Siga Pakaradjaan bay Pinalahil 7:9 - Sabahagiꞌ Kitab Tawrat: Panagnaan ni Awwal Jaman maka Kitab Injil

⁹ Pus meꞌ looy, ngita na baw ku sakiyan manusiyaꞌ nangge ni awpan ilooy ma ningkōꞌ taꞌ paningkoan mehe looy ka ni awpan Bili-bili looy. Ni kaeka da, yaꞌ na taitung. Luu na ndooy manusiyaꞌ lakka man mimon kalahat-lahatan ka mimon kabangsa-bangsahan, kaniya-kaniya ka jinisan pallun da. Boꞌ saliꞌ-saliꞌ sila jubahan poteꞌ maka saliꞌ-saliꞌ sila ngalabad-labaran pappaꞌ kalapaꞌ-sawit ni kagāk da.

Siga Pakaradjaan bay Pinalahil 7:9 ပူးပေါင်းရင်းမြစ်များ

Panagnaan 13:16

Maka panubuꞌ ma dean ku ina mintu ningkau, mas mura gi initung momok tanaꞌ man sila tandaꞌ ni kaeka da.

Panagnaan 49:10

Maka Juda, luu sina mintu siga panubuꞌ nu magsunuꞌ-sunuꞌ magsultan ni lahat tabi. Boꞌ luu gi sina mintu lahil panubuꞌ nu ilooy ma yaꞌ na kuhi labbos pagkasultan na saumu. Iya ina mintu yana sultan ma inasip meꞌ mimon kabangsa-bangsahan.

Lukas 12:1

Na jaman looy siꞌ, libu-libuhan na manusiyaꞌ lay kumpo ni awpan si Isa. Magdogsog-dogsog na sila sampay sikagiok-kagiok battis na ga. Na pag nagnaꞌ si Isa mitsala, duhuꞌ-duhuꞌ yuk na ni ga mulit na, “Iyakin kam mari kam yaꞌ kalakkotan meꞌ arat siga Parisi. Sila ina magbawuꞌ-bawuꞌ jaꞌ sutsiꞌ. Kalaatan da ina meꞌ karuha pasulig njawom addunan taligu. Batan tabiat pasulig ina, san dangkitiꞌ du inannaꞌ, pag ngassob na, kalakkotan mimon addunan na.

Lukas 21:36

Sangkon, subay kam wā saddiya. Maka maku na pin kam duwaa mari taggu iman bi natasan mimon katiksaan ma bay sabbut ku siꞌ. Maka maku na pin kam duwaa, kamura-murahan yaꞌ du luu meꞌ bi hinaꞌ pag taabut bi ngawpan aku, yana Anak Manusiyaꞌ, bbos-bbos.”

Yahiya 12:13

Dari lay sila ngaddoꞌ siga pappaꞌ kalapaꞌ-sawit boꞌ binoo pōꞌ man daira song pilay nampang iya. Takita da jaꞌ si Isa, bbuwatan da maghowapan mudji iya, yuk da, “Pudji tabi Tuhan! Sinupaatan jama naa ma pitu ni kawasa-kapatut Papuꞌ tabi Tuhan! Sinupaatan ko, sultan bangsa Israil!”

Suwat si Pol pa mman Baanan Sukuꞌ si Isa ndooy ni Rom 11:25

Na siga danganakan, supaya kam yaꞌ ngabbu saula-ula patingkat kam man siga Yahudi, bakkasan ta na kam disu kabanahan ma yaꞌ gi bay tahati maruhuꞌ. Minsan kaekahan Yahudi tohas kōk da yaꞌ kuhi pitsayaꞌ, ndang ilooy silay gantaan ninsila ngkod-ngkoran yaꞌ gi tatuman garaꞌ Tuhan matabeꞌ kabangsa-bangsahan saꞌ Yahudi ni sukuꞌ na.

Epesus 6:13

Sangkon, pakoyun bi na mimon kalangkapan ma bay pamuwan Tuhan supaya kam kaatu ni siga seytan tuktuk luu nasat. Dari san gi oy katuwaꞌ kaam, basta yaꞌ baw sina kam ā meꞌ da.

