1 Koorin 8:3 - Gooti Toolluro Yogalokwono3 Toro kuvi kuruv a'mwo pwol Gooti toolluno kalo buuropino winodowodo su toolluno'gwowi Gooti tool me'no wonoma'dowodekono. အခန်းကိုကြည့်ပါ။ |
1 Koorin 8:3
29 ပူးပေါင်းရင်းမြစ်များ
Aki lukomgu Jisasol pugasal puga toga aiko te aro kuudoganokaikono. “Joonolluro muugunyo Saimoonoloo, guu mino kalo buuropino gujunodowodekudeyo?” Kuudoganokaikono. Toro kuudoganoka toga'no'gwowi Pital jul'nyo subwosunokaikono. Su tov aro tovinokwono. Jisasolluro aro kuudoka tov, “Guu mino kalo buuropino gujunodowodekudeyo,” pugasal puga kuudoganoka su tovino Pital jul'nyo subwosunokaikono. Toro ibwosunyuno sumaiyokwe aro kuudokaikono. “Agutoloo, guu yiuwi'nokai noonyumwonyu tonyuno kuudo me'no youroma'dumdekugono. Toro tooku moro gumino kalo buuropino nyunodowodo su tovino kuudo me'no yanuu'dumdekugono.” Kuudokaikono. Toro kuudoka toollu Jisasol aro kuudokaikono. “Guu moro sipsip tobuurai wosamujuko neya duuwiyogawono.” Kuudokaikono.
Gooti su tool Isuraiyolda'ai a'mwo abolo gavnokweyolluro me'no ajesoka tonyu yiunokuudo mamodukwopiyodowodekono. Kevu proofet Ilaijalluro kuuguudo puvi me'no mojagilodupudogaikikono. Aiyoga proofet Ilaijal Isuraiyolda'ai a'mwo abolo tonyuro ma'no ma'no yodopure tovino Gooti toollu deko kuujajukekono. Kuuguudo su tov Gooti toolluro buukiyo tovi aro sakwollungikokwono.
Aki puruv aga nevu Gooti toollu yainyunyo po'dogalo miyalo'nodowodo tovibusuko ilaiyo neya mamuugona'dowadonogano. Toro kuvi kuruv lukomgu toga'no'gwowi Gooti toolluro sumdomago tovi ilaiyo to'no muugonarowa'ji imgu amgu nyainyunumwalanonogano. Su toro to'busuko kubalno aga nuvu kuudo yiuno pwekwonodo tekwojaino youroma'dumdonyugono. Toro kuvi kuruv lukomgu Gooti toollu me'no kuuru'ma'mi toga'no'gwowi Gooti tool mi yiunokuudo nuwonopiyodowodo to'busuko kubalno nuu kwonyu kuruv yiuwi'nokai kuudo tonyuno nyouroma'monyugono.
Su toro tovino Gooti toolluro yogalo puruv aro sakwollungikokwono. “Gooti toolluro ilaiyo kuunodo ton me'no sovrowosokaikono. Toro sovrowosoka su tonyuno a'mwo pwolnodo kwol kuruv gami sumdo tokwe ku'nono mwonodowodekono. Aki gami kaduko tokwe muu'nodowodekono. Aki gami poowokalago tokwe kuudo ku'nono miyouroma'dowodekono. Gooti toolluro ilaiyo kuunodo su ton a'mwo abolo gamino kalo buuropino winodopure tonyu wiyo'moneyokwe sovrowosokagano.” Toro sakwollungikokwono.
Toro kuvi kuruv aga'no'gwowi kevu Gooti kuunodo toolluno kuudo me'no youroma'dupudogaikikono. Toro te aro neya dumonyugono. Gooti toolno'gwowi kemino kuudo me'no yaikuu'dowodekono. Toro tovino tov kevu kwako akavida'ai kuudo maluko'nyo su tooraiyomno aki aiko te nyouragunyumo'numwalpiyo. Kwako akavida'ai kuudo maluko'nyo su tooro wollainyorogano. Aki su tooro kemi ku'nono maikullo'mwojupinorogano. Toro tovino tov kevu su toro toorai aki aiko te ki'nato womdo nuuwimwalpiyo.
Toro kuvi kuruv Gooti tool gamoro mollu'bwoto tovi mojudapiyo'moneyokwe nebaikuuguudo to'gwowi sulo bwotonyo toolbusuko jurogudo me'no kuudapingikokwono. Toro kuudapingiko su tovi aro sakwollungikokwono. “Aguto tool gamoro a'mwo abolo tonyuno kuudo me'no youroma'dowodekono.” Aki puukwollo sakwollungiko puruv arokwono. “Yiuwi'nokai a'mwo abolo ton, Oo nevu Aguto toolluronogano, dodupudo su tobuuro kaiya'no pasudo toorai buulo neya uugunyumopiyogapuro.” Sakwollungikokwono.
