Siga Pakaradjaan bay Pinalahil 14:4 - Sabahagiꞌ Kitab Tawrat: Panagnaan ni Awwal Jaman maka Kitab Injil

⁴ Sutsiꞌ sila. Kanaalla sila pa Tuhan. Sibuꞌ du karuha da ka lalla ma yaꞌ kuhi magjina. Maka paninggai-paninggai Bili-bili looy, luu na pin sila patuhut niiya. Sila ilay yana sagannap manusiyaꞌ ma lay nilakkat man komkoman Ibilis supaya sila dari sukuꞌ Tuhan. Sila meꞌ sapantun buwaꞌ kattoman ma pabiddaꞌ ayad na sinongan pa Tuhan ka Bili-bili looy.

Siga Pakaradjaan bay Pinalahil 14:4 ပူးပေါင်းရင်းမြစ်များ

Matiyu 19:12

Meka sina danan man kasohean lalla yaꞌ handa. Disu, ndang luu na salla ni baran da labba man kūn induꞌ da lagi. Kuwan kasohean, kon da yaꞌ handa sabap bay pinakaat meꞌ jama baran da. Kuwan kasohean, ndang yaꞌ doman handa sabap yaꞌ sila doman luu gi kasanggalang ninsila malān pamarinta Tuhan. Na soysoy ina doman nūs limpaꞌ da, pilayun bi.”

Matiyu 25:1

Yuk si Isa lagi, “Pag beleng Anak Manusiyaꞌ pa junyaꞌ magsultan, meꞌ tuu karuha na: Luu budjang sapū kaniya-kaniya ka palitaan da lay pōꞌ sangom nampang pangantin ma lalla.

Matiyu 8:19

Saddong da adak palakka, luu na baw disu guru saraꞌ agama pasōng pa mman si Isa, yuk na, “Tuwan, mmeꞌ ku la ningkau paninggai-paninggai jaꞌ ko.”

Yahiya 10:27

Batan bong ina siga sukuꞌ ku, mastiꞌ pakale jaꞌ ni suwara ku. Lungbid kami ka sila maka mmeꞌ na jaꞌ sila niyaku.

Yahiya 12:26

Soysoy doman buwat kahandak ku, subay du nūs lān ku supaya nnoy-nnoy mman ku, ndooy du ya. Maka sagannap ma buwat kahandak ku, mastiꞌ pinaehe sina mintu meꞌ Mmaꞌ ku.”

Yahiya 13:37

Tilaw si Pitel baw, “Papuꞌ, ongoy baw taggahaꞌ yaꞌ gi ku kapa-mmeꞌ ningkau batnaa? Atas ku bitu nongan umu ku kalnaꞌ kau.”

Yahiya 8:12

Pag-anu, luu na baw disu waktu si Isa noan jama, yuk na, “Aku tu yana sūꞌ marantaan pamiki manusiyaꞌ. Soysoy mmeꞌ niyaku, yaꞌ na sila bagagap njawom lindom batan luu na sūꞌ da man da ngita lān pa kasampulnaan nyawa.”

Salsila siga Rasul 20:28

Pag-anu, yuk si Pol lagi ni ga pa-mmean looy, “Ilagan bi dī bi. Maka ayaran bi mimon sukuꞌ si Isa ma bay hinalap meꞌ Rū Sutsiꞌ ningkaam. Tud kinasengan sina sila meꞌ Tuhan. Sila ilay meꞌ sapantun altaꞌ Tuhan ma bay binalli meꞌ na ka lahaꞌ Anak tungga na.

1 Korin 16:15

Na nnaa ina ni Akaya, katoonan bi na du ga si Estepanas sampay na jama lumaꞌ na bay duhuꞌ pitsayaꞌ ni Papuꞌ Isa. Sila ina basag nabangan siga sukuꞌ Tuhan. Sangkon na siga danganakan, junjung ku na ningkaam,

1 Korin 6:20

batan biddaꞌ na bay ehe bayad na supaya kitabi dari sukuꞌ na. Sangkon pakoyun bi baran bi man bi moo kabantugan niiya.

1 Korin 7:28

Na bong baw luu doman handa atawa halla, yaꞌ du baw na luu laat na. Sat na jaꞌ, bong kam handa atawa halla ni timpu batnaa, nammu na baw sina kam jinisan kasusahan. Boꞌ yaꞌ ku doman bong kam nammu lagi kasusahan.

2 Korin 11:2

Aku itu, meꞌ Tuhan na du sēng ningkaam. Batan meꞌ ku ka kaam, sibuꞌ du kam ka budjang bay pinagsitunang meꞌ ku ka disu lalla, yana Almasi. Sangkon subay kam jagahan ku paayad.

