Matiyu 28:18 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹⁸ Pag-anu, yuk si Isa ninsila, “Sikamimon kapatut ni sulgaꞌ sampay ni junyaꞌ lay na ndean aku.

Matiyu 28:18 ပူးပေါင်းရင်းမြစ်များ

Matiyu 11:27

Pag-anu, yuk si Isa na baw ni baanan jama ndooy, “Mimon-mimon lay na hinalap meꞌ Mmaꞌ ku niyaku. Yaꞌ luu toon njawom atay ku sarī man Mmaꞌ ku. Damikiyan, yaꞌ du luu toon njawom atay Mmaꞌ ku sarī man aku ka sagannap ma karomanan ku baan ku.

Matiyu 16:28

Maka baan ta kam banahan, kasohean kam ma luu nangge ntuu, yaꞌ gi situ kam mintu bay matoy, ndang takita bi na katakka Anak Manusiyaꞌ ddas ka pamarinta na.”

Matiyu 26:64

Iya tampung si Isa niiya, “Meꞌ halling sambat nu na du bilay siꞌ. Maka baan ta kam banahan, luu du sina masa ni sinōng, takita bi Anak Manusiyaꞌ ningkōꞌ huwin pa kawnan man Tuhan Sangat Kawasa. Maka bbos-bbos takita bi du sina ya takka man sulgaꞌ taꞌ tayiꞌ baliyu.”

Lukas 10:22

Pag-anu, yuk si Isa na baw ni baanan ga jama ndooy, “Mimon-mimon lay na hinalap meꞌ Mmaꞌ ku niyaku. Yaꞌ luu toon njawom atay ku sarī man Mmaꞌ ku. Damikiyan, yaꞌ du luu toon njawom atay Mmaꞌ ku sarī man aku ka sagannap ma peneꞌ ku pinakitau.”

Yahiya 13:3

Pus da siꞌ mangan, lay doꞌ si Isa nangge boꞌ na ngurusan juba na. Pag-anu, boꞌ na basahan ka tuwala. Na iya siꞌ tu, katoonan na du lay na dean Mmaꞌ na niiya kawasa-kapatut njataꞌ mimon-mimon. Maka katoonan na du iya lakka man Tuhan, damikiyan, Tuhan du polean na. Sugaꞌ san meꞌ looy, lay gi ya magpadiyoꞌ ni siga mulit na.

Yahiya 17:2

Lay na ku buwanan nu kapatut ni jataꞌ mimon manusiyaꞌ supaya ku kabuwan kasampulnaan nyawa ma yaꞌ luu katapusan na ni sagannap ma bay hinalap meꞌ nu niyaku.

Yahiya 3:31

“Na Almasi ilay lakka man sulgaꞌ. Sangkon patingkat ya man sikamimon. Boꞌ kitabi itu manusiyaꞌ ma ndang ni junyaꞌ sadjaꞌ, ngkod pakaradjaan ni junyaꞌ jaꞌ du katoonan tabi. Sangkon meꞌ iya lakka man sulgaꞌ, mastiꞌ patingkat jaꞌ ya man sikamimon.

Yahiya 3:35

Biddaꞌ na sina aseꞌ Tuhan ni Anak na sampay lay na pa-ntan na mimon-mimon niiya.

Salsila siga Rasul 10:36

“Batnaa pasampay ku na ningkaam umanat mahap ma lay na palahil Tuhan duhuꞌ ningkami bangsa Israil. Meꞌ tuu: Luu na situ jalan man manusiyaꞌ mahap na pa Tuhan man sabapan pabuwatan si Isa Almasi, yana Papuꞌ manusiyaꞌ sikamimon.

Salsila siga Rasul 2:36

“Sangkon,” yuk si Pitel, “subay katoonan bi na sampay mimon pagkahi tabi bangsa Israil, inawnan si Isa ma bay lansang bi taꞌ tehang, iya na silay bay pineneꞌ meꞌ Tuhan binuwat Papuꞌ tabi ka Tukang Nalamat tabi.”

