1 Koorin 14:3 - Gooti Toolluro Yogalokwono

³ Toro kuvi kuruv a'mwo gabovo yogaljo madodupudo toorono'gwowi Gooti toolluro yogalo tokwe kuurokado amoruudomollupi tov a'mwo abolo ton jurogudo nokwo gullumwalpinogano. Aki kemoro poowokalago tonyu jurogudo nokwo duuwimwojonokwono. Aki yogalo su tov kemoro tagunyo tonyu dugoga nokwo wirovomokwolamwalonokwono.

1 Koorin 14:3 ပူးပေါင်းရင်းမြစ်များ

Luuk 3:18

Aki yogalo bwotonyago pugai'aro kuruv a'mwo abolo su tonyuro poowokalago tovi juulowoso'moneyokwe aduuwimwojajukekono. Joonol kuuguudo sugudo tokwe su toro tomgu'aro amoruudomollajukekono.

Kuurotokwe 13:15

Toro kuulomwalodopure toga i'bwo'nyago su tovida'ai a'mwo pworo Moosesolluro loowo tokwe'aro proofet tooravuro kuuguudo togai'aro tonyuno sodubwasoporogano. Toro me'no yodubwosopino sumaveyokwe i'bwo'nyago su tovuro mido mollomwalokwe tooro Pooleke'aro toorai kuuguudo tokwe a'mwo pwollu amodapiyoporogano. Toro amodapiyopo tool i'bwo'nyago tovi anakuuto tomuu Pooleke toorai wuuru'maro'no aro kuudokaikono. “Nevugeravoo, kevu a'mwo abolo amwakuuwo akanollu jurogudo danekullumwojo'mo kuuguudo pun kurukweyorekuldeyokwe nokwo nekudupinorekikono.” Kuudokaikono.

Kuurotokwe 14:22

Toro tooral wagwolago go'no go'nodo su tonyu bai'mo'mdubul a'mwo abolo Jisasolluro uumjunyokwe tobuurai kemi poowokalago tonyu jurogudo duuwimwojo'moneyokwe kuuguudo aro kuujajulorakono. “Nevu aguto kig Gooti toolluro mido mollomwalo tovi dolago tomuu kuulomwallo'mo tov kavo kavo yovlavowa'ji maulomwalanonogano. Toro kunol kuruv kwako akavi mwalowa'ji toga jul'nyo go'no go'nodo ton nobaneki'mo'mwalononogano. Toro baneki'mo'mdowo'jure tonyu neya yodo'movlavowa'ji Gooti toolluro mido mollomwalo tovi dolago tomuu kuvinono kuulomwalanonogano. Toro tovino tov kevu jul'nyo ton baiki'mo'mdowo'jure toga nobwolorapiyokwe kuuguudo sugudo tovi kuudo uubweyodupudo su tovino guureji neya dogudupolarogaulo.” Aduuwimwojajulorakono.

Kuurotokwe 15:32

Aki Juudaseke Sailaseke tooral Gooti toolluro kuuguudo tokwe modomollo'moneyokwe proofet toorakono. A'mwo su tooral Jisasolluro a'mwo abolo su tonyu kuuguudo bwotonyago togai sodubwosumovlavolorakono. Toro yodubwasuno sumaleyokwe a'mwo abolo su tonyu duuwimwojodole tovida'ai kemoro poowokalago ton jurogudo sumo'nyajupogano.

Kuurotokwe 4:36

Su togasuro aku'momdo Saiprosda'ai a'mwo pwolluno yovo tov Joosepolekono. Toro tool Livaiyolluro iko tovasuda'aiyekono. Aki a'mwo su toolluno yovo puruv Banabasolekono. Kuurotokwe tooro yovo su tovi toro wuudodupudekono. Yovo su tovino kavlo tov “Poowokalago tonyu jurogudo duuwimwojo'moneyokweyolekono.”

