Matiyu 19:27 - Sabahagiꞌ Kitab Tawrat: Panagnaan ni Awwal Jaman maka Kitab Injil

²⁷ Pag-anu, yuk si Pitel, “Pooy baw tu la meꞌ kami lay na ngambanan mimon-mimon supaya kami kapa-mmeꞌ ningkau? Oy baw tungbas ningkami?”

Matiyu 19:27 ပူးပေါင်းရင်းမြစ်များ

Matiyu 19:26

Pag-anu siꞌ, ilooy ma lay si Isa ngandaꞌ ninsila sambayan na halling, “Ndang tunmanūn sina meꞌ manusiyaꞌ nalamat dī da, sugaꞌ bong Tuhan, yaꞌ luu tunmanūn niiya.”

Matiyu 19:28

Yuk si Isa, “Baan ta kam banahan, pag ina mintu pinabahauwan na junyaꞌ, Anak Manusiyaꞌ itu mintu ningkōꞌ na ni tingkoan man na magsultan ni kaehe kawasa na. Kaam pun, siga mulit ku, pinatingkōꞌ na du kam mintu ni sapu-duwa tingkoan marintahan mimon panubuꞌ lakka man siga anak si Israil sikasapu-duwa.

Matiyu 9:9

Pag lakka si Isa mandooy, lay ya ngita disu tukang ninga sukay ningkōꞌ ni upis na, awon na si Matiyu. Yuk si Isa niiya, “Tu ko. Mmeꞌ na ko niyaku.” Dari siꞌ, nangge na ya sampay lay na mmeꞌ ni si Isa.

Malkus 10:28

Pag-anu, yuk si Pitel, “Na meꞌ kami tu lay na ngambanan mimon-mimon supaya kami kapa-mmeꞌ ningkau, pooy baw tu la?”

Malkus 2:14

Pag lakka si Isa mandooy, sasang na lumān, lay ya ngita disu tukang ninga sukay ningkōꞌ ni upis na. Awon na si Libay, anak si Alpiyus. Yuk si Isa niiya, “Tu ko. Mmeꞌ na ko niyaku.” Dari siꞌ, nangge na ya sampay lay na mmeꞌ ni si Isa.

Lukas 14:33

Meꞌ naa du sina karuha bi bong kam doman mmeꞌ niyaku. Mastiꞌ subay pamikihan bi doꞌ duhuꞌ paayad bong takaya bi malungay mimon ma kinasengan meꞌ bi kalnaꞌ aku. Bong gantaan niyaꞌ du takaya bi, yaꞌ du kam dari mulit ku.”

Lukas 15:29

Sugaꞌ yaꞌ ya kuhi. Yuk na ni mmaꞌ na, ‘Uy, yaꞌ bina Maꞌ sikatuwaꞌ! Anak nu bilay, bay jaꞌ makaat altaꞌ nu man na magdanda. Meꞌ looy na bay karupangan na, pag takka na, lay gi sumbaliꞌ nu niiya sapiꞌ looy ma bay pinalammok! Boꞌ niyaku, san lasa disu kambing, yaꞌ bay luu dean nu aku man kami maglami-lami ka ga kabagayan ku. Yaꞌ sina sikatuwaꞌ, batan daka dangon taun na ku bay ngintu kau sampay ngasip ni oy-oy jaꞌ panohoan nu!’

Lukas 18:28

Pag-anu, yuk si Pitel, “Na meꞌ kami itu lay na ngambanan mimon-mimon supaya kami kapa-mmeꞌ ningkau, pooy baw tu la?”

Lukas 5:11

Pag lay jaꞌ sinallaran meꞌ da ga bagung da, lay jaꞌ mbanan da ga kalangkapan da labbasakayi ni tapiyan, sampay lay na sila mmeꞌ ni si Isa.

1 Korin 1:29

Kon ilay Tuhan buwat meꞌ looy mari tabista manusiyaꞌ sikamimon yaꞌ luu pataꞌ man da ngabbu ni awpan Tuhan.

1 Korin 4:7

Kaam ina nnaa ma tigiꞌ nilang jama, kanna bi mareꞌ luu kam patingkat man pagkahi bi. Tilaw ta teꞌ kam, luu kina kapandoyan bi ma saꞌ lakka man Tuhan? Na pagka yaꞌ luu, ongoy taggahaꞌ subay na pin kam ngabbu saula-ula kapandoyan bi lakka man dī bi?

Pilipi 3:8

Sampay mimon-mimon, bilang ku na du yaꞌ na luu hagaꞌ na bong bista ku ka ehe hagaꞌ pagkalungbid ku ka Papuꞌ ku si Isa Almasi. Kalnaꞌ iya, lay na labbahan ku mimon ma bay hagaan niyaku maruhuꞌ. Meꞌ ku ngingat, mimon ilooy siꞌ boboꞌ jaꞌ. Kon meꞌ looy batan ituu na batnaa hagaan niyaku pasal meꞌ ku madara pagkalungbid ku ka Almasi.