Siga Pakaradjaan bay Pinalahil 20:12 - Sabahagiꞌ Kitab Tawrat: Panagnaan ni Awwal Jaman maka Kitab Injil

^12-13 Pag-anu siꞌ, takita ku na baw mimon manusiyaꞌ ma bay matoy, balkanan maka saꞌ balkanan, nangge ni awpan paningkoan looy. Mimon manusiyaꞌ ma bay matoy pa dile pa dilawut, yana mimon manusiyaꞌ ma bay njawom tahanan jama matoy, luu na nangge ndooy ni awpan paningkoan looy. Dari siꞌ, inungkad na Būk Kaallum man bay ngalista awon sagannap ma luu kasampulnaan nyawa da saumu-umu. Maka lay na du inungkad siga būk man bay nuwatan mimon kawul-piil manusiyaꞌ mahap-maat halloman da bay taꞌ junyaꞌ. Sampay lay na binotangan hukuman ga jama looy siꞌ labbasakayi pinagpataꞌ ka bay pabuwatan da jawom siga būk looy siꞌ.

Siga Pakaradjaan bay Pinalahil 20:12 ပူးပေါင်းရင်းမြစ်များ

Matiyu 11:22

Sangkon, baan ta kam banahan, pag ina mintu taabut llaw hukuman Tuhan, bohat gi sina mulkaꞌ njataꞌ bi man mulkaꞌ Tuhan njataꞌ siga jama man Tayil ka Saydon.

Matiyu 16:27

Ni sinōng, pabeleng du situ Anak Manusiyaꞌ ka ga malaikat na pa junyaꞌ liput meꞌ sahayaꞌ Mmaꞌ na. Pag-anu, boꞌ na nungbasan mimon manusiyaꞌ ni oy-oy bay pabuwat da, mahap-maat.

Lukas 10:20

Sugaꞌ saꞌ du sina inaa puntukan banahan man bi gāk sukat kam inasip meꞌ siga seytan. Arapun ilooy ya subay kagakan bi banahan, sabap lay na sinuwatan awon bi ni listahan jama sukuꞌ sulgaꞌ.”

Salsila siga Rasul 24:15

Maka sibuꞌ du ku ka ga pagkahi ku Yahudi ntuu pitsayaꞌ mimon manusiyaꞌ ma lay na matoy, intong saꞌ intong, mastiꞌ pinakallum du bbos-bbos.

Suwat si Pol pa mman Baanan Sukuꞌ si Isa ndooy ni Rom 2:6

Ndaun bi sa, mastiꞌ tinungbasan jaꞌ sina mintu meꞌ Tuhan mimon manusiyaꞌ saliꞌ-saliꞌ magtūk ka bay pabuwatan da.

1 Korin 4:5

Sangkon daa subay na pin kam os-os manding pabuwatan jama. Agarun bi na doꞌ katakka Papuꞌ. Iya sa mungka mimon ma bay sinipuk sampay mimon niyat atay jama. Bong ina mintu mahap du niyat atay da, koleꞌ jaꞌ sina sila saliꞌ-saliꞌ sanglit Tuhan.

2 Korin 5:10

Batan ndang bay sina ginantaꞌ ningkitabi sikamimon pinaawop ni Almasi hinukum. Pag-anu, boꞌ tabi tinungbasan na sabapan mimon ma bay pabuwat tabi mahap-maat.

Pilipi 4:3

Maka Susugus, meꞌ kau disu pagkahi ku magkanaalla mmeꞌ ni kahandak Tuhan, subay ko nabang nalassay supaya sikatuwaꞌ na ga danda naa sikaduwa. Sila ina bay magtuyuꞌ-tuyuꞌ nabangan aku masaplag umanat mahap. Maka bay du sila nabangan si Kelemen ka siga limbang ku kasohean maghulas-sangsāꞌ kalnaꞌ Almasi. Sila ilay sikamimon, lay na tabeꞌ awon da njawom Būk Kaallum man ngalista awon sagannap ma luu kasampulnaan nyawa da saumu-umu.

Siga Pakaradjaan bay Pinalahil 11:18

Kuwan sagannap ni junyaꞌ ma yaꞌ mmeꞌ ningkau, tud lasu ningkau. Sugaꞌ taabut na waktu man da ngissa mulkaꞌ nu. Taabut na waktu bay ginantaꞌ man nu ngahukum sikamimon ma bay matoy. Maka taabut na du waktu man nu makaat sagannap ma bay makaat junyaꞌ. Kuwan siga ata nu, yana kanabi-nabihan sampay mimon sukuꞌ nu balkanan maka saꞌ balkanan ma ngisbat kau, binuwanan na du meꞌ nu tungbas ayad.”