Kuurotokwe 9:31

Toro te yiuwi'nokai kwako Juudiyake'aro Galilike'aro Samariyake'aro tomuuda'ai Jisasolluro mollu'bwoto ton sumdomgu jul'nyo tonyu amjomwekelabiyajupogano. Toro kun kuruv su toro toga'no'gwowi jul'nyo wuulo pun mamaropogano. Yiuno paiko to'no ibwosunodupu ilaiyo amwallajupogano. Toro ton Aguto toollu dolago tomuu uumjunodopure tonyu Gooti toolluro Kuullo tool wiyo'mwojoduke tovida'ai jurogudo sumo'nyajupogano. Toro imo'nodupu aki a'mwo abolo muuduko pugai'aro abuuguro'mwonyajupogano. Toro buuguro'mwonyodopure toga kwolallo bwotonyo sumo'nyajupogano.

Room 12:8

Aki punol a'mwo abolo tonyu jurogudo duuwimwojo'moneyokwe nekullabodowodo tonol kuvinono neya duuwimwojumwalanonogano. Aki punol nemi poowokalago tokwe yanyago wimo'nyo'mo nekullabodowodo su tonol kuvinono yanyago neya wimo'numwalanonogano. Aki punol mido mollomwallo'moneyokwe nekullabodowodo tonol womdo su tovi guureji neya mujumovla'mwalanonogano. Aki punol a'mwo abolo pubuuraino kalo mamwonyo'moneyokwe tov nekullabodowodonogano. Toro nekullabodowodo su tokwe a'mwo abolo tobuurai kwiyo'mwoja'ji toga ilaiyo neya ibwosunmwalanonogano.

Room 14:19

Toro tovino tov nevu yiuwi'nokai toga a'mwo abolo pubuurogai sumwoluko aval'no wosungovlaiyo'mo tomgu'aro to'no neya yomjomwekovlavogawano. Aki toro tonol Jisasolluro a'mwo abolo pubuurai jurogudo duuwimwojo'moneyokwe womdo to'no neya amjumovlavogawano.

Room 15:2

Jisasolluro a'mwo abolo su tobuuro jurogudo daiyo'moneyokwe tov nevu yiuwi'nokai tonol ilaiyo neya igolmwalanobuurogano. Nevu su toro tomgu'aro igolowa'ji Jisasolluro a'mwo abolo su tobuuro jurogudo sumo'nupi tov sugudokwono.

1 Koorin 10:23

Kevu Jisasolluro a'mwo abolo pugaikul aro dodupudogaikikono. “Oo nevu buro'nyo buro'nyodeyo yo'mo anekulluno'ji tov nokwo yanonogano.” Su tov nebal'no dodupudogaikikono. Toro kuvi kuruv nemoro sa'ji pun ku'nono manekullo'mwojupinogano. Aki nemoro sa'ji pun nevu Jisasolluro a'mwo abolo tonollu jurogudo ku'nono miyogullumwojonekwapipinogano.

1 Koorin 14:12

Toro te kevu Gooti toolluro Kuullo tool yasuwa'wino judo'no judo'no wiyodowodo tollovai mallo'mo guureji ikullunodowodogaikikono. Toro tovino tov kevu aro kuudo neya jaurogaulo. Oo nevu Jisasolluro mollu'bwoto tonyu jurogudo duuwimwojo'moneyokwe womdo tollovaino to'no neya amarogawano. Su toro kuudo yauropi Jisasolluro mollu'bwoto tonyu jurogudo neya doduuwimwojogaulo.

1 Koorin 14:17

Guvu Gooti toollu, “Nenyoo,” subusu'nyogalo ilaiyo wuudodo'bure kuvi kuruv a'mwo abolo ton kuuguudo tovino kuudo po'dogalo miyouromapinogano. Aki gumoro kuuguudo adubiyo su tov kemoro poowokalago tonyu jurogudo ku'nono maduuwimwojonokwono.

