1 Pita 3:20 - Gooti Toolluro Yogalokwono

²⁰ Wuulo aule'nallajupo kuullo su tooro aiyoga Noowalluro togasuro a'mwo abolo amwallajupo tonyurogano. Aiyoga Noowal sip toollu mododuke toga Gooti tool a'mwo abolo su tonyu kemi ma'no ma'no pasudo tonyuno yere mairumwallajukekono. Toro te a'mwo abolo su ton Gooti toollu kisuvolo to'no kwiyajupogano. Toro kuvi kuruv yiuno 8-pela a'mwo abolo tobuurono'gwowi sip toollu aulomwalopogano. A'mwo abolo pwolno puru'monodo aulomwalopo su tobuurai wonyo tov nome'nyudapiyo'jokweyo'mo Gooti tool wonyo tovida'ai luvomato to'busuko amollurolowapiyokaikono.

1 Pita 3:20 ပူးပေါင်းရင်းမြစ်များ

Muuduko 6:13

Gooti tool toro yau'no sumaiyokwe Noowallu aro kuudokaikono. “Yiuwi'nokai a'mwo abolo kwako akavi mwalodupudo ton ma'no ma'no sopiyopogano. Toro ton magu'nyo bwotonyo amjumawakwovo. Toro tovino tov nuu kwako akavi aiyowomno kaiyako mollounapiyo'mi a'mwo abolo kugai'aro romiyebuuropimonyugono.” Kuudokaikono.

Muuduko 6:3

Toro mujumovla'mdopure toga Gooti Yawel sumdo wono'no adokaikono. “Moro Kuullo tool a'mwo toorogai yiunokuudo mamjomwekovla'mwalonekono. A'mwo su tooro kwako akavida'airogano. Toro tooravuro poowokalago ton lumdo kuulopiyodupudo tovino tov kemoro aiyo mujomwekovlaiyo'mo tov yiuno 120 kworomo to'no uubwemorogano.” Gooti Yawel toro adokaikono.

Muuduko 6:5

To'no'gwowi Gooti Yawel kwako akavi wonyuno sumaiyokwe yiuwi'nokai a'mwo abolo ton ma'no ma'no bwotonyo mujumawodopure tonyu kwonokaikono. Toro ton yiuwi'nokai toga kemoro poowokalago kuudo ton yiuno kirovanyuvanyu kuumwiyo to'no sumo'nyajupogano.

Muuduko 6:8

Gooti Yawel toro adoka kwol kuruv Noowalluno'gwowi wono'no ilaiyo to'no amollokaikono.

Muuduko 7:13

Buuruko tov toro avomaroka kuunodo tollugwoji Noowaike'aro gamoro abolo tokwe'aro gamoro muugunyo Semol Hamol Jafetol toorogai'aro kemoro abolo togai'aro ton sip toollu aulapogano.

Muuduko 8:1

Toro te Noowaike'aro yiuwi'nokai ibesa'aiyo allu kuulolo kuulludaiyorodeyo oo wiyorodeyo toorogai'aro tooro sip toollu aulomwalopo tooraino Gooti tool kuudo miyallulo'gwonokarogano. Toro tooro sip toollu kuuno kuulomwalodopure toga Gooti tool dolo bwotonyo puruv aiyowomno amoropiyabokaikono. Toro te dolo tov ino ino sumaiyokwe wonyo buugo tov aiyo'nugwolokakwono.

Muuduko 8:18

Toro te Noowal gami abolo tokwe'aro muugunyo toorogai'aro kemoro abolo togai'aro ton abolokwopogano.

Matyuu 7:14

Toro kuvi kuruv aiyo yiunokuudo mujomwekovlaiyo'moneyokwe tovi kuullo'mo noullo to'gwowi yiuno kula'nyo kuunodokwono. Aki a'mwo abolo yiuno pwekwono pwekwonodo tono aiyo yiunokuudo mujomwekovlaiyo'moneyokwe tovuro puuto tovi pla'mdupudogano. Puuto su tovi plaiyo'moneyokwe tov kavenodo'maiyo. Toro te aiyo yiunokuudo mujomwekovlaiyo'moneyokwe su tovi mallo'mo tov a'mwo abolo yiuno pwekwonodo tono yo'mgonoma'dupudokwono.”