Hibrani 11:12

Maka Nabi Ibrahim pun, subay siꞌ yaꞌ na du bay hanak batan agon meꞌ anggawtaꞌ jama matoy na ya ni katoa na. Sugaꞌ sabap pitsayaꞌ ya ni janjiꞌ Tuhan, lay ya kabuwanan panubuꞌ meꞌ eka potean taꞌ langit ka ungus ni tapiyan.

Hibrani 12:22

Boꞌ ningkitabi itu batnaa, sarī na punu bay inabut meꞌ tabi. Awon na Punu Zayon, daira Tuhan sabanna ma llum saumu-umu, yana daira Jerusalem man sulgaꞌ. Ndooy ilay, libu-libuhan malaikat kumpo-kumpo njawom kagakan.

Siga Pakaradjaan bay Pinalahil 11:15

Pag-anu siꞌ, pasīng na baw malaikat looy ni kapituꞌ na niyup tabuliꞌ na. Pag pōꞌ halling na, ilooy ma luu siga suwara ngahowap ni sulgaꞌ, yuk da, “Labba man batnaa, yaꞌ na luu pamarinta manusiyaꞌ ni junyaꞌ, isu-isu pamarinta Papuꞌ tabi Tuhan ka ilooy ma bay peneꞌ na, yana Almasi. Boꞌ iya sa marinta saumu-umu.”

Siga Pakaradjaan bay Pinalahil 22:3

Ni daira looy siꞌ, yaꞌ luu sumpaꞌ Tuhan ni oy maka oy na. Maka luu na du ndooy paningkoan Tuhan ka Bili-bili looy man da ningkōꞌ marinta. Siga sukuꞌ Tuhan pun sikamimon, luu na du ndooy numba iya

Siga Pakaradjaan bay Pinalahil 3:18

Sangkon sohoꞌ ta na kam malli niyaku mmas porol ma bay na llakkahan sakot na ka api supaya kam dayahan na ni mata Tuhan. Maka malli na kam pamakoy poteꞌ niyaku mari katambunan na kaiyaan bi nantang. Maka malli na kam niyaku uliꞌ man bi muusan mata bi mari kam ngita.

Siga Pakaradjaan bay Pinalahil 4:4

Maka luu gi ndooy ngaliput paningkoan mehe looy siꞌ duwampuꞌ-mpat paningkoan meꞌ paningkoan sultan du. Maka luu duwampuꞌ-mpat matatoa ningkōꞌ taꞌ ga paningkoan looy. Pamakoy da poteꞌ maka saliꞌ-saliꞌ luu ka karuna mmas taꞌ kōk da.

Siga Pakaradjaan bay Pinalahil 5:11

Mindangoy ko, ngita na baw ku sampay kale gi ku laksaꞌ-laksaan malaikat ni sikaliput paningkoan looy ka ga balnyawa looy sika-mpat sampay ga matatoa looy.

Siga Pakaradjaan bay Pinalahil 5:9

Maka bbuwatan da ngalang kalangan bahau man mudji Bili-bili looy, yuk da, “Kau du tawop ngaddoꞌ suwat naa sampay ngalukap siga kanjiꞌ na sabap lay ko bay nongan umu nu man maddusan manusiyaꞌ man komkoman Ibilis. Lahaꞌ nu bay pinaduwai supaya dari sukuꞌ Tuhan na jama ni mimon kalahat-lahatan ka mimon kabangsa-bangsahan, kaniya-kaniya ka jinisan pallun da.

Siga Pakaradjaan bay Pinalahil 6:11

Pag-anu siꞌ, lay na sila binuwanan juba poteꞌ saliꞌ-saliꞌ boꞌ da nohoꞌ ngagad-ngagad gi dangkitiꞌ. Noy konoꞌ mintu ngabut na gantaan eka pagkahi da ata Tuhan pinapatoy meꞌ karuha da du, boꞌ da binawsan.

Siga Pakaradjaan bay Pinalahil 7:8

sapu-duwa libu yana panubuꞌ si Zebulun, sapu-duwa libu yana panubuꞌ si Yusup, sapu-duwa libu yana panubuꞌ si Benjamin.