1 Koorin 14:26

Mi avalobuuravoo, kevu su'bwo'nupi toga adado imwalpinogaikuldukoneyokwe tovino ikudumo'mokwono. Kevu su'bwo'nupi toga pwolno pwolnodo toorekul aro neya imwalpinorekikono. Pwol Gooti toolluno ilomoropiyo'moneyokwe dato tokwe mokabwonekono. Aki pwol yodubwaso'moneyokwe kuuguudo tov mokabwonekono. Aki pwol Gooti toolluro me'no bomollolupto'nosodowo'jure tonyu mokabwonekono. Aki pwol gabovo yogaljo tokwe mokabwonekono. Aki pwol gabovo yogaljo tovi mollovodo'mwojajo'moneyokwe kavlo tov mokabwonekono. Yiuwi'nokai go'no go'nodo su ton mokabopi i'bwo'nomwalpinogaikikono. Kevu go'no go'nodo su tonyu toro mokabopi kuvi kuruv yiuno Jisasolluro mollu'bwoto tonyu jurogudo duuwimwojo'moneyokwe togai to'no neya doulomollogaulo.

1 Koorin 14:31

Su tov aro tovinokwono. A'mwo Gooti toolluro yogalo tokwe kuurokado mollajokwe su tooro pwolda'ai pwolda'ai amjodumovlapi tov kevu yiuwi'nokai su'bwo'nupi togaikul kuudo nokwo youromaropi kemoro poowokalago tonyu jurogudo nokwo daikullumwojonokwono.

1 Koorin 8:1

Aga ibesa'aiyo muugupto pun nodupudo tovino ikudumo'mokwono. Muugupto su tonyuda'ai pun kuunano gooti toorai ilomoropiyo'moneyokwe me'no kwiroudapingikogano. Muugupto su tonyuno nonyo'moneyokwe tovino nevu punol aro dodowadonogano. “Oo nevu yiuwi'nokai tonol su toro tovino pi'mwo kuudo kurukweyonogano.” Toro dodowado tonol ilomoropunyu nyuna'jo. Toro kunol kuruv Jisasolluro mollu'bwoto tonyu jurogudo duuwimwojo'moneyokwe to'gwowi nevu a'mwo abolo su tonyu kalo buuropino neya amollogawano.

2 Koorin 1:4

Toro tool nevu a'mwo abolo noonyumwonyu jul'nyo baneki'mo'mdowo'jure tobuuronollu piyarupto nekumokwolabodowodekono. Toro tovino tov nevu a'mwo abolo jul'nyo bwi'mo'mdowo'jure pubuurai nokwo wiyo'mwojumovla'mwalanonogano. Gooti toolluro nemi nekullo'mwojodowodo su tokwe a'mwo abolo su tobuurai aval'no nokwo wiyo'mwojumwalanonogano.

2 Koorin 2:7

Toro kwol kuruv gamoro kalo kalo'mo yodowodo tov gavnokweyolluro kuudo uubweyodowodo tovi yiunokuudo nuugollu'mowo'jo. Toro tovino tov aga'no'gwowi kevu a'mwo su tekwojuro ma'no ma'nodo tonyuro kirumwallo tovi yiunokuudo modukwopiyopi gamoro tagunyo tovi dugoga neya duuwirovomokwolabogaulo.

Efesos 4:29

Aki kemoro mago tonyuda'ai kaiya'no yogalo jugollo'moneyokwe tooro nobolokuumwalpiyo. Toro kugaikul kuruv a'mwo abolo pubuurai jurogudo duuwimwojo'moneyokwe yogalo sugudo to'no neya dodogaulo. Toro dodopure tovi a'mwo abolo kadu'molo supi tobuuravuro sumdo tovi Gooti toolluro yasuwa'wino sugumaluko nekubweyodowodo tovino kuu'maiyo toru'no bomollolupto'nubweyonokwono.

Efesos 6:22

Toro te kevu nemino kuudo youronekumapino'moneyokwe nuu a'mwo su toollu amekwopiyamono. A'mwo su tool nemoro yiuwi'nokai yomjomwekovla'mdowado tonyuno kuuguudo ikudodowo'jure toga kemoro poowokalago tonyu jurogudo nokwo daikullumwojonekono.

