1 Joon 4:15 - Gooti Toolluro Yogalokwono

¹⁵ Toro dodoluwosodowa'jure tovi a'mwo pwol wuu'nowo'ji aro dodowiyoku'bworosonekono. “Oo nebalo'mdeyo. Jisasol Gooti toolluro Kwolaiyekono.” Dodowiyoku'bworosonekono. Gooti tool a'mwo su toro adodowiyoku'bworoso'ji toollu nuuguro'mwonyonekono. Aki a'mwo su to kwol kuruv Gooti toollu nuuguro'mwonyonekono.

1 Joon 4:15 ပူးပေါင်းရင်းမြစ်များ

Matyuu 10:32

Aki Jisasol aro kuudokaikono. “A'mwo pwol a'mwo abolo tonyuro sumdo tovi mino kuu'maiyo toru adodowiyoku'bworubweyo'ji tov nuu kwonyu kuruv mi Nyunumiyago muunyu kai'muu mwalodowodo toolluro sumdo tovi a'mwo su toolluno kuu'maiyo toru nododowiyoku'bworubwemonyugono.

Luuk 12:8

Aki Jisasol kuudokaikono. “Nuu aro ikudumo'mokwono. A'mwo pwol a'mwo abolo tonyuro sumdo tovi mino aro adodowiyoku'bworobweyo'ji tov, “Oo nuu su to kwolluno kuudo uubweyodumdonyugono.” Su toro adodowiyoku'bworobweyo'ji tov nuu A'mwo Kwolaiyo Kuunodo kwonyu kuruv Gooti toolluro ensel tooro sumdo muugonanuwo'dopure toru a'mwo su toolluno, “Morekono,” dodowiyoku'bworubwemonyugono.

Joon 6:56

Toro te yiuwi'nokai a'mwo abolo ton moro kulako tokwe mujako tokwe tovallu anpi su ton nuvuge noguru'mwonyumwalpinogano. Aki nuu kwonyu kuruv a'mwo abolo su togai noguru'mwonyumwalmonyugono.

Room 10:9

Toro moruudomollodowado tovida'ai kevu pugaikul kemi mago togai aro dodowiyoku'bworosunpinogaikikono. “Oo Jisasol nemi Agutekono.” Aki kemi poowokalago kuunodo togai aro kuudo kuubwepi tov, “Oo Gooti tool Jisasollu aiyo aiko te me'no amodukavokaikono.” Su toro kuudo kuubwepi tov Gooti tool kemoro ma'no ma'nodo tovuro kirumwallo tovida'ai nobomollurolovekumokalokwonekono.

Filipai 2:11

Aki yiuwi'nokai su ton kuu'maiyo toru'no aro neya dodowiyoku'bworosunpinogano. “Oo Jisas Kraisol Agutekono.” Toro dodowiyoku'bworosunodopure tovida'ai gami Ganumiyago Gooti tool yovo aguto ma'mwalonekono.

1 Joon 2:23

Yiuwi'nokai a'mwo abolo Gooti toolluro Kwolaiyo toollu buulo uuguunyumopiyodupudo su ton gami Ganumiyago Gooti kwollu kuruv buulo me'no uugunyumopiyodupudogano. Toro kuvi kuruv a'mwo abolo puno'gwowi Gooti toolluro Kwolaiyo toolluno kuu'maiyo toru'no aro dodowiyoku'bworosupinogano. “Oo Jisasol Gooti toolluro Kwolaiyo tool kwoldeyo.” Yiuwi'nokai toro adodowiyoku'bworosupi su ton Ganumiyago Gooti kwolluno kuruv kuu'maiyo toru'no dodowiyoku'bworosupinogano.

1 Joon 2:24

Toro te kemi aro ikudumo'mokwono. Kevu muudu'nodo togada'ai kuuguudo sugudo tovi me'no kuu'nopogaikikono. Kuuguudo kuu'nopo su tov kemoro kuudo tonyu yiunokuudo neya aulaikworogawono. Kuuguudo su tov yiunokuudo kuvinono aulaikworo'ji tov kevu Gooti toolluro Kwolaiyo tooke'aro gami Ganumiyago Gooti tooke'aro toorallu yiunokuudo nokwo uuguro'mwonyumwalpinogaikikono.

