یوحەنا 21:12 - کتاب مقدس به زبان کردی جنوبی - گویش کلهوری

¹² عیسا وەپێان وەت: «بان قاواڵتی بخوەن.» هویچکام وه شاگردەگان جرئەت نەکردن وه لێ بپرسن، «تو کید؟» چوینکه زانستیان خوداوەنده.

یوحەنا 21:12 ပူးပေါင်းရင်းမြစ်များ

ئنجیل مەتا 22:46

جا هویچکامێان نەتویەنستن کەلیمەێگیش جواو عیسا بێەن، وەشون ئەو ڕوژه دی هویچکەس جرئەت نەکرد پرسیارێ له لێ بکێ.

مەرقوس 9:32

وەلێ شاگردەگان مەبەست عیسا حالی نوین و زاورێان چی له لێ بپرسن.

لوقا 9:45

وەلێ نەفامین عیسا چه ئویشێ؛ بەڵکەم له لێان شاریایەو تا دەرکێ نەکەن؛ جا زاورێان چیاد له ئی باوەته چشتێ له لێ بپرسن.

یوحەنا 16:19

عیسا زانستیا که توان له لێ بپرسن؛ جا وەپێان وەت: وەبونەێ ئیه له یەکترەکی پرسین، که مەبەستم چەس وەتم، ”وەشون ماوەێ کەمێگ، مه نیوینین، جا وه دواره وەشون ماوەێ کەمێگ، مه دوینین“؟

یوحەنا 21:11

جا شەمعون پتروس چیه ناو قایقەگه و توڕەگه کیشاده ناو وشکای. توڕەگە پڕ له ماسیەیل گەورا بی، سەد و پەنجا و سێ گله ماسی وەناوێ بی. هەر چەن ماسیەگان فره بین وەلێ توڕەگە نەدڕیا.

یوحەنا 21:15

وەشون ئیه که قاواڵتی خواردن، عیسا له شەمعون پتروس پرسی: «شەمعون، کوڕ یوحەنا، توی فرەتر له ئیانه مه دوس دێرێ؟» ئەوه جواو دا: «بەڵێ ئێ خوداوەند؛ تو زانید که دوسد دێرم.» عیسا وەپێ وەت: «وەرکەگانم بلەوەڕن.»

یوحەنا 4:27

هەر ئەو وەخته، شاگردیل عیسا هاتنەو. ئەڵاجویان هات که دێرێ وەگەرد ژنیگەو قسیه کەی. وەلێ کەسێگ نەوەت: «چه تواێ؟» یا «ئەڕا وەگەرد ئی ژنه قسیه کەی؟»

کاریل ڕەسولەیل 10:41

وەلێ نه ئەڕا گشتیەکی، بەڵکەم تەنیا وه شاێەتیلێگ که خودا وەرجەوە هەڵوژاردوی، یانێ وه ئیمه که وەشون زنیەو بوینی له مردگیل، وەگەردیەو خواردیمن و نوشایمن.