Yaꞌkub 5:16 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹⁶ Sangkon bong kam bay kapabuwat dusa, subay du kam mangaku ni pagkahi bi sampay sipaku-paku duwaa supaya kam kaulian meꞌ Tuhan. Na bong ina jama intong maku duwaa pa Tuhan, mastiꞌ kawasahan jaꞌ duwaa na.

Yaꞌkub 5:16 ပူးပေါင်းရင်းမြစ်များ

Panagnaan 19:29

Dari meꞌ looy na siꞌ, tud lay na du hinansu meꞌ Tuhan ga daira looy ndooy ni labbak man si Lut bay maglahat. San meꞌ looy, yaꞌ du bay takupan Tuhan bay paku si Ibrahim, batan lay du bay lakkahan na si Lut man jawom balaꞌ looy mari salamat.

Panagnaan 20:17

Na sabap bay kadarihan Sultan Abimalik bay ngaddoꞌ si Sara, ndang lay na ga ya ka nda na tuwaꞌ saki meꞌ Tuhan yaꞌ hanak. Sampay mimon ata na ma danda ni astanaꞌ na lay na du kalaminan meꞌ saki looy. Kahapan lay na baw sila pakuhan si Ibrahim duwaa sampay lay na du sila kaulian.

Panagnaan 20:7

Batnaa, papoleun na danda looy pa mman lla na. Lla na ilay nabi. Pakuhan na sa ko duwaa supaya ko yaꞌ matoy. Sugaꞌ bong ina yaꞌ papoleꞌ nu danda looy, mastiꞌ papatoy ta jaꞌ sina ko sampay na mimon raayat nu.”

Panagnaan 32:28

Yuk lalla looy, “Labba man batnaa saꞌ na si Yaꞌkub meꞌ ngawnan kau, si Israil na. Hatiyan na, ‘magbasag-basagan ka Tuhan.’ Batan yaꞌ ko bay kuhi banti magbasag-basagan ka manusiyaꞌ sampay na Tuhan ngkod-ngkoran yaꞌ bay takoleꞌ nu ma puhung nu, boꞌ lay jaꞌ du ko tumanjataꞌ.”

Matiyu 21:22

Oy-oy paku bi njawom duwaa bi pa Tuhan, nduwan jaꞌ sina kam basta kam pitsayaꞌ jaꞌ.”

Matiyu 3:6

Ndooy siꞌ, lay na sila magsabanna ni baanan jama bay dusa da sampay nawbat. Pag-anu, boꞌ da pinandi meꞌ si Yahiya ndooy ni Sōng Juldan.

Malkus 1:5

Dari siꞌ, yaꞌ na taambat jama bahuklud pilay pa mman na lakka man Jerusalem sampay man sikaliput Yahudiya. Pag takale da umanat si Yahiya, lay na tawbatan da dusa da ni pag-awpan mimon ndooy. Sampay lay na sila pinandi meꞌ si Yahiya ni Sōng Juldan.

Lukas 9:6

Dari siꞌ, lay na lumān ga rasul na ngalataan kakawum-kawman masaplag umanat mahap pasal pamarinta Tuhan. Maka lay na du sila ngulian sagannap ma sakihan.

Yahiya 9:31

Lalla looy bilay, bong ya saꞌ lakka man Tuhan, mastiꞌ yaꞌ ya kapabuwat meꞌ tuu. Labba man panagnaan junyaꞌ, yaꞌ gi baw luu bay taaka jama lay kasay buta man jawom kūn induꞌ na lagi. Boꞌ na, saliꞌ-saliꞌ du tabi toon, tiyap-tiyap baldusa, yaꞌ nduwan meꞌ Tuhan. Ilooy du nduwan, yana sagannap ma ngisbat iya ka buwat kahandak na.”

Salsila siga Rasul 19:18

Maka meka na sukuꞌ si Isa ma yaꞌ gi bay ngalabbahan dusa da labbasakayi, lay na māꞌ ni awpan baanan pagkahi da kalaatan ma bay pabuwat da.

Salsila siga Rasul 8:24

Pag-anu, yuk si Saymon ni ga si Pitel ka si Yahiya, “Bong bina la meꞌ naa, pakuhan bi doꞌ ku duwaa pa Papuꞌ mari yaꞌ na tuwaꞌ pa aku ilooy ma bay sabbut bi siꞌ.”