Kooloosi 4:8

Toro te kevu nemino kuudo youronekumapino'moneyokwe nuu a'mwo su toollu kemiyomno amekwopiyamono. A'mwo su tool nemoro yiuwi'nokai yomjomwekovla'mdowado tonyuno kuuguudo aikudo'ji tovi'aro kemoro poowokalago tonyu jurogudo nokwo daikullumwojonekono.

1 Tesaloonaika 2:11

Aki kevu aka kuvino kuruv kuudo me'no youroma'dupudogaikikono. A'mwo ganumiyago pwol gami kwoloraiyo tonyu pi'mwono yogullumwojomokailabodowodo to'busuko kubalno nevu yiuwi'nokai pwolno puru'monodo togaikullu pi'mwono aro sogullumwojekwapiyajuwonogano.

1 Tesaloonaika 2:3

Toro te nevu guureji aro adaikullajuwonogano. “Oo kevu kuuguudo sugudo akavino kuudo neya duubweyulo.” Su toro adaikullajuuwo su tov kemi youkuu'naikujo'mo'maiyo. Aki kemi kaiyako yaikullugollo'moneyokweyo'maiyo. Aki kemi molloguurekudapiyo'moneyokwe aikujajuwonolmaiyo.

1 Tesaloonaika 3:2

Toro domdukuurosuno sumawoneyokwe Sailaseke navu Timootiyollu kemiyomno yere amekwopiyabowolonakono. Timootiyol nemi nellugwai'yago toolbusuko nekullumo'nodowo Gooti toolluro womdo tovi aval'no yodowadonogano. Aki toro tool Krais toolluno kuuguudo sugudo tokwe aval'no modomollodowadekono. Toro toollu kemiyomno amekwopiyabowolekono. Su tool kemoro kuudo uubweyodupudo tovino guureji gudupola'mwalpino'moneyokwe daikullumwojonekono.

1 Tesaloonaika 4:1

Nemi avalobuuravoo, aga kuuguudo purukwe'aro ikullabwanonogano. Kevu Aguto Krais Jisasolluro a'mwo abolo me'no wimo'nodupudogaikikono. Toro togaikulluno tov Gooti toollu ilaiyo igollo'moneyokwe to'no neya domjumovlavogaulo. Su toro tovino nevu sumdomgu me'no sodekubwasowonogano. Toro sodekubwasowo su to kuvi, “Oo me'no uumjunodupudodeyo,” kemino su toro kuudo me'no yaikuu'dowadonogano. Kevu ilaiyo uumjunodupudo su tovi muunyu toru'aro guureji mujumovla'mwalpino tovino'mo aga jurogudo adaikullumwojumwakuuwono.

1 Tesaloonaika 4:18

Toro tovino tov yogalo akagai kevu Gooti toolluro a'mwo abolo pubuurai jurogudo doduuwimwojogaulo.

2 Tesaloonaika 3:12

Toro te nevu a'mwo abolo womdo mimwakopo su togaikullu Aguto Jisas Kraisolluno yovo tovida'ai guureji aro daikullano'monogano. Kemoro yasuwa'no worubovenodupudo su tov imwogapiyopi kevnokwe togaikul womdo neya domjumovlavogaulo. Kevnokweyogaikulluro womdo supi tovida'ai neya jomjonomwekovlavogaulo.

1 Timooti 1:4

Aki a'mwo kanoga kuuguudo jokwe toorogai'aro aki kemi kwikweyago tooraino yovokwe kuuguuwipuuto toorogai'aro toorai nodumwalpiyokwe tovino neya doduumjukurogawono.” Agudekugono. Kuuguudo su to kworaino a'mwo abolo ton yogalo youllajunodupudogano. Aki kuuguudo su tooro Gooti toolluro womdo tovi wimovlaiyo'moneyokwe ku'nono maikullo'mwojupinorogano. Toro kuvi kuruv yiuno Gooti toolluno kuudo kuubwemovlapi su to'gwowi gamoro womdo tovi wimovlaiyo'moneyokwe nokwo ikullo'mwojonokwono.

