Toro kuvi kuruv a'mwo uumjunyokwe tool gami ibwasokwe toolbusuko aval'no sumo'no'ji tov mekono, uumjunyokwe su tool ilaiyo nokwo ibwosunonekono. Aki a'mwo ki'nato womdokwe tool gami a'mwo mido mollomwalokwe toolbusuko aval'no sumo'no'ji tov mekono, a'mwo ki'nato womdokwe su tool ilaiyo nokwo ibwosunonekono. Neya duu'nyulo. Nuu ago tovida'ai mido mollomwalokwe toonyubusuko imo'nodumdonyugono. Toro toonyuno a'mwo pworo kaiya'no yovo aro bwolomonumwogapiyodapudorogano. Oo Belsebuulolekono. Bwolomonumwogapiyodapudorogano. Toro to'busuko kubalno kevu moro ago tovi anakuuto tomuu me'no kuulomwalodupudo kugaikullu kuruv kemino kaiya'no yogalo pworogai aval'no bwolomekumwogapimwolapinorogano.”
1 Pita 2:12 - Gooti Toolluro Yogalokwono12 Kevu a'mwo abolo Jisasolluno kuudo muubweyodopure tonyuro akuuto tomuu amwalpi toga yiuno sugupasudo tollovogai to'no jogaulo. Su tov aro tovinokwono. A'mwo abolo Jisasolluno kuudo muubweyodupudo ton kemi bwolomekumwogapiyo'mo winodopure toga kemoro sugupasudo su tollovai wonopi lukomgu Gooti tool kuu'maiyo abiyalo'no'ji toga gamino yovo tov nyulomoropiyapinogano. အခန်းကိုကြည့်ပါ။ |
1 Pita 2:12
46 ပူးပေါင်းရင်းမြစ်များ
Toro to'busuko kubalno kevu sugupasudo tokwe kuu'maiyo toru'no neya domjumovlavogaulo. Toro supi togaikullu a'mwo abolo pun ikwonopi toga kemi Tellunumiyago muunyu kai'muuda'ai toolluno nokwo ilomoropiyapinogano. Kevu toro supi togaikul a'mwo abolo tonyu bako to'busuko wimo'nopi nokwo luvomokavla'mwalpinogaikikono.”
Aki kemoro wagwolago tovi yiunokuudo kirowo'dolapiyopi kemoro kwoloraiyo kubuurai kuruv wagwolago su tovuro kuurupto anakuuto tomuuda'ai mwalodupudo tobuurai noromiyebuuropipinorogano. Aki wagwolago su tovuro yiuwi'nokai sulo bwaku bwakuto amjomodumellungiko kunyu kuruv kirowo'dolapiyopi sulo yiuno pwolnodo kwol kuruv mworonokwono. Yiuwi'nokai tooro nerowo'dolapipinorogano. Su toro ikullumo'nono tov aro tovinokwono. Gooti tool kemi ikullo'mwojo'mo bekuru'ma'duke su toga'no kevu kuudo miworovomaropo tovinokwono.”
Aki kevu A'mwo Kwolaiyo Kuunodo toonyu numjunodupudo toorekulluno a'mwo pworo surodo nuunmwalpinorogano. Yopi kemi kwa'mgu tomuu nobilomaikudukwopipinorogano. Yopi kaiyako yaikullugolopi kemino yovo ton nobwolomekumwogapiyapinorogano. Kemi kaiyako su toro yaikullugolodopure toorekul ilaiyo nokwo jogaulo.
Toro amodapiyoka tovi Poolollu mokabo'mno kooti yogalo wuu'nyo'moneyokwe toru aulomolludapiyopekono. Toro kuulomolludapiyodopure toollu wagwolago Jeruusalemda'ai Juu kwolabopo tooro aiyowomno amomwodovomaroporogano. Toro momwodovoma'no sumaveyokwe Poololluno kuunano yogalo pun Festosollu soukuu'nuudoporogano. Toro tooro guureji aro aduuwiyoporogano. “A'mwo akal ma'no ma'no bwotonyago ton mujumovla'mdowodekono.” Aduuwiyoporogano. Toro aduuwiyopo tovino nebal'nodokwoneyo'mo pun ku'nono muuduuwalloporogano.
Toro kuvi kuruv gumoro puuto gabovo uumjunodumdo su tovino'gwowi yiuwi'nokai tomuuda'ai a'mwo abolo ton bwolomorumwogapiyo'moneyokwe kaiya'no yogalo bomjodumoulodapudogano. Toro bomjodumoulodopure tonyu nevu me'no wuu'nodowadonogano. Toro te aga nevu guvnokwekujuro kuudo sau'mwakudo tovi wuu'nyo'mo anekullunadopiyo.” Kuudoporogano.