A'mwo pwol yamju wiyoganyo'mo jul'nyo pun bwi'mo'mdowo'jure kuga kuruv gamoro kuudo kuubwengiko tovi neya agudupolarogawono. A'mwo agudupolaro'ji su tool ilaiyo nokwo yonekono. Su tov aro tovinokwono. A'mwo su tool wiyoganyo'mo jul'nyo bwi'mo'mdowo'jure tovi pi'mwono kuuwolowo'ji tov resis tovuro mubiyo ma'dupudo to'busuko kubalno Gooti tool aiyo yiunokuudo mujomwekovlaiyo'moneyokwe tov a'mwo su toollu nuubiyonekono. Gooti tool yiuwi'nokai a'mwo abolo gamino kalo buuropino winodupudo tonyu mubiyo su toro tov nuuwiyonekono. Toro wiyono su tovino subuu'yamju me'no aduuwiyajukekono.
Mi avalobuuravoo, neya duu'nyulo. Kwako akavida'ai a'mwo abolo apoo'nyaiyo mwalodupudo tobuuro kuudo uubweyodopure tovida'ai muunyu kai'muuda'ai noonyumwonyu bwotonyagokwe tonbusuko imo'nyo'moneyokwe Gooti tool me'no ajesokagano. Aki a'mwo abolo apoo'nyaiyo su tobuuraino Gooti toolluro subuu'yamju me'no aduuwiyoka puruv arokwono. “Yiuwi'nokai pwolno puru'monodo mino kalo buuropino winyokwe ton nuu aguto kig toonyuro mido mollomwalo toru nuuge noulomwalmwalpinogano.” Adokaikono.
Kevu Krais Jisasollu yere mwonodupudo kuvi kuruv kwolluno kalo buuropino ikullunodowodogaikikono. Aki kevu Krais Jisasollu yere mwonodupudo kuvi kuruv kwolluno kuudo uubweyodupudogaikikono. Aki kevu Krais Jisasolluno ilaiyo bwotonyo yodupudogaikikono. Ilaiyo bwotonyo su tov kwako akavida'ai ilaiyo tonyu uuwolo'mdowodokwono. Aki ilaiyo su tovino a'mwo pwol gamoro mago tokwe jo'moneyokwe kuruv supto yonekono.
Mi ibwoto'nyobuuravoo, nevu Jisasolluro a'mwo abolo pubuuraino imgu amgu kalo buuropino neya amollogawano. Su tov aro tovinokwono. Kalo buuropino winyo'moneyokwe pasudo su tov Gooti toolluda'ai bodowodokwono. Aki yiuwi'nokai a'mwo abolo kalo buuropino winodupudo ton Gooti toolluro kwoloraiyo me'no wimo'nodupudogano. Aki toro ton Gooti toolluno kuudo me'no youroma'dupudogano.
Gumoro ajumiyo mwalodumdo su tovino nuu kuudo nyau'mwakono. Ajumiyo su toru Satanyol a'mwo abolo tonyuro aguto kig wimo'nodowodorukono. Toro kuvi kuruv guvno'gwowi mino kuudo nubweyodumdo tovi guureji gudupola'dumdekugono. Aki a'mwo pwol mi numjunodowodo toolluno yovo tov Adipasolekono. A'mwo su tool a'mwo abolo tonyu mino kuu'maiyo toru'no amoruujajukekono. Toro toollu Satanyolluro mwalodowodo ajumiyo toruda'ai a'mwo pworo aromiyosopekono. Toro toollu romiyosodopure kuga kuruv guvno'gwowi mino buulo manugunyumopiyajudekugono.
Nuu gumoro yiuwi'nokai pasudo mujumelabodumdo tonyuno kuudo me'no youroguma'dumdonyugono. Guu pasudo aro tonyu mujumelabodumdekugono. A'mwo abolo tonyuno kalo buuropino gujunodowodo tokwe'aro mino kuudo nubweyodumdo tokwe'aro a'mwo abolo punyu wiyo'mwojo'mo womdo yodumdo tokwe'aro aki tagunyo bagi'mo'mdowo'jure toga numi guureji to'no gudupolanuwo'dumdo tokwe'aro tonyuno nuu kuudo me'no youroguma'dumdekugono. Aki pasudo su tonyu tono tono mujumelabodum aga kuga kuruv muunyu toru'aro guureji mujumovla'mdumdo tovino kuudo youroguma'dumdonyugono.
A'mwo pworo mino kuudo manubweyodupudorogano. Toro tooravuro gumi kaiyako yagujugolodopure tovi wonoguma'dumdonyugono. Toro yagujugolodopure tovida'ai guu danyu'nyuwuulo ma'dumdo tokwe'aro aki apoo'nyaiyo imo'nodumdo tokwe'aro tovalluno nuu me'no souroguma'mwakonyugono. Guu kwako akavida'ai tonyuno apoo'nyaiyo imo'nodumdo kweku kuruv gumoro poowokalago tovino'gwowi muunyu kai'muuda'ai noonyumwonyu bwotonyagokwe imo'nodumdekugono. Aki a'mwo pworavuro gumino mebweyogalo gudodopure kuvino kuruv nuu kuudo me'no souroma'mwakonyugono. A'mwo su tooro aro jokwerogano. “Oo nevu Juuwonogano.” Su toro dodupudo kworo kuruv Juu kuunodoromaiyo. A'mwo su tooro Satanyolluro mollu'bwoto wimo'nodupudorogano.
ကြော်ငြာတွေ