Matiyu 12:41 - Sabahagiꞌ Kitab Tawrat: Panagnaan ni Awwal Jaman maka Kitab Injil

⁴¹ “Na jama angkat-angkatan batnaa itu, pag taabut llaw hukuman Tuhan, luu na sina mintu siga jama man Niniba naksi sila. Kon da naksi batan pag bay jaꞌ takale da umanat Nabi Yunus mattoꞌ, tud bay paruli da sampay lay na tawbatan da dusa da. Boꞌ jama angkat-angkatan batnaa itu, luu na ntuu ni awpan da patingkat gi man Nabi Yunus, sugaꞌ yaꞌ san paruli da bitsala na.

Matiyu 12:41 ပူးပေါင်းရင်းမြစ်များ

Matiyu 12:39

Sugaꞌ tampung si Isa, “Tud maat jama angkat-angkatan batnaa. Yaꞌ sila kanaalla pa Tuhan. Yaꞌ sila kuhi pitsayaꞌ bong sila yaꞌ bay pinakitahan sipat kawasa. Sugaꞌ yaꞌ du sila pinakitahan sipat sarī man meꞌ ilooy ma bay katuwaꞌ ni Nabi Yunus mattoꞌ.

Matiyu 12:42

Maka ni llaw hukuman ina, luu gi sina mintu danda mattoꞌ, yana bay panghuluꞌ ni lahat Seba naksi angkat-angkatan batnaa du. Kon na ilay mintu naksi sila batan iya, atas na bay palintas luꞌ pitu pa Israil lakka man dambilaꞌ junyaꞌ bong pin ya kale jaꞌ tōꞌ Sultan Sulayman. Boꞌ angkat-angkatan batnaa itu, luu na batnaa ni awpan da patingkat labi man Sultan Sulayman, sugaꞌ yaꞌ san paruli da bitsala na.”

Matiyu 12:45

Dari magti seytan looy ngaddoꞌ siga pagkahi na pituꞌ seytan maat gi man iya, boꞌ boo na balik pa bay limpaꞌ na maglumaꞌ. Pag toklas na, jama looy ma bay sineytan, malasahi gi man sibuwa. Bong nnaꞌ ta pa jama ni angkat-angkatan batnaa, tud malasahi sina mintu sila sabap yaꞌ sila bay kuhi pitsayaꞌ ni kabanahan.”

Matiyu 12:6

“Na kaam ina, ilooy meꞌ punu njawom atay bi yana langga mehe. Sugaꞌ baan ta kam banahan, luu na situ ntuu batnaa du ma patingkat labi man langga mehe.

Matiyu 16:4

Tud maat jama angkat-angkatan batnaa. Yaꞌ sila kanaalla pa Tuhan. Yaꞌ sila kuhi pitsayaꞌ bong sila yaꞌ bay pinakitahan sipat kawasa. Sugaꞌ yaꞌ du sila pinakitahan sipat sarī man meꞌ ilooy ma bay katuwaꞌ ni Nabi Yunus mattoꞌ.” Pag-anu siꞌ, lay na si Isa palakka mandooy.

Matiyu 17:17

Tampung si Isa, “Uy la! Angkat-angkatan batnaa tud kulang bitu pangando da pa Tuhan maka tud bingkok pamiki da. Subay meꞌ noy gi doꞌ tu hallom ku dambuwaꞌ ka kaam boꞌ bi pitsayaꞌ niyaku? Agon yaꞌ na bitu tatatas ku arat bi.” Pag-anu, yuk na ni mmaꞌ anak-anak looy, “Bōn na pitu anak nu.”

Matiyu 23:36

Baan ta kam banahan, mulkaꞌ ma bay sabbut ku ilay siꞌ, mastiꞌ labuꞌ du sina mintu pa jataꞌ bi siga Yahudi ni angkat-angkatan batnaa.”

Lukas 11:32

Sampay siga jama man Niniba mattoꞌ, pag taabut llaw hukuman Tuhan, pōꞌ du sina mintu sila nusunan kaam. Man da pataꞌ nusunan kaam batan pag bay jaꞌ takale da umanat Nabi Yunus, tud bay paruli da sampay lay na tawbatan da dusa da. Boꞌ kaam ina angkat-angkatan batnaa, luu na ntuu ni awpan bi patingkat gi man Nabi Yunus, sugaꞌ yaꞌ san paruli bi bitsala na.”

Yahiya 3:31

“Na Almasi ilay lakka man sulgaꞌ. Sangkon patingkat ya man sikamimon. Boꞌ kitabi itu manusiyaꞌ ma ndang ni junyaꞌ sadjaꞌ, ngkod pakaradjaan ni junyaꞌ jaꞌ du katoonan tabi. Sangkon meꞌ iya lakka man sulgaꞌ, mastiꞌ patingkat jaꞌ ya man sikamimon.

Yahiya 4:12

Tagaꞌ tuu bitu bay pinusaka meꞌ Nabi Yaꞌkub ningkami. Iya mismu mag-anak-mpu sampay siga baanan hayop da lagi lay bay pingkaꞌ nginum boheꞌ tagaꞌ tuu. Ongoy, patingkat lagi ko kina man iya taggahaꞌ tabuwanan nu kami boheꞌ mas ayad lagi man boheꞌ tuu?”

Suwat si Pol pa mman Baanan Sukuꞌ si Isa ndooy ni Rom 2:27

Dari sila ma yaꞌ bay inislam pataꞌ nahawi kaam ma turunan bangsa Yahudi. Batan san ina kam bay pingkaꞌ inislam sampay kaam lagi ngantanan saraꞌ Nabi Musa, yaꞌ du kam pandoy buwat kaintongan. Boꞌ sila ina pandoy. Dari sabapan da, tumatandaꞌ pataꞌ bangsa Yahudi kalabuan hukuman Tuhan.

Hibrani 11:7

Damikiyan Nabi Nū, sabapan pangando na pa Tuhan, pag lay jaꞌ ya binaan leꞌ Tuhan luu takka dunuk mehe bbos-bbos, lay du ya pitsayaꞌ. Dari lay du ya ngasip ni Tuhan nohoꞌ buwat bahitlaꞌ man nalamat ga paglūng na. Maka sabapan pangando na, lay ya initung meꞌ Tuhan intong. Sugaꞌ kuwan jama lahat na, yaꞌ kuhi pitsayaꞌ pag binaan meꞌ Nabi Nū luu takka dunuk. Batan inawnan dunuk, yaꞌ gi san bay pingkaꞌ takita leꞌ manusiyaꞌ. Dari sabap yaꞌ sila mmeꞌ pitsayaꞌ ni Nabi Nū, ilooy na man da bay kalabuan hukuman kapatoy ni bay dunuk looy.