aki kevu Gooti toolluro ilaiyo winodowo'jure tonyu aval'no neya duumjungovlavogaulo.

1 Koorin 12:26

Toro te nemoro kulako tovida'ai puruv danyu'nyuwuulo amaro'ji tov yiuwi'nokai kulako tovida'ai judo'no judo'nodo kun kuruv danyu'nyuwuulo aval'no ibwosungoulapinogano. Aki nemoro kulako tovida'ai puvi ilaiyo toru sulomorumwallupi tov yiuwi'nokai kulako tovida'ai judo'no judo'nodo kun kuruv ilaiyo aval'no ipinogano.

Efesos 4:2

Kevnokwe togaikul bwolomoropinapi Jisasolluro a'mwo abolo punyu kwako tomuu'aro neya duuwiyogaulo. Aki toro tonyu kavo duubemwojogaulo. Toro togaikullu a'mwo abolo pun kaiyako saikullugolpi tov kevu sumwoluko su'mno yere nyumo'numwalpiyo. Toro kugaikul kuruv kalo buuropino ikullunodowodo tovino tov a'mwo abolo kaiyako saikullugolpi tonyu ilaiyo to'no domollomarogaulo.

Efesos 4:31

Aki kemoro iru'kuudo toorogai'aro magu'nyo kuudo toorogai'aro surodo'mo kuudo toorogai'aro mebweyogalo toorogai'aro burolyogalo toorogai'aro yiuwi'nokai su toorai manyu tomuu neya dodukwopiyogaulo. Aki buro'nyo buro'nyo ma'no ma'no yo'moneyokwe kuudo kworo kuruv nyau'mwalpiyo.

Efesos 4:32

Toro kugaikul kuruv Jisasolluro a'mwo abolo pubuurai yiuno ilaiyo to'no igolopi kemoro poowokalago ton neya duuwiyogaulo. Aki kevnokwe togaikulluda'ai pun kemi kaiyako saikullugolpi tov kemoro ma'no ma'nodo tonyuno kuudo neya jallulo'gwonogaulo. Gooti tool Krais toollu'aro kemoro ma'no ma'nodo tonyu maikudukwopiyo'no aki aiko te kuudo miyou'movla'mdowodekono. Su toro to'busuko kubalno kev kugaikul kuruv kaiyako saikullugolpi tobuuravuro ma'no ma'nodo tonyuno kuudo nyau'mwalpiyo.

Filipai 2:3

Kevu yovo aguto mallo'mo'mdeyo oo ilomoropunyo'mo'mdeyo tovino womdo puru'monodo kuruv nyumwalpiyo. Toro kuvi kuruv kevu kwako tomuu'aro bwolomoropinapi a'mwo abolo pubuuraino aro kuudo neya jaurogaulo. Oo a'mwo abolo su tobuuro nemi nekuuwolo'mdupudogano.

Filipai 3:16

Neya duu'nyulo. Nevu Krais toolluro sugupasudo punyu me'no yomjomwekovla'mdowadonogano. Pasudo su tonyu guureji neya gudupola'mwalanonogano.

Kooloosi 3:12

Gooti tool gamoro a'mwo abolo kuunodo wimo'nyo'moneyokwe kemi me'no ajaikubweyokaikono. Toro togaikulluno kalo buuropino winyokwekono. Toro tovino tov kevu youro mollosodupudo to'busuko kubalno pasudo akanyu neya domollosogaulo. Kemi poowokalago tokwe a'mwo abolo tonyuno kalo mamwonyo'mo pasudo togai'aro a'mwo abolo tonyu ilaiyo to'no igollo'mo pasudo togai'aro bwolomoropinyo'mo pasudo togai'aro kavo molludo'movlaiyo'mo pasudo togai'aro jul'nyo baiki'mo'mdowo'jure kuga kuruv womdo mimwogapiyo'moneyokwe pasudo togai'aro pasudo su toro tonyu kevu neya domollosogaulo.

Hibruu 13:1

Kevu Jisasolluro a'mwo abolo tobuurekul kemi tellugwai'yago tello'mwo tonbusuko ikullumo'nodupudo Jisasolluro a'mwo abolo tobuuraino kalo buuropino imgu amgu me'no ikullunodowodo su tov kuuno domollogaulo.

Jems 2:13

Neya duu'nyulo. A'mwo pwol a'mwo gabovo pwekwojuno kalo mamamwonyo'ji tov Gooti kwol kuruv kooti yogalo aduuwiyo'ji toga a'mwo kalomaiyo su toolluno kalo mamamwonyonekono. Toro kuvi kuruv a'mwo pweku a'mwo abolo punyu kalo amamwonyubi su tookujuno'gwowi Gooti tool kooti yogalo adagujo'ji toga gumino kalo nomagumwonyonekono.

