Yahiya 12:48 - Sabahagiꞌ Kitab Tawrat: Panagnaan ni Awwal Jaman maka Kitab Injil

⁴⁸ Sugaꞌ pag taabut llaw dambuli, mastiꞌ kalabuan jaꞌ sina hukuman sagannap ma bay nuwak aku ka tōꞌ ku. Boꞌ pindoga man da kalabuan hukuman, yana tōꞌ ku.

Yahiya 12:48 ပူးပေါင်းရင်းမြစ်များ

Matiyu 10:15

Baan ta kam banahan, pag ina mintu taabut llaw hukuman Tuhan, bohat gi sina mintu mulkaꞌ njataꞌ da man ilooy ma bay katuwaꞌ ni siga jama Sodom ka Gomora.”

Matiyu 21:42

Pus meꞌ looy siꞌ, yuk si Isa ninsila, “Yaꞌ kilay kam bay kabatsa suwat njawom kitab, ilooy ma yuk na, ‘Batu ma bay tinimanan meꞌ siga tukang buwat lumaꞌ batu, ilooy ya bay dari patingkat kapansahaliyan na man sikamimon. Ilooy ilay siꞌ man gantaan Tuhan na du, boꞌ tud kainu-inu ningkitabi.’

Matiyu 25:31

Yuk si Isa lagi, “Pag ina mintu takka Anak Manusiyaꞌ ni kaehe sahayaꞌ na haboyan mimon malaikat, ningkōꞌ na ya ni paningkoan kawasa-kapatut magsultan.

Malkus 12:10

Yuk si Isa lagi, “Kahalan anak dapu kabbun looy ilay siꞌ magtuntun du ka suwat njawom kitab ma pinagbatsa meꞌ bi, ilooy ma yuk na, ‘Batu ma bay tinimanan meꞌ siga tukang buwat lumaꞌ batu, ilooy ya bay dari patingkat kapansahaliyan na man sikamimon.

Malkus 16:16

Soysoy ina pitsayaꞌ niyaku sampay bay pinandi, malaingkan salamat na ya. Sugaꞌ soysoy ina yaꞌ pitsayaꞌ, kalabuan du sina hukuman Tuhan.

Malkus 8:31

Na puwas mandooy, lay na baw si Isa mahati siga mulit na bong oy katuwaꞌ niiya ni sinōng, yuk na, “Ndang lay na situ ginantaꞌ niyaku, yana Anak Manusiyaꞌ, natasan jinisan kabinsanaan. Boꞌ tinuwak lagi ku meꞌ siga matatoa ni agama ka ga imam langkaw sampay ga guru saraꞌ agama. Maka pinapatoy lagi ku. Sugaꞌ pag ina mintu taabut ni katallu ngallaw, llum na du sina ku pabalik.”

Lukas 10:16

“Na kuwan kaam siga mulit ku, soysoy ina mintu ngahasi bitsala bi, saliꞌ du sila ka bay ngahasi bitsala ku. Soysoy nuwak kaam, saliꞌ du ka aku bay tuwak da. Maka soysoy nuwak aku, saliꞌ du sila ka nuwak ilooy ma bay mapitu aku.”

Lukas 17:25

Sugaꞌ talpaksaꞌ doꞌ sina mintu niyaku duhuꞌ lumingkaꞌ njawom jinisan kabinsanaan sampay tinuwak meꞌ jama angkat-angkatan batnaa.

Lukas 20:17

Pag-anu, ilooy ma ngandaꞌ si Isa pa mman da sambayan na halling, “Pooy meꞌ na niyaꞌ? Pahamun bi teꞌ bong oy kamaatunan suwat looy njawom kitab, ilooy ma yuk na, ‘Batu ma bay tinimanan meꞌ siga tukang buwat lumaꞌ batu, ilooy ya bay dari patingkat kapansahaliyan na man sikamimon.’

Lukas 7:30

Boꞌ siga Parisi ka ga guru saraꞌ agama lay jaꞌ nuwak kahandak Tuhan batan yaꞌ sila bay kuhi pinandi meꞌ si Yahiya.

Lukas 9:22

Maka yuk na lagi, “Ndang lay na situ ginantaꞌ talpaksaꞌ niyaku, yana Anak Manusiyaꞌ, natasan jinisan kabinsanaan. Boꞌ tinuwak lagi ku meꞌ siga matatoa ka ga imam langkaw sampay ga guru saraꞌ agama. Maka pinapatoy lagi ku. Sugaꞌ pag ina mintu taabut ni katallu ngallaw, llum na du sina ku pabalik.”

Lukas 9:26

“Soysoy ina iyaꞌ mangaku mmeꞌ niyaku ka tōꞌ ku, malaingkan aku, yana Anak Manusiyaꞌ, iyaꞌ du ku mangaku iya sukuꞌ ku pag beleng ku pa junyaꞌ ddas ka kawasa lakka man kami ka Mmaꞌ ku sampay ga malaikat na.

Yahiya 11:24

Tampung si Malta baw siꞌ tu, “Ohoꞌ Papuꞌ, ndang katoonan ku llum jaꞌ silay ya bbalik ni llaw dambuli pag taabut mimon manusiyaꞌ ma bay matoy pinakallum.”

Yahiya 5:45

Sugaꞌ daa kam mista ga aku nusunan kaam ni awpan Mmaꞌ ku bbos-bbos. Arapun iya ilay mintu nusunan kaam yana Nabi Musa ma asahan bi nanggehan kaam.

