Matiyu 20:28 - Sabahagiꞌ Kitab Tawrat: Panagnaan ni Awwal Jaman maka Kitab Injil

²⁸ Minsan aku, Anak Manusiyaꞌ, yaꞌ du ga kon ku bay pitu muhung inintu. Arapun kon ku itu bay pitu mari ku kaintu manusiyaꞌ sampay nongan umu ku mari meka na jama pinaddusan man hukuman ni dusa da.”

Matiyu 20:28 ပူးပေါင်းရင်းမြစ်များ

Matiyu 20:27

Atawa soysoy kam doman pinaehe banahan subay buwat dī na ata sikamimon.

Matiyu 26:28

Ingatun bi inaa lahaꞌ ku song tinumpahan supaya meka na jama taampun sampay puwas na dusa da labbasakayi. Batan lahaꞌ ku ina, inaa na muwan kasāhan ni pagsulutan bahau ni antaraꞌ Tuhan ka manusiyaꞌ.

Matiyu 8:20

Tampung si Isa, “Mamiki doꞌ ko ba paayad. Gam gi ina ga sattuwa tawun, luu gi katattogan man da patannaꞌ sangom-sangom. Minsan ga manuk-manuk, luu du ka sāng da. Boꞌ aku, Anak Manusiyaꞌ, yaꞌ san luu patulihan ku.”

Malkus 10:45

Minsan aku, yana Anak Manusiyaꞌ, yaꞌ du ga kon ku bay pitu muhung inintu. Arapun aku tu bay pitu ngintu manusiyaꞌ sampay nongan umu ku mari meka na jama pinaddusan man hukuman ni dusa da.”

Malkus 14:24

Yuk si Isa ninsila, “Ingatun bi inaa lahaꞌ ku song tinumpahan supaya meka na jama koleꞌ kaampunan. Batan lahaꞌ ku ina, inaa na muwan kasāhan ni pagsulutan bahau antaraꞌ Tuhan ka manusiyaꞌ.”

Lukas 22:27

Ni bandingan manusiyaꞌ, mas patingkat jama ma binotangan ni lamisahan man ilooy ma motangan iya. Sugaꞌ ningkitabi, saꞌ meꞌ looy. Akigun bi jaꞌ suntuan ku batan halloman ku bay dambuwaꞌ ka kaam, bbuwatan ku ngintu jama.

Yahiya 10:15

Yana meꞌ kami ka Mmaꞌ ku lungbid, damikiyan, meꞌ naa du meꞌ kami ka siga bili-bili ku lungbid. Maka songan ku jaꞌ sina mintu umu ku kalnaꞌ sila.

Suwat si Pol pa mman Baanan Sukuꞌ si Isa ndooy ni Rom 4:25

Si Isa ilay bay pinaglillaꞌ meꞌ Tuhan pinapatoy sabapan dusa tabi, boꞌ na pinakallum pabalik supaya kitabi taitung intong.

2 Korin 8:9

Ngaddoꞌ jaꞌ kam pamintangan ni Papuꞌ tabi si Isa Almasi. Katoonan bi na du ehe aseꞌ na ningkitabi. San ya dayahan ni sulgaꞌ, lay na ga ya pitu pa junyaꞌ niksaꞌ dī na njawom miskin supaya luu na lawang man tabi koleꞌ ladjikiꞌ ma natas saumu-umu.

Galatiya 3:13

Boꞌ kitabi itu, ndang katoonan tabi na mimon manusiyaꞌ ngalangga saraꞌ Tuhan. Sangkon pataꞌ kitabi minulkaan bbos-bbos. Lipara, luu na Almasi bay nongan umu na llansang taꞌ tehang supaya tapaddusan na na kitabi man mulkaꞌ Tuhan. Iya ilay gantiꞌ tabi minulkaan. Boꞌ magbēꞌ du silay ka suwat njawom kitab, ilooy ma yuk na, “Soysoy pinapatoy siniitan taꞌ tehang, tumatandaꞌ lay minulkaan meꞌ Tuhan.”

Epesus 1:7

Sabapan lahaꞌ Almasi bay tumpa, ilooy na silay bay maddusan kitabi man pidjalaꞌ ni dusa tabi. Sangkon luu na kaampunan ningkitabi tandaꞌ landuꞌ ehe aseꞌ Tuhan ningkitabi.