Suwat si Pol pa mman Baanan Sukuꞌ si Isa ndooy ni Rom 3:10

Boꞌ sikatuwaꞌ du ka halling njawom kitab, ilooy ma yuk na, “Yaꞌ luu san disu manusiyaꞌ intong pa Tuhan.

Suwat si Pol pa mman Baanan Sukuꞌ si Isa ndooy ni Rom 5:19

Bong pasiglaꞌ ta bitsala, poonan disu jama yaꞌ bay ngasip, sikamimon manusiyaꞌ bay dari baldusa. Sugaꞌ poonan disu jama bay ngasip ni panohoan Tuhan, meka na manusiyaꞌ bay initung intong.

Kolossa 1:9

Dari labba man llaw kami bay kaakahan pasal kaam, yaꞌ na situ bakkat meꞌ kami makuhan kaam duwaa pa Tuhan. Kamura-murahan binuwanan na pin kam meꞌ Rū Sutsiꞌ akka lawom ka pangahati supaya tahati bi na banahan bong oy kahandak Tuhan ningkaam.

1 Tesaloneka 5:17

Wā tiggohan bi maku duwaa pa Tuhan.

1 Tesaloneka 5:23

Kamura-murahan tinabangan du kam meꞌ Tuhan, yana poonan kasannangan, supaya sutsiꞌ na banahan mimon kawul-piil bi. Kamura-murahan inayaran na pin meꞌ na nyawa bi, pamiki bi, sampay baran bi supaya yaꞌ luu sutsutan njataꞌ bi pag beleng Papuꞌ tabi si Isa Almasi.

1 Tesaloneka 5:25

Siga danganakan, kaam pun, pakuhan bi du kami duwaa.

Hibrani 11:4

Pamintangan bi na si Habil ni awwal jaman. Sabapan pangando na pa Tuhan, kuwan ilooy ma bay songan na pa Tuhan mas mahap man ilooy ma bay songan kakaꞌ na si Kayin. Man tabi tau sabap ilooy bay songan si Habil bay hinasi meꞌ Tuhan. Maka sabapan pangando na, lay na ya awnan Tuhan jama intong. Sangkon minsan hallom na si Habil lay matoy, luu na pin pamintangan lay mbanan na ningkitabi sabapan pangando na.

Hibrani 11:7

Damikiyan Nabi Nū, sabapan pangando na pa Tuhan, pag lay jaꞌ ya binaan leꞌ Tuhan luu takka dunuk mehe bbos-bbos, lay du ya pitsayaꞌ. Dari lay du ya ngasip ni Tuhan nohoꞌ buwat bahitlaꞌ man nalamat ga paglūng na. Maka sabapan pangando na, lay ya initung meꞌ Tuhan intong. Sugaꞌ kuwan jama lahat na, yaꞌ kuhi pitsayaꞌ pag binaan meꞌ Nabi Nū luu takka dunuk. Batan inawnan dunuk, yaꞌ gi san bay pingkaꞌ takita leꞌ manusiyaꞌ. Dari sabap yaꞌ sila mmeꞌ pitsayaꞌ ni Nabi Nū, ilooy na man da bay kalabuan hukuman kapatoy ni bay dunuk looy.

Hibrani 12:13

Nūs jaꞌ kam lān intong supaya luu inuru meꞌ pagkahi bi ma yaꞌ gi takkoꞌ pangando da. Meꞌ looy ilay, yaꞌ sila magsiꞌ, gam pin pabasag pangando da sabapan bi.

Hibrani 13:18

Siga danganakan, pakuhan bi na pin kami duwaa supaya wā kami moo kabantugan pa Tuhan man sabapan kawul-piil kami. Kamasaꞌ, san itu kami maku meꞌ tuu, katoonan kami du yaꞌ luu ni kawul-piil kami gantaꞌ pataꞌ man kami sinusunan.

1 Pitel 2:24

Boꞌ lay gi paglillaꞌ na baran na llansang taꞌ tehang bong pin tatanggung na jaꞌ dusa tabi. Kon na buwat meꞌ looy supaya patagong na kitabi buwat dusa boꞌ tabi makutuꞌ meꞌ buwat kaintongan. Dari meꞌ halling njawom kitab, “Man sabapan siga bakat bisa ni baran na, kaulian na kitabi.”

1 Yahiya 3:22

Boꞌ na, oy-oy paku tabi pa Tuhan, nduwan jaꞌ sina kitabi batan asip tabi jaꞌ siga panohoan na maka pabuwat tabi ilooy ma kasulut niiya.