Suwat si Pol pa mman Baanan Sukuꞌ si Isa ndooy ni Rom 14:9

Batan kon ilay Almasi bay matoy sampay pinakallum pabalik supaya ya dari Papuꞌ sikamimon ma pitsayaꞌ niiya, sagannap ma lay na matoy sampay na sagannap ma masi llum.

1 Korin 15:27

Boꞌ magbēꞌ du bana ka suwat njawom kitab, ilooy ma yuk na, “Mimon-mimon inannaꞌ meꞌ Tuhan ndiyoan kawasa Almasi.” Sugaꞌ ni ayat looy ilay, subay tallak ningkitabi yaꞌ baw lay tabeꞌ Tuhan ni diyoan kawasa Almasi. Batan kawasa-kapatut ma luu ni Almasi, Tuhan mismu bay ngandean.

Kolossa 2:10

Almasi ina magbayaꞌ ni mimon ma ngantanan kawasa-kapatut sampay siga seytan ka malaikat. Sangkon kaam ina, langkap-samat na kam sabap tibuuk na kam ka iya.

Hibrani 1:2

Sugaꞌ ni masa batnaa, yana ni ahil jaman, Anak na na mismu man Tuhan bay masampay umanat na ningkitabi. Anak na ilay, ilooy na man Tuhan bay mapayak alam sikamimon. Damikiyan man gantaan Tuhan, Anak na du dapu mimon-mimon.

Hibrani 2:8

Boꞌ lay gi nnaꞌ nu mimon-mimon ndiyoan kawasa-kapatut da.” Na tiyap-tiyap halling njawom kitab mimon-mimon inannaꞌ ndiyoan kawasa-kapatut manusiyaꞌ, hati na, yaꞌ luu saꞌ yaꞌ tapagbayaan meꞌ da. Bana na, yaꞌ lagi baw bay manyatakan mimon-mimon ndiyoan kawasa-kapatut da san sila pinamāꞌ magbayaꞌ ni mimon-mimon.

1 Pitel 3:22

Na si Isa ilay, lay na inangkat pa sulgaꞌ sampay luu na ya ni bihing Tuhan huwin pa kawnan. Ndooy ilay, iya magbayaan mimon malaikat ka mimon ma ngantanan kawasa-kapatut mahap-maat.

Siga Pakaradjaan bay Pinalahil 11:15

Pag-anu siꞌ, pasīng na baw malaikat looy ni kapituꞌ na niyup tabuliꞌ na. Pag pōꞌ halling na, ilooy ma luu siga suwara ngahowap ni sulgaꞌ, yuk da, “Labba man batnaa, yaꞌ na luu pamarinta manusiyaꞌ ni junyaꞌ, isu-isu pamarinta Papuꞌ tabi Tuhan ka ilooy ma bay peneꞌ na, yana Almasi. Boꞌ iya sa marinta saumu-umu.”

Siga Pakaradjaan bay Pinalahil 17:14

Bbuwatan da ina mintu, moo Bili-bili looy sibonoꞌ. Sugaꞌ ā du sila meꞌ Bili-bili looy ka siga sukuꞌ na, yana sagannap ma bay peneꞌ na sampay liyun na pa jawom okoman na, ma magkanaalla mmeꞌ niiya. Kon na ina mintu ga Bili-bili looy kaā sabap iya Papuꞌ ninggi taꞌ mimon papuꞌ; Sultan ninggi taꞌ mimon sultan.”

Siga Pakaradjaan bay Pinalahil 19:16

Na ni juba ilooy siꞌ ma ginalla Palman Tuhan, luu bay sinuwatan ni tagan paa na meꞌ tuu: “Sultan ninggi taꞌ mimon sultan maka Papuꞌ ninggi taꞌ mimon papuꞌ.”