Epesus 1:14

Boꞌ Rū Sutsiꞌ ina yana katakkoan man tabi katantu takoleꞌ tabi mimon ma bay hinalliꞌ meꞌ Tuhan ni sukuꞌ na. Maka tatantu tabi na bbos-bbos puhu na kasalamatan tabi takoleꞌ tabi pamaehe sanglit ka kabantugan pa Tuhan.

Epesus 5:27

Kon na nongan umu na supaya tahasi na kitabi bilang pangantin ma danda lingkatan saꞌ na tapandang, ma sutsiꞌ sampay yaꞌ luu salla na atawa tamak na.

1 Timuti 4:3

Dari njawom tōꞌ da, bong jama doman sutsiꞌ banahan, subay sila konoꞌ yaꞌ handa atawa halla. Maka baꞌ-bāꞌ da, luu lawuk yaꞌ dari kinakan. Mingkan ilay siꞌ, mimon lawuk ma pamāꞌ da haram bay pinapayak meꞌ Tuhan. Dari mimon ma pitsayaꞌ ni si Isa ka toon tōꞌ sabanna dari muwan pagsukuhan pa Tuhan sabapan lawuk looy sampay mangan.

Hibrani 12:23

Maka ndooy ilay, lay na tabi takka pa jawom kumpohan sagannap ma ginalla siga anak Tuhan siyaka, yana sagannap ma pitsayaꞌ ni Almasi, ma lay na talista awon da ni sulgaꞌ. Maka lay na tabi takka pa jawom baanan siga rū jama intong mattoꞌ ma yaꞌ na luu salla na. Maka lay na tabi takka pa mman Tuhan, yana tukang ngahukum manusiyaꞌ sikamimon.

Yaꞌkub 1:18

Man kahandak na, lay na ya muwanan kitabi kaallum bahau sabap meꞌ tabi pitsayaꞌ ni umanat kabanahan pasal Almasi. Maksud na supaya tumatandaꞌ na kitabi patingkat niiya man mimon-mimon ma bay pinapayak meꞌ na.

1 Pitel 2:9

Boꞌ kaam ina ma pitsayaꞌ ni Almasi, lay na kam pineneꞌ meꞌ Tuhan binuwat baanan siga imam ka sultan njawman pamarinta na. Boꞌ lay gi kam pabuwat Tuhan bangsa sutsiꞌ ma inaku leꞌ na sukuꞌ na. Kahandak na masaplag na kam kaayaran na. Batan lay na kam pinōꞌ meꞌ na man jawom kalindoman, sampay lay na kam lliyun pa jawom karantaan na ma yaꞌ luu sibuꞌ sabanding na.

Siga Pakaradjaan bay Pinalahil 17:14

Bbuwatan da ina mintu, moo Bili-bili looy sibonoꞌ. Sugaꞌ ā du sila meꞌ Bili-bili looy ka siga sukuꞌ na, yana sagannap ma bay peneꞌ na sampay liyun na pa jawom okoman na, ma magkanaalla mmeꞌ niiya. Kon na ina mintu ga Bili-bili looy kaā sabap iya Papuꞌ ninggi taꞌ mimon papuꞌ; Sultan ninggi taꞌ mimon sultan.”

Siga Pakaradjaan bay Pinalahil 21:22

Bong langga, yaꞌ ku bay ngita ni daira looy batan ndang luu na pin ndooy Papuꞌ tabi Tuhan Sangat Kawasa ka Bili-bili looy. Dari ni pag-awpan da na mismu man manusiyaꞌ numba.

Siga Pakaradjaan bay Pinalahil 21:23

Maka ni daira looy, san yaꞌ na luu mataallaw atawa buwan, batan ndang luu na sahayaꞌ Tuhan ninag ndooy. Maka Bili-bili pun yana sūꞌ ni daira looy.

Siga Pakaradjaan bay Pinalahil 3:4

Sugaꞌ yaꞌ du baw tu ga labbasakayi na kam susunan ku, batan luu gi du baw sina disu-disu nnaa ni Saldis masi sutsiꞌ. Dari ko ngawon, yaꞌ sila bay matamakan pamakoy da. Sila ina mintu kapahaboy niyaku ddas ka pamakoy poteꞌ sabap tawop sila niyaku.

Siga Pakaradjaan bay Pinalahil 5:9

Maka bbuwatan da ngalang kalangan bahau man mudji Bili-bili looy, yuk da, “Kau du tawop ngaddoꞌ suwat naa sampay ngalukap siga kanjiꞌ na sabap lay ko bay nongan umu nu man maddusan manusiyaꞌ man komkoman Ibilis. Lahaꞌ nu bay pinaduwai supaya dari sukuꞌ Tuhan na jama ni mimon kalahat-lahatan ka mimon kabangsa-bangsahan, kaniya-kaniya ka jinisan pallun da.