Luuk 12:32

Aki Jisasol aro kuudokaikono. “Kevu sipsip mollu'bwoto kula'nyo tobuurekulbusuko imo'nodupudo togaikul luko mipinono. Su tov aro tovinokwono. Kemi Tellunumiyago aguto kig su toolluro ilaiyo winoduke tovida'ai gamoro mido mollomwalo tov kemi me'no aikullabokakwono.

Kuurotokwe 2:41

Pital toro moruudoduke tovida'ai a'mwo abolo pun wuu'nodupu, “Oo nebalo'mdeyo” kuudo yau'dopure ton wonyo kuuvollunopogano. Toro te a'mwo abolo iruko avalo su tollugwojuda'ai kuudo kuubweyopo ton 3,000 a'mwo abologano. Toro ton sumdomguda'ai Jisasolluro a'mwo abolo tonyu uuguro'mwonyo'mno yiuno puru'mono sumo'nopogano.

Room 9:22

Aki Gooti su tool yiuwi'nokai ma'no ma'no mujumovla'mdupudo toorai kirumwallo'moneyokwe tov gami uuwo'dowodokwono. Aki kuudo wuuteyo'moneyokwe kuruv avalo toollu kuuwoso. Toro toolluno tov yiuwi'nokai a'mwo abolo ma'no ma'no mujumovla'mdupudo tonyuno Gooti tool surodo wuunodowo nerumwallonekono. Gooti tool a'mwo abolo su tonyu yere nokwo kirumwallono kwol kuruv gamiyomno kuudo neya youragunyumo'nupureyokwe tovino sogwollo kingovla'mdowodekono. Gooti tool a'mwo abolo surodo wuunodowodo tonyu gamoro jurogudo tov su toro tomgu'aro kuu'maiyo toru'no wuuduuwallodowodekono.

Efesos 5:26

Aki gamoro mollu'bwoto tonol gamoro sumdo tovi sugudo wimo'nyo'moneyokwe abolokaikono. Toro te Krais tool gamoro yogalo tokwe nemi wonyo to'busuko amollol'movonekumarokaikono.

Hibruu 11:7

Aki aiyoga Noowal Gooti toolluno kuudo kuubweyajukekono. Noowal Gooti toolluro lukomgu nyumo'nupino tonyuno duudapi yogalo wiyoduke tonyu kaduko kwiyokaikono. Toro wino sumaiyokwe Gooti toollu dolago tomuu amwallajukekono. Toro tool gami julkwolaiyo togai'aro tonumdotai buuru'allako tovida'ai kaiyako nomapiyokwe sip pwollu amodokaikono. Noowalluro su toro soka tovino tov yiuwi'nokai kwako akavida'ai a'mwo abolo Gooti toollu kuudo muubweyodupudo tobuurai kuu'maiyo aro kuuduuwallokaikono. Kevu kemi kirumwallo tov nomapinogaikikono. Aki yiuwi'nokai a'mwo abolo Gooti toollu kuudo kuubwepi tono'gwowi gamoro sumdo tovi sugudo wimo'nupinogano. Su toro to'busuko kubalno Noowal kwol kuruv Gooti toollu kuudo kuubweyoka tovi'aro Gooti toolluro sumdo tovi sugudo kwimo'nokaikono.

1 Pita 1:22

Kevu Gooti toolluro nebal'no yogalo tovi kuumjunopo tovino tov kemi ma'no ma'no pasudo tooraida'ai me'no yal'mo'no'mno sugudo kwimo'nopogaikikono. Toro te kevu Jisasolluro a'mwo abolo tobuurekul kevuge avalo tellugwai'yago tello'mwo kuunodo tonbusuko ikullumo'nodupudo pubuuraino kalo buuropino mollodupudogaikikono. Toro te kemida'ai avalo su tobuuraino kemi poowokalago kuunodo tokwe kalo buuropino pasudo su tokwe imgu amgu guureji muunyu toru'aro neya domollogaulo.