Epesus 5:2

Subay kitabi wā maasean pagkahi tabi manusiyaꞌ meꞌ karuha Almasi bay maasean kitabi. Tandaꞌ aseꞌ na, lay na ga ya nongan umu na kalnaꞌ kitabi. Yana meꞌ jama bay numbaliꞌ bili-bili man ngulban maruhuꞌ, Almasi pun lay na du bay pinapatoy binuwat kulban kalnaꞌ kitabi. Bay pabuwatan Almasi ilay nulut ni kahandak Tuhan. Bong ibaratan bawu, tud kahamutan ya.

1 Timuti 2:6

Iya ilay, atas na bay nongan umu na supaya tatanggung na dusa manusiyaꞌ sikamimon mari sila kapaddus man hukuman ni dusa da. Boꞌ ituu na situ masa bay ginantaꞌ man umanat pasal iya pinasaplag.

Taytus 2:14

Iya ilay, lay na ga bay nongan umu na kalnaꞌ kitabi supaya tapaddusan na na kitabi man tabiat tabi buwat dusa, maka supaya tapasutsiꞌ na kitabi. Batan kahandak na ina, luu na sukuꞌ na ma tinagi buwat mahap, ma pabiddaꞌ man kasohean manusiyaꞌ.

Hibrani 2:10

Na Tuhan ina bay mapayak mimon-mimon maka iya dapu mimon-mimon. Boꞌ na, iya du bay bagaraꞌ subay meka manusiyaꞌ dari anak na hampit ni ehe kabantugan na. Pag-anu, man na majatu garaꞌ na, bay ya mapitu Anak na. Boꞌ lay gi bay ginantaꞌ meꞌ Tuhan subay Anak na ngalingkaan kabinsanaan supaya ya tawop binuwat pa-mmean tabi ka poonan kasalamatan tabi.

Hibrani 5:8

Iya ilay, san ya Anak Tuhan, lay du ya lumingkaꞌ njawom jinisan kabinsanaan supaya takissa na parasahan manusiyaꞌ mean kahandak Tuhan tanne-pasuꞌ.

Hibrani 9:28

Damikiyan Almasi pun, sakayi du bay matoy mari tatanggung na dusa manusiyaꞌ. Pabeleng gi du ya ni sinōng, sugaꞌ saꞌ na maksud na mintu nanggung dusa. Arapun ilooy sa kon na lahil pabalik supaya tasalamat na sagannap ma ngagad ni katakka na.

1 Pitel 2:24

Boꞌ lay gi paglillaꞌ na baran na llansang taꞌ tehang bong pin tatanggung na jaꞌ dusa tabi. Kon na buwat meꞌ looy supaya patagong na kitabi buwat dusa boꞌ tabi makutuꞌ meꞌ buwat kaintongan. Dari meꞌ halling njawom kitab, “Man sabapan siga bakat bisa ni baran na, kaulian na kitabi.”

1 Pitel 3:18

Mamintang jaꞌ kam ni Almasi. San ya intong gi man intong, lay du ya bininsanaꞌ. Sampay lay na ga ya matoy sakayi labba du kalnaꞌ mimon baldusa pangkat-mamangkat. Lay na tanggung na mimon dusa tabi supaya kitabi mahap na pa Tuhan. Dari siꞌ, bay na pinapatoy jasad na, sugaꞌ lay na baw ya pinakallum ka jasad bahau ma yaꞌ na kuhi matoy.

1 Yahiya 2:2

Ni gasad bayaꞌ na, lay na sambut na mulkaꞌ Tuhan mari tatanggung na mimon dusa tabi supaya tabi taampun na meꞌ Tuhan. Boꞌ saꞌ sat mimon dusa tabi bay tanggung na, arapun sampay dusa manusiyaꞌ labbasakayi, lai du tanggung na.

Siga Pakaradjaan bay Pinalahil 1:5

Maka kamura-murahan binuwanan na pin kam kasannangan ka barakat meꞌ si Isa Almasi, ilooy ma kanaalla masampay kabanahan pasal Tuhan. Iya ilay bay duhuꞌ pinakallum pabalik ka baran ma yaꞌ na kuhi matoy. Maka iya du marintahan mimon panghuluꞌ ni sikaliput junyaꞌ. Ni kaehe aseꞌ na ningkitabi, atas na man lahaꞌ na bay tumpa supaya tapaddusan na kitabi man hisab ni dusa tabi.