Yahiya 6:39

Kahandak na ina, subay ayaran ku sagannap ma bay sinukuꞌ meꞌ na niyaku mari yaꞌ hilang san disu man jawom okoman ku. Batan kahandak Mmaꞌ ku subay mimon ma pitsayaꞌ sampay mangando ni Anak na binuwanan kasampulnaan nyawa ma yaꞌ luu katapusan na. Dari san sila matoy, pag taabut llaw dambuli, pakallum ku du sila pabalik.”

Yahiya 8:47

Bong ina jama sabana-bana sukuꞌ Tuhan, mastiꞌ gāk jaꞌ ya pakale ni umanat Tuhan. Boꞌ kaam itu, yaꞌ kam doman pakale sabap saꞌ kam sukuꞌ Tuhan.”

Salsila siga Rasul 17:31

Batan luu du sina mintu disu llaw bay ginantaꞌ meꞌ Tuhan man mimon manusiyaꞌ hinukum meꞌ disu lalla bay pineneꞌ meꞌ na. Hukuman na ilay mintu intong jaꞌ. Lalla looy ilay siꞌ bay na matoy. Sugaꞌ lay na du ya pinakallum meꞌ Tuhan mari tumatandaꞌ na ni manusiyaꞌ sikamimon iya na bay pineneꞌ ngahukum sila.”

Salsila siga Rasul 3:23

Pag lahil nabi looy ilay mintu, sagannap ma yaꞌ ngahasi bitsala na, yaꞌ na tabeꞌ ni sukuꞌ Tuhan. Boꞌ na, ilooy na silay mintu poonan man da binasa.’ ”

Suwat si Pol pa mman Baanan Sukuꞌ si Isa ndooy ni Rom 2:16

Dari oy-oy jaꞌ ina bay pabuwat manusiyaꞌ, yaꞌ sina takupan ngabut sampay llaw bay ginantaꞌ meꞌ Tuhan man si Isa Almasi ngahukum. Ni llaw looy ilay mintu, sampay mimon ma bay tinapuk njawom atay manusiyaꞌ pinōꞌ na meꞌ Tuhan, boꞌ da hinukum na. Na mimon ilay ma bay sabbut ku siꞌ, tabeꞌ du sina ni umanat mahap ma pasaplag ku.

2 Korin 4:3

Salla na, kasohean baw yaꞌ tahati da umanat mahap ma pinasaplag meꞌ kami. Sugaꞌ sabana na, kon da ina yaꞌ kahati sabap yaꞌ sila doman pitsayaꞌ. Sangkon lān tinūs meꞌ da song pa nalkaꞌ.

2 Tesaloneka 1:8

Iya ina mintu duwai ddas ka api noleyab man na midjalaꞌ sagannap ma nuwak Tuhan ka sagannap ma yaꞌ mmeꞌ ni umanat mahap pasal Papuꞌ tabi si Isa.

Hibrani 10:25

Daa kitabi ngakig kasohean ma nabiat yaꞌ mmeꞌ bila pagkahi da kumpo-kumpo numba. Arapun subay kitabi mmeꞌ sampay sibuwansang-buwansang pa kaayaran, labi na ni timpu batnaa pagka song patapit na pin llaw man Papuꞌ Isa pabeleng.

Hibrani 12:25

Sangkon, amay-amay daa tuwakun bi umanat Tuhan ningkaam batnaa. Mamintang doꞌ kam ni bay jaman kabboꞌ-bboan tabi. Bong sila bay pinidjalaꞌ sabap meꞌ da nuwak bitsala lalla looy man junyaꞌ, yana Nabi Musa, labi na saꞌ kitabi pinidjalaꞌ bong tuwak tabi na baw bitsala lalla looy ma lakka man sulgaꞌ.

Hibrani 2:3

Na bong meꞌ looy bay katuwaꞌ ninsila, pooy meꞌ tabi kailag mulkaꞌ Tuhan bong pabiya tabi umanat kasalamatan, meꞌ naa na ehe hagaꞌ na? Umanat looy ilay, Papuꞌ Isa mismu bay duhuꞌ masaplag. Pag-anu, kuwan sila ma bay kale niiya balharapan, sila na baw bay masaplag sampay muwanan kitabi buktiꞌ tud bana bitsala na.

Hibrani 4:12

Na palman Tuhan ina kawasahan boꞌ kabuwan gi kaallum bahau. Dari ko ngawon, palman na tawom gi man kataliꞌ batan ngassob sina pa jawom atay tabi sampay pa nyawa tabi. Maka palman na ina, inaa na man tabi mindoga bong mahap atawa maat pamiki tabi ka niyat atay tabi.

1 Pitel 1:5

Maka man sabapan pangando bi ni si Isa, agpangan Tuhan na pin sina kam ni kaehe kawasa na ngkod-ngkoran yaꞌ gi bay takoleꞌ bi kasalamatan ma song pinalahil ni llaw dambuli.

2 Pitel 3:3

Sugaꞌ ilooy duhuꞌ subay tahati bi meꞌ tuu: Ni ahil jaman, meka sina mintu pangaludjum. Ilooy du meꞌ punu njawom atay da nganduwan napsu da sadjaꞌ.

2 Pitel 3:7

Damikiyan, gumi ka langit ma luu ni batnaa, ampud leꞌ api bbos-bbos man sabapan palman Tuhan du. Sugaꞌ nilantan gi sina ngkod-ngkoran yaꞌ gi taabut llaw hukuman, yana llaw man Tuhan makaat sagannap ma yaꞌ luu tawu da niiya.