Pilipi 2:16 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹⁶ Labi na bong pasampay bi lagi umanat ma kabuwan kaallum bahau ninsila. Dari pag ina mintu taabut llaw Almasi pabeleng, tud mehe na meꞌ ku gāk, batan kaam na sina buktiꞌ yaꞌ bay lopas hulas-sangsāꞌ ku noan jama kabanahan.

Pilipi 2:16 ပူးပေါင်းရင်းမြစ်များ

Matiyu 10:27

“Kuwan kaam, oy-oy bay rahasiyaan ku ningkaam, pamaun bi na ni sikamimon. Siga tōꞌ ku ma isu-isu kaam bay kale, pasaplagun bi na ni mayran.

Lukas 12:8

Yuk si Isa lagi, “Baan ta kam banahan, soysoy ina mangaku ni awpan manusiyaꞌ mmeꞌ ya niyaku, yana Anak Manusiyaꞌ, malaingkan mangaku du sina ku mintu sukuꞌ ku ya ni awpan siga malaikat Tuhan.

Yahiya 6:63

Baan ta kam banahan, bong itu tud isi baran ku, mastiꞌ yaꞌ kabuwan kasampulnaan nyawa. Ilooy ya muwan kasampulnaan nyawa, yana Rū Sutsiꞌ. Boꞌ bay bitsala ku ilay siꞌ ningkaam, lakka man iya. Sangkon soysoy pitsayaꞌ ni bitsala ku koleꞌ kasampulnaan nyawa.

Yahiya 6:68

Pag tampung si Saymon Pitel, “Uy Papuꞌ, soy lagi tiluꞌ kami? Isu-isu kau du bina poonan bitsala ma kasampulnaꞌ ni nyawa saumu-umu.

Salsila siga Rasul 13:26

Yuk si Pol lagi, “Siga danganakan, yana pagkahi ku panubuꞌ Nabi Ibrahim sampay na kaam ma saꞌ Yahudi ntuu ma mmeꞌ na du ngisbat Tuhan, pakale doꞌ kam. Ningkitabi na situ bay pinasampay umanat kasalamatan.

1 Korin 1:8

Maka ginaosan na pin sina kam meꞌ Tuhan mmeꞌ ni kahandak na ngabut sampay pa katapusan supaya yaꞌ luu susunan njataꞌ bi pag beleng Papuꞌ tabi si Isa Almasi.

1 Korin 9:26

Sangkon yana meꞌ jama lalumbaan mulan basag na mari kaā, aku pun pulan ku du basag ku kalnaꞌ Tuhan. Ibaratan jama panuntuk, yaꞌ ku nuntuk baliyu sadjaꞌ.

Galatiya 2:2

Ngkon ku bay pabeleng sabap ilooy kahandak Tuhan bay pinalahil niyaku. Takka ndooy, lay ku nammuhan siga pa-mmean sukuꞌ si Isa ndooy. Dari sasang kami-kami du ndooy, lay na bakka ku ninsila isi umanat mahap ma pinasaplag meꞌ ku ni kabangsa-bangsahan ma saꞌ Yahudi. Maksud ku ilay siꞌ masā bong tud magbēꞌ du umanat ku ka ninsila. Batan bong ilay bay niyaꞌ, taggahaꞌ senseng jaꞌ bay hulas-sangsāꞌ ku masaplag. Kahapan, pag bāꞌ ku ninsila isi umanat ku,

Galatiya 4:11

Ituu kahanggawan ku, taggahaꞌ lai jaꞌ lopas mimon bay sangsāꞌ ku noan kaam.

Pilipi 1:10

mari kam pandoy meneꞌ bong oy pataꞌ subay pabuwat bi llaw pa dangallaw. Batan bong ina mahap pabuwatan bi, mastiꞌ sutsiꞌ jaꞌ kawul-piil bi sampay yaꞌ na luu sutsutan njataꞌ bi pag taabut llaw Almasi pabeleng.

Pilipi 1:6

Aseꞌ bi ina yana buktiꞌ tud hinalin na pin meꞌ Tuhan pangatayan bi pa kaayaran. Maka tatantu ku pagka Tuhan lay na nagnaꞌ ngahalin pangatayan bi, mastiꞌ ndarahan na pin sina meꞌ na ngabut sampay magjatu na garaꞌ na ningkaam ni llaw Almasi pabeleng.

1 Tesaloneka 2:19

Kainagon kami sitammu na kitabi pabalik batan pangando bi ni Papuꞌ tabi si Isa poonan kagakan mehe ningkami. Maka sabapan pangando bi, tatantu kami magsasōng na pin meꞌ bi nulut kahandak Tuhan ngabut sampay pa katapusan. Meꞌ kami ngingat, kaam ina meꞌ sapantun karuna dorogan ma bay sinangon taꞌ kōk kami man kami koleꞌ kabantugan pag beleng Papuꞌ Isa.

1 Tesaloneka 3:5

Sangkon, pagka yaꞌ na bay tasaggaꞌ ku gampang ku ningkaam, lay na bay sohoꞌ ku si Timuti pilu ngandaꞌ bong masi hallot pangando bi ni Papuꞌ. Ilooy kagampangan kami, taggahaꞌ senseng jaꞌ bay hulas-sangsāꞌ kami bong mintu lay na baw kam patatak sabapan sasat Ibilis.

Hibrani 4:12

Na palman Tuhan ina kawasahan boꞌ kabuwan gi kaallum bahau. Dari ko ngawon, palman na tawom gi man kataliꞌ batan ngassob sina pa jawom atay tabi sampay pa nyawa tabi. Maka palman na ina, inaa na man tabi mindoga bong mahap atawa maat pamiki tabi ka niyat atay tabi.

1 Pitel 1:23

Batan sibuꞌ du sina kam ka lay na pinamaddihan pabalik. Sugaꞌ kaallum bi ina ma bahau saꞌ na meꞌ kaallum bi sibuwa ma lakka man induꞌ-mmaꞌ bi ma kuhi gi matoy. Arapun kaallum bi ina ma bahau lakka man Tuhan sabanna ma llum saumu-umu. Danan bi ilay bay koleꞌ kaallum bahau sabap meꞌ bi pitsayaꞌ ni palman Tuhan. Batan palman na ina muwan kaallum bahau maka yaꞌ kuhi baluba saumu-umu.

1 Yahiya 1:1

Itu suwat ku ningkaam pasal si Isa Almasi, yana Palman Tuhan ma nampulnaꞌ nyawa manusiyaꞌ saumu-umu. Yaꞌ gi luu oy maka oy na, ndang luu na ya mman Mmaꞌ na Tuhan. Pag-anu, lay ya dari manusiyaꞌ sampay bay maglahat ntuu ni junyaꞌ. Maka lay gi ya takita kami ka mata kami ma duwa. Damikiyan, lay du ya takale kami mitsala. Maka lay gi ya tapurut kami ka tangan kami mismu.

Siga Pakaradjaan bay Pinalahil 22:17

Pag-anu, yuk Rū Tuhan ka sagannap ma ginalla pangantin ma danda, yana mimon sukuꞌ Papuꞌ Isa, “Pitu na ko.” Damikiyan sagannap ma pakale ni bitsala njawom kitab tuu siꞌ halling du, “Pitu na ko.” Na soysoy tohoꞌ kallong bi, pitu na kam nginum boheꞌ ma muwan kaallum. Libre jaꞌ sina ni soysoy doman nginum.