1 Joon 3:23

Aki Gooti toolluro yogalo adanekulloka puruval arovakono. Nevu gamoro Kwolaiyo Jisas Kraisolluno yovo tovino kuudo neya uubweyogawano. Aki nemi adanekulloka puruv arokwono. Nevu Jisasolluro a'mwo abolo punyuno kalo buuropino neya amollogawano.

1 Joon 3:24

Gooti toolluro yogalo adanekulloka su tovallu nevu kuumjuna'ji tonol Gooti toollu kuvinono uuguro'mwonyodowadonogano. Aki Gooti tool ne kunollu kuruv me'no nekuguro'mwonyodowodekono. Aki gamoro Kuullo anekullaboka tool nemoro poowokalago tonyu kuulonekumwalododekono. Toro kuulonekumwalodowodo su toollu'aro kuudo youroma'dowadonogano. Oo Gooti tool nevuge mwalodowadoldeyo. Kuudo youroma'dowadonogano.

1 Joon 4:12

A'mwo pwolnodo kwol kuruv Gooti toollu ku'nono mwonodowodekono. Toro kuvi kuruv nevu a'mwo abolo tobuuraino kalo buuropino anekulluno'ji to'gwowi Gooti tool nemi kuvinono nonekuguro'mwonyumwalonekono. Toro nekuguro'mwonyumwalodowo'jure tonollu'aro Gooti tool gamoro kalo buuropino pasudo tov a'mwo abolo tonyuro sumdo tovi kuu'maiyo toru'no bomollolupto'nubwemwalonokwono.

1 Joon 4:2

Gooti toolluro Kuullo tool a'mwo toollu kuuluumwalodowodoldukoneyokwe tovino kuudo youromallo'mo puuto tov arokwono. A'mwo pwol aro amodomollo'ji tov, “Jisas Kraisol kwako akavi wolabo'no a'mwo kulakokwe kuunodo pwolbusuko abwollumo'nokaikono.” Su toro amodomollo'ji toolluno kuudo yaupinekono. Oo Gooti toolluro Kuullo tool a'mwo modomollokwe su toollu me'no kuuluumwalodowodoldeyo. Kuudo yaupinekono.

1 Joon 5:1

A'mwo abolo pun aro kuudo uubweyodupudogano. “Oo Jisasol Gooti toolluro amonekwopiyaboka Krais tool kwekono.” Yiuwi'nokai su toro kuudo uubweyodupudo ton Gooti toolluro kwoloraiyo wimo'nodupudogano. Aki yiuwi'nokai a'mwo abolo su ton kemi Kuunumiyago toolluno kalo buuropino winodupudogano. Toro winodupudo su ton kemi Kuunumiyago toolluro kwoloraiyo kubuuraino kuruv kalo buuropino winodupudogano.

1 Joon 5:5

Toro te kwako akavida'ai tooravuro jurogudo tovi uuwoleyo'mo tov aro tomgu'arokwono. A'mwo pwol aro kuudo uubweyonekono. Oo Jisasol Gooti toolluro Kwolaiyekono. Yiuno a'mwo su toro kuudo kuubweyo'ji toolno kuvinono uuwolowonekono.

2 Joon 1:7

Neya duu'nyulo. A'mwo kuunano youkuu'najokwe bwotonyago tooro kwako akavi yomollodupudorogano. Toro tooro a'mwo abolo pubuurai ki'nomallo'moneyokwe aro modomollodupudorogano. “Jisas Kraisol a'mwo kulako kuunodokwe pwolbusuko mimo'nokaikono.” Modomollodupudorogano. Yiuwi'nokai yogalo su tokwe amodomollupi tooro kuunano youkuu'najokwe to'no imo'nyokwerogano. Aki toro tooro Krais toollu ikomago wimo'nyokwerogano.