Toro tonol iruko tollugwojuro bako tovi anakuuto tomuu yomjomwekovla'mdupudo tonbusuko kubalno ne kunol kuruv aval'no neya yomjomwekovlavogawano. Aro tomgu'aro yomjomwekovla'mwalanonogano. Nevu ma'no ma'no pasudo toorai mamjeroungovla'mwalanonogano. Aki imo'wonyo bwotonyago ana'ji tovida'ai amomo nyumwala'jo. Aki nevu kwonyalo pasudo toorogai'aro julpasudo toorogai'aro toorai mimwalanonogano. Aki a'mwo abolo pugai molo minmwalanonogano. Aki toro tonyuno kwekuullu kuudo miyau'mwalanonogano.
Aki Krais tool a'mwo abolo Juu miyawosunodupudo kunyu kuruv wiyo'mwojo'mo kwolabokaikono. A'mwo abolo Juu tooravuro miyawosunodupudo su ton Gooti toolluro kalo mamwonyodowo'jure tovi kwonpi toga Gooti toolluno nokwo ilomoropiyapinogano. Su toro tovino puukwollo puruv aro sakwollungikokwono. “Nuu a'mwo abolo Juu tooravuro miyawosunodupudo togai aulomwalmi toga guu Gooti tookujuno ilomogwopimwolamonyugono. Aki gumino yovo tovi ilomodomoropiyo'moneyokwe dato dumwalmonyugono.”
Kuurokado mokavlaiyo'moneyokwe yogalo su tov a'mwo toolluro yiulo kuudo yau'dowo'jure kunyu kuruv kuu'maiyo toru'no nobomollolupto'nosonokwono. Su toro bomollolupto'nosodowo'jure toga a'mwo su tool suduko inuguto'nowo'ji Gooti toolluno ilomodomoropiyawo'ji aro donekono. “Oo Gooti tool a'mwo abolo akanyu akuuto toru nebal'no domwallo.” Donekono.
Toruda'ai nevu aro tovino ilaiyo bwotonyo yodowadonogano. Nevu nemi poowokalago tovi me'no kuulanekwo'dupudo tonyu kuvinono uumjunyokwenogano. Aki kwako akavida'ai a'mwo abolo tonyuro sumdo tovi nemi me'no kuulanekwo'dupudo su tollovogai nevu pi'mwono molludo'movla'mdowadonogano. Aki nevu Gooti gavnokwe toolluro pasudo tonyu yiuno nebal'nodo tomgu'aro uumjunodowadonogano. Toro toonol a'mwo abolo togai'aro kev kugaikike'aro togaikullu yaikullugollo'moneyokwe tov kwako akavida'ai pi'mwo kuudo tovi muumjunodowadonogano. Toro kuvi kuruv nevu Gooti toolluro yasuwa'wino sugumaluko tovino'gwowi uumjunodowadonogano. Toro tovino tov yiuwi'nokai a'mwo abolo tonyu nevu ilaiyo to'no igolodowadonogano. Aki kemino'gwowi nemoro ilaiyo tov muunyu toru'aro guureji yaikullugolodowadonogano.
Toro te nevu Gooti toollu subusu'nyogalo aro wuudodowadonogano. “Oo Koorinda'ai a'mwo abolo su tobuuro ma'no ma'no pasudo nyumwalpiyokwe guu neya duuwiyo'mwojogawono.” Subusu'nyogalo su toro wuudodowado tov nevnokwenolluno aro wuuduuwallunyo'mo'maiyo. “Oo nevu Krais toolluro womdokwe kuunodo tovosonogano.” Su toro tovino wuuduuwallunyo'mo'maiyo. Toro kuvi kuruv kevu sugupasudo tovi neya imwalpino'moneyokwe tovino Gooti toollu subusu'nyogalo wuudodowadonogano. Toro te a'mwo pworo nemino aro kuudo sanekuupi tov, Oo su tooro Krais toolluro womdokwe kuunodoromaiyo. Su toro kuudo sanekuupi kuruv nemi aguto manekullumo'nonokwono. Kevu sugupasudo to'no mujumovla'mwalpino su to'gwowi nemi aguto nekullumo'nodowodokwono.
Su toro to'busuko kubalno ne kunol kuruv sumdomgu nevnokwenolluro kulako tovuro winoduke tomgu'aro kuumjungovlaiyajuwonogano. Su toro kuumjungovlaiyajuuwo toga nevnokwenolluro kulako tonyu ilaiyo igollunyo'mo pasudo togai'aro kaiya'no kuudo toorogai'aro toorai kuumjungovlaiyajuwonogano. Su toro toga Gooti toolluro surodo wuunodowodo tov nemi wobo toru kwollajukokwono. Gooti tool yiuwi'nokai kwako akavida'ai a'mwo abolo ma'no ma'nodokwe tonyuno surodo wuunodowodekono. Su toro to'busuko kubalno sumdomgu ne kunolluno kuruv Gooti tool surodo aval'no kuunyajukekono.
