Pilipi 2:21 - Sabahagiꞌ Kitab Tawrat: Panagnaan ni Awwal Jaman maka Kitab Injil

²¹ Boꞌ ilooy kasohean ntuu, ndaꞌ ku sikamimon sila, mas hagaan gi ninsila kahandak da man kahandak si Isa Almasi.

Pilipi 2:21 ပူးပေါင်းရင်းမြစ်များ

Matiyu 16:24

Pag-anu, yuk si Isa ni ga mulit na, “Soysoy doman mmeꞌ niyaku subay tikutan na kahandak na bong pin taduwan na jaꞌ kahandak ku. Subay atas na manangkit tehang halliꞌ man na nilansang, boꞌ na patuhut niyaku. Hati na, subay atas na lumingkaꞌ njawom jinisan katiksaan ka kabinsanaan kalnaꞌ aku san man na matoy, boꞌ na kapa-mmeꞌ niyaku.

Lukas 14:26

“Soysoy doman mmeꞌ niyaku, subay maasean aku labi man induꞌ-mmaꞌ na, labi man anak-nda na ka ga danganakan na. Maka minsan aseꞌ na ni dī na subay yaꞌ labi man aseꞌ na niyaku. Bong saꞌ meꞌ looy, yaꞌ ya dari mulit ku.

Salsila siga Rasul 13:13

Paddus mandooy, lay na baw ga si Pol ka ga soheꞌ na mmeꞌ taꞌ adjung lakka man Papos song pilay pa daira Pelga ndooy ni Pampilya. Takka jaꞌ sila ndooy, lay na baw si Yahiya Malkus pasakkat sampay lay na ya pabeleng pa Jerusalem.

Salsila siga Rasul 15:38

Sugaꞌ yaꞌ kuhi si Pol. Honaꞌ-honaꞌ na, yaꞌ pataꞌ si Malkus binoo batan lay ya pasakkat jaman da ni Pampilya. Yaꞌ na ya bay mmeꞌ pawus ninsila majatu garaꞌ da.

1 Korin 10:24

Sangkon, oy-oy pabuwat ta, pamikihan ta doꞌ duhuꞌ bong kasampulnaꞌ ni pagkahi ta atawa niyaꞌ. Daa isu-isu pabuwat ta ma karomanan ta sadjaꞌ.

1 Korin 10:33

Aku pun itu, inaa du aturan bean ku. Wā ku ngilag oy-oy pabuwatan ma binista meꞌ jama maat. Batan yaꞌ ku muhung kaayaran ni dī ku. Arapun ilooy ya puhung ku, kaayaran ni pagkahi ku manusiyaꞌ bong pin sila nammu jaꞌ kasalamatan.

1 Korin 13:5

maka yaꞌ ya halipulu. Yaꞌ ya nabiat miha kaayaran ni dī na sadjaꞌ. Yaꞌ ya mura dugahan, maka yaꞌ ya ngannaꞌ njawom atay na dusa jama niiya.

2 Korin 1:5

Na meꞌ kitabi itu sukuꞌ Almasi, mastiꞌ meꞌ iya du kitabi lumingkaꞌ njawom jinisan kabinsanaan. Sugaꞌ sa basag-basag binsanaꞌ njataꞌ tabi, mas basag gi meꞌ tabi pinagamgaman meꞌ Tuhan sabap meꞌ tabi tibuuk ka Almasi.

Pilipi 2:4

Daa sat kam ngulihal pa kaayaran ni dī bi sadjaꞌ, arapun ngulihal du kam pa kaayaran ni siga pagkahi bi.

2 Timuti 1:15

Na ndooy ilay ni Asiya, katoonan nu na du, adak katis na mimon danganakan ta nikutan aku. Sampay ga si Pijilus ka si Helmojinis, lai na du.

2 Timuti 3:2

Batan kaekahan na sina mintu manusiyaꞌ, dī da du kaasean da. Maka magnapsu mulakab na sila ni sīn. Pangabbu gi sila ni kalangkaw atay da. Boꞌ meka gi sina yaꞌ paagak mitsala jama pa kalaatan. Yaꞌ sila ngasip ni induꞌ-mmaꞌ da, yaꞌ ngintom buddi maka yaꞌ tawu pa Tuhan.

2 Timuti 4:10

Gunahan niyaku tabang, batan si Demas lay na pilay pa Tesaloneka. Lay na ku mbanan na sabap hagaan niiya nganduwan napsu na ni hāl junyaꞌ. Kuwan si Keresen, lay pa Galatiya. Kuwan si Taytus, lay pa Dalmatiya.

2 Timuti 4:16

Ni kapasal palkalaꞌ ku ntuu, sibuwa ku bay sinumariya meꞌ huwis, yaꞌ luu san disu danganakan ta bay pasabu nanggehan aku. Lay jaꞌ ku pabiya da dangan-dangan ku. Sugaꞌ kamura-murahan inampun du sila meꞌ Tuhan.