Pilipi 3:15 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹⁵ Sangkon kaam ma taggu na iman bi, sapatut na dambuwaꞌ pamiki na kam ka aku ni hāl angan-angan tabi. Sugaꞌ bong luu nnaa kasohean yaꞌ numan ni pamiki da bay bitsala ku siꞌ, bbos-bbos pinalahil du sina meꞌ Tuhan kabanahan ningkaam.

Pilipi 3:15 ပူးပေါင်းရင်းမြစ်များ

Matiyu 5:48

Sangkon, subay mahap gi man mahap arat-tabiat bi meꞌ karuha arat-tabiat Mmaꞌ bi Tuhan.”

Lukas 11:13

Na bong kaam manusiyaꞌ pandoy muwan pakaradjaan ayad ni anak bi san meka kalaatan bi, labi na Mmaꞌ bi Tuhan ni sulgaꞌ saꞌ pandoy muwanan kaam pakaradjaan ayad. Sampay Rū Sutsiꞌ, dean na du sina soysoy maku.”

Yahiya 6:45

Ndang luu bay sinuwatan njawom kitab kanabi-nabihan, ilooy ma yuk na, ‘Mimon sila tinoan meꞌ Tuhan bbos-bbos.’ Intong na, sagannap ma pakale ni Mmaꞌ ku maka nganna tōꞌ na, mastiꞌ mmeꞌ niyaku.

Yahiya 7:17

Soysoy ina doman mean kahandak Tuhan, malaingkan tasilang na jaꞌ bong tōꞌ ku tud lakka man Tuhan atawa lakka man dī ku sadjaꞌ.

Suwat si Pol pa mman Baanan Sukuꞌ si Isa ndooy ni Rom 15:1

Na kitabi itu ma basag pangando tabi, sapatut na, subay takissa tabi parasahan siga danganakan tabi ma kulang pangahati, ma yaꞌ gi basag pangando da. Maka subay sila pinasensiya meꞌ tabi ni kasaan pamiki da. Daa subay na pin kahandak tabi jaꞌ duwan tabi.

1 Korin 14:20

Siga danganakan, kaam ina ma bay kaladjikian mitsala ni siga pallun ag-agan, sibuꞌ du karuha bi ka anak-anak luu kuli-kulihan na bahau tud kinasengan meꞌ na. Sugaꞌ ddong na kam ngakig pamiki anak-anak. Akigun bi na siga matatoa patong pamiki da. Luu baw beꞌ disu pakaradjaan ma pataꞌ man bi ngantanan pamiki anak-anak dikiꞌ, yana hāl meꞌ da yaꞌ kapiki nulun-nulun kalaatan.

1 Korin 2:6

Na kami tu, saꞌ baw ga yaꞌ na kami mōꞌ tōꞌ lawom. Batan tuktuk kami noan sagannap ma taggu iman da, mastiꞌ mōꞌ du kami. Sugaꞌ tōꞌ lawom ma pinasampay meꞌ kami saꞌ ga tōꞌ ma hagaan ni jama ma yaꞌ pitsayaꞌ ni si Isa. Maka saꞌ du tōꞌ ma hagaan ni siga pa-mmean ni junyaꞌ ma yaꞌ ngisbat Tuhan, yana sagannap ma yaꞌ luu kasongan da.

Galatiya 5:10

Kamasaꞌ, pagka ina kam ndang luu na njawman Papuꞌ Isa, tatantu ku mastiꞌ pabeleng du sina kam pa kabanahan ma bay tōꞌ ku ningkaam. Boꞌ ga jama looy ilay ma ngalingog pamiki bi ka tōꞌ palsu, soy maka soy na, basta kalabuan jaꞌ sina sila hukuman meꞌ Tuhan.

Epesus 1:17

Maku na pin situ ku duwaa pa Mmaꞌ tabi ma yaꞌ luu sibuꞌ sabanding na, yana Tuhan Papuꞌ tabi si Isa Almasi. Kamura-murahan binuwanan du kam pangahati lawom ni hāl Tuhan supaya magsasōng na pin meꞌ bi lungbid ka iya.

Kolossa 1:28

Dari inaa na sina kon kami masaplag pasal iya ni sikamimon bangsa. Sabuli-buli kami na situ mupusan kapandoyan bay pamuwan Tuhan ningkami man kami noan sila sampay ngawalan sila. Batan kainagon kami sikamimon ma mmeꞌ ni Almasi yaꞌ na luu sutsutan njataꞌ da ni mata Tuhan.

Kolossa 4:12

Maka luu gi ntuu jama lahat bi du, yana si Epapras, lay du bay nohoꞌ masampay salam duwaa na ningkaam. Iya itu sabana-bana sosohoan si Isa Almasi. Basag ya makuhan kaam duwaa supaya taggu iman bi maka supaya tatantu bi bong oy kahandak Tuhan ningkaam.

1 Tesaloneka 4:9

Na ni hāl meꞌ bi maasean siga danganakan bi sukuꞌ si Isa, san yaꞌ na patabeꞌ kami ni suwat tuu. Ndang-ndang lay na du kam tinoan meꞌ Tuhan sikaaseꞌ-kaaseꞌ.

2 Timuti 3:17

Bong ina tud kinanna du meꞌ siga sukuꞌ Tuhan isi kitab, malaingkan yaꞌ na luu kulang da man da majatu mimon pabuwatan mahap bay sinukuꞌ ninsila.

Hibrani 5:14

Boꞌ jama ma nganna sampay tattap mean kabanahan, malaingkan biyasa na sila nilang tōꞌ ma mahap ka tōꞌ palsu. Sila ilay meꞌ sapantun jama mehe na ma takaya da na mangan sumbalian.

1 Yahiya 2:5

Sugaꞌ soysoy ngasip ni siga panohoan Tuhan, tumatandaꞌ tattap aseꞌ na pa Tuhan. Maka sabap meꞌ tabi ngasip, inaa na man tabi katantu tibuuk kitabi ka Tuhan.