Sumdomgu kevu kuudo uumdo su toorai kuumjungovlaiyajupo toga kemi kaiyako bwotonyo sugolaikumeyajuporogano. Aki kemi kaiyako igolaikumeyo'moneyokwe youkuu'naikudodopure toorai uumjungovlaiyo'mo tov ilaiyo aikullunyajukogaikikono. Toro kuvi kuruv aga'no'gwowi kevu kuudo uumdo su toorai yiunokuudo neya duugollu'movogaulo.
Kevu aro neya jogaulo. Krais toolluro kuuguudo sugudo tovino wuuduuwallo'moneyokwe kemoro pasudo tov pi'mwono to'no neya domjumovlavogaulo. Kemoro pasudo toro amjumovlapi tov nuu nobaikwonmonyudukono oo mabaikwonmonyudukoneyokwe tovino kuudo miyau'mwakono. Toro kuvi kuruv kemino kuuguudo pun kuu'numi toga aro kuudo nokwo yaikuu'mwalmonyugono. Oo a'mwo abolo judo'no judo'nodo su ton jurogudo da'mdupudodeyo. Aki yiuwi'nokai su ton kuudo puru'mono to'no yau'dupudodeyo. Toro ton kuuguudo sugudo tokwe moruujo'moneyokwe avaiwomdo yodupu imgu amgu sobanyo molluulnoda'mdupudodeyo. Toro yodopure tovida'ai a'mwo abolo pun kuuguudo sugudo su tovino kuudo nokwo uubwepinogano. Toro tovino'mo womdo su tovi guureji yodupudodeyo.
Mi avalobuuravoo, nuu aiyowo'mo yogalo akav ikudumo'mokwono. Kevu noonyumwonyu nebal'no pasudo togai'aro pasudo punyuno ilaiyodeyo dodupudo togai'aro pasudo idopto'nodo togai'aro kaiya'no nonagutokwe pasudo togai'aro pasudo sugumaluko togai'aro ilaiyo jugollo'mo pasudo togai'aro yiuwi'nokai pasudo su tonyuno kuudo neya jou'movlavogaulo. Aki noonyumwonyu pasudo kuuroollumaluko togai'aro aki ilomodomoropiyo'mo pasudo togai'aro kunyuno kuruv kuudo neya jou'movlavogaulo. Yiuwi'nokai pasudo su tollovo kemoro kuudo tonyu neya aullo'movaikwopiyogapuro.
Kevu su toro tomgu'aro womdo ilaiyo somjumovlapi tov kevu noonyumwonyu punyuno supto miyopi a'mwo pworai miwosuna'mwalpinogaikikono. Kevu su toro somjomwekovlapi tovi a'mwo abolo Jisasolluro mollu'bwoto kwa'mguda'ai mwalodupudo pun ikwonopi kemino aro kuudo yaikuupinogano. Oo po'dogalo yomjomwekovla'mdupudodeyo. Kuudo yaikuupinogano.
Aki kevu a'mwo aguto kig toorogai'aro gavman a'mwo aguto toorogai'aro kworaino kuruv subusu'nyogalo neya duudogaulo. Kevu su toro kuudupi toga Gooti tool a'mwo aguto su toorai kuudo ilaiyo tov nokwo uubweyonekono. Toro kuubweyo'ji tokwe a'mwo aguto su tooro nemi mido ilaiyo nokwo mollonekumwalpinorogano. Su toro mollonekumwalodopure toga nevu ilaiyo to'no mwalowa'ji nemoro sumwoluko kun kuruv kavo wosunmwalanonogano. Aki nevu Gooti toollu dolago tomuu wiyowa'ji gamoro ilaiyo winodowo'jure tonyu kuvinono nokwo uumjungovla'mwalanonogano.
Guu muugunyo tookujuno biyolsumdo gujopi gumino aro kuudo nyau'mwalpiyo. Oo yiuno muugunyekono. Kuudo nyau'mwalpiyo. Toro kuvi kuruv gumoro somjomwekovla'bi tovi'aro Jisasolluro a'mwo abolo tonyu ilaiyo neya wuuduuwallunumwalbinekugono. Aki gumoro yogalo dodumdo tokwe'aro gumoro yomjomwekovla'mdumdo tokwe'aro gumoro kalo buuropino gujunodowodo tokwe'aro gumoro kuudo uubweyodumdo tokwe'aro guu kaiya'nodo tonyu manyu toru mwalodumdo tokwe'aro yiuwi'nokai su togai ilaiyo neya duuduuwallunogawono.