Siga Pakaradjaan bay Pinalahil 13:8

Dari dak mimon na manusiyaꞌ taꞌ babaw junyaꞌ numba sattuwa looy na. Ilooy du yaꞌ numba iya yana sagannap ma lay na sinuwatan awon da njawom Būk Kaallum man ngalista awon sagannap ma luu kasampulnaan nyawa da saumu-umu. Awon da ilay ndang lay na sinuwatan njawom būk looy labba man kapayak junyaꞌ. Ilooy ma dapu būk looy yana Bili-bili looy ma bay pingkaꞌ pinapatoy.

Siga Pakaradjaan bay Pinalahil 17:8

Kuwan sattuwa looy siꞌ ma bay takita nu, ndang bay luu silay maruhuꞌ-ruhuꞌ, pag batnaa lay na ya limbu. Sugaꞌ yaꞌ na du sina hallom, luu na du ya kaluwa pabalik man jawom lowang tangob looy ma yaꞌ mag-ngkoran lawom na. Sugaꞌ pag beleng na ina mintu, yaꞌ du hallom, tanalkaꞌ du ya. Pag ilay mintu pōꞌ sattuwa looy, tud inu-inu jama sukuꞌ junyaꞌ, yana sagannap ma ndang yaꞌ bay sinuwatan awon da njawom Būk Kaallum labba man kapayak junyaꞌ. Ngkon da ina mintu inu-inu ni sattuwa looy sabap ndang luu na ya maruhuꞌ, pag-anu, lay na limbu, sugaꞌ luu na sina mintu kaluwa pabalik.”

Siga Pakaradjaan bay Pinalahil 19:5

Pag-anu siꞌ, luu na baw suwara pōꞌ man tagan paningkoan Tuhan, yuk na, “Kaam, siga sosohoan Tuhan, yana kaam ma ngisbat iya, balkanan saꞌ balkanan, pudjihun bi du Tuhan tabi.”

Siga Pakaradjaan bay Pinalahil 2:23

Mimon ma mmeꞌ meꞌ uwahan na, papatoy ku du sina. Dari pag mintu meꞌ looy, tabista na sina meꞌ mimon baanan sukuꞌ ku, mastiꞌ tasayu ku jaꞌ bong oy njawom atay manusiyaꞌ ka pamiki da. Maka aku du nungbasan sila saliꞌ-saliꞌ magbēꞌ ka pabuwatan da mahap-maat.

Siga Pakaradjaan bay Pinalahil 20:11

Pag-anu siꞌ, ngita na baw ku disu paningkoan sultan, tud mehe ka poteꞌ. Maka luu na du takita ku ilooy ma ningkōꞌ ndooy. Kuwan junyaꞌ ka langit, lay na lanyap man pag-awpan na sampay yaꞌ na takita pabalik.

Siga Pakaradjaan bay Pinalahil 21:27

Sugaꞌ oy-oy jaꞌ kalalamaan ma katamak ni manusiyaꞌ, saumu yaꞌ dari paasok pa jawom daira looy. Damikiyan, soysoy buwat kasabuhan atawa ngandustaꞌ yaꞌ du dari paasok. Ilooy du kapaasok pilay yana sagannap ma bay tasuwatan awon da njawom Būk Kaallum. Ilooy ilay siꞌ yana Būk Bili-bili looy man ngalista awon sagannap ma luu kaallum da saumu-umu njawom okoman Tuhan.

Siga Pakaradjaan bay Pinalahil 22:12

Pag-anu, yuk Papuꞌ Isa, “Iyakin kam batan tapit na sina katakka ku. Pag takka ku, tungbasan ku na sina mintu sikamimon manusiyaꞌ magpataꞌ ka bay pabuwatan da.

Siga Pakaradjaan bay Pinalahil 3:5

“Na soysoy ina kanaalla mmeꞌ niyaku tanne-pasuꞌ, malaingkan pinapatukan du sina mintu pamakoy poteꞌ. Maka basta yaꞌ du sina pawman ku awon da man jawom Būk Kaallum man ngalista awon sagannap ma luu kasampulnaan nyawa da saumu-umu. Boꞌ na, mangaku du sina ku sila sukuꞌ ku ni awpan Mmaꞌ ku Tuhan ka ga malaikat na.