Matiyu 18:7 - Sabahagiꞌ Kitab Tawrat: Panagnaan ni Awwal Jaman maka Kitab Injil

⁷ Baan ta kam banahan, siya-siya sina manusiyaꞌ ma mandang hāl junyaꞌ sabap wā sila takoleꞌ sinasat. Ni junyaꞌ tuu itu ndang yaꞌ taambat sasat ma moo jama buwat dusa. Sugaꞌ tud siya-siya sina mintu sagannap ma bay moo sasat meꞌ looy.

Matiyu 18:7 ပူးပေါင်းရင်းမြစ်များ

Panagnaan 13:7

Boꞌ na, sasaꞌ-manasaꞌ na ga tukang ngipat ga hayop si Ibram ka ni si Lut. Sarī gi, ndang luu gi ndooy kahayop-hayopan bangsa Kanan ka bangsa Peris ma ndang maglahat ndooy.

Matiyu 16:23

Pag-anu, ilooy ma paawop si Isa ni si Pitel sambayan na halling, “Lakka na ko man bihing ku Ibilis! Pamiki nu ina kahandak manusiyaꞌ, saꞌ ga kahandak Tuhan.”

Matiyu 26:24

Anak Manusiyaꞌ itu ndang bay tinunaꞌ njawom kitab, mastiꞌ pinapatoy jaꞌ. Sugaꞌ tud siya-siya silay mintu ilooy ma nipu iya. Gam na ya yaꞌ bay pinamaddihan.”

Malkus 13:7

“Pag taabut bi ina mintu kaakahan meka na bonoꞌ mehe ni kalahat-lahatan matā-matapit, daa doꞌ gundalaꞌ pamiki bi. Ndang bay silay ginantaꞌ meꞌ looy, sugaꞌ saꞌ gi baw lay katapusan junyaꞌ.

Lukas 17:1

Pag-anu, yuk si Isa ni siga mulit na, “Ni junyaꞌ tuu meka sina sasat kaboo-boo manusiyaꞌ buwat dusa, tud yaꞌ sina tatangkisan. Sugaꞌ tud siya-siya sina mintu soysoy bay moo sasat meꞌ looy.

Yahiya 17:12

Halloman ku dambuwaꞌ ka sila, bay sila tabangan ku supaya sila kanaalla ni awon nu, yana awon ma bay dean nu aku. Lay sila jagahan ku paayad supaya yaꞌ luu ninsila hilang man jawom okoman ku sarī man ilooy disu ma bahagiꞌ nalkaꞌ. Kamasaꞌ, talpaksaꞌ jaꞌ silay magkadarihan meꞌ looy supaya binakbul bay suwat njawom kitab.

Salsila siga Rasul 1:16

“Siga danganakan, subay situ kitabi isun bong soy peneꞌ tabi gantiꞌ ni si Judas. Ndang katoonan bi na du, si Judas pun lay du pineneꞌ meꞌ si Isa binuwat rasul na sibuꞌ du ka kami. Boꞌ lay du ya tabeꞌ ni pabuwatan ma bay sinukuꞌ ningkami saliꞌ-saliꞌ. Sugaꞌ ndang katoonan bi na du, maruhuꞌ-ruhuꞌ Nabi Daud bay nunaꞌ njawom kitab man kapandoyan Rū Sutsiꞌ pasal disu lalla ma nipu Almasi ni sinōng. Na tiyap-tiyap tunaꞌ nabi ina, mastiꞌ binakbul jaꞌ. Boꞌ lai na du bana binakbul tunaꞌ looy siꞌ njataꞌ si Judas waktu na bay moo jama nungkuban si Isa.

1 Korin 11:19

Kanna bi mareꞌ subay na pin kam magsulemaꞌ pamiki boꞌ tumatandaꞌ bong mamooy kam man Tuhan kasulutan.

1 Timuti 6:1

Na ni kapasal siga ata ma mmeꞌ ni si Isa, toan nu sila meꞌ tuu: Subay sila wā magmaltabat ni siga papuꞌ da. Meꞌ naa ina, yaꞌ na sina mintu luu danan man jama malaat awon Tuhan atawa madiyoꞌ tōꞌ ma binean meꞌ tabi.

Taytus 2:5

maka supaya sila patong mamiki sampay mōꞌ kawul-piil sutsiꞌ. Maka subay karandahan ma yaꞌ gi toa tinoan mari sila hutu buwat ni lumaꞌ ka buwat kaayaran sampay maglillaꞌ ni lla da. Bong siꞌ ina bogbogan da meꞌ naa, malaingkan yaꞌ luu danan man umanat Tuhan ma pasaplag tabi binitsala pa kalaatan.

Taytus 2:8

Amay-amay bila ko mitsala, subay bana jaꞌ supaya yaꞌ luu man nu tasahawi. Meꞌ naa inaa, alang-kapalang sagannap ma nulang kitabi mitsala kitabi pa kalaatan.

Suwat Lakka man si Jūd 1:4

Kon ku itu ngawalan kaam sabap luu na sina nnaa bay pasalluk ni siga baanan bi ga jama yaꞌ mahap. Yaꞌ san luu tawu da pa Tuhan. Boꞌ tinabid lagi meꞌ da kabanahan pasal aseꞌ Tuhan ni manusiyaꞌ. Baꞌ-bāꞌ da, dari na konoꞌ san kitabi buwat oy-oy kasabuhan ma kinanapsuhan meꞌ tabi. Ndang-ndang mehe du konoꞌ aseꞌ Tuhan ngampun. Na man sabapan laat kawul-piil da ina, tumatandaꞌ yaꞌ sila kuhi mangaku isu-isu si Isa Almasi yana Papuꞌ sikamimon. Sugaꞌ ndang luu na sina mulkaꞌ hinalliꞌ ninsila meꞌ ndang bay tinunaꞌ jawom kitab maruhuꞌ-ruhuꞌ.