1 Pita 1:9

Kevu Krais toolluno kuudo kuubwemwakopo su tovino tov Gooti tool ma'no ma'nodo tovuro kirumwallo tovida'ai yiunokuudo bomollurolovekumokalokwonekono.

1 Pita 2:25

Kevu sipsip tobuurobusuko imo'nodupudogaikikono. Sipsip su tooro kemi kuudo tovida'ai gomno gomno younopiyodupudo to'busuko kubalno kev kugaikul kuruv sumdomgu ma'no ma'no kuudo toorai airoungovlaiyajupogaikikono. Toro kuvi kuruv aga'no'gwowi kevu kemi Sipsip Duuwatokwe toolbusuko ikullumo'nodowodo toollomno aikomgu me'no buuru'ma'dupudogaikikono. Duuwatokwe su tool sipsip toorai yellukuromollomwalodowodo to'busuko kubalno kemoro kuullo tobuurai pi'mwono yellukuromollekumwalodowodekono.

1 Pita 3:19

Krais tool Kuullo imo'nyuno sumaiyokwe kuullo pworo wuulo killo'mo ago tovi kuule'na'dopure toorai gavnokweyolluro me'no kuuwolovoka tovino yagwoto amoruujogalokaikono.

1 Pita 4:19

Toro te Gooti toolluro ilaiyo winodowo'jure tovida'ai kev togaikulluro a'mwo abolo pun tagunyo amapi tov kemoro kwako akavida'ai aiyo mwallo'moneyokwe tov Gooti toolluro ato tovi neya uubweyogapuro. Neya duu'nyulo. Gooti tool a'mwo abolo su tonyu me'no sokwollosokagano. Toro sokwollosoka su tonyu pi'mwono mollomwalmwalonekono. Toro te a'mwo abolo su ton tagunyo amapi kuga kuruv sugupasudo kuuno neya amjumovlavogapuro.

2 Pita 2:5

Aki aiyogasuro a'mwo abolo kwako akavi amwallajupo tonyu Noowal aro amoruujajukekono. “Kevu Gooti toolluro ilaiyo winodowodo pasudo idopto'nodo tonyu neya duumjungovlavogaulo.” Toro moruudoduke kuvi kuruv a'mwo abolo kwako akavi amwallajupo su ton kisuvolo to'no kwiyajupogano. Toro te Gooti tool a'mwo abolo su tonyu wonyo allako tokwe airumwallokaikono. A'mwo abolo kwako akavi amwallajupo su ton Gooti toolluro kirumwallo su tovi mirukuruwolovopogano. Toro kuvi kuruv Noowaike'aro gami 7-pela a'mwo abolo togai'aro tonumdotono'gwowi Gooti tool amollovi'mwojomokavlavokaikono.

2 Pita 3:15

Aki aro kuudo neya jou'movlavogaulo. Aguto tool a'mwo abolo kwako akavi mwalodowado tonollu yere maironekumwalladopiko tovino kavlo tov arokwono. Aguto tool a'mwo abolo tobuurai ma'no ma'nodo tovuro kirumwallo tovida'ai bomollurolovomokalokwiyo'moneyokwe tovino sogwollo duuwinadopiyo. Toro tovino kuudo neya jou'movlavogaulo. Aguto toolluro pasudo su tovino nemi nellugwai'yago toolbusuko Poolol kwol kuruv kemi pas puruv me'no sokwollekwopiyabokaikono. Poolol nemoro kalo buuropino nekullunodowodekono. Toro tool Gooti toolluro pi'mwo kuudo wiyoduke tovi'aro to'no pas tov sokwollekwopiyabokaikono.