Aki abekanyo su tobuuro womdo sugudo aro tonyu neya yodupudodeyokwe kemino yovo tov nokwo yakwollupinokwono. Abekanyo su tobuuravuro pubuul gami kwoloraiyo tonyu yiuno ilaiyo to'no mollumwojumelabodowodobuukono. Aki a'mwo abolo pun gamoro ago tovi buuru'ma'dopure tonyu ilaiyo mollomarowo'ji po'dogalo mollomwalodowodobuukono. Toro tobuul Gooti toolluro a'mwo abolo abuuru'mapi su tonyu kwako tomuu'aro wiyowo'ji kemoro suvlo tonyu wonyo tokwe mollal'mo'mdowodokwono. Aki a'mwo abolo jul'nyokwe tonyu po'dogalo wiyo'mwojodowodokwono. Aki toro tobuul sugupasudo go'no go'nodo ton mujumovla'mdowodobuukono. Abekanyo womdo su toro mujumovla'mdupudodeyo adupi tobuuraino yovo tov kevu nokwo yakwollumwalpinogaikikono.
Gooti tool nemi anekullo'mwojoneyokwe tovino kevu subusu'nyogalo neya duudogaulo. Aki Gooti toolluro sumdo tovi nevu aro me'no yainyunodowadonogano. Oo nemi poowokalago tovi kuulanekwo'dupudo tonyu kuvinono uumjunodowadonoldeyo. Yainyunodowadonogano. Aki nevu yiuwi'nokai toga pasudo idopto'nodo tonyu mujumovlaiyo'mo nekullunodowodonogano.
Kevu nuugwiyo bwotonyo ki'nomallo'mo tovino nekullunumwalpiyo. Aki, Oo nuu noonyumwonyu kuto ivito pugai'aro neya ama'mo, kuudo nyau'mwalpiyo. Toro kuvi kuruv kemi kuto ivito me'no mwora'dupudo su tonyuno, Oo su ton nokwo'modeyo, kuudo to'no neya jaurogaulo. Su toro tovino Gooti tool aro adokaikono. “Nuu gumi magugollu'mo'monyugono. Aki gumi miyogwapimonyugono.” Adokaikono.
Kemida'ai pweku pi'mwo kuudo tokwe'aro kuudo sugudo tokwe'aro toval me'no youroma'dumdekugono. Toro tooku gumoro sugupasudo amjumovla'bi tovi'aro pi'mwo kuudo su tov a'mwo abolo punyu neya duuduuwallogawono. Aki pi'mwo kuudo su tovi uumjunodo'bure tovida'ai guu a'mwo abolo tonyu kavo to'no neya uubemwojumwalbinekugono. Yo'bi gumoro sugupasudo su tonyuno kuu'maiyo toru nokwo wuuduuwallumwalbinekugono.
Sugupasudo su tov kemoro poowokalago tovi me'no kuulaikwo'dowodokwono. Toro tovi kuvinono neya duumjunogaulo. Toro togaikul kavo bemwojopiyopi kevnokwe togaikul kwako tomuu'aro bwolomorumwogapinogaulo. Su toro tomgu'aro kemoro sogwollo kinodupudo tovino kavlo tov kuu'maiyo toru neya dodelukuulludapiyogaulo. Toro te kevu Krais toollu me'no uuguro'mwonyodupudo togaikulluro sugupasudo yomjomwekovla'mdopure su tovino a'mwo abolo pun nobwolomekumwogapiyapinogano. Toro abwolomekumwogapiyapi kuvi kuruv kevnokwe ton wogulo to'no yowo'gallunmwalpinogano.
Toro te kemida'ai a'mwo pwol moruudomollo'moneyokwe yasuwa'wino su tovi amaro'ji tov a'mwo su tool Gooti toolluro mago tovida'ai mollodavowo'ji gamoro mago tokwe neya moruudomollumwalonekono. Aki kemida'ai a'mwo pwol a'mwo abolo pubuurai womdo wiyo'moneyokwe yasuwa'wino su tovi amaro'ji tov a'mwo su tool Gooti toolluro jurogudo uubweyodowo'jure tokwe a'mwo abolo pubuurai womdo guureji neya wimwalonekono. Su tov aro tovinokwono. Kemoro yiuwi'nokai judo'no judo'no womdo amjumovlapi su ton Jisas Kraisollu'aro Gooti toolluno yovo tovi kuvinono ilomoropiyapinogaikikono. Jisas Kraisol Gooti toolluro bako bwotonyo pwopiyodowodo tovi anakuuto tomuu mwalodowo aki yiuwi'nokai tonyu mido mollomwalodowodekono. Toro toolluno nevu yiuwi'nokai toga yiunokuudo neya ilomoropimwolowanekono. Nebalokwono.
ကြော်ငြာတွေ