Pilipi 2:17 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹⁷ Meꞌ ku ngingat, mimon hulas-sangsāꞌ bi man sabapan pangando bi ni si Isa meꞌ karuha jakat ma bay sinongan meꞌ siga imam pa Tuhan mattoꞌ. Kuwan aku itu, bong sawpama lay na ku mintu pinapatoy sabap meꞌ ku masaplag, meꞌ ku ngingat, lahaꞌ ku tumpa meꞌ karuha tubaꞌ anggul ma bay tinumpahan meꞌ siga imam taꞌ kulban da mattoꞌ. Sugaꞌ san gi oy katuwaꞌ aku, masi du ku gāk maka gāk du ku ningkaam.

Pilipi 2:17 ပူးပေါင်းရင်းမြစ်များ

Salsila siga Rasul 20:24

Sugaꞌ yaꞌ du situ ku paruli bong oy mintu katuwaꞌ niyaku bong pin tapajatu ku jaꞌ pabuwatan bay hinalap meꞌ Papuꞌ Isa niyaku, yana masaplag umanat mahap pasal aseꞌ-tabang Tuhan pa manusiyaꞌ.

Salsila siga Rasul 21:13

Sugaꞌ iya tampung si Pol, “Ongoy kam nangisan aku? Daa na ba gangguun bi iman ku. Daa palagi sat njīl, san kapatoy ndooy ni Jerusalem atas ku du kalnaꞌ Papuꞌ Isa.”

Suwat si Pol pa mman Baanan Sukuꞌ si Isa ndooy ni Rom 12:1

Sangkon siga danganakan, sabapan ehe aseꞌ Tuhan ningkitabi, junjung ku na ningkaam, suhuran bi na dī bi pa Tuhan. Ingatun bi na Tuhan dapu baran bi halloman bi llum. Labbahan bi na oy-oy arat-tabiat ma yaꞌ nulut ni kahandak Tuhan mari kam sutsiꞌ. Batan subay silay meꞌ looy meꞌ bi makitahan iya bana-bana kam ngisbat iya.

Suwat si Pol pa mman Baanan Sukuꞌ si Isa ndooy ni Rom 15:16

Aku itu bay pineneꞌ binuwat sosohoan si Isa Almasi kalnaꞌ siga bangsa ma saꞌ Yahudi. Pabuwatan ku tu meꞌ karuha imam batan masaplag ku umanat mahap man Tuhan ninsila. Kuwan sagannap ma pitsayaꞌ, sila meꞌ sapantun jakat sinongan meꞌ ku pa Tuhan. Boꞌ tinimaꞌ jaꞌ sina sila meꞌ Tuhan sabap lay na sinutsiꞌ pangatayan da meꞌ Rū Sutsiꞌ.

2 Korin 12:15

Gāk du situ ku magtuyuꞌ-tuyuꞌ kalnaꞌ kaam san gi man sīn ku katis sampay anggawtaꞌ ku bong pin sambu jaꞌ nyawa bi. Sugaꞌ tilaw ta teꞌ kam, meꞌ tuu na tamba-manamba na aseꞌ ku ningkaam, sikatuwaꞌ kina bong subay gi maglumba aseꞌ bi niyaku?

2 Korin 4:12

Dari san tu kami wā nontongan kapatoy, lay du bay pa kaayaran ningkaam sabap pag toklas na, lay na kam koleꞌ kasampulnaan nyawa ma yaꞌ luu katapusan na.

2 Korin 6:10

San yaꞌ taambat kamalasahiyan talingkaan kami, yaꞌ du baw bay maglumba kagakan njawom atay kami. San kami miskin, meka na baw jama magkadayahan meꞌ kami ka altaꞌ ma natas saumu-umu. San yaꞌ luu oy maka oy na ni junyaꞌ tuu ma taawnan kami dapu, pagka kami tibuuk na ka Almasi, mimon ma luu niiya, ningkami na du.

2 Korin 7:4

Tud kasulutan ku ningkaam sampay daran gi kam pinagbantug meꞌ ku. San yaꞌ taambat kabinsanaan njataꞌ kami, mehe meꞌ ku kagamgaman sabapan bi. Kaam ina poonan kagakan mehe niyaku.

Pilipi 1:20

Kainagon ku yaꞌ luu oy maka oy na pabuwat ku man ku iyaꞌ ni awpan Tuhan. Kamura-murahan batnaa, meꞌ maruhuꞌ na pin, yaꞌ maglumba tawakka ku masaplag umanat mahap. Batan kaallum-kapatoy ku itu, kainagon ku pinaehe Almasi sabapan ku.

Pilipi 2:18

Damikiyan kaam pun, kamura-murahan gāk du kam maka gāk du kam niyaku.

Pilipi 2:30

Iya itu dak na ga bay matoy magtuyuꞌ kalnaꞌ Almasi. Batan lay na ga ya narapan umu na bong pin ku tatabangan na jaꞌ bilang gantiꞌ bi.

Pilipi 4:18

Batnaa, sabapan tulung ma bay pokonan bi man si Epaproditus, luu na labi man balanjaꞌ ku. Tulung bi ilay niyaku binilang jakat ma kasulut banahan pa Tuhan. Bong ibaratan bawu, kahamutan ya.

Kolossa 1:24

Na san ku tu batnaa tiksaꞌ sabap meꞌ ku wā masaplag, yaꞌ du tu lungay kagakan ku. Kon meꞌ looy batan lay jaꞌ du bay pa kaayaran ningkaam. San pun Almasi, bay du lumingkaꞌ njawom jinisan kamalasahiyan kalnaꞌ siga sukuꞌ na. Pag batnaa, aku na baw pagantiꞌ niiya ngissahan kamalasahiyan kalnaꞌ sagannap ma pitsayaꞌ niiya, yana kitabi ma binilang baran na.

1 Tesaloneka 2:8

Tandaꞌ ehe aseꞌ kami ningkaam, sarī man umanat mahap man Tuhan bay pasampay kami ningkaam, lay gi du atas kami narapan umu kami kalnaꞌ kaam. Tud maaseꞌ kami ningkaam.

2 Timuti 4:6

Kuwan aku tu, yaꞌ na meꞌ noy tahaꞌ umu ku. Tapit na situ waktu man ku limbu man junyaꞌ tuu.

1 Yahiya 3:16

Na man tabi toon bong oy aseꞌ sabanna, mindoga jaꞌ tabi ni si Isa, batan lay na ga ya nongan umu na kalnaꞌ kitabi. Sangkon kitabi pun subay du mangatas nongan umu tabi kalnaꞌ siga pagkahi tabi sukuꞌ si Isa.