1 Timooti 4:13

Nuu yere mabai'mo'mdo'mure toga guu Jisasolluro mollu'bwoto su'bwo'nupi tonyuro akuuto toru Gooti toolluro yogalo tokwe neya domomjojogilmovlavogawono. Aki kemoro poowokalago tonyu jurogudo neya duuwimwojo'bi jubwosumovlavogawono.

1 Timooti 6:2

Aki ki'nato womdokwe su tonyuro mido mollomwalokwe pwol Jisasolluno kuudo aval'no me'no uubweyodowodoldeyokwe gamoro ki'nato womdokwe ton aro kuudo nyau'mwalpiyo. Oo nemi nelludai'yago toolbusuko nonekullumo'nodowodo toolluno tov nevu gamoro yogalo tovi po'dogalo muumjunmwalanonogano. Kuudo nyau'mwalpiyo. Toro kuvi kuruv aro kuudo neya yau'mwalpinogano. Oo nemi mido mollonekumwallokwe kwol kuruv Gooti toolluro kwoloraiyo me'no wimo'nodowodekono. Toro tovino tov nevu nemi mido mollonekumwalokwe su toolluno kalo buuropino neya mollowa'ji yiuwi'nokai toga guurejuno neya uumjungovlavogawano. Su toro kuudo neya yau'mwalpinogano. Guu su toro tonyuno yiuwi'nokai toga yodubwosumovlavo'bi a'mwo abolo ton neya uumjunmwalpino'moneyokwe dodumul'mwojogawono.

2 Timooti 4:2

Guu Gooti toolluro yogalo tokwe modomollo'moneyokwe neya jovraimonyogawono. A'mwo abolo ton Gooti toolluro yogalo su tovi kaduko wiyo'mo kwinpiyoga'deyo oo kaduko wiyo'mo mwinpiyoga'deyo kuga kuruv yiuwi'nokai toga guu Gooti toolluro yogalo tokwe modomollo'moneyokwe neya jovraimonyogawono. Aki toro tooku kavo to'no mwalo'bi Gooti toolluro yogalo su tokwe neya jodubwasogawono. Toro yodubwasodo'bure tovi'aro a'mwo abolo tobuurai mollado'movo'bi aki yogalo mojurugolo'bi aki jurogudo duuwimwojo'bi tono tono imwalbinekugono. Aki toro tobuurai Krais toolluro yogalo tokwe yodubwasodumdo tovi miyuu'dapimwalbinekugono. Toro kweku kuruv yiuwi'nokai toga neya jodubwosumovlavogawono.

Taitos 1:9

A'mwo su tool namoro yogalo yodubwasodowolo sugudo kuunodo tovi guureji neya gudupola'mwalonekono. Yogalo su tovino guureji agudupolaro'ji tov a'mwo abolo tonyu Gooti toolluno yodubwasowo'ji aki kuuguudo idopto'nodo tokwe jurogudo nokwo duuwimwojumwalonekono. Aki toro agudupolaro'ji tov a'mwo abolo pun kuuguudo idopto'nodo tovi kisuvolo wiyodopure tonyu po'dogalo yovo'dogallo'moneyokwe yogalo nokwo mojurugolmwalonekono.

Taitos 2:15

Toro te guu yiuwi'nokai kuuguudo me'no aikudumo akan a'mwo abolo tonyu neya jodubwasogawono. Aki kuuguudo akanyu a'mwo abolo ton po'dogalo uumjunmwalpino'moneyokwe jurogudo doduuwimwojumovlavogawono. Aki a'mwo abolo pun kuuguudo akanyu kisuvolo yodopure tonyu guu yogalo neya domojurugologawono. Guu womdo su toro tovi yo'moneyokwe Gooti tool me'no ajagubweyokaikugono. Toro tovino tov a'mwo abolo pun gumi maguu'nyubusuko yopi kaduko magujupi tov guu su toro tonyu wonyapino nyumwalbiyo.