Jems 3:17

Toro kuvi kuruv a'mwo pwol muunyu kai'muuda'ai Gooti toolluro pi'mwo kuudo tollovai amaro'ji su toolno'gwowi pasudo aro tollovai molludo'movla'mwalonekono. Muudu'nodo tov a'mwo su tool ma'no ma'nodo tovi manyu tomuu'aro mwalmwalonekono. Aki sumwoluko kavo to'no wosunmwalonekono. Aki a'mwo gabovo tobuurai kavo uubemwojumwalonekono. Aki a'mwo pworavuro yogalo dodopure tonyu kaduko yere wimwalonekono. Aki a'mwo abolo punyuno kalo mamwonyomwalonekono. Aki toro tool iko pwol ikulsulo ki'nodowodo toolbusuko kubalno sugupasudo tollovai molludo'movla'mwalonekono. Aki yiuwi'nokai a'mwo abolo avalo punyuno kuu'dello muubweyowo'ji yiuwi'nokai tonyu yiuno aval'no igolmwalonekono. Aki toro tool yiuwi'nokai toga nebal'no pasudo to'no mujumovla'mwalonekono.

Jems 5:11

Neya duu'nyulo. A'mwo jul'nyo bwi'mo'mdopure kworo kuruv Gooti toollu guureji kuuno gudupola'dupudo tooraino nevu aro kuudo yau'dowadorogano. Oo ilaiyo tov uuwo'dowodorogano. Kuudo yau'dowadorogano. Toro tooraida'ai a'mwo pwolluno yovo tov Joopolekono. Kevu a'mwo su toolluno me'no wuu'nodupudogaikikono. A'mwo su tool jul'nyo ma'dowodo kuga kuruv Gooti toollu guureji kuuno agudupolallajukekono. Aki toro agudopolallajuko su toollu Aguto tool ilaiyo sugolokaikono. Aguto tool Joopollu ilaiyo sugoloka su tov aro tovino nekuduuwallodowodokwono. Aguto tool a'mwo abolo tonyuno kalo winodowodekono. Aki Aguto su tool kalo to'no mamwonyodowodekono.

1 Pita 1:22

Kevu Gooti toolluro nebal'no yogalo tovi kuumjunopo tovino tov kemi ma'no ma'no pasudo tooraida'ai me'no yal'mo'no'mno sugudo kwimo'nopogaikikono. Toro te kevu Jisasolluro a'mwo abolo tobuurekul kevuge avalo tellugwai'yago tello'mwo kuunodo tonbusuko ikullumo'nodupudo pubuuraino kalo buuropino mollodupudogaikikono. Toro te kemida'ai avalo su tobuuraino kemi poowokalago kuunodo tokwe kalo buuropino pasudo su tokwe imgu amgu guureji muunyu toru'aro neya domollogaulo.

1 Pita 2:17

Kevu yiuwi'nokai a'mwo abolo tonyu ilaiyo to'no jugologaulo. Kevu yiuwi'nokai Jisasolluro a'mwo abolo tobuuraino kalo buuropino domollogaulo. Kevu Gooti toolluno luko yopi kwako tomuu'aro duuwimovlavogaulo. Aki kemi kwako akavida'ai a'mwo aguto kig toolluno yovo kuruv neya julomodomoropiyogaulo.

1 Pita 5:5

Toro to'busuko kubalno kevu a'mwo muugunyunodo kworekul kuruv a'mwono moduvomwallokwe toorai kwako tomuu'aro neya duuwiyogaulo. Aki kevu yiuwi'nokai a'mwo pwolno pwolnodo toorekul kevnokwerekulluno bwolomoropinapi kemida'ai a'mwo go'no go'nodo toorai kwako tomuu'aro to'no neya duuwimovlavogaulo. Su toro tovino Gooti toolluro yogalo puruv aro sakwollungikokwono. “Gooti tool a'mwo ilomoropunyu yodapudo toorai molo wiyokwekono. Toro kuvi kuruv a'mwo bwolomoropinodapudo tooraino'gwowi gamoro yasuwa'wino sugumaluko tov wiyokwekono.” Su toro sakwollungikokwono.

2 Pita 1:7

Aki Gooti toolluro pasudo tonyu yomjomwekovla'mdupudo su tovi muunyu toru'aro kevu Jisasolluro a'mwo abolo tobuurai ibwoto'nyo neya jumo'nomollogaulo. Aki pasudo su tovi muunyu toru'aro kevu yiuwi'nokai a'mwo abolo tonyu kalo buuropino neya domollogaulo.

1 Joon 3:14

Nevu Jisasolluro a'mwo abolo nemi nellugwai'yago nello'mwovobusuko nekullumo'nodupudo tobuuraino kalo buuropino nekullunodowodonogano. Nemoro kalo buuropino nekullunyo'moneyokwe pasudo su tovi yainyunowa'ji aro kuudo neya yau'mwalanonogano. Oo nevu bolnodo tovi akuuto tomuuda'ai me'no kuugollu'movowonogano. Me'no wuugollu'mo'mno sumawoneyokwe aiyo yiunokuudo mujomwekovlaiyo'moneyokwe tovino'gwowi akuuto tomuu me'no kuulomwalodowadonoldeyo. Kuudo neya yau'mwalanonogano. Toro kuvi kuruv a'mwo pwol kalo buuropino winyo'moneyokwe pasudo su tokwe mamolludowo'ji toolno'gwowi bolnodo tovi akuuto tomuu kuuno kuulomwalodowodekono.