Matiyu 13:46 - Sabahagiꞌ Kitab Tawrat: Panagnaan ni Awwal Jaman maka Kitab Injil

⁴⁶ Pag lay jaꞌ ya nammu disu ma biddaꞌ na ayad na, lay na bballihan na altaꞌ na sikamimon, boꞌ lay du balli na mutsaꞌ looy.

Matiyu 13:46 ပူးပေါင်းရင်းမြစ်များ

Matiyu 13:44

Pag-anu, ngandalil na baw si Isa pabalik, yuk na, “Pamarinta Tuhan ina meꞌ sapantun altaꞌ hagaan bay llabbong ni jawom tanaꞌ. Pag lay tatammu jama, lay na baw llabbong meꞌ na pabalik. Dari ni kaehe gāk na, lay na paballihan na altaꞌ na sikamimon boꞌ lay balli na tanaꞌ looy.

Matiyu 13:45

“Damikiyan, pamarinta Tuhan ina meꞌ tuu karuha na: Luu disu tukang malli mutsaꞌ, bbuwatan na ngalataan lahat miha siga mutsaꞌ mahap.

Matiyu 13:47

“Maka Pamarinta Tuhan ina meꞌ tuu karuha na: Luu siga jama mukut njawom danaw, boꞌ meka jinisan daying lay takoleꞌ da.

Salsila siga Rasul 20:24

Sugaꞌ yaꞌ du situ ku paruli bong oy mintu katuwaꞌ niyaku bong pin tapajatu ku jaꞌ pabuwatan bay hinalap meꞌ Papuꞌ Isa niyaku, yana masaplag umanat mahap pasal aseꞌ-tabang Tuhan pa manusiyaꞌ.

Galatiya 6:14

Boꞌ aku tu, ilooy du pinag-abbu meꞌ ku yana kapatoy Papuꞌ tabi si Isa Almasi taꞌ tehang kalnaꞌ kitabi. Meꞌ ku ngingat, bay pagkajama ku maruhuꞌ lay na tabeꞌ ni si Isa nilansang taꞌ tehang. Pag batnaa, sarī na pagkajama ku. Sangkon lay na matoy kainagon ku ni kalaatan ma pinaabak meꞌ jama ma mandang hāl junyaꞌ. Boꞌ jama ma mandang hāl junyaꞌ ina, yaꞌ du luu kainagon da ni siga pakaradjaan ma hagaan niyaku.

Epesus 3:8

Sabana na, ni mimon sukuꞌ Tuhan, aku ya labi yaꞌ tawop inawnan sukuꞌ na. Lipara, lay gi baw ku tapeneꞌ nohoꞌ masaplag ni siga bangsa saꞌ Yahudi pasal siga supaat mehe saꞌ taangan-angan ma takoleꞌ da bong sila tibuuk na ka Almasi.

Kolossa 2:3

Isu-isu Almasi kabuwanan kitabi akka lawom mari tahati tabi hāl Tuhan. Boꞌ pangahati ni hāl Tuhan ina yana ladjikiꞌ hagaan.

Siga Pakaradjaan bay Pinalahil 18:12

Labba man mmas da, pilak porol da, siga palmata, ga mutsaꞌ, ka kakanaꞌ hagaan yana lanay ka kakanaꞌ tawuk atawa akket, yaꞌ na luu jama man Babilon malli. Sampay kakayu-kayuhan hamut ka jinisan barang pinabuwat ka tanduk gadja, sampay kayu ma hagaan ka tumbagaꞌ, bassi, ka malbol, yaꞌ na du luu malli.

Siga Pakaradjaan bay Pinalahil 21:21

Kuwan ga lawang kutaꞌ looy siꞌ sikasapu-duwa, mutsaꞌ mehe jaꞌ saliꞌ-saliꞌ, njawom disu lawang, disu mutsaꞌ. Maka lān daira looy mmas porol, tallak meꞌ sammin na.