Taitos 2:6

Aki a'mwononyunodo toorai ibwaso'mo tov arokwono. A'mwononyunodo su tooro kevnokwero amollomwalnogapureyokwe tov po'dogalo neya dumul'mwojumwalbinorogano.

Taitos 2:9

Aki ki'nato womdokwe tonyu ibwaso'mo tov arokwono. Ki'nato womdo yodupudo ton kemi mido mollomwalokwe toorai yiuwi'nokai toga kwako tomuu'aro neya wimwalpinogano. Aki kemi a'mwo aguto su toorai ilaiyo igollo'moneyokwe nyoga'gaivoluudumwalpiyo.

Hibruu 10:25

Jisasolluro a'mwo abolo pun kevuge avalo pubuurogai mi'bwo'nodupudogano. Kevu su to'busuko aval'no nyumwalpiyo. Toro kuvi kuruv kevno'gwowi neya ju'bwo'nomwalogaulo. Su toro i'bwo'nomwalopi Jisasolluro a'mwo abolo tobuurogai imgu amgu jurogudo doduuwimwoju'nogaulo. Toro togaikul aro wonomapinogaikikono. “Oo Aguto tool aikomgu nobai'mowono'mo tov wobo toga'deyo.” Su toro tovi kwonomapi toga jurogudo duuwimwoju'numwalpino su tov muunyu toru'aro guureji jogaulo.

Hibruu 13:22

Miyobuuravoo, nuu guureji aro ikudumo'mokwono. Nuu kemi jurogudo daikullumwojo'moneyokwe yogalo su'mnodo akav sokwollaikubwemono. Toro tovi kevu kaduko neya duuwiyogaulo.

Hibruu 3:13

Toro kuvi kuruv yiuwi'nokai iruko tollovaino, “Oo anuugwo toga'deyo,” su toro kuuno adupi toga kevnokwe togaikul imgu amgu jurogudo aro neya doduuwimwoju'nogaulo. Ma'no ma'no pasudo tovuro youkuu'naikudodowo'jure tovida'ai kevu yiuwi'nokai togaikul Gooti toollu dogaipo'nyo kuumwiyo nuuwimo'numwalpiyo.

1 Pita 5:12

Nuu a'mwo Sailasolluno aro kuudo yau'dumdekono. Oo Jisasolluro a'mwo su tool mi nyugwai'yago pwolbusuko nyumo'nodowodoldeyo. Toro tool Krais toollu guureji uumjunyokweyoldeyo. Kuudo yau'dumdekono. Pas kula'nyo akav kemi yokwollekwopiyabiyo'moneyokwe a'mwo su tool mi anyo'mwojokaikono. Nuu pas akavi'aro kemi jurogudo daikullumwojumo'monyugono. Aki kuu'maiyo toru'no aro dodoluwosumo'mokwono. Kemoro tabunyuwuulo ama'mwakopo su ton yiuno Gooti toolluro yasuwa'wino sugumaluko tovida'ai to'no ikullumo'nodupudogano. Toro te kevu Gooti toolluro yasuwa'wino sugumaluko su tovi akuuto tomuu guureji neya doulodavogaulo.

Juut 1:20

Toro kuvi kuruv kevu moro kalo buuropino nyunodowodo tobuurekulno'gwowi Gooti gavnokwe toolluro nebal'no yogalo anekullaboka tovino kuudo me'no uubweyodupudogaikikono. Toro te kemoro kuudo uubweyodupudo su tovi'aro jurogudo neya jogullumovlavogaulo. Aki Gooti toolluro Kuullo tool jurogudo ikubweyodowo'jure tokwe kevu Gooti toollu subusu'nyogalo neya duudumovlavogaulo.